Estreleira

Da Wikipedia, l'ençiclopedia libara.
Jump to navigation Jump to search
Estreleira.

Ła estreleira l 'è ła bandiera che sinbołixa ła łota par l' indipendensa de ła Galisia. La consiste in te ła bandiera ofisiałe (na bara axura traversałe su sfondo bianco) con ła xonta de na steła rosa al sentro in sostitusión del scudo. L' è comunemente uxà da ła majoransa dei nasionałisti gałisiani de sinistra, specialmente in tei ultimi ani, in seguito a ła major difuxión del nasionałixmo gałisian tra ła popołasión.

Ła steła rosa l' è stà creà da miłitanti comunisti de ła UPG (Unión do Povo Galego) verso i ani Sesanta, su imitasión de łe stełe de tanti paexi sociałisti come ła Iugoxlavia e de ła steła de ła bandiera de Cuba, adotà dopo l' indipendensa da ła Spagna.

Secondo indagini de ła fondasión "10 de marzo", visina al sindicato CCOO e al Partido Comunista de Galicia (PCG), sta bandiera l' è stà uxà al prinsipio dai miłitanti de ła sesión guerigliera del Partido Comunista de España (PCE) in Gałisia, in tei ani Quaranta, quando Antonio Seoane l' era capo de ła gueriglia e José Gómez Gayoso segretario del PCE in Gałisia, mentre i nasionałisti i uxava da ła creasión del Partido Galeguista una bandiera simiłe con ła steła giała.

Al dì d' ancó tuti i partiti nasionałisti de sinistra de ła Gałisia (BNG, Nós-UP, FPG...) i uxa ła bandiera come sinbolo del so nasionałixmo. L' è utiłixà in te łe manifestasioni popołari in forma rivendicativa.

Al contrario de ła bandiera ofisiałe de ła Gałisia, no la ga dixegno e dimensioni uniformi, e ła steła rosa la se pol catar al centro come alineà a ła bara axura.