Domotica

Da Wikipedia, l'ençiclopedia libara.
Jump to navigation Jump to search
On panelo de controlo fiso par la domotica

La domotica o domotega, la xé la siensa interdisiplinare che la laora n'tel canpo del studio de łe tecnoloxie juste par mejorar la cuałità de ła vita n'te la casa e pì in xeneral n'tei anbienti antropixai. Sta area fortemente interdisiplinar la domanda la colaborasion intrà tanti tipi de tecnoloxie e de profesion, tra ste cua ghe xé inxegneria ediłe, architetura, inxegneria enerxedega, inxegneria jestional, automasion, ełetrotecnega, ełetronega, tełecomunicasion, informadega e projetasion.

Derivasion del termine[canbia | canbia el còdexe]

Domotica el deriva da l'union tra i termini domus, che in lengua latina signifega "caxa", e dal sufiso greco "ticos", che indica le materie de l'aplicasion, o sia chel materia che la se ocupa de l'aplicasion de l'informadega n'tei inpianti de la caxa (iluminasion, riscaldamento, multimediali..) e n'tei dispoxidivi de varia naura (lavatriçi, tende, persiane...), comandandoli da remoto.

Descrision[canbia | canbia el còdexe]

La domotica la xé nata n'tel corso de la tersa rivolusion industrial al fin de studiar, catar strumenti e metodi par:

  • Mejorar la cualità de la vita;
  • Dar pì sicuresa;
  • Rendare pì senplise la projetasion, l'instalasion, la manutension e la doparasion de la tecnoloxia;
  • Xbasare i costi de jestion;
  • Canbiar i veci inpianti in inpianti novi.

La domotica la ga on rolo inportante n'tel rendare intelijenti dispoxidivi, inpianti e sistemi. Par exenpio, on inpianto eletrego intelijente el pole autoregolar co ga da inpisarse o stuarse i eletrodomestiçi a segonda de le regolasion. Co "caxa intelijente" se ghe dixe a on posto - ben projetà co le tecnoloxie - chel mete a dispoxision de l'uxuario, inpianti che i va oltre a cheli "tradisionali", andove i inpianti e i sistemi i xé in grado de conpletar le so funsion, in parte autonome, in baxe a la regolasion fata dal uxuario steso, o se no, conpletamente autonome (in baxe a reasion a parametri anbientali comandae da programi dinamiçi che i se mejora co l'autoaprendimento).

Ghe xé anca el building automation o "automasion dei edifiçi". On edifiço intelijente, col suporto de le nove tecnoloxie, el permete la jestion coordinada, integrada e computerixada dei inpianti tecnoloxici (climatixasion, distribusion acua, gas e enerxia, inpianti de sicuresa), col fine de mejorar el comfort, la sicuresa e par mejorar la cualità del star e del laorar drento ai edifiçi

Carateristeghe de la domotica[canbia | canbia el còdexe]

  • Senpliçità: La domotica no la xé fata solo par le persone esperte, ma par on target pì anpio, par sta motivasion cua, la domotica dopara intermuxi user friendly.
  • Continuità del funsionamento: El sistema l'è projetà pensando chel ga da dar on servisio continuadivo, par sto motivo, caxi imune da malfunsionamenti o n'tel caxo i ghe fuse, senpliçi da rixolvare anca da parte de on no esperto.
  • Fidabilità: El sistema funsiona senpre, anca sensa darghe atension, e n'tel caxo ghe fuse calcosa che nol ndase, la domotica la xé in grado de segnalarlo.
  • Baso costo: Parché on sistema domotico el sia disponibile par tuti, el ga da ver on baso costo.
  • Risparmio enerxedego: On sistema domotico, in cuanto autonomo, el ga da evitar costi in pì che i pole derivar da posibili dexmenteganse da parte dei proprietari (na lanpadina inpisada..)
  • Automatixasion de la routine: La domotica la garà da senplifegare la routine e speçalmente se determinade asion le njien fate ogni dì.