Cortécia (botànega)

Da Wikipedia, l'ençiclopedia libara.
Struturasion de ła cortesa inte el truzo de na àlbara

La cortesa o cortécia, el ze el strà pì esterior del truzo e de ła raìza de piante legnoze, cofà i àlbari. Ła cuerze e proteze łe fibre legnoze andove che i pasa i canałi linfàteghi e ła ze formada da trè sotostrai, el libro, periderma, retidoma.

Ła cortesa, ła połe revar èsar el 10-15 % del pezo totałe de l'albara.

Acesion del tèrmano[canbia | canbia el còdaxe]

El signìfegà del tèrmano el cànbia drio de l'acesion.

In Botànega, inte ła acesion stretamente rigoroza del tèrmano, ła cortécia ła ze un tesudo parenchimatego esterno, disponesto suito soto l'epidèrmide inte ła strutura primària del trozo e soto el rizoderma inte ła strutura primària de ła raiza. La cortesa ła ze el tesudo prevałente inte ła raiza primària e el ze netamente separà dal siłindro sentrale da l'endoderma. Inte el truzo in strutura primària el ga invese un spesor pì reduzesto. Sto tesudo el sparise col pasajo da ła strutura primària a cheła secondària

Inte l'acesion popołana del tèrmano, che ła ze erada, par cortécia s'intende l'union dei tesudi perifèreghi, inte ła strutura secondària, esterni al cànbio cribro-vascołare o, pì sinpiamente, el strato pì esterno, dito retidoma. Fazendo refarimento al primo signìfegà , ła cortécia de un fusto in strutura secondària ła ze na strutura conplesa zenerada da l'atività de do meristemi secondari par adatare i tesudi esterni a łe forse de trasion tanzensiałi orizenae dal cresimento in diàmetro dei tesudi interni. El àanbio cribro-vascołare el ze un tesudo meristemàtego che ogni ano el orìzena novo xilema (legno) inte l'interior e novo floema (libro) inte ła parte esteriora. Sta atività definise ła a-pozision de un novo ser-cio anuałe al de fora del legno, e sui tesudi pì esterni invese el ghe da na pendesta che ła tende a desgregar i tesudi pì veci, miga pì boni de adatarse ełastegamente a łe sołesitasion tanzensiałi.

Inte el so conpleso, ła cortesa ła se conpone de na strutura interna deputada al trasporto floemàtego de ła linfa elaborada e de na strutura esterna co cònpiti de protesion del cànbio e dei tesudi vascolari inte i confronti de ajenti de dano biòteghi o abiòteghi.
D'inte l'interior a l'esterior, ła cortesa ła ze conponesta da łe seventi struture anatòmeghe: libro, periderma, retidoma.

Floema[canbia | canbia el còdaxe]

Dito anca cribro o libro, el floema el ze conponesto da tubi cribrozi e sèłule cribroze, struture sełulari deputade al trasporto de ła linfa, elaborada da cełule parenchimàteghe e da sełule sclerenchimàteghe. Ogni ano el cànbio sotostante el zènera un novo strato de libro, par tanto i strati pì novi i ze cuełi interni. Difarentemente dal legno, i strati pì veci del libro i ze sojeti de na desgregasion che ło desfa, par tanto el libro el ga un spesor pì reduzesto al legno e limità ai strati dei ultemi 2-3 ani.

Periderma[canbia | canbia el còdaxe]

El ze ła union dei tesudi de revestimento inte ła strutura secondària e el ze orìzenà da l'atività de un meristema secondàrio, el fełòzeno o cànbio sùbero-fiłodèrmego. El fełòzeno el zenera inte l'interior un tesudo parenchimatego secondàrio, miga senpre prezente, dito fiłoderma, e un tesudo tegumentale esterior dito sùgaro o fełema.

El sùgaro el ze un tesudo tegumentale, privo de spasi intersełulari, formà da sełule morte, ła cuała parete ła ze ispesorida e suberìfegada e el lùmeno sełulare inpienio d'ària. Grasie a sta strutura el sùgaro el ga propietà de ìzołamento protezendo i tesudi sotostanti dai scanbi tèrmeghi e dai scanbi de sostanse chìmeghe licuide o gasoze. La guałività del rivestimento suberozo el ze interonpesto da łe lentezełe, struture plurisełułari che łe permete el scànbio de gas e licuidi co l'esterno.

Dal momento che el periderma el ze sojeto a łe sołecitasion tanzensiałi provocae dal cresimento in diàmetro dei tesudi interni, ogni ano (o de ecesion dopo racuanti ani) se forma un novo fełòzeno inte un strato pì interno. Inte ła major parte de łe piante el novo fełòzeno el se forma inte el spesor del libro vècio (de 2-3 ani). Tuti i veci tesudi restai inte l'esterno del novo periderma (vècio periderma e strati pì esterni del libro) i ze dezenerai e ormai morti.

Ritidoma[canbia | canbia el còdaxe]

Dito anca scorsa, el ze ła parte pì esterna de ła cortécia conponesto dai tesudi morti esterni pì veci restai ìzołai ogni ano da ła formasion del novo periderma. El retidoma el se prezenta co aparense difarenti drio de łe spece e el ze un inportante ełemento de clasìfegasion: un mùcio de spece arbòree simiłari par tanti caràtari le pole distìnguarse par ła forma difarente del retidoma. Ze pusìbiłe distìnguare łe cortece par ła so aparensa, par via de łe plache prominenti o no prominenti, larghe o strete, lise, rugade, fibrade, descuamanti e altre caratarìsteghe de aparensa.

Spesor e strutura[canbia | canbia el còdaxe]

El spesor e ła strutura łe ze caratarìsteghe inportanti ma łe dimanda ezami de laboratòrio spesìfeghi. Pròpio ste ulteme caratarìsteghe, drio i biòłoghi o i ecòłozi, łe ze el fruto de ła selesion naturale e par tanto de l'evolusion naturale de ła spece inte el so anbiente.
Par ezénpio, ła cortécia de ła sugarara (Quercus suber, L.), da ła cuała ghe se cava-fora el sùgaro, el raprezenta na forma de resposta a anbienti àridi co frecuente pasajo del fogo.

Gałaria de multimèdia[canbia | canbia el còdaxe]

Notasion[canbia | canbia el còdaxe]

Altri projeti[canbia | canbia el còdaxe]


Linganbi foresti[canbia | canbia el còdaxe]





Controło de autoritàLCCN (ENsh85011862 · GND (DE4178161-2 · BNF (FRcb11964939k (data) · NDL (ENJA00575085
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Cortécia_(botànega)&oldid=1060974"