Primo concìlio de Lion
| ||
| Sorte | sìnode  | |
|---|---|---|
| Intervało de tenpo | 26 zugno - 17 de lujo del 1245 | |
|
| ||
El primo concìlio de Lion el ze sta convocà da papa Inosenso IV inte el 24 de zugno 1245 a Lion. I ghe ghea partesipà sirca 150 pari conciliari. El ze el tredèzemo concìlio ecumènego reconosesto da ła Ceza Catòłega.
Istòrego
[canbia | canbia el còdaxe]I ani prima del primo Concìlio de Lion i ze stai ani de aspra lota intrà l’inperatore Federico II e el papato: el primo el sognava na ezemonia pułìtega de l’inpero, suprema autorità desolvesta da ogni vìncoło e garantio solché da Dio; i papi invese, in lìnea co łe teorie teocràteghe che łe vede el so apozeo in Inozenso III, i sercava de garantizar l’ezemonia e l’inisiativa a ła Ceza de Roma.
Zà inte el 1240 el vècio papa Gregòrio IX el scomunega l’inperatore svevo col pretesto che no el zera partio par ła crozada, e el cònvoca un concìlio col fin de condanarlo sołenemente. L’inperatore tutavia, inte ła primavera del 1241, el ataca ła flota zenoveze che ła portava i prelai a Roma par el concìlio, e li fa prezonieri; na volta otegnesto el renvio del concìlio, el lansa un apeło ai cardenałi e a ła ceza contro del papa. Ma el 22 de agosto el papa el more e ła vien verzesta na longa vacansa de ła sede apostòłega, domenada da ła incertesa so ła sorte de resposta da dar a Federico II, e sospendesta solché par pochi dì da ła ełesion de Cełestin IV, che parò el more prima oncora de èsare consacrà. Solché inte el 25 de zugno del 1243 el vien ełezesto papa el zenoveze Sinibaldo Fieschi, el cuało el tołarà nome Inosenso IV.
El novo papa, fin dai primi dì de goerno, el intoła e el porta a finir łe tratative de paze coi raprezentanti de Federico II. Ma, co che el ze drio móvarse da Roma par nare a ła reunion concludente co l’inperatore, el cànbia idea e, sospetando na intrapołada, el taca scanpar, e dopo de un viajo longo e tribułà, el riva a Lion. Da cuà, a ła fin del 1244, el cònvoca un concìlio par condanar in definitiva l’inperatore, dipinzesto cofà anticristo.
Argomentasion e decizion
[canbia | canbia el còdaxe]El concìlio, che el zera sta verzesto inte el 28 de zugno del 1245 soto ła prezensa de 144 véscovi, el gavarà solché altre do sentade comuni, inte el 5 e inte el 17 de lujo. Inte el scumìsio el papa el anunsa i 5 problemi che i colpise ła ceza, o sia:
- ła corusion de ła fede e dei costumari;
- la mancada recuperasion de ła Tera Santa (Jeruzałeme ła zera cascada in man turca inte el 1244);
- el sisma de ła ceza orientałe;
- el perìcuło dei tàrtari;
- el contrasto col contumace Federico II.
Fintantoché sui primi problemi el concìlio redizarà dei decreti che el papa el rescrivarà anca dopo ła fin del concìlio, el problema sentrałe el resta el raporto co l’inperatore. Malgrado i tentativi del raprezentante de Federico II, Taddeo de Suessa, de no reconósar el concìlio e de convocàrghene n'altro che el podese èsar raprezentativo del podere siviłe, co na prosedura sensa presedenti, el concìlio el priva l’inperatore de tuti i deriti inperiałi e regałi, conprendesto cueło de l’ubidiensa da parte dei sùditi, e el vien sołenemente deponesto cofà sperzuro, apòstade e traditor. El concìlio el depone anca el re del Portogało, Rancho, cavà dal so posto cofà rex inutilis. In sta magnera el papa, che el ze inte el prinsìpio de ogni decizion dei Pari conciliari, el da manifesto de ła so totałe autorità e zurisdision su tuta ła cristianità e su ogni potestà siviłe.
Altri canoni e decreti del concìlio i revarda chełi altri problemi erlevai dal papa inte ła reunion de partensa: el vien defìnio el juto a l’inpero latin de Costantinòpułi e se fa apeło a na nova crozada; vien decidesto de rezìstare ai tàrtari, par evitar ła prospetiva apocałìtega de na tera sensa altri fedełi.
Post reunion
[canbia | canbia el còdaxe]I decreti e łe decizion del concìlio łe vegnarà publegae solché inte el 25 de agosto, dopo de ła revizion dei testi, e i sarà resipii da łe università e da ste cuà comentai, de frecuente sevindo l’interpretasion ufisałe del Papa. La depozision de Federico II invese no ła ghea el conflito intrà el podere papałe e cueło inperiałe.
Notasion
[canbia | canbia el còdaxe]
Altri projeti
[canbia | canbia el còdaxe]
Wikimedia Commons el detien imàjini o altri file so Primo concìlio de Lion
el detien schemi gràfeghi so
Linganbi foresti
[canbia | canbia el còdaxe]- (EN) councils of LyonEnçiclopedia Britannica, Encyclopædia Britannica, Inc.
- (EN) Primo concìlio de Lion, in Catholic Encyclopedia, Robert Appleton Company.
| Controło de autorità | VIAF (EN) 312989860 · GND (DE) 4114469-7 · WorldCat Identities (EN) 312989860 |
|---|