Colpo de stato del 18 frutidoro, ano V

Colpo de stato del 18 frutidoro, ano V
Revołusion franseza
	;
Tipo	colpo de stato
Data	4 de setenbre del 1797
Liogo	Parize
Stato	Prima Repùblega franseze

El Colpo de Stato del 18 frutidoro ano V (4 de setenbre del 1797) el ze sta un Colpo de stato organizà, soto el Diretòrio, da tre diretori (Barras, Reubell e La Reveillière-Lépeaux) sostegnesti da l'ezèrsito, contro de ła majoransa moderada e reałista del Consejo dei Sincuesento e del Consejo dei Ansiani.

La situasion ła ghea tacà trabałar verso agosto del 1797, co che el Diretòrio, a łe strete, el se ghea parecià a ła reasion fazendo vegner verso Parize l'armada de Sambre e Mosa (Sambre-et-Meuse), forte de 80.000 ómani comandai dal decizamente republegan Hoche.

I conponenti del diretòrio i zera sìncue: Reubell e La Reveillière-Lépeaux i zera fortemente republegani, de Barthélemy e Lazare Carnot, grando zenerale e fiero jacobin i zera reałisti, e el cuinto, Barras, el zera indifarente ai do grupi. El zera tutavia stra-visin al zenerale Bonaparte. Sia Barras che Napołeon i ghea oncora farse perdonar ła represion del 13 vendemaro e i garia vesto belché poco da guadagnar in pì de cheło che za i ghea da na svolta reałista a Parize.

In sto contesto al Bonaparte «ghe zera capità» de catar un ajente realista, el sior conte d'Antraigues, che el ghea in man documenti, denomenai dopo affaire d'Antraigues, so na cospirasion realista, includesto el tradimento del Pichegru.

Che i fuse documenti veri o no, Vaublanc e el merajo Villaret de Joyeuse e altri clichiens i ghea organizà par el 4 de setenbre un novo colpo de Stato

Vaublanc el garia vesto un discorso al Consejo dei Sincuesento, dimandando ła mesa soto acuza dei tre diretori republegani. Contenporaneamente Pichegru, in cao de ła guàrdia del Corpo lejislativo, el li garia arestai.^[1]

Sta asion no ła ze mai stata veramente organizada e ła zera anca tardiva. Augereau el ghea ocupà militarmente ła capitale de ła Fransa e i ghea scumisià tacar manifesti che i publegava parte del scrito inte i documenti atribuii a d'Antraigues e i proclamava el tradimento del Pichegru.

Do diretori reałisti de Barthélemy e Carnot i zera vegnesti destituii. Carnot el zera scanpà da Parize e Pichegru e Barthélémy i zera stai inprezonai, cusita cofà altri inportanti monàrcheghi (el zenerałe Willot, racuanti deputai e zornalisti). El republegan moderà Tronson, Willot, de Barthélemy, Pichegru, Marbois, La Rue, Ramel sarai in prezon e anułae łe ełesion in 49 departementi.

Notasion

↑ J Tulard, J-F Fayard e A Fierro, Histoire et dictionnaire de la révolution française 1789-1799, édition Robert Laffont, Parize, 1987 (p. 222), ISBN 2-221-04588-2.