Cexa Ortodosa Tewahedo

Da Wikipedia, l'ençiclopedia libara.
Capela de le Tavole de la Lege inte la cexa de Nostra Signora Maria de Sion.

La Cexa Etiopica Ortodosa Tewahedo (unitaria) la xe na Cexa Ortodosa orientale in Etiopia. La Cexa Tewahedo la fasea parte de la Cexa Coptica (Egixiana) fin al 1959 co el Patriarca de Alesandria Cirilo VI el ga dà on patriarca propio a la Cexa Etiopica. La Cexa Etiopica Tewahedo la xe ona de le poche Cexe africane che le ga continuà a vivare anca soto l’ataco de l’Islam. La ga na quarantina de milioni de fedeli.

Storia[canbia | canbia el còdaxe]

El nome Tewahedo el se riferise a la natura de Cristo, che la Cexa Etiopica la vede come unitaria (Gesù omo e Dio inte na sola realtà). Questa teoria la contrasta co l’insegnamento de la Cexa Catolega e de le Cexe Ortodose Orientali che le segue el insegnamento de el Concilio de Calcedonia (451) che insegna che Gesù el xe vero Dio e vero omo, do nature in una sola persona. La Cexa etiopica la se vanta de disendar da l’eunuco tesoriere de la regina Gersamot Hendeke VII (regina dal 42 al 52) de Candace (Etiopia) batesà da Filipo (Ati de i Apostoli 8). En realtà, la Cexa la xe rivà in Etiopia co do diaconi nestoriani i ga fato naufragio so la costa eritrea e i xe stà portà dal re. Uno de sti diaconi el xera Frumenzio, l’altro el xera so fradel Edesio. La Cexa la se sa ligà a la Cexa Coptica de Alexandria e, par secoli, el xe stà el patriarca de Alexandria a mandar vescovi in Etiopia. Dal 1959, la Cexa Tewahedo la xe autocefala, la se scelie el so Patriarca da sola. La Cexa eritrea – da senpre ligà a quele etiopica - la xe diventà autoceffala in tel 1998.

Medio Evo[canbia | canbia el còdaxe]

Co l’arivo de le armate islamiche so le coste eritree, l’Etiopia la ga perso tanta influenzas econòmega. Prima, la controlava tute le strade carovaniere dal nord Africa verso le Indie. Anca sensa la richesa de na olta, el regno etiopico el ga continuà a esare inportante e la Cexa la ga funsionà da fatore de unificaxion. A la fin del XV secolo, i portoghexi i ga mandà de i soldati in Etiopia par jutar el re cristiano contro l’invasion musulmana. Co lori, i xe rivà anca de i misionari gesuiti. Questi i ga laorà par portar la Cexa Tawahedo soto l’influensa de Roma. Dopo on secolo de tentativi, el re Susenyos el se ga convertio al catolicesimo, ma la popołasion – e sora-de-tuto la casta monacale – la ga resistio. Susenyos el xe stà costreto a dar le dimisioni. El fiol Failides el ga subito roto I legami co Roma e el xe tornà a la comunion co Alesandria, el ga espulso i gesuiti (1633) e el ga ordenà che tuti i libri de i Franchi (i bianchi) i vegnese brusà.

Ancò[canbia | canbia el còdaxe]

Prete etiopico

En tel 1948, le Cexe de Alesandria e de Addis Abeba le ga firmà on acordo par far diventar la Cexa Tewahedo autocefala, saria a dir bona de elezare el so patriarca. Dopo on longo proceso, el Patriarca de Alesandria el ga odernà on arcieparca (arcivescovo) etiopico (Abuna Basilios) in tel 1951, e in tel 1959 el lo ga incoronà Patriarce de Etiopia. El so sucesore el xe stà Abuna Tewophilos. Co la caduta de l’imperatore Haile Selassie, in tel 1974, la Cexa Tewahedo la ga perso el posto de religion de Stato. El novo governo marsista el ga fato arestar el patriarca e lo ga copà in tel 1979. El governo el ga ancà ordenà de elegere on novo patriarca inte la pesona de Takla Haymanot. Le altre Cexe sorele le ga rifiutà de riconosarlo. Dopo la caduta del governo Menghistu, el patriarca Merkorios – na marioneta ne le mane de i comunisti - el ga abdicà e la Cexa la ga eleto Patriarca Paulos.

Dotrina[canbia | canbia el còdaxe]

La Cexa Tewahedo la riconose la Bibia usada da le Cexe ortodose, co la zonta de el Libro de Enoc, el Libro de i Giubilei, i do libri de Esdra, el terzo libro de i Macabei e el Salmo 151. Alcune vecie Bibie le ga altri libri conservà solo che inte la lengoa amarica, la lengoa de la majoria de i fedeli. L’insegnamento de la Cexa Tewahedo el se basa pi so el Vecio Testamento che sul Novo. En modo particolare par quanto riguarda la dieta e del come el se ga da copare i animali da magnare. El maiale el xe proibio. Le done no le pol entrar in cexa co le ga le mestruasioni e le ga da cuersare la testa co le prega. Done e omeni i prega separadi e tuti i se leva le scarpa par entrar in cexa. I sabati i xe festa come le domeneghe.

Lengoa[canbia | canbia el còdaxe]

La liturgia la xe fata inte la lengoa gheez, la vecia lengoa de i altipiani etiopici. Ancò, i preti i predica in amarico o tigrigno, le lengoe de la majoria de le persone che va in cexa.

Architetura[canbia | canbia el còdaxe]

Cexa de San Giorgio a Lalibela.

En Etiopia se cata cexe costruie in tuto l’arco de la storia de la Cexa Tewahedo. Iportanti le xe le cexe monolitiche de Lalibela. Se trata de 12 cexe costruie inte le rocia. De solito le xe stà scavade dal teto in zo. En sto modo, no le se vede da distante. Sta tecnica la xe stà usada par scanpar a i atachi de i musulmani. Se cata anca cexe de pianta a baxełega, come inte le cexe ortodoxe. Se cata anca cexe costruie secondo on disegno lacale a pianta circolare. En tel sentro ghe sta i preti, on circolo interno el xe par i fedeli. A l’estertno ghe n’altro circolo cuerto par le procesioni.

Linganbi foresti[canbia | canbia el còdaxe]

(Ethiopian Orthodox Tewahedo Church Directory -the oldest site)
Directory of Ethiopian Orthodox Churches


Controło de autoritàVIAF (EN125463366 · ISNI (EN0000 0001 2107 6977 · LCCN (ENn50076393 · GND (DE4399521-4 · BNF (FRcb162584759 (data) · NLA (EN36513946 · WorldCat Identities (ENn50-076393
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Cexa_Ortodosa_Tewahedo&oldid=1162573"