Certoza de Vedana

	Certoza de Vedana
Dati
Sorte	Ceza e certosa (it)
Costrusion	1619
Pozision
Stato	ITA
	Sospirolo
	46°09′53.17″N 12°06′32.22″E
Atività
Diòseze	diòseze de Bełun-Feltre
Rełijon	catołicismo

La certoza de Vedana ła ze ponesta in località Maziere, inte el comun de Sospiroło, sol posto andove ghe zera situà l'antigo ospìsio de San Marco de Vedana derivante da l'Alto Medioevo.

Stòria

Al prinsìpio del Baso Medioevo ła pare certa l'ezistensa de un ospìsio (ligà a altri recòveri par pełegrini, fazenti parte de ła via dei Ospisi) inte ła località de Vedana, de cual ła zera propietaria el Capìtoło dei Canòneghi de Bełun. El atesta na boła papałe de l'otobre del 1155, col cuało papa Adriano IV el mete soto ła so protesion i canòneghi de Bełun e łi declara in perpètuo propietari de l'ospìsio de Agre e de ła ceza. Inte el corso del XIII secolo łe dificoltà econòmeghe e łe réndite senpre pì scarse łe sujerise che łe struture asistensiali łe vègnee zestionae in altra magnera.

Inte el 1455 el Capìtoło de ła Catedrałe de Bełun el ghea scrivesto al Superiore Zenerale dei Certozini e l'Órdene el ghea acetà ła proposta de insediarse a Vedana e inte el 1457 ła zera stada de fati stipulada ła véndita de l'Ospìsio de Vedana de propietà del Capìtolo ai pari certozini de ła Règola de San Brunon, co l'òbligo de sevitar prategare l'asistensa ai pełegrini. L'antigo ospìsio el speciava probabiłmente ła concesion d'inpianto de l'antiga caza rurale bełuneza e el derivava dal 1145-1150, e el zera sta costruio cofà ospeałe par i pełegrini. Zera nomenà retore de ła nova certoza el mònago certozin Antonio Arloti.

Inte el 1458 zera ndai in chel posto i comisari inviai dal capìtoło zenerale: pare Filipo da Milan prior de ła certoza de Pàdoa e pare Gulielmo retor de ła certoza de Venèsia, al fin de ciaparse łe donasion e inpartir łe diretive fondamentali a l'edìfegasion. L'ospìsio, co łe relative propietà. Inte el 1460 i zera stai concedesti anca i ospisi menori de Candaten e Agre, co i respetivi fondi; tuti sti beni i zera stai incorporai ufisalmente inte el 1467 da l'Órdene Certozin.

El visin San Gotardo, co ła so ceza, racuanto probabilmente ła ghea da ver ła funsion de abitasion provizòria dei mònaghi inte el perìodo de costrusion. El primo edifegà a vegner fato inte el posto de ła nova certoza ła ze sta ła ceza, termenada inte el 1471. Na confradèrneda làega, asistia da un sacerdote ła rezeva l'ospìsio soto ła dipendensa dei canòneghi, che i ghe mandava de tanto in tanto vìzite de controło.

Nei dezeni seventi l'òpara de costrusion ła zera sevitada: inte una de łe colone del clostro ghe zera ponesta ła data del 1521, ma presedentemente i zera za stai costruii racuanti edifegai senobìteghi cofà che el refetòrio, el capìtolo, łe capełe de San Juzepe e Santa Madałena. Un documento del capìtolo zenerale del 1542 el dize al priore de ła nesesità de sgrandir el nùmero de łe cełe par i mònaghi del coro da sie a oto, ma łe dificoltà finansiarie no łe ghea consentio na ràpida concluzion dei lavori e solo ła zenerosità dei benefatori ła ghea permetesto pian pian de finir l'òpara.

El véscovo de Càorle Benedeto De Benedeti, delegà da cheło de Bełun Alvize Lołin, inte el 1619 el ga consacrà ła ceza, fin a chel momento solché benedita. Inte el febraro del 1695 el ze s-ciopà un inséndio che ga portà forti dani ai fabregai e el ga desfà anca documenti inportanti cofà i protocołi notariłi, donasion, titułi, relasion de donasion; da cuel momento, dopo un difìsiłe restàuro dei locali, no ghe ze pì stai signifegativi intervegnimenti de costrusion, ma ghe ze stai lavori de decorasion pitòrega de ła ceza e dei anbienti.

El 7 de setenbre 1768 el Senato Vèneto el ghea decidesto de aplegar al clero regołare provedimenti de sopresion; el decreto fato da 11 paràgrafi, el vien aprovà co sento-sìncue voti favorévuli, disdoto contrari, sincuanta-cuatro no "sinceri". L'8 de setenbre 1769 ai mònaghi ghe ga tocà de sbandonare ła certoza de San Marco de Vedana e trasferirse inte ła visina certoza del Monteło.

Inte el 1771 el patrìsio venesian Nicolò Eriso el ga cronpà ła certoza e i so beni par 101.000 ducai, gheła ghea dazesta in afito a ła fameja Segato converténdoła in fatoria e inte el 1773 el Senato el ga cełerà łe oparasion de véndita dei conventi.

Ne ł'ex ceła del procuratore el 13 de zugno 1792 da Benedeto Segato e da Justina Lante de Bełun nase Ziròłamo Segato dito el pierìfegadore. Inte el 1825 Matilde Eriso ła ga eredità i beni de ła certoza e li ga portà in dote ai marchezi Araldi de Cremona; inte el 1864 Andrea Segato el ghene zera devegnesto propietàrio, dopo ła fioła Corina inte el 1882 e so mario i ghea rivendesto el monastiero al pare zenerale de l'Órdine Marseło Grezier. Inte el isteso ano i pari de Pavia i ghea ritolto posedimento del monastiero sensa i tereni e i beni un tenpo de propretà de ła certoza. El conpleso ła ze sta dopo ojeto de granda restaurasion.

L'Órdene dei Mònaghi Certozini ghe zera restà fin al 1977, sucesivamente ła strutura ła zera restada inabitada finmente el 1998 co che ła ze stada ospitada ła comunità de mònaghe de clauzura provegnenti da ła Certoza de Riva de Pinerolo fin al 2014. Inte el 2018 ze ndà star na comunità di mònaghe de clauzura Adoratore perpètue del Santìsimo Sacramento, dèdite a ła preghiera ininteronpesta davanti al Santìsimo sołenemente esponesto. El conpleso monàstego no el ze vizitàbiłe.

Gałaria

Viałe d'entrada de ła certoza de Vedana
Vista laterałe de ła certoza
Faciada e ingreso de ła certoza de Vedana
Capiteło votivo arente de l'entrada
Na pała d'altare de Sebastiano Ricci

Certoze vènete

La certoza ła ga gavesto inte i sècołi na granda atrasion par anbienti ecleziàstieghi e làeghi, cofà espresion de vigoroza oservansa e de devosion gràsie a ła tradision spirituałe e disiplinare de łe so orìzeni. Ghe zera cuatro certoze vènete, trè in teraferma e una lagunar:

San Ziròłamo del Monteło (1349-1351) dopo de łe sopresion napoleòneghe inte el 1809 la ze sta metesta a l'asta e dopo interada.
Sant'Andrea in Ìzoła a Venèsia (1422-1425) la ze sta sbandonada inte el 1806 e uncó no ła ghe ze pì. Parte del clostro el ze sta cronpà dal prìnsipe Carlo de Prùsia e inte el 1850 fato recostruir inte el parco de ła so rezidensa estiva a Berlin.
Santi Ziròłamo e Bernardo de Pàdoa (1448-1451) la ze sta interada inte el 1510 dopo de ła guera de ła Liga de Canbrai e recostruia Vigodàrzere (1534-1560), uncó viła privada in stato de sbandono (certoza de Vigodàrzere).
San Marco de Vedana (1455-1467), ła ùnzoła oncora in pie e funsionałe.