Caljera
Co la parola caljera se se riferiss a tuta na serie de pignate destinade a coser robe de scarsa consistensa. Secont al so scopo, le pol cener da qualche litro infin a diversi etoletri. Al material doperà par ecelensa al ze al ran, ma no manca la ghixa, al ałuminio, al aciaio e al bronzo. Esiste anca caljere fate de piera.
La dimension de la caljera le so rifinidure le dipende par na minima part da la quantità de roba che se ga da coserghe entro, e invese al ze al tipo de inpiego che al influiss su le sielte costrutive.
Caljera da polenta
[canbia | canbia el còdaxe]La ze la caljera pì pisola. De solito la ze fata de ram (ma anca ghisa o aluminio), co el orlo oltà in fora e do protuberanse dintorn aonde che gnen ingancià al manech, de solito de oton. La sagoma la ze pitost svaxada in modo da renderghe la vita pì facile a chi che ga da missiar la polenta. Se la dopera metendola al posto dei serci de la fornela, o senò picandola par al manech te un gancio del arin. Esiste anca version che le ga belche na s-cianta de basament par far la połenta te el gas, e an sostegno par meterghe an mestol automatico.
Caljera par far menestron
[canbia | canbia el còdaxe]Ciamada anca bronzina, la ze na caljera de bronzo. La ze fata circa come quela da polenta, ma la ze pì larga. Na olta la gnea doperada par far al menestron.
Caljera da saon
[canbia | canbia el còdaxe]La ze de ran, fata al incirca come na bronzina, ma pì granda.
Caljera da formai
[canbia | canbia el còdaxe]Par produsion pisole se dopera caljere de ran fate come quela da polenta ma an stciantenin pì grande. Par mèdie produsion se mancen la sagoma, ma la caljera no la gnen vincolada al manech ma a do perni. Te un sto caso no se pol spostarla, ma tute le operasion le gnen fate su el posto aonde che la ze montada. Par produsion industriai se dopera caljere aposta de aciaio inossidabile.
Caljera da bira
[canbia | canbia el còdaxe]Na olta la bira la gnea fata ten caljere da diversi etoletri, fate po' sù po' do come quele che se dopera par na produsjon mèdia de formai. Quele moderne le cen inte sentener de etoletri, e come che se pol ben inmaginar le gnen costruide diretamente su el posto e no le gnen mai pì moeste infin a la demolisjon. Al riscaldamento al ze a vapor par ndar mejo a regolarlo e a erlo pì uniforme. Par produsjon casalinghe ogni un al se indegna come che al pol.
Caljera da sgnapa
[canbia | canbia el còdaxe]Co el sistema industrial se dopera caljere de aciaio inossidabile de grosse dimension alimentade da fluidi caldi. Par pisole produsjon, come che le gnea fate na olta, se dopera caljere da qualche diesina de litri infin a qualche etoletro. Ste quà le ga na sagoma quasi cilindrica e an disco forà de ran che ghe gnen pojà te el cul in modo che le sarpe no le epje modo de far al brustol. No le ga al manech a semi-circonferensa ma do maneghere in posision diametralmente oposta. Le ga an disco de ran, casomai rinforsà co na anima de fer, che al serve da batuda su al superficie del fornel. Al orl al pol esser stondà o al pol er an nantro disco, secont che al capel al gnene frontà o fissà co i morset.