An

Da Wikipedia, l'ençiclopedia libara.
Va a: navigasion, serca
Sto articol al é scrit in belumat

An an al indica an periodo de tenp pari a quel doperà da la Tera par conpletar la so orbita dintorn de 'l Sol. An an al è dividest in 365 , ma da' che la Tera la feniss al so giro te 'n tenp poch pi lonch se à rendest necessario dontar i ani bisesti fati de 366 dì, par coreger la diferenža. par estension al nome se 'l dopera par al periodo orbital de qualunque pianeta, te 'l qual caso a "an" ghe gnen dontà an agetiu (come "an maržian"). In astronomia gnen definidi diversi tipi de an:

  • an siderale: al definiss al periodo che ghe met la Tera par far na rivolužion conpleta de la so orbita, mesurada rispeto a 'n insieme de punti de riferimento (come le stele fisse). La so durada media la è de 365,256 363 051 dì (365 d 6 h 9 min 10 s).
La durada real de 'l an la canbia, in quant al movimento de la Tera al è influenžà da la gravità de la Luna e de i altri pianeti.
  • an tropico: al periodo che ghe met la Tera a far na rivolužion, co riferimento a la strutura formada da la intersežion tra la eclitica (al pian su 'l qual gira la tera) e al pian de 'l Equator (al pian perpendicolar a 'l ass de rotažion de la Tera). Par colpa de la precession, sta strutura la va an pel indrio te la eclitica rispeto a le stele fisse. Come conseguenža, al an tropico al è an pel pi curt rispeto a quel sideral. La so durada media la è de 365,242 189 67 dì (365 d 5 h 48 min 45 s).
  • an anomalo: al periodo che la Tera la conpleta na rivolužion de la so orbita rispeto a i so apsidi. La orbita terestre la è elitica; i punti estremi de la elisse, ciamadi apsidi, i è:
  1. al perielio, aonde che la Tera la è pì arent a 'l Sol (dintorn de 'l 2 de genaro)
  2. al afelio, aonde che la Tera la è pì distante da 'l Sol (dintorn de 'l 2 de lujo).
Par via de la interferenža gravitažional de i altri pianeti, la sagoma e al orientamento de la orbita no i è fissi, e i apsidi i se sposta a pianpianet rispeto a i punti de riferimento. Par sto motivo, al an anomalo al è an stciant pì lonch de 'l an siderale. In media 365,259 635 864 giorni (365 d 6 h 13 min 52 s).
  • an eclitico: al periodo che ghe met al Sol (come che 'l gnen vist da la Tera) par conpletar na rivolužion co riferimento a 'n nodo lunar, de la orbita de la Luna (al punto aonde che al orbita lunar la interseca la eclitica). Sto periodo al è associà co le eclissi: le gnen co tant al Sol fa la Luna i è arent a un de sti do nodi; sichè le eclissi le gnen a 'l incirca entro an mese ogni medo an eclitico. Ghe n'è de conseguenža do stajon eclitiche ogni an. la durada media de 'l an eclitico la è de 346,620 075 883 dì.
  • in maniera analoga de 'l an eclitico, gnen definì an periodo 'te 'l qual al Sol (come che 'l gnen vist da la Tera) al conpleta na rivolužion co riferimento a 'l perigeo de la orbita lunar. Sto periodo, poch manžonà 'te la leteradura astronomica, al è associà co la dimension aparente de la Luna a 'l colm, e anca co la durada variabile de 'l mese sinodico. La durada de sto periodo la è de 411,784 430 29 dì.

Al Calendario normalmente al tenta de adeguarse a 'l an tropico, parchè le stajon le è determinade da sto tipo de an. Par motivi pratici al an de 'l calendario al è fat da 'n numero intiero de dì. te 'l calendario dess in vigor te la società ocidental, al calendario gregorian, i ani i à 365 dì. A 'l scopo de cenerlo sincronizà co 'l an tropico, ogni 4 ani an calendario al conta 366 dì (an bisest). La principal ecežion a 'l calendario gregorian la è al calendario islamico, an calendario lunar senža ani bisesti, secont al qual le ricorenže le se sposta te le stajon.

Al an giuliano: base de 'l calendario giuliano al ea na durada de 365,25 dì.

Al an gaussiano al dura 365,256 898 3 dì, e al è derivà da la "costante gravitažional gaussiana" che la gnen espressa in unità de 'l sistema solare.

Al an besseliano: al è an an tropico che 'l scominžia quando che al Sol al rua a la longitudine elitica di 280°. Sta longitudine la gnen senpre dondesta arent a 'l 1° de genaro. Al ciapa al nome da 'l astronomo e matematico de 'l XIX secolo Friedrich Bessel.

Modi de dir[canbia | canbia sorxente]

  • Na ana la è an an de miseria.
  • an de la fam co la alusion a 'l 1816 e dopo al 1917, ani che è stat patì la far par colpa de na carestia te 'l primo caso, e de la guera te 'l secondo. "Tu se lonch come al an de la fam" se ghe 'l diss a uno par dir che al è tant pegro.
  • An bisest, ogni mat al fa al so sest.

Varda anca[canbia | canbia sorxente]