Teatro Ła Fenice

L'interno de ła Fenice, come el jera nel 1837

El Teatro Ła Fenice el xe el teatro lirico piasè inportante de Venesia. El xe stà più olte distruto da incendi e dopo ricostruìo, e deso el xe sede de na inportante stajon operistica e del Festival internasionałe de mùxega contenporanea.

Storia

El Teatro la Fenice de Venexia el lo ga progetà l'architeto Gian Antonio Selva nel 1790 par conto de società de palchetisti de l'aristocrazia de Venexia; el teatro i lo ga costruìo in pressia nonostante ghe sia sta un mucio de polemiche su la so colocazion e su la so strutura razionalista e neoclassica.

El concorso par el progeto l'era sta indetto el 1° novenbre del 1789 e i lavori i xe tacà ne l'avril del 1790. Ne l’arco de du anni da la presentazion del progeto, el Teatro la Fenice de Venexia el xe sta ultimà. I lo ga inaugurà el 16 majo 1792 metendo in scena "i Giochi di Agrigento" de Giovanni Paisiello.

El 13 dicenbre 1836 el teatro el xe ndà brusà in un incendio, ma i lo ga ricostruìo subito de paca, preciso identico a come l'era prima.

Nel corso del XIX secolo el ga ospità un mucio de prime rapresentazion de opere liriche de grandi autori italiani come Gioachino Rossini, Vincenzo Bellini e Giuseppe Verdi. Proprio La traviata de Verdi, a la prima, la jera sta fis-cià sonoramente dal publico de la Fenice.

Nel 1937 el teatro el xe sta restaurà su progeto de Eugenio Miozzi.

El 29 de zenaro 1996 un eletricista, Enrico Carella, che l'era in drio laorar nel teatro, el ga dato fogo intenzionalmente, parché sicome l'era in ritardo coi so laori, no'l volea dover pagar la penale prevista dal contrato. Fatostà che la Fenice la xe brusà de novo tuta quanta.

Le istituzioni del Stato le sa subito prodigà par la ricostruzion. El teatro el xe sta riedificà - rispetando el stile del precedente - in zirca oto anni. El 14 dicenbre 2003 i lo ga inaugurà con un conzerto direto da Riccardo Muti, che el ga verto le celebrazioni de na Settimana inaugurale.

Durante i laori, le rapresentazion de l'ente lirico venexian le ga vu logo al Palafenice, na strutura provisoria parecià aposta al Troncheto, e al Teatro Malibran.

Da calche anno i ghe fa un Conzerto de Capodano, in contenporanea (o mejo, in concorenza) al Musikverein de Viena.

Prime assolute

• 1813 Tancredi de Gioachino Rossini
• 1814 Sigismondo de Gioachino Rossini
• 1823 Semiramide de Gioachino Rossini
• 1830 I Capuleti e i Montecchi de Vincenzo Bellini
• 1833 Beatrice di Tenda de Vincenzo Bellini
• 1835 Belisario de Gaetano Donizetti
• 1838 Maria de Rudenz de Gaetano Donizetti
• 1843 Ernani de Giuseppe Verdi
• 1846 Attila de Giuseppe Verdi
• 1851 Rigoletto de Giuseppe Verdi
• 1853 La traviata de Giuseppe Verdi
• 1857 Simon Boccanegra de Giuseppe Verdi

Bibliografia

• Michele Girardi, Franco Rossi, Il Teatro La Fenice. Cronologia degli spettacoli (1792-1936), Albrizzi Editore, Venezia 1989 - ISBN 88 7837 007 X
• Michele Girardi, Franco Rossi, Il Teatro La Fenice. Cronologia degli spettacoli (1938-1991), Albrizzi Editore, Venezia 1992 - ISBN 88 317 5509 9
• Manlio Brusatin, Giuseppe Pavanello, Il Teatro La Fenice. I progetti - l'architettura - le decorazioni, Albrizzi Editore, Venezia 1987

Galeria de foto

• 
  Particolar de la fazada
• La fazada del teatro in Canpo S. Fantin
  La fazada del teatro
  in Canpo S. Fantin
• Insegna del teatro
  Insegna del teatro

Ligamenti de fora

• Sito ufizial del Teatro La Fenice
• freelance writing jobs