Stasion miƚitare de Pierre-sur-Haute

Da Wikipedia, l'ençiclopedia libara.
Va a: navigasion, serca
Tori de semento co ƚe atresadure miƚitari radio inte ƚa stasion miƚitare de Pierre-sur-Haute

Ƚa stasion radio miƚitare de Pierre-sur-Haute ƚa xe un sito de etari dedicà a ƚe comunicasion miƚitari fransexi, che se cata inte i comuni de Sauvain e de Job al confin tra ƚe region Rodano-Alpe e Alvernia (el limite el pasa drento de ƚa baxe).

El conpleso miƚitare el se trova so ƚa "Croix de Pierre-sur-Haute", che co i so 1634 m de altesa el xe el ponto pì alto del dipartimento de ƚa Loira oltre a segnar el confin co'l dipartimento de Puy-de-Dôme.

Oltre a ƚe instaƚasion miƚitari, el sito el ospita anca na antena de ƚa teƚevixion comerciaƚe TF1 e un radar de ƚa Direction générale de l'Aviation civile (DGAC).

Istòria[canbia | canbia sorxente]

El teƚegrafo otico de Pierre-sur-Haute inte'l 1913.

Inte'l 1913, 'l exersito fransexe el costruise so'l posto un teƚegrafo otico, costituìo da un picoƚo stabiƚe de pièra co sora el dispoxitivo de comunicasion.

Inte'l 1961, durante ƚa guera freda, ƚa NATO ghe da al exersito fransexe ƚa mision de costruir una de ƚe 82 stasion de ƚa so rède de trasmision ciamà ACE High, co nòme in còdexe "FLYZ". Inte'l 1974, ƚa responsabiƚità del sito la pasa da l'exersito a ƚa reonautega miƚitar. Dal 1988 ƚa NATO ƚa ga ciapà in considerasion el smanteƚamento de ƚa rède ACE High, che gavarà par conseguensa ƚa creasion de novi piani de frecuense nasionaƚi.

Funsion[canbia | canbia sorxente]

Ƚa stasion miƚitar de Pierre-sur-Haute ƚa xe sua de l'armée de l'air e ƚa dipende da ƚa baxe aerea 942 Lyon-Mont Verdun, che se trova a 80 chiƚometri dal sito. Ƚa xe una de ƚe cuatro stasion radio de l'ase nord-sud, e ƚa comuega de continuo co chealtre tre: Lacaune, La Borne di Henrichemont e ƚa baxe aerea de Brétigny. Ƚa fa cuindi da tramite par ƚe teƚecomunicasion interne de l'exersito, rivardanti prinsipalmente el comando operativo: se pensa che se ƚa forsa de disuaxion nucleare fransexe ƚa dovese èsar doparà, 'l ordine de ataco el podaria pasar da sto sito.

El sito el dipendeva dal "Commandement air des systèmes de surveillance d'information et de communications" (CASSIC) dal momento de ƚa so creasion el 1º de giugno 1994, e po, a partir dal 1º de genaro 2006, da ƚa "Direction interarmées des réseaux d'infrastructure et des systèmes d'information" (DIRISI) e da ƚa so gestion sentraƚe a Le Kremlin-Bicêtre.

Direte da un magior, na ventina de persone ƚe laora so'l sito pa'l so funsionamento e ƚa so difexa.

Strutura[canbia | canbia sorxente]

Ƚa stasion ƚa se cata so un sito de 30 etari infrà i comuni de Sauvain e Job, al confin infrà i dipartimenti de ƚa Loira e del Puy-de-Dôme. El perimetro el xe sircondà da na alta bariera de legno e metaƚo, e 'l aceso del personaƚe miƚitare e dei dipendenti el xe garantìo da na strada vietà ai siviƚi.

Costrusion[canbia | canbia sorxente]

Ghe xe tre tori. Ƚa pì alta ƚa xe na tore de teƚecomunicasion siviƚi de 55 metri de altesa, de propietà de Télédiffusion de France. Ƚa tore de teƚecomunicasion ƚa xe sormontà da un radome e ƚa contien un moduƚo de controƚo del sistema "S beacon radar" del trafego aereo, d propietà de ƚa Diresion xeneral de l'aviasion siviƚe. El radar el xe operativo dal 18 de agosto 2009, ma el ga speso malfunsionamenti a cauxa de ƚe forti nevegade inte ƚa xona. Ƚe do tori de cemento ƚe xe del propietà dei miƚitari: ƚe struture ƚe xe altre 30 metri e ƚe xe sta doparae dal 1991 par ƚa trasmision e ƚa ricesion radio; ƚe xe costruìe par rexistare a un ordigno nuclear. Po ghe xe edifisi doparai come garage e aƚogi, conpleti de cuxina, saƚa da pranso e camare; i xe coƚegai infrà de ƚori da tunel, de sirca 400 metri de longhesa totaƚe, in modo da evitar de caminar in mexo a ƚa neve co se se sposta da un stabiƚe a 'n altro.

Soteranei[canbia | canbia sorxente]

El tòco pì inportante del sito el xe ƚa parte soto tera, doparà par ƚe trasmision: a na veƚosità de 2 Mbit/s, ƚe comunicasion da ƚe tori ƚe vien anaƚixae e po reindirisae a destinasion. I edifisi soto tera i xe stai clasifegai come "infrastrutura de masima sicuresa" soto ƚa protesion nuclear, bioƚoxega e chimica. Inte'l xergo miƚitar, el sito el xe "indurìo": par exenpio, el ga na ceƚula in semento proteta dai inpulsi eletromagnetisi da na gabia de Faraday e i locaƚi i xe soto presion, propiamente diti "camare bianche". Ƚa strutura ƚa xe dotà de acua e de enerxia eletrica autonoma e de un sistema de risiclo de l'aria independente.

Tentativi de censura[canbia | canbia sorxente]

Seben tante de ƚe informasion prexenti inte ƚa voxe ƚe fuse stae tolte da un documentario, autorixà da ƚa reonautega miƚitar fransexe e trasmeso inte'l 2004 da ƚa teƚevixion regional TL7, inte'l avriƚe del 2013 ƚa Direction centrale du renseignement intérieur (DCRI, i servizi de intelligence interna fransexi) ƚa ga dimandà ƚa scanseƚasion de ƚa version fransexe de sta voxe de Wikipedia prima a ƚa Wikimedia Foundation, che ga rifiutà, po rivolxendose diretamente a Rémi Mathis, presidente de Wikimedia France, minaciando asion legaƚi contro de lu.[1] L'asociasion Wikimedia France ƚa ga protestà publicamente co un comunicato stampa in fransexe e inglexe. L'asion del DCRI ƚa ga vudo ƚa conseguensa de aumentar de tanto l'atension dei media a liveƚo fransexe e internasionaƚe so ƚa voxe che, oltre a èsar sta rimesa da un utente svìsero so ƚa version de Wikipedia in lengua fransexe e èsar sta slargà, ƚa xe stà anca tradota in diverse lengue e asé vixità. El tentativo de oscuramento ga cuindi vudo un efeto contrario determinando chel che xe conosùo come effetto Streisand:[2] ƚa voxe ƚa ga infati risevùo 120 000 vixite inte'l fine setimana sucesivo[3] e inoltre ƚa figura, dopo ƚa visenda, in pì de venti version lenguisteghe de Wikipedia.[4]

Da na anaƚixi dei acesi so ƚe difarenti version lenguisteghe de Wikipedia xe posibiƚe oservar 'l efeto Streisand xenerà da ƚa dimanda de scanseƚasion da parte de ƚe autoridà.

Nùmaro de acesi a ƚa voxe inte ƚe difarenti version
Data creasion pàgina Version Avriƚe 2013 Marso 2013 Febraro 2013 Genaro 2013 Disenbre 2012
29 de giugno 2009[5] fransexe 224 934[6] 0 0 0 0
6 de avriƚe 2013 todesca 14 265[7] No prexente NP NP NP
6 de avriƚe 2013 inglexe 13 593[8] No prexente NP NP NP
6 de avriƚe 2013 rusa 12 300[9] No prexente NP NP NP
6 de avriƚe 2013 cinexe 2 956[10] No prexente NP NP NP
6 de avriƚe 2013 olandexe 1 982[11] No prexente NP NP NP
6 de avriƚe 2013 spagnòƚa 1 939[12] No prexente NP NP NP
6 de avriƚe 2013 Basic English 1 195[13] No prexente NP NP NP
6 de avriƚe 2013 cateƚana 1 083[14] No prexente NP NP NP
7 de avriƚe 2013 itaƚiana 4 584[15] No prexente NP NP NP
7 de avriƚe 2013 giaponexe 1 680[16] No prexente NP NP NP
7 de avriƚe 2013 poƚaca 1 013[17] No prexente NP NP NP
8 de avriƚe 2013 ongarexe 1 026[18] No prexente NP NP NP
10 de avriƚe 2013 araba 1 473[19] No prexente NP NP NP
13 de avriƚe 2013 ceca 3 395[20] No prexente NP NP NP

Altri progeti[canbia | canbia sorxente]


Note[canbia | canbia sorxente]

  1. (IT)Alberto Mattioli. «Finiscono su Wikipedia i segreti militari della Francia». La Stampa, 9 de avriƚe 2013. URL consultato in data 9 de avriƚe 2013.
  2. (IT)Francia: per "sicurezza nazionale", amministratore di Wikipedia costretto a cancellare una voce - Wikinotizie. URL consultà el 11-04-2013.
  3. (EN)Statistiche del traffico su Wikipedia, aprile 2013. URL consultà el 9 de avriƚe 2013.
  4. (IT)Luca Martinelli. «Non stuzzicare il wikipediano che dorme, nemmeno se sei un agente segreto francese». Libertiamo, 9 de avriƚe 2013. URL consultato in data 9 de avriƚe 2013.
  5. crono de ƚa pàgina orixenal so fr.wikipedia.org
  6. da stats.grok.se
  7. da stats.grok.se
  8. da stats.grok.se
  9. da stats.grok.se
  10. da stats.grok.se
  11. da stats.grok.se
  12. da stats.grok.se
  13. da stats.grok.se
  14. da stats.grok.se
  15. da stats.grok.se
  16. da stats.grok.se
  17. da stats.grok.se
  18. da stats.grok.se
  19. da stats.grok.se
  20. da stats.grok.se