Gaio Giulio Cesare

Da Wikipedia, l'ençiclopedia libara.
Va a: navigasion, serca

Gaio Giulio Cesare (in latino Gaius Iulius Caesar; IPA: 'gai.us 'jul.ius 'kae.sar[1]; 'nte łe epigrafe C·IVLIVS·C·F·COS·DIC·CAESAR[2] - dal 42 a.C. IMP·C·IVLIVS·CAESAR·DIVVS [3] - ;; Roma, 13 de lujo 100 a.C.Roma, 15 de marso 44 a.C.) xe stà un generałee ditator roman, considerà uno dei personaji pì inportanti e influenti deła storia.

El xe considerà dai storeghi so contemporanei el primo inperador de Roma, e el xe sta determinante 'ntel pasajo dała Republica Romana a queła inperiałe. El xe sta dictator de Roma ała fine del 49 a.C., 'ntel 47 a.C. e ancora 'ntel 46 a.C. con carica dexenałe, dal 44 a.C. come ditatore perpetuo. Łe so conquiste miłitari in Gallia Transalpina łe ga estexo el dominio romàn fin a ł'Oçeano Atlantego e al Reno. El ga Portà romani a invadare par ła prima volta ła Britania e ła Germania e a conbatare in Spagna, Grecia, Egitto, Ponto e Africa.

Ł'acordo par ła spartision del poter con Gneo Pompeo Magno e Marco Licinio Crasso (che eò ga ciapà el nome de Primo Triumvirato) el ga segnà el scuminsio de ła so aséxa. Dopo ła morte de Crasso (Carre, 53 a.C.), Cesare el se ga scontrà con Pompeo e ła fasion dei Optimates par el controło deło Stato. Intel 49 a.C., de ritorno dała Galia, guidando łe so łegion atraverso el Rubicone (ocaxion indove el ga pronuncià el çełebre «Alea iacta est»), Cesare el ga scadenà ła guera sivil, con ła qual el xe diventà el capo indiscuso de Roma: el ga batù Pompeo a Farsalo (48 a.C.) e sucesivamente i altri Optimates, tra cui Catone Uticense, in Africa e in Spagna. Co ł'asunsion deła ditatura a vita, el ga dà scuminsio a on proceso de radicałe riforma deła società e del goerno, riorganisando e sentrałisando ła burocrasia republicana. El so operado el ga provocà ła reasion dei conservadori, finché on grupo de senadori, capezà da Marco Giunio Bruto e Gaio Cassio Longino no i ga cospirà contro de łù, copandoło ałe Idi de Marso del 44 a.C. Intel 42 a.C., apena du ani dopo el suo asasìn, el Senado ło ga deificà ufisialmente ełevandoło a divinità. Ł'eredità riformatrice e storega de Cesare ła xe sta quindi sunà su da Ottaviano Augusto, so neodo e fioło adotivo.

Łe canpagne miłitari e łe asion pułiteghe de Cesare łe xe sta cuntàe in detajo 'nte i Commentarii scriti proprio da łu: Commentarii de Bello Gallico e Commentarii de Bello Civili. Parece nòve sora ła so vita łe xe presenti 'nte i scriti de Appiano di Alessandria, Svetonio, Plutarco, Cassio Dione Cocceiano e Strabone. Altre informasion łe pol esare rintraciae 'nte łe opare de altri contemporanei, come 'nte łe łetare e inte łe orasion del so rival pułitego Cicerone, 'nte łe poexie de Catullo e 'nte i scriti storeghi de Sallustio.

Biografia[canbia | canbia sorxente]

Orixeni familiari[canbia | canbia sorxente]

Gaio Giulio Cesare.

Giulio Cesare el xe nato el 12 o el 13 de lujo del 100 a.C. a Roma da 'na vecia e nota fameja patrisia, ła Gens Iulia, che a se dixeva disendente da Iulo (o Ascanio), fioło del prinsipe troiano Enea, secondo el mito fioło a so volta de Venere.[4] Al culmine del so poter, intel 46 a.C., Cesare par sotołineare ła so disendensa dała dea el ga dedicà a Venere Genitrice on tenpio intel novo Foro da łu fato tirar su.

Note[canbia | canbia sorxente]

  1. El praenomen "Gaio" ła xe ła forma coreta rispeto al pur comune "Caio". Ła forma "Caio", infati, ła se gera difuxa in seguito de 'na interpretasion sbaglià de ł'abreviasion epigrafica "C." (cfr., tra i altri, Conte, Pianezzola, Ranucci, Dizionario della lingua latina, sub voce Gaius: «el fraintendimento de ł'abbr., in cui ła G ła se scriveva, par conservasion de grafia arcaica, C., ła ga xenerà ła forma "Caio"»).
  2. Testo łatin de ł'epigrafe: Gaius Iulius Caesar, Gaii filius, consul et dictator; traduzione in vèneto: Gaio Giulio Cesare, fioło de Gaio, consołe e ditator.
  3. Tałe epigrafe ła xe conparsa a partir dal 42 a.C., ano in cui ł'ex dictator el xe sta sołenemente divinisà come el Divus Iulius. Testo łatin de ł'epigrafe: Imperator Gaius Iulius Caesar, Divus; tradusion vèneta: Inperador Gaio Giulio Cesare, divo.
  4. Velleio Patercolo, Storia Romana, II 41,2
    Plutarco, Cesare, 69,1
    Svetonio, Cesare, 88
    Cassio Dione, Storia Romana, XLVII, 18,6
    Appiano, Le guerre civili, II,106,149