Fjen

Da Wikipedia, l'ençiclopedia libara.
Va a: navigasion, serca
Na rotobala
Na rastreliera par secar al fjen a Sesto 'te la Val Pusteria

Par fjen o fen se intende erba secada in maniera particolar, binada e inmagazinada co 'l scopo de darghela da magnar a žerti animai, in particolar vache, cavai, caore e žede.

Anca žerti animai mesteghi cei come conici e roditori i pol magnar fjen. In particolar par i conici la alimentaion pì justa la è a base de fjen, senža cereai, pan, mangime o altro. Al fjen par i conici al representa al alimento principal, inportante anca par la salute de i dent fruandoli prim che i gnene grandi assei da dar problemi. I poržei inveže i à problemi a digerir al fjen, a pì che no se ghe 'l dae dopo erlo assà qualche dì a maserar 'te l'aqua.

Al fjen al gnen doperà par guarnar le bestie quando e aonde che no ghe n'è pascoi assei par via de 'l clima (par esenpio de invern) o parchè i teren pì boni i gnen doperadi par altre coltivažion.

Al fjen al gnen tajà e ciot sù pì de na olta durante al an. Secont de 'l periodo che se fa sta operažion, al ciapa nomi diferenti:

  • fen se al è al primo tai
  • dorch o ardiva se al è al secondo tai
  • teržanin se al è al teržo tai

Aonde che se pol tajar pì de 3 olte, al fjen fat dopo de 'l teržanin al feniss comunque co 'l gner considerà come teržanin.

Contenuto de 'l fjen[canbia | canbia sorxente]

Te 'l fen se ciapa entro la gran part de i stech: se cata da le radicele a i radici da 'l mat a i diversi tipi de erba spiga. Se al gnen fat tardiu se pol catar anca al mažacaval. La dorch de solito la è fata da strafoi, pjantan, erba spiga de dimension ridote, spagna, ladino, mažacaval. Se al teren al è umido se pol catar anca fenocere. Al teržanin al à entro pjantan e altre erbe de dimension ridote.

Al è inportante sotolinear che al fjen fat a man al à entro anca na gran quantità de žiess, che le costituiss an alimento conpleto e concentrà par le bestie che le lo magna. Al fjen fat co i machinari par quant al gnen sbatest co forža, sichè al perž la gran part de le žiess co 'n conseguente pejorament de la qualità, sichè se rende necessario integrar la dieta de le vache co na part de mangime.

Produžion de 'l fjen[canbia | canbia sorxente]

La produžion de 'l fjen la à inižio da 'l segar l'erba. Sta operažion la gnen fata a partir da San Vetor, endo cura che al pra al scominžie a ciapar an color gialin-rossastro e che le spighe de la erba spiga le scominžie a piegarse do, segn che la žiess la è madura. Sta operažion na olta la gnea fata co la falž, ma te i ultimi 100 ani al progresso al à portà prim a le bare falcianti tirade da i cavai, po' a le machine da segar e a la fin a le bare falcianti e a le bare rotanti da tacar te 'l trator. Na olta segada, l'erba la gnen secada a 'l sol. Parchè la se seche in maniera uniforme ogni tant la gnen oltada sot sora co la forca, o la gnen sghirlada co 'l girel. Se al loch laorà al è particolarmente umido, par poderla secar se la pica su struture particolari ciamade rastreliere. Se al fjen al è sech, ma no assei da gner cargà, al è inportante star atenti che no 'l se bagne. Te 'l caso che gnene ignanž an tenporal, se pol salvarlo a farlo sù come maruž. Na olta che al è pronto se 'l fa in rela, de solito doperando međi mecanizadi come al restelon. La racolta la pol gner fata co na inbalatrice, che la lo conpata in bale tonde o quadre, senò al pol gner cargà te 'l autocaricante.

Conservažion[canbia | canbia sorxente]

Al è inportante che al fjen sech al stae senpre a 'l sut. Durante la conservažion par de pì al subiss de i processi de fermentažion che al è inportante che i sie ben ariedadi parchè le alte tenperature se gnen a generarse le podaree anca esser pericolose in fato de incendio. Al deposito de 'l fjen al se ciama fjenil e de solito al è sora a 'n staol, ma te le aziende moderne al tende a deventar an edificio par conto soo. te i pra magri de montagna al fjen al gnea cenest anca entro te i barch. Al fjen al gnen inmagazinà come bale o sfuso. Te 'l primo caso se varda de sielder la maniera de postar le bale in modo che le ciape manco posto che se pol. Te 'l secondo caso al fjen al gnen portà in qualche modo te 'l deposito, aonde che al gnen postà polito in maniera che al se conprime te quei grum che se ghe ciama moje. An nantra solužion par inmagazinar al fjen quando che no se à posto a quert la è quela de far sù le mede. Se trata in poche parole de moje fate sù coniche dintorn de 'n pal inpjantà 'te 'l teren. An palco al evita che al fjen al reste a direto contato co la tera.

Voxe colegade[canbia | canbia sorxente]

Altri progèti[canbia | canbia sorxente]