Dante Alighieri

Da Wikipedia, ła ençiclopedia libara.

Dante Alighieri (Firenzse, 1265 – Ravena, 13 de setenbre 1321) el xe stà un poeta, scritor e połitico itałian. El xe ritegnùo el primo e pi grande poeta de ła lengoa itałiana e par questo el xe ciamà "el sommo poeta", o "el vate" (che vorìa dir "el profeta"). Per aver tegnù a bateximo l'utiłizo leterario de ła lengoa volgare el vien anca considerà el Pare de ła lengoa itałiana. Ła so opera prinçipałe, ła Divina Comedia, ła xe el poema piesè inportante de tuta ła leteratura itałiana e ła xe considerà uno dei capolaori de ła leteratura mondiałe.

Ła so vita ła xe sta par molti versi tormentà: dopo ver ricoperto per alcuni ani varie cariche połitiche a Firenzse stando da ła parte dei Guelfi Bianchi, nel 1301 el xe finìo in exiłio quando el partito dei Guelfi Neri al gà ciapà in man coła forzsa el goerno de ła çità e el gà parà via tuti i Bianchi. Dante ałora el gà tacà samar par varie çità del Nord Itałia, tra cui Verona dove el xe stà ospite prima de Bartolomeo della Scala e dopo de Cangrande I. Nel 1321 el xe morto a Ravena, senzsa ver mai podùo rivedar ła so Firenzse.