Pjol

Da Wikipedia, l'ençiclopedia libara.
(Rimando da Balcon)
Va a: navigasion, serca
Sto articol al é scrit in belumat

Al pjol al è an spažio che al vanža fora da la faciada de 'n edificio, che se pol doperarlo, e che de solito al à na ringhiera.

Al famoso pjol de Giuljeta, a Verona
An pjol te la cità de Roma

Sagoma, dimension e tecniche costrutive le canbia in maniera inpressionante secont al uso che ghen gnen fat, al perido de costružion e i schei che al à spendest al paron.

Inte le case citadine vece e 'te le vile i pjoi de solito i è de pjera. La so funžion la era ligada a na vista panoramica, a 'n elemento par far pì bela la faciada de la casa, o, qialche olta, a 'l bisogn de er an palco da 'l qual farghe descorsi a la popolažion. Se trata de pjoi estremamente pižoi, de solito fati a sbalž.

Le case de i porecan, inveže, no le à mai abu an gran bisogn de er pjoi infin a la introdužion de 'l sorch. Le prime qualità de sto cereal american difati le fea fadiga a gner fate, cossì al è nassest al bisogn de er spaži grandi aonde meter le panoce a secarse. de fianco de ste qua se à dontà anca fasoi e qualche altro cereal. I pjoi i era anca inportanti come spažio par meter i vestì a sugarse. I representea anca al elemento de comunicažion tra le canbere de le case rurai. Par tuti sti motivi, i pjoi i ea da esser grandi. Al materjal da costružion principal al era al legn. I trau i podea esser incastradi a sbalž 'te 'l mur, co elementi de inrigidiment che ruea 'te 'l quert (zona feltrina) o pojadi 'te 'l mur da na banda e te na pjana incastrada a pilastri da quelaltra (solužion adotada 'te 'l beluness e 'te la alta Trevisana). Al legn doperà de solito al era roro, castegner, laress. Tra i pjoi de solito ghe n'era scale normai o a pecoi. La ranpa de scale che tochea tera comunque la era senpre de pjera. La ringhiera la era senpre fata de 'l stesso legn de 'l pjol, co elementi verticai a base esagonal. fea ecežion solche žerti paeset de montagna aonde che al legn al costea poch, sichè la đent la podea permeterse anca de far ringhiere de tole decorade. Inte le case moderne la funžion de i pjoi la se à redusest forte. De solito i gnen fati de cimento a sbalž e de dimension pižole parchè le norme ediližie le tende a scorajarli e parchè i representa an elemento pericoloss par la trasmission de 'l calor.

Altri progeti[canbia | canbia sorxente]