Tenpo Coordenà Universałe

UTC atuałe
2024-12-25 T 17:32 UTC (renovar)

El tenpo coordenà universałe o tenpo siviłe, scursà co ła sigla UTC (un conprometesto intrà l'ingleze Coordinated Universal Time e el franseze Temps universel coordonné^[1]), el ze el fuzo oràrio decidesto cofà referimento globałe, partindo dal cuało i ze calcołai tuti i fuzi orari del mondo. El ze stà stabiłio da l'Union internasionałe de łe tełecomunegasion.

El vałore de ła mezura del tenpo inte l'unità de mezura UTC el coinside col vałore esprimesto inte l'unità tenpo mèdio de Greenwich (Ora mèdia de Greenwich, in ingleze Greenwich Mean Time, acrònemo GMT), se no che par de łe prosimasion infinitezemałi. La dòpara del tenpo mezurà in GMT el ze parò fortamente sconsejà inte el liveło internasionałe: in pasà el ze stà inte ła baze de ła formasion del tenpo siviłe del Regno Unio^[2]

Descrision

El novo nome el ze stà conià par no gaver da mensionare na spesìfega locałità inte un stàndar internasionałe. L'UTC el se baza su mezurasion fazeste da rełoji atòmeghi al posto che su fenòmani cełesti cofà inte el cazo del GMT.

La sigla UTC ła deriva dal scursamento UT del tenpo universałe co ła zonta del sufiso C (che signìfega "coordenà"): in sta magnera sto cuà el recorda che se ze drio parlar de l'adosion de un tenpo universałe comunitàrio e par de pì, esendo formà da tre caràteri, el se conforma al stàndar de cuełi altri fuzi orari (ez: CET par Central Eoropean Time in Eoropa, EST par Eastern Standard Time inte i USA, etc.).

Par colpa de łe osiłasion inte ła vełosità de rotasion de ła Tera, dèbite a łe influense gravitasionałi de Luna, Sołe e de altri pianeti, el GMT el tarda costantemente in confronto al "tenpo atòmego" UTC. El tardo el ze mantegnesto drento dei 0,9 secondi, zontando o cavando un secondo a l'UTC a ła fin del meze co serve, convensionalmente inte el 30 de zugno o inte el 31 de disenbre. El secondo extra, dizesto intercałare, el ze determenà da l'International Earth Rotation and Reference Systems Service (IERS), bazàndose su łe mezurasion de ła rotasion terestre.

El tenpo stàndar internasionałe UTC el połe èsar determenà co ła precizion màsima solché dopo de l'avegnimento al cuało el se referise, parché ła mezurasion finałe ła se baza su l'oservasion de łe difarense intrà vari rełoji atòmeghi spandesti in volta par el mondo. Ocuparse de ła zestion del sistema, el ze cònpito de l'Ufiso internasionałe par i pezi e łe mezure (BIPM). Grupi izołai de rełoji atòmeghi i ze isteso sufisenti par na precizion de calche dezena de nanosecondi.

L'UTC el ze el tenpo doparà par tanti procedimenti e stàndar de Internet e inte el World Wide Web, inte el spesìfego el se ciama Network Time Protocol.

El fuzo oràrio UTC el ze denomenà anca da ła létara 'Z', par fini miłitari, meteorołòzeghi e de navigasion aeronavałe sia miłitare sia siviłe.