Posta ełetrònega

Come funsiona la posta eletronica

La posta eletronica (ing. e-mail, scrito anca email tuto tacà, e pronuncià iméil) la xe un servizio con cui ogni utente de Internet el pol mandar e ricevar messagi, in maniera simile a come sucede ne la posta normal, solo che la posta eletronica de solito la riva a destinazion entro pochi secondi o minuti. Ghe xe un mucio de siti internet che i offre a la gente servizi de posta eletronica, de solito a gratis.

La posta eletronica la laora in sta maniera qua: prima de tuto bisogna iscrivarse a un servizio de e-mail, segliendo un nome utente e na parola-ciave (password). A sto punto te ghe el to indirizo e-mail, che el xe fato dal nome utente seguìo da la chiociola (@) e da l'indirizo del sito che offre el servizio (senza www davanti). Esenpio: "nomedelutente@postaeletronica.com". Co sti dati te pol entrar ne la to casela postal, dove te vedi tuti i messaggi che la gente la ta mandà e te pol scrivar dei messaggi e inviarli a ci te vol (basta saver l'indirizo e-mail del destinatario). A la casela postal se pol ndarghe in do maniere: andando diretamente sul sito, o doparando un programma de posta eletronica, che el se colega a la to casela e el te fa vedar i messaggi.

Ogni messaggio de posta eletronica, oltre al testo, el ga varie intestazion: le pi inportanti le xe el canpo A (From), dove va scrito l'indirizo del destinatario (anca più de uno) e el canpo Soggetto (Subject) dove se scrive l'argomento del messaggio. I messaggi i pol verghe anca dei alegati, o sia dei file che se vol spedir insieme col messaggio.