Granexa

Da Wikipedia, l'ençiclopedia libara.
Jump to navigation Jump to search
El Rifugio Granezza

Granexa (o Granezza) xe na piana de foreste (bosco nero) a miłe doxento metri, suł'Altopian dei sete comuni, in provinça de Vicensa, drento el teritorio del comun de Lugo Vixentin.

La bataja del bosco nero de Granexa durante ła Rexistensa[canbia | canbia el còdexe]

El bosco nero de Granexa

Łe prealpi vixentine xera xona de operasion de diverse formasion partixane n'teła seconda guera mondiałe. Anca suł'Altopian dei sete comuni. Granexa xera un posto dove ke i partixani i podeva stare e organisarse e in più xera un posto comodo par i Ałeati par far rivare i rifornimenti coi paracadute. A Granexa xe sta anca paradutà ła mision ałeata del magiore Wilkinson ("Freccia"). Sta postasion de partixani, proprio sui monti drio l'Alto Vixentin e łe vie de comunicasion coła Germania, ła ghe dava tanto fastidio ai Todeschi e ai fasisti, così ke i ga deciso de fare un rastrełamento par destrùsare le forse deła Rexistensa. Xa in agosto i gaveva tacà i partixani in Val Posina e sułe montagne dełe Laste (malga Zonta), pi vanti i gavarìa fato el rastrełamento del Monte Grapa.

El monumento ai partixani a Granexa

El 6 setenbre 1944 i naxisti i ga fato partire ł'operasion Hannover, tacando con blindati e soldà de tera deła Luftwaffe, coi Rusi e i Ucraini del 263°Batajon orientałe deła Wehrmacht, de stansa a Maran Vixentin, jutà dai fasisti deła Brigata Nera Faggion de Vicensa e dała Legione Tagliamento deła Guardia Nasionałe Republicana. A difendere ła piana ghe xera i partixani dei Batajon 7 Comuni e Testolin deła Brigata Mazzini. Naxisti e fasisti i xera in masa, con blindati e mortari, e ała fine i xe vegnù fora dai boschi ocupando ła piana e copando tuti quei ke i trovava. Prima de poderse sganciare, i partixani i ga lasà morti sul canpo 22 de lori e 6 dispersi. In più, i naxisti i ga fuxiłà 14 autisti taljan disertori ke se xera rifugià lì.