Dr. House - Medical Division

Da Wikipedia, l'ençiclopedia libara.
Va a: navigasion, serca
'Sto artìcoło el 'é scrito doparando ła grafìa dita DECA

Dr. House - Medical Division (House, M.D.) l’è na serie tełeviziva statunidense ideà da David Shore e Paul Attanasio e mandà in onda da ła Fox da’l 16 novenbre 2004 a’l 21 majo 2012.

Protagonista de la serie l’è el Dr. Gregory House, un dotor poco convensionale ma dotà de grande capasità ed esperiensa, che’l dirize na scuadra de medisina dianjòstega inte’l fitisio ospedałe univarsitario Princeton-Plainsboro Teaching Hospital in New Jersey.

Ła serie ła trae ispirasion da łe òpare de’l sèłebre detective Sherlock Holmes: in onji epizodio A ghe ze un diłema mèdego deverso che’l protagonista, par mezo de łe so capasità e dedusion, el ga da destrigar bazàndose su vari indisi, tante ‘olte poco evidenti; a ła fine el riese scuazi senpre a resòlvar el enigma e a salvar el só pasiente.

I vari asidenti mèdeghi de ła serie i ze stà ispiradi da na rubriga de’l New York Times revardo diversi cazi clìneghi partegołarmente problemàteghi realmente capitài.

Dr. House el ze stà aclamà da ła crìtega e el ga avù un alto łiveło de ascolti tełevizivi. Ła serie ła ze stà tra i primi dieze programi televizivi de pì seguìi inte i USA da ła só segonda stagion fin a la cuarta.

Distribuìo in 66 paezi, Dr. House l’è stà el programa tełevizivo de pì seguìo a’l mondo int’el 2008. Ła serie ła ga resevùo racuanti premi, incluzo un Peabody Award, do Golden Globe e tre Emmy Award. El 8 de febraro 2012 ła Fox ła ga anunsià ła sarada de ła serie co ł'otava stagion, che ła se ga concludesta el 21 de majo de’l 2012.

Da’l punto de vista culturałe, ‘sta serie tełeviziva – e pì in partigołar ła figura de’l protagonista – ła ga fornìo motivi de riflesion fiłozòfega, ètega e rełijioza rełativi a’l canpo de ła medezina e de ła deontołozìa.

Produsion[canbia | canbia el còdexe]

Concesion[canbia | canbia el còdexe]

Int’el 2004, i creadori David Shore e Paul Attanasio, insenbre co Katie Jacobs, só mojer de’l segondo, i gavéa proponesto ła serie (ancora sensa un tìtoło) a ła Fox come un CSI de ła medezina, na sorta de drama ospedałiero indo che i dotori i incuerise so i sìntomi e so łe reładive càuze. Attanasio, par crear ‘sta serie dramàtega ospedałiera de tipo prosedurałe, l’è stà ispirà da ła rubriga Diagnosi de’l The New York Times Magazine. Ła Fox ła gavéa cusì cronpà ła serie, ma el prezidente de ałora de ł'emitente tełeviziva, Gail Berman, el gavéa avertìo cosita el team de produsion: «A vojo na serie de dotori, ma no vojo védar càmizi bianchi che i paseje par el coridor». Jacobs el ga dito che ‘sta condision ł’era stà una de łe tante che łe ga portà a ł'ideasion de’l parsonajo prinsipałe.

Dopo che ła Fox ła gavéa acolto ła serie, ła ga asunto el tìtoło de łavorasion Chasing Zebras, Circling the Drain (A cacia de zebre, in vita tacài a un fiło); zebra inte’l slang de i dotori el coresponde a na diànjozi inuzuałe o poco ciara. Ł'inisiałe premesa de ła serie ł’era cueła de na scuadra de dotori che i łaora insenbre par sercar de «dianjostegar el indianjostegàbiłe». David Shore el retenjéa inportante che A ghe fuse un intaresante parsonajo prinsipałe, calcheduni che’l fuse in grado de ezamenar łe caratarìsteghe parsonałi de i pasienti e dianjostegar cosita łe só małatìe de łori scoerzéndoghine i segreti e łe buzìe. Co el team creativo el ezaminava łe posibiłità de’l parsonajo, ła serie ła deventava manco prosedurałe e pì insentrà so’l protagonista. Dàndoghe a ła fine el nome de House, ‘sto chì el ga dato cusì el nome a ła mèdema serie. Pi tardi Shore el ga dezviłupà i vari parsonaj co i reładivi caràtari e'l ga scrivesto ła sienejadura de ł'epizodio piłota. Bryan Singer, che'l ło ga dereto, el ga dichiarà che «el tìtoło de ł'epizodio piłota el sarìa stà Everybody Lies (Tuti i mentise) e l’è purpio cuesta ła premesa de ła serie». N’antro aspeto sentrałe inte ła premesa de ła serie el zera che el protagonista el gavarìa dovùo 'ver un calche handicap. Inisialmente A se gavéa pensà de costrìnzarlo so’ na caroseła, ma ła Fox ła ga scartà ł'idea. Siché i sienezadori i ga desidesto de farlo deventar sòto par via de na diànjozi zbajà: el gavarìa dovesto caminar co un baston e'l sarìa stà depandente da narcòteghi par via de’l dołor a ła só ganba. El copion inisiałe el prevedéa un protagonista de 34 ani, ma Shore el ga retenjesto che un dotor a ła “Brad Pitt” el sarìa rezultà poco credìbiłe.

Epizodi[canbia | canbia el còdexe]

Ła serie tełeviziva ła ze conponesta da oto stajon, par un totałe de 177 epizodi, andài in onda tra el 2004 ed el 2012. Ł'ùltema stajon la ze andà in onda in Itałia so Canale 5 da’l 24 de apriłe a’l 3 lujo 2012.

Stajon Epizodi Prima TV USA Prima TV Itałia
Prima stajon 22 2004-2005 2005
Segonda stajon 24 2005-2006 2006
Tersa stajon 24 2006-2007 2007
Cuarta stajon 16 2007-2008 2008
Cuinta stajon 24 2008-2009 2009
Sesta stajon 22 2009-2010 2010
Sètema stajon 23 2010-2011 2011
Otava stajon 22 2011-2012 2012

Parsonaji e intèrpreti[canbia | canbia el còdexe]

Parsonaji prinsipałi[canbia | canbia el còdexe]

  • Gregory House (stajon 1-8), interpretà da Hugh Laurie, dopià in itałian da Sergio Di Stefano (stajon 1-6) e da Luca Biagini (stajon 7-8). Primario de’l reparto de medezina dianjòstega, spesializà in nefrołozìa e infetivołozìa. El se prezenta co n’atejamento burbero, menefreghista, pigro co i só cołeghi e co i só pasienti, justifegando in parte i só atejamenti par via de na menomasion de ła ganba dreta che ła ghe inpedise de caminar coretamente, dovùa a un infarto che’l ghe ga cauzà ła pèrdita de na persentuałe de’l mùscoło de’l cuadrisìpite e na necrozi de i tesùi nervozi che ła dezboca inte un dołor crònego. Łu el conbate ‘sto dołor co un potente analgèzego a baze opiàcea de nome Vicodin, che a cueło oramai el ze conpletamente asuefà. Anca se esensialmente el ze itim un indeviduo cosiensiozo e asà sensìbiłe, no’l ghe piaze vizitar i só pasienti, łu el ło fa soło se’l ze costreto da ła situasion.
  • Lisa Cuddy (stajon 1-7), interpretà da Lisa Edelstein, dopià da Roberta Pellini. Deretrise sanitaria de ł'ospedałe, A ła pràtega raramente ła só profesion, prefarendo ła parte aministradiva. Ła só spesiałizasion ła ze endocrinołozìa. Eła ła vołarìa 'ver un fioło, ma nonostante i numarozi mètodi che ła ga doparà, no ła riese a restar insinta; siché inte ł'epizodio Gioia al mondo de ła cuinta stajon l’adota na neonata de na só pasiente. Eła ła ze el capo de House e ł'ùnega che ła riesa a tenjerghe testa inte łe discusion, sora de tuto co ła ga a che far co ła łòzega e łe batùe sesiste de eło.
  • James Wilson (stajon 1-8), interpretà da Robert Sean Leonard, dopià da Roberto Certomà. Primario de’l reparto de oncołozìa, el ze el mejor e ùnego amigo de’l dr. House. El só bonizmo el ło ga portà a trascurar só mojer par el łaoro in ospedałe. Devorsià par tre ‘olte, el ga avù na rełasione extraconiugałe co na só pasiente e co na ex sotoposta de House, Amber. Inte'l finałe de stajon, Amber ła morarà dopo un insidente so’ un autobus indo che A ghe ze anca House, e cuesto el interonparà par calche meze ł'amicisia tra łu e Wilson. Inte ł'otava e ùltema serie, A ghe vien dianjostegà un cancro rezistente a łe cure, e cosita el deside de gòdarse in totałe łibartà i ùltemi 5 mezi de vita che i ghe resta sensa sotoporse a terapìe par zlongar ła só speransa de vita.
  • Eric Foreman (stajon 1-8), interpretà da Omar Epps, dopià da Tony Sansone.Spesiałizà in neurołozìa. Ła só anbision ła ze èsar un mèdego stimà ma el ghe someja senpre de pì a House. El ze el primo a demétarse da ła scuadra dianjòstica de House a ła fine de ła tersa stajon, e'l ze el soło a tornarghe rento inte ła stajon sucesiva. Durante ł'otava e ùltema stajon el tołe el posto de Lisa Cuddy come Deretor sanitario de ł'ospedałe e capo de House.
  • Robert Chase (stajon 1-8), interpretà da Jesse Spencer, dopià da Stefano Crescentini. Spesiałizà in terapìa intensiva. Fioło de un reumatòłogo apresado, che parò no’l va d'acordo co łu parché el ło retien responsàbiłe de ła morte de só mama a cauza de ła vita fedìfraga de eło. El se sente in dover de dimostrar de 'ver otenjù el posto par braura e nò par ła presion de só pare: ‘sto caràtare el ło porta a tradir House in pì de na ocazion. El se prezenta come un omo duro, ma nando vanti co i epizodi el scoerze anca un łato pì sentimentałe. El se spoza co Cameron, dopo na rełasion che ła dura da ła tersa a ła cuinta stajon.
  • Allison Cameron (stajon 1-6), interpretà da Jennifer Morrison, dopià da Emanuela D'Amico. Spesiałizada in imunołozìa. Ła ze védoa de uno małà de cancro, che ła gavéa spozà par jutarlo inte ła só małatìa, che ła ło gavarìa presto copà. Probabilmente A ze par el steso motivo che inte łe prime stajon ła se sente atrata da House. Po’ dopo ła ga invese na relasion co’l dr. Chase che ła ło spoza inte ł'ùltemo epizodio de ła cuinta stajon.

El dr. Chase e ła dotoresa Cameron i fà parte de ła scuadra de’l dr. House inte'l reparto de medezina dianjòstega fin a ła tersa stajon. Inte ła cuarta A vien invese straoltà el cast de łe tre presedenti stajon introduzendo ‘sti novi parsonaji:

  • Chris Taub (stajon 4-8), interpretà da Peter Jacobson, dopià da Gaetano Varcasia. Dotor ebrèo co esperiensa in cerozìa plàstega, łaoro che łu el ga łasà par evitar che i só cołeghi i revełase a só mojer el só tradimento co na infermiera.
  • Remy "Tredici" Hadley (orizenariamente: Remy "Thirteen" Hadley) (stajon 4-8), interpretà da Olivia Wilde, dopià da Laura Lenghi. Ciamà “Tredici” par via de’l nùmaro che ła portava a’l coło durante ła sełesion de’l parsonałe, par molto tenpo A no vien rivełà njente de eła, njanca el nome; ła ze spesiałizà in medezina interna; House el scoerze che ła podarìa 'ver ła corea de Huntington, małatìa zenètega che ła gavéa copà anca só mama. A ła fine de ła cuarta stajon ła vien convinta a far el test, che’l se reveła pozitivo. Ła intratien na relasion co Foreman.
  • Lawrence Kutner (stajon 4-5), interpretà da Kal Penn, dopià da Luigi Ferraro. Zóvane dotor de orìzene indiana spesiałizà in medezina sportiva e riabiłitadiva. Cofà el só novo capo, el ze disposto a tuto pur de rivar a na diànjozi. El se suisida inte ł'epizodio Una spiegazione semplice de ła cuinta stajon, sensa alcun motivo aparente.

Ispirasion łetararie[canbia | canbia el còdexe]

Ispirasion łetararia da Sherlock Holmes[canbia | canbia el còdexe]

Łe somejanse intra el conosùo detective imazenario Sherlock Holmes e Gregory House łe vien fora int’el corso de ła serie; Shore el ga declarà de èsar senpre stà un amirador de Sherlock Holmes e de crédar ùneghe łe caratarìsteghe de’l parsonajo e ł'indifarensa che’l ga co i só clienti.

Defati łe maniere poco ortodose che House el dòpara par far łe só diànjoze, łe só cure estreme cofà ła rasionałità inpiegada par resòlvar łe problemàteghe e ła só riłutansa ad asetar i pasienti che no i ghe intaresa, łe ze tante ‘olte cauza de conflito tra łu e i só cołeghi. El dotor el mostra anca na carente sinpatìa par i só pasienti e no'l łi va a catar scuazi mai, n’abitùdene che ła ghe parmete de 'ver pì tenpo a dispozision par resolvar enigmi patołòzeghi.

Na gran parte de ła trama ła ze insentrada so’ ła depandensa da Vicodin da parte de House, par controłar un dołor scaturìo da un infarto che’l ghe zera venjù tanti ani prima al só mùscoło reto de’l cuadrisìpite femorałe, un małano che’l ło costrinze a caminar co un baston.

Nonostante i só cołeghi pì visini, i dotori James Wilson e Lisa Cuddy, i ło spinza a ndar in reabiłitasion varie ‘olte, nesun tentativo el ga suceso. ‘Sta depandensa ła ze n’antra somejansa co Sherlock Holmes, che’l zera depandente da ła cocaina. Tuti do inoltre i sperimenta altre droghe, come ła morfina.

A ze intaresante asà saver che ła creasion de’l detective łetarario ła zera stà a só volta inspirada da un dotor che Arthur Conan Doyle el gavéa conosùo a ł'ospedałe de Edinburgo indo che l’era andà dopo 'ver ciapà el master in cerozìa. ’Sto cerùzego, Joseph Bell, che de cueło Doyle el zera anca stà asistente par un breve parìodo, el jera un dotor ispio ma briłante, che’l doparava int’el só łaoro un mètodo sientìfego e grande abiłità dedutive par mezo de ł'oservasion, tanto che, come che’l descrive Doyle mèdemo, ezaminando un stranio el riuséa ad indovinarne, in baze a ł'aspeto, ł'ocupasion e cueło che’l fazéa. Siché el parsonajo de House el pol anca èsar visto come ł'idea che ła sèra el sercio de Sherlock Holmes.

Anbientasion[canbia | canbia el còdexe]

Ła major parte de łe visende de ‘sta serie tełeviziva łe se tien rento el fitisio Princeton-Plainsboro Teaching Hospital, ospedałe univarsitario de Princeton, New Jersey.

A ghe ze in tuti i modi ultariori siene in łoghi deversi: ła parte inisiałe de onji epizodio ła ze anbientada sołitamente inte'l posto indo che el futuro pasiente el taca sentirse małe. Inoltre A ghe ze deverse reołide inte'l parco e inte'l parchejo de ł'ospedałe, in caza de House, de Wilson e de altri parsonaji (Cuddy, Foreman, Kutner, Taub). Scuazi in onji epizodio A ghe ze un toco anbientà inte ła caza de’l pasiente, che i dotori de ła scuadra de House, soto ła só guida, i ga da sercar par procurarse notisie de rełevansa mèdega sora el pasiente. A ‘olte, sepur de rado, i parsonaji i se cata rento a negosi, pub, restoranti.

Ła sesta stajon de ła serie ła taca inte'l senpre fitisio ospedałe psichiàtrego Mayfield Psychiatric Hospital, indo che House el vien portà a ła fine de ł'ùltemo epizodio de ła cuinta stajon, Ora ambedue le parti.

Stiłe e łocałità de repreza[canbia | canbia el còdexe]

Dr. House el ze spes filmà doparando el mètodo walk and talk, tècnega de reołida doparà anca in tante altre serie tełevizive, da E.R. - Medici in prima linea a West Wing - Tutti gli uomini del Presidente. Ła consiste inte’l dòparo de na carełada mostrando do o pì parsonaji che i camina co i parla. Ła produtrise ezecudiva Katie Jacobs ła ga afermà che ‘sta tècnega ła vien doparà spes parché «inserir na siena in movimento A l’è un... modo par crear urgensa e intensità».

Panoràmega so ła serie[canbia | canbia el còdexe]

Strutura de i epizodi[canbia | canbia el còdexe]

A ł'inisio de onji epizodio A vien prezentà el momento sùito prima de cuando che el futuro pasiente el taca a sentirse małe (a ‘olte n'antra parsona ła par èsar małà e ła mostra sìntomi łizieri prima de chel momento, cofà in Tutto per tutto), seguìo da ła sigla inisiale: House, drio 'ver łeto ła diànjozi, el propone a ła só scuadra na diànjozi defarensiałe e'l scrive i sìntomi so’ na tabełeta co un penareło: tuti i menbri i propone na małatìa e daspò A se prosede co i vari test; ła situasion ła se repete onji 'olta che'l pasiente el mostra un novo sìntomo, fin che A no vien catà fora ła sołusion, fornìa scuazi senpre da House, de sòłito iłumenà da un discorso co Wilson so' n'argomento che no'l sentra co ła diànjozi. A ghe ze senpre racuanti ostàcołi a ła resołusion de’l diłema, come condision partegołari de ła sałute de’l pasiente che łe inpedise de portar vanti i ezami (a ezenpio Tutto torna), diłemi ètisi (Un cane è per sempre) o el mèdemo pasiente, che’l dize buzìe par scóndar un só segreto (Emancipazione); siché House el ga da riesar a narghe fora da ‘sti problemi par poder formułar na diànjozi. A ghe ze anca racuante siene de sòłito còmeghe e grotesche in anbułatorio (Madre controllo), indo che House el ze costreto a ocuparse de cuełi cazi mèdeghi talmente banałi che el dianjosta el serca senpre de scanparghe; talvolta i ghe dà parò n'iłuminasion so’l problema prinsipałe (Al sicuro).

In tante ocazion i se zonta a cuesti altri pìcołi o grandi problemi che i se prezenta fora da’l contesto ospedałiero.

Problemi clìneghi[canbia | canbia el còdexe]

Tanti insòłiti cazi mèdeghi de ła serie i ze stà ispiradi da i artìgułi e da i libri de Berton Roueché, come afermà da ł'ideador David Shore; uno in partegołar el ze capità a febraro 2014 inte ł'ospedałe de Marburgo, in Zermania, indo che un omo l’è stà salvà da un dotor che’l ga ameso de èsarse ispirà propio a un epizodio de ła serie TV.

Trama zenerałe[canbia | canbia el còdexe]

Prima stajon[canbia | canbia el còdexe]

Inte ł'epizodio piłota Una prova per non morire A vien presentài i parsonaji; in Disintossicarsi A vien ezaminada pienamente ła depandensa de House da’l Vicodin; da Sotterfugi a Il minore dei mali House el riscia el łicensiamento in sèguito a ł'entrada, come capo de’l consejo de aministrasion de ł'ospedałe, de Edward Vogler, un miłiardario che’l vołe cavar el reparto de House ma che a ła fine el vien casà fora da ła Cuddy. In Il caso House A vien spiegà el motivo parché el dotor el ze sòto e ła vien ciapà rento ł'avocato Stacy Warner, ex conpanja de’l dianjosta, e inte ł'epizodio dapò, Un uomo solo, el vien fora só marìo, Mark Warner, che’l vien curà da House.

Segonda stajon[canbia | canbia el còdexe]

In Padri e figli A vien prezentài i zenidori de House e spiegài i raporti co’l fioło; a partir da Vortice taca da novo el raporto fra House e Stacy, che reavisinàndose senpre de pì, el porta ła dona a renunsiar a Mark par el dotor, ma łu el se rifiuta de scominsiar n’altra rełasion (È meglio sapere). In Caccia al topo Chase e Cameron, co eła soto ł'efeto de łe anfetamine, i va in łeto insieme. In Euforia (epizodio dopio conponesto da Parte I e Parte II) Foreman el se mała e par poco no’l more; inte ł'ùltemo epizodio de ła serie, Mr. Jekyll e Dr. House, un omo el spara a House in ospedałe, che’l se fa oparar co ła ketamina sperando che cosita el sparisa anca el dołor a ła ganba.

Tersa stajon[canbia | canbia el còdexe]

A ł’inisio el dołor a ła ganba el par zvanìo, ma dopo el torna, co enorme despiazer de House; in Pazzi d'amore Michael Tritter, un investigador, el incrìmena el dianjosta par poseso de droga: i do i va a finir in tribunałe e, in Parole e fatti, el dotor el vien asolto grasie a na falsa testimoniansa de ła Cuddy. In Errore umano Foreman e Cameron i se demete e Chase el vien łicensià; po’ dopo, ‘st’ùltemo e Cameron i se mete insieme.

Cuarta stajon[canbia | canbia el còdexe]

House el ze costreto a tor su na nova scuadra dianjòstega, e'l ło fa radunando cuaranta candidài e descartàndołi a poco a poco finché, in Giochi A ghin resta solche tre, Lawrence Kutner, Chris Taub e “Tredici”, oltre a Foreman che’l ze stà riciapà. Una de łe candidade nò asunte, Amber Volakis, ła taca na rełasion co Wilson, ma in La testa di House ła ga un insidente mentre ła ze in autobus co House e ła more trazegamente in Il cuore di Wilson; ‘sta dezgrasia ła zlontana de molto Wilson da House.

Cuinta stajon[canbia | canbia el còdexe]

In Non è cancro A vien meso Lucas Douglas, investigador privà tolto su da House par spiar Wilson che’l se ga definitivamente destacà da łu; in Impronte genetiche el more John House, pare de’l dianjosta, e Gregory e Wilson i fa paze; in Dolci chili di troppo “Tredici” ła aderise ad un trial clìnego par ła małatìa de Huntington portà vanti da Foreman; i do i se fidansa, co un bazo, in Gioia al mondo. Inte’l mèdemo epizodio ła Cuddy, che da tanto tenpo ła zera drio a sercar in tuti i modi de aver un fioło, ła riese finalmente ad adotare ła neonata tanto sospirada. In Il patto sociale Wilson el parla co só fradeło, che no’l vedéa da nove ani. Inte’l ventézemo epizodio Una spiegazione semplice Kutner el se suisida sensa motivo: cuesto el sconvolzarà House, che’l gavarà ałusinasion de łu e de Amber e, dopo aver credùo, in Sotto la mia pelle, de èsarse dezintosegà da’l Vicodin e de 'ver avùo un raporto sesuałe co ła Cuddy, el se fa ricoverar inte un ospedałe psichiàtrego (Ora ambedue le parti); contemporaneamente Chase e Cameron i se spoza.

Sesta stajon[canbia | canbia el còdexe]

Piegato el scominisa a’l Mayfield Psychiatric Hospital, indo che House el se gavéa recovarà: dopo pì de un meze el vien demeso e ‘sta esperiensa ła ło canbia, parché dopo el tenta de èsar manco tàngaro e de 'ver pì raporti umani; in Fallimento epico Foreman, deventà caoreparto parché House el reciaparà ła łicensa mèdega solche in Lavoro di squadra, el łicensia Tredici, che ła sarà retolta su insieme a Chase, e cuesto el càuza na crizi inte'l só raporto co łu. In Il tiranno Chase el copa un ditator pasiente de ła scuadra dianjòstega de House che’l jera per métar in ato un sterminio de masa, e ‘sta roba ła fa sciopar na crizi inte’l só raporto co Cameron, fazéndoła rivar ad un divorsio. In Conosciuti sconosciuti House el se declara a ła Cuddy dizéndoghe de èsar senpre stà atrato da eła, ma el descoerze che ła ga za na rełasione co Lucas, l'investigador privà tolto su propio da House inte ła stajon prima. House e Wilson i va a vìvar insieme par un breve parìodo, ma sùito dopo Wilson el torna co ła só prima ex-mojer; mentre House e Cuddy, dopo na gran bega, i se mete insieme in Aiutami.

Sètema stajon[canbia | canbia el còdexe]

In E adesso? House e Cuddy i se domanda come poder menar vanti ła só rełasion. Tredici ła łasa el team per motivi oscuri e ła sconpare par sirca n’ano, fin cuando che l’è House a descoerzer che ła dotoresa l’è stà incarserà daspò 'ver prategà ł'eutanazìa so’ só fradeło, anca łu małà de Corea di Huntington (Indagine). Par sostituirla House l’è costreto a tor su Martha Masters, na zóvane e briłante studentesa de medezina, che ła fa ła só ùltema aparision in L'ultima tentazione. House e Cuddy i se moła inte ł'epizodio Hollywood, Hollywood, quando che łu el torna a doparar el Vicodin; in Andare avanti un House in còłera el sfonda ła fasada de ł'abitasion de ła ex-moroza co ła só màchina, par dopo nar via da’l Paeze in cuanto prezumibilmente resercà da ła połisìa par ‘sto fato.

Otava stajon[canbia | canbia el còdexe]

Ła serie ła scominsia co ł'epizodio Venti Vicodin per la vita anbientà inte’l càrsere ndo che House l’è stà portà dopo el triste insidente che co cueło ła se gavéa concludesta ła stajon prima. In Il trapianto Foreman el premarà par el só rełaso, consejando un stato de łibartà viziłada. Łe continue bravade de House parò łe metarà in defigoltà Foreman, só garante łegałe, come in Rischi di paranoia, indo che el se reveła de èsar in poseso de un'arma nò declarada, o in Nessun colpevole, indo che A vien fora el motivo de’l parché House el ga spozà na dona de ł'Est Europa: farghe otenjer ła green card. In La parola Cancro, el vien descoerto che Wilson el ga un tumor a’l timo. ‘Sta roba ła conpanjarà ła serie fin a ła só concluzion, co un gran storzimento par House, che’l ga paura de restar soło.