Mesa Boogie

La Mesa/Boogie ła xe na dita de Petaluma in California ke dal 1969 fà anplificatori par kitara e basso e tuto quéo ke ghe và drio.

Storia

Inte el 1969, rente łe xone de Petaluma (California), Randall Smith el ga scumisià come tecnico de anplificatori inte un laboratorio picinìn: el ciapàva dei conbo dea Fender e łi modificava par darghe pì gain. El laoro de customixasiòn dei anplificatori ndava ben e senpre pì xente ghe comodàva el sò modo de laorare seitàndo ndar far dimanda par fàrsine far uno da lu, finkè a CBS Fender se ga insospetìo da quanti trasformatori ke ghe ordinava Randall Smith par far łe so riparasiòn, eora ghe ga tocà par forsa verxerse na sò dita: ła Mesa/Boogie. Tra i primi ke ga tacà doparàre e cronpare łi anplificatori Mesa/Boogie ghe xe stà par exenpio Carlos Santana e Keith Richards dei The Rolling Stones, ke xà da l'inìsio ghe ga fato crésare suìto ła reputasión dea Mesa/Boogie come dìta ke faxeva anplificatori de fàsa alta.....ke dèso come dèso podarìa èser ciamài anpli "boutique". Ndando vanti co i àni anca James Hetfield dei Metallica e John Petrucci dei Dream Theater ga yutà a far conòsere tanto el nome dea Mesa/Boogie anca ai amanti de generi muxicài come heavy metal o hard rock, cusìta senpre pì xente se ga incorto dea versatiità dei anpli de Randall Smith diventando in poco tenpo un suono de riferimento par country, metal, jazz, etc... Ła Mesa/Boogie ła xe conosùa anca come Mesa Engineering.

Da'l garaje, ai palki e studi de rejistrasión de tuto el mondo

Randall Smith, l'inventor dea Mesa/Boogie, ga tacà laorar inte un caxoìn cinexe (Prune Music) trasformà in botega de muxica. Lu laorava come tecnico riparator fintanto ke el so socio e amigo David Kessner ghe metìva na bona paròea co i muxicisti dea xona de San Francisco Bay Area ciapàndo senpre pì lavori da far: tra questi anca par i Grateful Dead, Big Brother and the Holding Company, e Carlos Santana.

Inte el 1969, Smith, quaxi par xugo, ghe ga modificà l'anplificatore Fender Princeton a Barry Melton's (Country Joe and the Fish): partìndo dal circuito de el 12 watt Princeton el ghe gheva cavà via el cono da 10 pòici ke ghe jera inte l'anpli originàe, metìndoghe sù un cono 12 pòici JBL D-120 (un cono ke vegneva doparà tanto al'epoca), dopo el ghe ga modificà el teàro pa inpirarghe drento un trasformator de corènte pì grando, metìndoghe uno de quéi doparài de sòito par i 4X10 tweed Fender Bassman: xe stà in stà maniera ke Randall Smith ga creà el primo Boogie.

Randall Smith gheva bixogno de proàrlo par ben stò Princeton modificà, eora el xe ndà inte'a botega davanti. Fataità, in kel momento Carlos Santana el yera là "insieme a tanta xente ke se gheva inmucià inte el marciapìe par scoltar i lamenti ke vegneva fora da stò anpli". Inpresionà, Santana ghe fà contro Randall Smith, "Omo, kel robèto picoeo là el xe veramente boogie!"...e da stà ocaxion xe nato anca el nome dei anplificatori de Randall Smith.

Inte el 1971, el basista Patrick Burke el xe ndà dimandàrghe a Randall Smith se el ghe faxea par lu un anpli custom par bàsso: Smith tuto contento el se ga tirà su łe maneghe e el se ga méso de bona voya. Aa fin el ga costruìo el Snakeskin Mesa 450, ke el xe el primo anpli da bàsso fato da Randall Smith, ma anca el primo prodoto "uficiàe" dea Mesa/Boogie.Modeło:Fact

Ła vera inovasiòn xe saltà fora quando Randall Smith ga tacà sviupàrghe par Lee Michaels un projeto de un preanplificatore ke'l gheva da far ndar el sò novo finàe de potensa Crown DC-300. Visto ke no'l savéva quanto segnàe ghe voèva par far ndar el Crown, Smith el ghe ga xontà al preamp nantro stadio valvoeare de gain in pì par tegnèr meyo de ocio tuto co 3 potensiomentri par el gain so dei punti difarenti del circuito. Quando Randall Smith el ghe ga portà el preanplificatore a Lee Michaels, e picà drento el finàe, pena scoltà no łi yera miga màsa contenti gnanca uno dei do parké dai speaker vegneva fora un suono fiàco e straco, co un voeume bàso: I se gheva incorto ke I gheva picà i coni diretamente inte el preamp, eora no I ga fato altro ke stacar tuto e picàr i coni inte el finàe de potensa come gheva da ndare. Co tuto yera coegà ben, Lee Michaels ga fato un power chord par proàr el so novo set-up, ke a fin da quànta potensa ke'l gheva, I "ga scaraventà tuti do (Michaels e Smith) su par el muro". Randall Smith in sto modo, par puro caxo, el ga scoperto l'high gain, eora da là el ga tacà far i novi Mesa/Boogie sfrutando ła so nova scoperta e verso ła fin del 1972 el Mark I el yera xà ke beo in comèrcio.

Verso ła fin dei àni '70 el ga fato dee variasiòn custom so rikiesta (ai Mark I), xontàndoghe el reverbero, el cono da 15", equaixatore grafico, coni difarénti (el pì dee olte Altec o ElectroVoice), teàri co legni diversi tipo koa o grilia in vimini.

El Mark II xe stà meso in comercio inte el 1978.

Inte'i àni '80, ła Mesa ga seità far conbo, testate e càsse, partìndo far anca finài de potensa o preanplificatori a rack, finài come i M180/190 e a serie Strategy, o come i pre-amps tipo el Quad preamp e el Studio preamp. De tuti i MESA/Boogie fati fin deso, queo ke a xente và pì in serca, quèo ke xe entrà inte'a lejénda(ma ke se fà fadiga anca catàre) xe el Mark II-C (pikealtro el II-C+). Ła serie Mark ła xe ndà vanti par tuti i àni '90 col Mark IV, uno dei anplificatori ke al'epoca el jera el pì avansà al mondo a livèo tecnolojico.

Inte'i àni '90, ła Mesa ga prodoto ła serie pì picinìna e a pì bon marcà dea serie Mark, ła serie Dual Caliber, ma łi xe partii anca co ła Rectifier series ke ła ga fato el bòto de vendite diventando na testata de riferimento par un serto tipo de suoni.

Invensiòn dea Mesa/Boogie

• Original Lead/Rhythm Dual Mode Amplifier(anpli 2 canài switchàbii)

brevéto n. 4,211,893

• Simul-Class™ Power Amp

brevéto n. 4,532,476

• Simul-Class™ Power Amp

brevéto n. 4,593,251

• Lead/Rhythm Dual Mode Amplifier (Senplificài)(anpli 2 canài switchàbii)

brevéto n. 4,701,957

• Dyna-Watt™ Power Amp

brevéto n. 4,713,624

• Tweed & Spongy Power - Mains Voltage Reduction

brevéto n. 5,091,700

• Selectable Dual Rectifier®

brevéto n. 5,168,438

• TriAxis™ Preamp – Contròeo programàbie midi de 8 conbinasiòn valvoeari

brevéto n. 5,208,548

• Progressive Linkage™ - Conbinasiòn de varie valvoe finài

brevéto n. 5,559,469

• FX Loop paralèlo col Mix Control

brevéto n. 6,522,752

• Mute Circuit

brevéto n. 6,621,907

• Solo Control – Pre-settable, Volume Boost a pedàe

brevéto n. 6,724,897

• Duo-Class™ Power - Push-Pull switchàbie / Single-Ended Power Amp

brevéto n. 7,173,488

• Multi-Watt™ Power - Channel Assignable Power Amp

fra poco brevetà

• Recto Tracking™ - Auto-matches Rectifier Type to Power Amp

fra poco brevetà

Anpli atualmente in produsiòn

Mark V

El Mark V, ciamà anca MARK FIVE™ o Mark 5, el l'ultimo Mesa/Boogie dea serie Mark e anca l'unico ncora in produsiòn. El ga na pasùa de posibiità, se ghe poe catare suoni ke se ispira al Mark I, Mark IIC+ o Mark IV, ma anca suoni pì ispirài ai anpli inglexi. Se pòe sceliere el tipo de potensa finàe da doparàre, 10,45,90 watt: doparàndo łe do valvoe esterne se ga 10 watt in clàse A, doparàndo quee interne 45 watt in clàse AB, doparàndoe tute quàtro 90 watt in simul-class. Ghe xe tre canài indipendenti e so ogni uno se ga i contròi de Gain, Treble, Mid, Bass, Presence e Master, se ghe pol sceliere ła potensa del finàe(10-45-100 watt) e se pol asegnàrghe l'equaìxatore grafico si o no. Ghe xe na pasùa de contròi, dal depth al reverbero, loop programàbii, el "solo" controeàbie anca a pedàe, ecc.... Co el canàe pulito se pol avèr un pulito tipo Fender, dal funky al blues come ridere, col secondo canàe se riva a fare un bel crunch rock(forse el mejo crunch ke gae mai avùo un Mesa/Boogie Mark), col lead se poe far dee ritmike rabióxe, soli xbregamudànde, shred da far vegnèr i penòti.

TransAtlantic

Inte el 2010, seguendo a nova moda de fare anpli a poki watt come l'Orange Tiny Terror, o quèi fati da a Vox, l'Epiphone, ecc..., i ga fato el TransAtlantic dea Mesa/Boogie co drento e tecnoeogie Duo-Class e Dyna-Watt. El ga dò EL84 e quatro 12ax7 sol Pre-amp co na potensa seesionàbie da 5/15/25 watt da clase A a clase AB. Ghe xe dò canài switchàbii co sinque modi difarenti, tweed and normal (Brit + English).

Rectifier Series

A serie Rectifier, ke a vièn de sòito ciamà "Recto", xe diventà tanto famoxa in tei àni '90 grasie anca ae band heavy metal e nu-metal ke sonava co acordature bàse o ke i uxava e 7 corde.Modeło:Fact Ghe xe 4 modèi: Single, Dual (Solo, Road King, e Roadster) e Triple Rectifier. Ghe xe anca i modèi Tremoverb e Rectoverb.

A Single Rectifier xe un'anplificatore 50 watt co dò canài indipendenti ke uxa pa a retificasiòn o el sistema silicon diode rectifier, o a retificasiòn co na valvoea. Deso ghe xe in produsiòn a Single Rectifier Solo Head 50, a Rect-o-Verb 50 head, e el Rect-o-Verb 50 conbo, kel gà un cono da 12" Celestion Black Shadow. A Rect-o-Verb ga el stèso tipo de circuitasiòn dea Single Rectifier Solo Head 50, ma in pì a ga el reverbero. Tute e Single Rectifier uxa un paro de valvoe finài 6L6 e sinque 12AX7 valvoe preanplificatrici. So tuta a linea de "Series 2" xe stà xontà un switch pa poèr pasàre dae 6L6, a dee EL34, so i Rect-o-Verb el potensiometro del reverbero xe stà pasà da da drio a testata, al panèo davanti.

A Dual Rectifier Solo Head xe a pì uxà tra a serie dee Rectifier. El nome ghe xe stà dato parkè a uxa 2 circuiti de retificasiòn, uno uxa i silicon diodes e kealtro uxa e valvoe. Pa un suono pì morbido, a Dual Rectifier te fà canbiare da a retificasiòn valvoeare a silicon diodes, strucando un switch. Ghe xe quatro valvoe finài 6L6 ke buta fora 70-100 watt: dipende in ke modaità a vièn uxà. El switch del bias xe stàndar come so e Single Rectifier poendo sceliere tra e EL34 o 6L6 sensa aver el bixogno de farghe el bias. A Dual e a Triple Rectifier, ke e ga 5 valvoe de pre 12AX7, al'inìsio a gheva 2 canài (comuncue no veri e propri circuiti paraleli), ma da na dexina de àni i ga fàto anca el terso canàe: tanta xente preferìse e 2 canài parkè i dixe ke a sona mejo, i dixe anca ke e prime 500 rectifier sia e mejo de tute kealtre parkè vegnèa uxà dei trasformatori difarenti da quèi uxài so cuee fate dopo, e anca parkè e gheva un circuito difarente ke da a fin del 1992 xe stà canbià. Pa capire quàe ke e xe e prime 500 dual rectifiers basta ndare in serca de quee ke ga i numeri de serie ke và da # R-0001 a R-0506.

Anca pa e Dual Rectifier Solo Head, come pa a serie mark, ghe xe el modèo de ponta: a Dual Rectifier Road King ke a ga na pasùa de opsiòn. A ga 4 canài, dò difarenti speaker output, dò loop efèti e el Progressive Linkage kel te dà a posibiità da canbiare e valvoe finài in tante maniere(2x6L6, 2xEL34, 2x6L6+2xEL34, 4x6L6, 4x6L6+2xEL34). Tuto questo vien segnaeà da dei led mesi sol panèo davanti. L'anpli ga anca a Recto-Tracking, ke automaticamente el te scelie el sistema de retificasiòn ke xe mejo (single o dual 5U4s o silicon diode), dipende dal tipo de configurasion de e valvoe finài ke se ga scelto.

Pa ki ke uxa a Road King xe un vantajo aver tute ste opsiòn parkè se se poe tirare fora tanti tipi de suoni, ma da n'altra parte ghe xe ki ke dixe ke a xe na testata conplicà da uxare, eora a Mesa/Booogie ga butà in comercio a Dual Rectifier Roadster ke a ga tanto manco roba dea Road King avendo parò senpre a posibiità de aver 4 canài.

A Triple Rectifier và a 6 valvoe finài 6L6 pa 150 watt de potensa, co 3 valvoe retificatrici 5U4. El slogan jera "When excess is barely enough", e vegneva uxà dai Rammstein, Creed, Limp Bizkit, KoЯn, Linkin Park, Blink 182, As I Lay Dying, 311, and Avenged Sevenfold. Ben o mae a ga e stèse carateristike e storia dea Dual Rectifier.

Lone Star

El Lone Star xe stà mèso in produsiòn sol 2004 col slogan "Tone as big as Texas", e ghe ne xe de dò tipi, Classic e Special: el Classic ga un suono ispirà ai veci Fender, el Special se ispìra ai veci VOX AC-30, anca se gnanca uno dei dò ga un suono visìn ai anpli ke se ispira.

El Mesa/Boogie Lone Star Classic se ispìra ai suoni de Stevie Ray Vaughan e al so Texas blues,ma el ga anca un bel pulito sscièto. El Lone Star ga dò canài, posibiità de sonàre a 50 watt(co a retificatrice a volvoe o a diodi) o a 100 watt(retificasiòn coi diodi). Sol 2007 xe stà xontà anca l'opsiòn dei 10 watt in clàse A.

El Lone Star Special existe dal 2005, da quando l'è stà prexentà pa a prima olta al NAMM(fiera dei strumenti muxicài) de Los Angeles. De difarènte col Lone Star Classic xe ke al posto dee 6L6 el monta e EL84 de valvoe finài e a potensa sfrutàbie xe seesionàbie da 5, 15 o 30 watt. A 30 watt l'uxa a retificasiòn a diodi, a 5 e 15 watt l'uxa a retificasiòn valvoeare in clàse A.

Stiletto

A prima versiòn dea Mesa/Boogie Stiletto, a "Stage I", xe stà mèsa in comèrcio dal 2004, e a xe a variante "British" dea serie Rectifier, a xe stà a risosta par tuti kei muxicisti ke doparava Marshall e Mesa/Boogie contenporaneamente. Ghe xe dò versiòn, a Deuce e a Trident, tute dò monta de stàndar e EL34.

A Deuce xe un 100 watt co EL34 ke uxa dò valvoe retificatrice 5U4. A Trident xe come a Deuce, ma co pì potesa, ke xe switchàbie da 50 a 150 watt doparando sie EL34 e tre valvoe retificatrici 5U4.

Sol 2006 i xe pasài da a versiòn "Stage I", a versiòn "Stage II", e el primo dea serie "Stage II" xe stà el Ace ke l'è un 50 watt disponìbie in diverse versiòn. Da a serie "Stage I" a "Stage II" ghe xe stà rimèse e man ai suoni sia soi puliti ke soi distorti.

Express

A serie Express xe stà mèsa in comercio sol 2007 al posto dea F-Series anca se no i xe conpagni tra i dò.

Co l'Express a Mesa/Boogie mete in pràtega a so nova invensiòn ciamà “Duo-Class” ke sarìa a posibiità de sceliere de doparare el finàe so un vero e proprio clàse A(single-ended) uxando na soea valvoea a 5 watt, o in vera clàse AB (push-pull) sfrutàndo tuta a potensa. Ghe xe dò versiòn del Mesa/Boogie Express, el 5:25 ke ga come potesa a ciòdo 25 watt, o el 5:50 kel spara 50 watt.

El 5:25 fà ndare dò valvoe finài EL84 pa na potensa de 25 watt. L'è disponìbie a testata(versiòn curta) o conbo 1X10(Open Back) co un E50 Speaker.

El 5:50 fà ndare dò valvoe finài 6L6 pa na potensa de 50 watt a baìn. El ghe xe a testata(versiòn curta e longa), conbo 1X12(Open Back) co un C90 Speaker, o conbo 2x12(Open Back) co dò C90 Speakers.

Bass Amps

Mesa Boogie Bass 400+

A Mesa/Boogie ga fato anca anpli pa bàso. I anpli transistor ke ghe xe atualmente in produsiòn xe el simul-state Big Block series, M-Pulse, e el Walkabout. A Mesa/Boogie ga fato anca un'anpli pa bàso tuto valvoeare: el Bass 400+! L'è "sò fradèo" del Strategy 400, el ga na potensa de 500 watt a ciòdo faxendo funsionare dodaxe valvoe 6L6 ke spùa fora 350 watt RMS. El primo Bass 400 gheva sie valvoe 6L6 ke sparava ben o mae 180 watts RMS.

Pre-amps

Triaxis

L'è un preanplificatore valvoeare nato pa aver tuti i suoni dea serie Mark drentro un preanplificatore, dal pulito sscièto del Mark IV, al crunch selvadego del Mark IIC/IIC+. El ga sìnque valvoe de pre, ma l'è tuto controeàbie via midi. Ghe xe tre versiòn del Triaxis, a V1, V2 e V2 phat mode. Come tuti i preanplificatori el ga bixogno de un finàe de potensa pa farlo ndare, al'inìsio el jera nato in còpia col Mesa/Boogie 2:Ninety, ma voèndo el triaxis se poe abinàrlo co tuti i finài ke se voe otegnèndo el pì dee olte suoni ke xe na maraveja.

Rectifier Recording PreAmp

El MESA/Boogie Rectifier Recording™ PreAmp l'è un preanplificatore ke se ispira ai suoni dee testate Rectifier, l'è nato pa studio de registrasion, ma anca meso a rack e drento un bel finàe de potensa el fà a sò bea figura.

Anplificatori fora produsiòn

Serie Mark

Mesa Boogie Mark IV

A Mesa/Boogie Mark series, xe a prima serie de anplificatori pa kitara. Xe stà fato el Mark I, Mark II(A), Mark IIB, Mark IIC, Mark IIC+, Mark III in sinque version(stripe), Mark IV(A), Mark IV(B) e deso el Mark V. Co sti anpli Randall Smith se ga inposto sol marcà dei strumenti muxicài e el ga tirà fora nove idee come l'high gain, el simul class, el slave out, el dò canài, el tre canài, ecc... ma pikealtro co a serie Mark, Randall Smith ga inventà un suono novo ke prima no ghe jera, el suono Boogie ke poèva incontentare tanta xente, da Santana a James Hetfield, un suono ke ga fato storia. Se te interèsa savèrghine de pì varda quà: Mesa/Boogie Mark series

Se te voi savère de ke àno ke xe el to vecio Mesa/Boogie Mark, basta ke te ghe dixi i numeri de serie(ke i xe sol panèo da drio l'anpli) ai toxati dea Mesa Engineering tramite email al sito dea Mesa/Boogie, cusita jori farà presto dirte de ke àno ke a xe. Pa i Mark II, III e IV se trova fora tuto, ma forse pa quàlke Mark I xe fadiga vedere l'àno de fabricasiòn, pikealtro i primi. Dopo xe da ricordare ke alcuni ga avùo varie modifike come a xonta de reverbero, simul class o cono diverso, ma questo incatija un fià de pì a ricerca pa a datasiòn del'anpli.

Quad preamp

El Quad preamp ga dò canài separài, uno sòra e uno sòto: sò quèo sora ghe xe el canàe col circuito de pre del Mesa/Boogie Mark IIC+ e invèse soto ghe xe st'altro canàe ke l'è ciapà da un Mark III. Pena vegnesto fora ghe jera 8 valvoe de pre NOS Tesla E83CC fate soi àni '70 de produsiòn Telefunken. El percorso del segnàe del Quad l'è soeo valvoeare e no come altri pre come Triaxis and the JMP-1 ke uxa opamp (sol Triaxis i opamp vièn uxài soeo pal dynamic voice). Randall Smith ga dito: "El Quad (insieme al Simul 395 Stereo power amp) l'è sta fato insialmente pa sonare dal vivo al posto de ndare via co dò-tre(anca de pì) testate, de sòito modificàe, e in pì anca un switcher." El Quad preamp ga anca el reverbero dea Accutronics: forse el mejo reverbero ke ga fato a Mesa/Boogie.

Blue Angel

El Mesa Blue Angel fà senpre parte dea serie Rectifier, ma l'è un monocanàe pì pensà ai suoni tranquii anca se spenxendoeo se riva a suoni vioenti. El ghe xe a testata o conbo 1x12, 2x10, e 4x10. Uxando el Progressive Linkage technology se poe sceliere da dò 6V6 a quatro EL84. Ghe xe na GZ34 come retificatrice e sinque 12AX7 sol preanplificatore.

Nomad

A serie Nomad xe stà fata dal 1998 fin al 2000 co e versiòn 45, 55 e 100 watt. El jera considerà el sucesore dea serie Caliber.

Maverick

El Maverick jera un clase A fato a conbo 4x10, 2x12, 1x12 o a testata da 35 watt, deso l'è stà sostituìo dal Lone Star. El gheva dò canài, sie valvoe 12AX7 de pre, tre par canàe e quatro EL84 in clase A.

Ki ke dopàra MESA/Boogie de famoxo

James Hetfield e Kirk Hammett dei Metallica Korn Buckethead Rocky George dei Suicidal Tendencies Jerry Cantrell Les Claypool David Gilmour dei Pink Floyd Trey Anastasio dei Phish Dave Grohl dei Foo Fighters Allan Holdsworth Adam Jones dei Tool Steve Lukather Robin Finck dei Nine Inch Nails e Guns N' Roses Ed O'Brien dei Radiohead

John Petrucci e John Myung dei Dream Theater Prince John Scofield Andy Summers dei The Police Pete Townshend dei The Who Ron Wood Mark Tremonti dei Creed e Alter Bridge Andy Timmons Tom Kaulitz dei Tokio Hotel Frank Zappa Eric Bass dei Shinedown Carlos Santana Walter Trout Piotr Wiwczarek Vader Mark Morton e Willie Adler dei Lamb of God

Links

• Mesa Boogie Homepage
• Mesa Boogie Information & Discussion Forum Archivià il 18 de zenaro 2012 in Internet Archive.

• The Mesa Boogie Mark Series Registry
• The Boogie Files - History of the Home of Tone

Altri progetti

• Wikimedia Commons

• Wikimedia Commons el detien imàjini o altri file so Mesa Boogie
• el detien schemi gràfeghi so