Kim Jong-un

Retrato fotoreałìstego de Kim Jong-Un

Kim Jong-un (김정은, 金正恩, Kim Jŏng-ŭn; IPA: [kim.dʑʌŋ.ɯn]; Pionjang, 8 de zenaro 1983) el ze on ditador e miłitar corean, el ze prezidente del Partio dei Łaoraduri de ła Corèa e cao supremo de ła Repùblega Democràtega Popołar de Corèa (DPRK), comunemente ciamada Corèa del Nord.

Kim ze el segondo fiol de Kim Jong-il e de so mojere Ko Yong-hui. De ła so infansia e del parìodo prima de ła so cariera połìtega A se sa tanto poco, anca ła data de nàsita ła ze inserta (probabilmente l'8 zenaro o el 5 zunjo 1984).

El ze deventà el leader supremo dopo el funerałe del pare el 28 disenbre 2011.

Kim el mantien el tìtoło de prezidente del Partio de i Łaoradori de ła Corèa, prezidente de ła Comision Sentrałe Miłitare, prezidente de ła Comision de Defeza Nasionałe, Comandante Supremo del Ezèrsito del Pòpoło Corean, el ze menbro del Politburo del Comitato Permanente del Partio dei Łaoraduri de Corèa.

Kim el ze stà promoso maresiało de ła Nord Corèa inte el Ezèrsito del Popoło Corean el 18 zunjo 2012 asegurando el so podere in canpo miłitare. Da i mass mèdia coreani el ze sołito èsar defenìo co 'sto tìtoło.

El 9 marso 2014 Kim el vien eleto inte l'Asenblèa Suprema del Pòpoło (l'òrgano łezizlativo unicamerałe nordcorean). Kim el ze inserìo inte ła Forbes List de łe 46 fegure mondiałi pì influenti.

Vita

Ła prima parte de ła vita de Kim ze poco conosùa. Ła data de nàsita ła ze dibatùa: el governo nordcoreano el dize che ła sìa el 8 zenaro 1982 ma servisi de intelligence sudcoreani i ze convinti che ła data ła sia stada modifegada. Sirca ła prima edugasion tanti i sostìen che Kim gabia studià in do scołe Zvìsare co falso nome, ma A ghe ze chi el che crede el fose so fradeło e njente ze stà uncora provà co sertesa.

Pì tardi el ga otenjesto do łàuree, una in fìzega a ła università Kim II-sung e n'altra come ufisiałe miłitare a ła università miłitare Kim II-sung, A se pensa inte el parìodo 2002-2007.

A ze soło inte el 2009 che Kim el deventa noto al'osidente esendo infra i candidài par l'Asenblèa Suprema del Pòpoło. Fin da suito A ze ciaro a i oservaduri osidentài che el pare Kim Jong-il el ło ga sielto come sucesor. A senbra che in zunjo Kim el se gabia prezentà a el governo sineze, anca se ła Sina ła ga negà che ła vìzita ła ghe sia stada. Inte el setenbre del steso ano A vien fata na oparasion de propaganda par pareciarghe ła scałada al podere.

El 27 setenbre 2010 el deventa Daejang (o Taejang, on grado sìmiłe a zenarałe o maresiało). El venjarà ełeto vice prezidente de ła Comision Miłitare Sentrałe e menbro de ła Asenblèa Sentrałe del Partio dei Łaoraduri. El 10 otobre el derize ła festa par el anivarsaro de i 65 ani del Partio de i Łaoraduri. A vien donca destituìi tanti parsonaji połìteghi, anca parenti de Kim, par evitar rivałità che łe posa ostacołarlo.

El 17 disenbre 2011 Kim Jong-il el more. Kim el fa da prezidente al comitato par el funerałe. Inte i dì seguenti el Partio de i Łaoradori e i mèdia i scomisia sałudare el futuro ditatore come leader supremo. El 24 disenbre el vien proclamà cao supremo del ezèrsito. L'11 apriłe el deventa primo segretario de ła Asenblèa del Partio de i Łaoraduri. Inte el 13 apriłe 2012 el deventa prezidente de ła Comision de Defeza Nasionałe. Inte el łujo 2012 el vien proclamà wonsu, ła pi inportante pozision de asion inte el ezèrsito.

Ofisialmente Kim'l entra a far parte de on triumvirato insenbre al premier Pak Pong-ju, cao del governo, e a Kim Yong-nam, cao del parlamento responsàbiłe de łe rełasion èstare; Kim el derize'l ezèrsito e co 'sta pozision el ze stà bon a ver on podere major de i altri do.

El 9 marso 2014 Kim Jong-un el ze stà votà a ła Asenblèa Suprema del Pòpoło.

De ła vita parsonałe de Kim A se sa poco. Ła gran parte de łe informasion łe vien dal so cogo giaponeze Kenji Fujimoto che el ło descrive come guałivo a so pare. Kim el ze partegołarmente apasionà dal basket e da i videogames.

Par ła prima volta i mèdia inte el 2012 i ga revełà al paeze che Kim el ze spozà co Ri Sol-ju (drio oservadori sudcoreani dal 2009, e che i gavarìa vuo na fioła inte el 2010, notisia confarmada dal zugador de basket ameregan Denis Rodman inte el 2013).

El ditator el ze de frecuente conpanjà da ła soreła pi ceła Kim Yo-jong che ła ło juta par l'organizasion de avegnimenti pùbleghi.

Połìtega econòmega

Ła połìtega econòmega de Kim ła ze simiłe a cueła de ła Sina.

El so programa el prevede na major łibartà a łe aziende, on incremento de ła produsion agricoła, on mejoramento de łe condision de vita dei singołi sitadini, l'introdusion de beni de consumo sol modeło osidentałe, na vertaura ai marcài intarnasionałi.

Armi nucleari

Kim fin dal 2013 el ga sciarìo ła so intension de continuar e anpliar i projeti de costrusion e mantenimento de mìsiłi atòmeghi. Inte el 2016 el ga segurà che 'sto programa el ga come soło scopo ła defeza nasionałe.

A par che ła Corèa del Nord ła gabia sirca na dozina de bonbe nucleare, che łe ga on rajo de tiro che no'l sùpara el Japon.

Inte el disenbre 2015 Kim el ga anunsià che el so paeze el ze stà bon de reałizare na bonba a idròzeno, anca se A pararìa poco probabiłe.

Da'l 2016 ła Corèa ła ga subìo uncora sansion par via de i test misiłìsteghi.

Ezecusion e viołasion de i deriti umani

Ze stà confarmà l'ezistensa de racuanti canpi de reedugasion par tuti i opoziduri połìteghi del rezime prezenti zà inte el pariodo de Kim Jong-il. Al momento A ze difìsiłe far stime ezate sirca el nùmaro de deportài.

Inte el 2013 łe Nasion Unìe łe ga costituìo na comision de inchiesta. El raporto publegà inte el 2014 el jùdega Kim colpévołe de crìmeni contro i deriti umani.

Racuanti artìgołi i ze stài scriti so ezecusion ordenàe da Kim contro i so famejari e cołaboraduri, ma serte łe se ga revełà zbajàe o mìa verifegàbiłe.

I mèdia nordcoreani i ga reza pùblega ła ezecusion del barba del ditador, Jang Sung-taek.

Altri progetti

• Wikimedia Commons

• Wikimedia Commons el detien imàjini o altri file so Kim Jong-un