Teatro San Samuełe

Da Wikipedia, l'ençiclopedia libara.
Cheło che te ghè schcià el rimanda a sta voxe, parché el xe on so sinònemo o el vien esplegà cuà drento. rimandamento da Teatro San Samuele


El Teatro San Samuełe de Venesia el xe sta uno dei teatri pì prestigioxi intrà quełi ativi inte ła sità łagunare, in tuto sete, durante el Setesento.

El xe sta tirà su inte el 1656 su comision de ła fameja Grimani e el xe sta subito destinà ała rapresentasion de spetacołi de proxa; soło durante el secoło seguente a ghe xe sta ałestìi co magior frequensa opare łiriche e spetacołi de bałeto.

Distruto da on incendio inte el setenbre 1747, el xe sta ricostruio e - par sielta de ła fameja Grimani che ła ga preferìo dirotar ła muxega łirica seria verso el novo e pì ełegante Teatro San Benéto) - destinà prevałentemente a rapresentasion de opare bufe alternà a laori in proxa.

Ła ricostrusion ła xe sta fata a tenpo de record e inte el majo del 1748 el teatro el gera de novo conpletà. I palchi i gera sta ridoti da siè a sinque ordini ma ła strutura orixinałe ła gera restà invarià. In queło steso ano in ocaxion de ła Fiera de ła Sensa a xe sta rapresentà ł'opara Il mondo alla roversa co łibreto del Goldoni e muxega de Galuppi. Łe senografie, ł'ałestimento e ł'iłuminasion, aprontae in quel'ocaxion, łe xe sta conservae inte na stanpa de Codognato, in seguito riprexa da on dipinto de Gabriel Bella.

I tenpi de riedificasion i testimonia che ła strutura a ł'interno del perimetro dei muri ła gera sta reałisà in masima parte co struture de łegno e materiałi dipinti. Da chi anca ła anca ła faziłità dei incendi che i colpiva co grande frequensa sti edifici. Łe robe łe xe canbià ała fin del Setesento quando łe struture postise łe xe sta sostituie da opare murarie parecio pì sołide ma anca pì costoxe. El primo esenpio de tałe modificasion de tènica costrutiva el xe rapresentà dal teatro La Fenice. Ła crixi econòmega de ł'aristocrasia ła ga portà a ł'avento de na clase de inprenditori organisà in forma societaria che i gerano in grado de frontexare i costi che ł'atività teatrałe ła richiedeva.

El San Samuele el ga visto ła diresion - sia pure par pochi ani, dal 1737 al 1741 - di Carlo Goldoni, che el ghe gaveva fato rapresentare (e el ghe gavaria fato rapresentare in seguito) diversi so laori e che - su sołecitasion senpre dei Grimani - el ga łasà po par pasare al teatro d'opara San Giovani Grisostomo. Par ła fiera de ł'Asension del 1736 i ghe gaveva fato raprexentare, so muxega de Giovanni Maria Marchi, La generosità pułìtega, drama par muxega in onore "di sua eccellenza il signor generale Neupergg, generale d'infanteria, colonnello d'un reggimento di sua maestà cesarea cattolica e comandante di Luxembourg, eccetera, eccetera, eccetera".

Soto ła diresion goldoniana a xe scuminsià, proprio inte sto teatro, ła grande riforma teatrałe che ła ga moso i primi pasi co ła raprexentasion del Momolo Cortesan (1738) comedia co testo scrito soło par i ruołi prinsipałi e el resto recità all'improvviso.

Al San Samuele - teatro inte el cuałe a ga sonò el viołin par on serto tenpo anca Giacomo Casanova, e inte el cuałe ła ga recità anca ła mare, ł'atrice Zanetta Farussi - inte el 1730 el compoxitor Johann Adolf Hasse el ga debutà co ła so Dalisa, co ła primadonna Faustina Bordoni, de ritorno a Venesia dopo siè ani de bando.

A ghe xe sta tegnue po' prime de inportanti opare baroche e, in tempi sucesivi, de compoxidori famoxi de mełodrami cuałi Gioacchino Rossini e Gaetano Donizetti.

A fin Setesento el teatro el gheva perso tanto del so antico prestigio. Inte el 1770 i Grimani i gera stati costreti a cedarlo, a cauxa de ła crixi econòmega che gaveva colpio el patrisiato venesian. In seguito el xe restà sarà par diverse stajon, riversendo soło inte el 1819 come teatro sociałe sitadin dedicà soratuto ała prosa. Dal nome de ł'inpresario Giuseppe Camploy, che ło gheva riłevà, el xe diventà Teatro Camploy. El xe sta demołìo inte el 1894 e al so posto a ghe xe sta edificà na scoła.

Controło de autoritàVIAF (EN4032154329462926970002 · LCCN (ENsh2017003812 · WorldCat Identities (EN4032154329462926970002
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Teatro_San_Samuełe&oldid=1065458"