Storia de l'Egito

Da Wikipedia, l'ençiclopedia libara.
Va a: navigasion, serca

La Storia de l'Egito la ne dixe che za 5000 ani prima de Cristo na cultura distinta da le altre del Medio Oriente la se stava formando longo el fiume Nilo. El periodo de i faraoni l'è scominsià pi tardi, nel 3100 a.C., co l'unificasion de l'Egito en on solo Stato. No Stato che el xe andà vanti fin al 332 a.C. co el xe stà conquistà da Alesandro el Grande. Da alora, l'Egito xe stà governà da i Tolomei fin a la conquista romana.


I albori[canbia | canbia sorxente]

L'Egito xera abità fin da i tempi preistorici. Le piture rupestri xe na testimoniansa direta de le popolasioni che vivea su tuto el teritorio. No se gha da desmentegar che en tempi antichi tuto l'Egito xera fertile, co pascoli adati a l'alevamento de el bestiame. Co la desertificasion che portarà a la formasion del deserto del Sahara (8000 a.C. in poi) la popolasion la sa riunia longo el fiume Nilo, l'unico posto dove se podea coltivar e alevar animai. I ricatamenti archeologici ne fa saver che intorno al 6000 a.C. ghera za na cultutra sedentaria e organizà longo el Nilo, co la costrusion de case e palazi permanenti. Scominsia così el periodo pre-dinastico che culminarà co la formasion de do regni: quelo del Nord (comprendente el delta del Nilo e la region subito a sud) e quelo del Sud (tuto l'Egito centrale e meridionale).

En sto periodo se nota l'uso del rame (che no l'è presente en Egito e dovea vegnar dal Sinai o da la Nubia) e el miglioramento de la tecnologia ne la preparasion de vasi de teracota (culture Badariana e Tasiana, da el nome de i siti do sà catà i ogeti, Badari e Der Tasa). Dopo ste culture, se pasa al periodo Amratiano, dal sito de el-Amra. En sto periodo se vede che el marcà co paexi confinanti xera en aumento, così come anca el marcà tra nord e sud del paexe. L'ultimo stadio prima de el periodo de i Faraoni xe la cultura Gerzana, dal sito de Gerza. En sto periodo se nota come la tecnologia gha parmeso la costrusion de varie cità de pi de 5000 abitanti. Scominsia l'uso de matoni coti. La majoria de la popolasion xera sedentaria. El rame xera usà sempre pi ne la preparasion de ogeti, strumenti e armi. I ogeti de la casa mostra sempre pi speso disegni e intagli.


El Regno Vecio[canbia | canbia sorxente]

Statua in grovaca del faraon Menkaura e so mojer Khamerernebty II.

I primi documenti scriti risale al 3150 a.C. Secondo ste tradisioni, el primo re de l'Egito xe stà Menes, che ghavaria uniò i do regni. Recenti ricatamenti dixe che el re che gha uniò i do regni xera Narmer. No xe posibile esar pi precisi al riguardo. Se pol dir solo che dopo l'uniicasion de i do regni, scominsia le dinastie de i Faraoni. La cultura, le tradisioni, l'architetura, le arti, la religion e le struture sociali de l'Egito xe rimaste stabili par tremila ani.

El primo periodo dinastico xe conosù come el Regno Vecio. El Regno Vecio va da el 3150 al 2134 a.C., da la prima a la sesta dinastia. La cavedal del Regno Vecio xera Menfi. En sto periodo xe stà costruie le piramidi. El faraon pi imporante xe stà Djoser (2630-2611) che gha costruio la piramide de Saqqara.

El punto pi alto del Regno Vecio l'è stà co el Faraone Sneferu, fondator de la quarta dinastia. Sneferu gha fato costruir tre piramidi, so fiol Khufu gha fato costruir la piramide granda de Giza, l'altro fiol Khafra (Cheope) e el neodo Menkaura gha anca lori costruì grose piramidi. La costrusion de le piramidi xe la testimoniansa del poder economico de i faraoni, ma anca de la capacità organizativa e tecnologica. No bisogna pensar che le piramidi xe stà costrui da sciavi, n'idea che la vien da la letura de la Bibia. I costrutori de le piramidi xera en majoria agricoltori libari, guidà da on grupo de tecnici che dirixea i laori, lavoradori specialixà de la piera. Matemateghi e sacerdoti.

El Regno Vecio xe terminà co el faraon Usherkhaf (2465-2458) ghà fato na reforma del governo. La reforma gha diminuiò el poder central a favore de i nomes (le regioni) che gha scominsià na guera civil par verghe pi poder. I problemi sociali xe continuà anca soto i faraoni che xe vegnù dopo Usherkaf. Co le carestie dovue a la mancanza de piova de i ani 2200 - 2150, se riva a la fin del Regno Vecio e al primo periodo intermedio.

El periodo intermedio xe durà dosento ani, da la sesta a la undicesima dinastia. I faraoni de stò tempo xera picoli re che no gavea el control de tutto el paexe. En stò periodo ghe l'invasion de 'i arcieri', on popolo che vegnea da l'Axia e el sachegio de le piramidi e de le tombe pi antiche. La nona e decima dinastia controlava parti del Baso Egito con cavedal a Eraclopoli, la undicesima dinastia la governava l'Alto Egito da Tebe. Dopo na longa guera, el faraone Mentuhotep II de Tebe gha vinto e gha riunì le Do Tere, dando vita al Regno de Mezo.

Regno de Mezo[canbia | canbia sorxente]

El Regno de Mezo va da el 2030 al 1640 a.C., e comprende le dinastie undicesima, dodicesima e parte de la tredicesima. La cavedal xera a Tebe (11 Dinastia) e el-Lisht (12 dinastia). Dopo la riunificasion de la naxion, Mentuhotep II gha moso guera contro la Nubia, che la sera stacà da l'Egito durante el periodo intermedio, e contro i Stati de Canaan (Palestina). El faraone gha risistemà l'aministrasion publica e istituì la carica de primo ministro (vizir). CO la dodicesima dinastia, la Nubia e la Libia xe stà conquistà e sotomese soto i faraoni Amenemhat I e Senusret I e II. Amenehemat III (1860-1839) xe stà l'ultimo grande faraone de sta dinastia. Durante el so regno, la popolasion xera cresuda tanto che la produsion alimentare no la bastaa a covrir la domanda interna, e na serie de ani de carestia gha portà a la fine del Regno de Mezo e l'inisio de el secondo periodo intermedio.

I hyksos[canbia | canbia sorxente]

En tel secondo periodo intermedio, i faraoni no gavea forsa. Da na parte lo Stato xera disorganizà, da l'altra, le carestie gavea indebolio la naxion. On popolo axiatico conosù come i hyksos xe stà boni de caturar la cità de Avaris e de formar on regno en tel delta del Nilo. I faraoni egisiani gha mantegnù el control de l'Altro Egito, ma no xera boni de contrastar el poder de i hyksos. No sembra, parò, che ghe sia stà de le guere tra i do regni. El periodo intermedio xe rivà a fin co la diciasetesima dinastia. I faraoni de sta dinastià xe stà boni de organixar el paexe e de contrastar la potensa de i hyksos soto la guida de Tao II e Kamose. Ahmose I xe stà el primo faraon bon de parar via i hyksos da l'Egito, portar la cavedal a Tebe, riconquistar la Nubia e tuta la costa mediteranes fin en Fenicia. Ahmose I l'è stà l'ultimo faraon de la diciasetesima dinastia e el primo de la diciotesima.


El Regno Novo[canbia | canbia sorxente]

La maschera funeraria de oro de Tutankhamon

Sto periodo xe stà quelo pi rico del paexe. I pi importanti faraoni, i i pi conosù, xe de sto periodo. Se cata una de le poche faraone, Hatshepsut. Ela la xe sta bona de conquistar nove tere e de estendar el control su le trate da la Somalia a tuto el Mediteraneo. El so sucesor, Thutmose III, gha esteso el control en Axia. Amenhotep III gha costruoio i pi importanti monumenti de Karnak, el tempio de Luxor e novi templi a Ma’at. El sucesor, Amenhothep IV, gha insistio sul monoteismo, el gha anca cambià el so nome en Akhanaten, en onor del dio Aten. En sto modo, el sa scontrà co la clase sacerdotale che gavea sempre dà el primo posto a Amon-Ra. El faraon gha prima dito che Aten l’era el pi importante dio, dopo el gha dito che el xera l’unico e che Aten, Amon-Ra e Horus xera la stesa cosa. Amenhothep IV gha anca sostegnù le arti e novi modei de arte pitorica. A la so morte, Smenkhkare – el co regente – xe diventà faraone. No se sà se Smenkhkare xera on omo o na dona, se xera la mojer de Amenhothep IV co on novo nome faraonico, o n’altra persona. La religon politeista l’è tornà subito a gala. A la morte de Smenkhkare, dopo pochi mexi, xe saliò al trono Tutankhamon.

Tutankhamon xera un buteleto e el regno l’era mandà avanti da el general Horemheb. Tutankhamon xe morto ancora zoino, dopo esar cascà da caval durante na batuta de cacia nel deserto. Dopo de lu el regno pasò a Ay e dopo on par de ani al general Horemheb. El vecio generale gha fato de i cambiamenti importnti en tel modo de governare e gha ridato splendor al paexe. A la so morte, el general Paramessu l’à tolto el poder co el nome de Ramesses, e gha scominsià la dicianovesima dinastia. So fiol Seti I xe el faraon che gha fato costruir el complexo religoiso de Abydos. Dopo de Seti, xe stà el tempo de Ramesses II. Co i so 67 ani de regno, Ramesses II xe stà bon de continare le riforme de so nono e de so pare e de costrir novi templi, come quelo de Abu Simbel. Le so campagne militari xe culminà co la bataglia de Kadesh, ricord anca ne la Bibia, dove el xe riusio a vinsar contro i ititi. L’ultimo grande faraone de el Regno Novo xe stà Ramesses III. El gha fermà le invasioni de el ‘popolo del mare’, che gha poi invaso Canaan, e le scoribande de i libici. Dopo de lu, i faraoni no gha vù vero poder, e i no xe stà gnanca boni de reagir a le carestie e la mancansa de piova. Al tempo de Ramesses XI, i preti de Amun controlava el sud del paexe, mentre el nord xera in man a Smendes, che diventarà el primo faraone del la ventunesima dinastia, el primo del terzo periodo intermedio.

Libici e nubiani[canbia | canbia sorxente]

L’ultimo faraone de la ventunesima dinastia, Pusennes II, gavea on generale de origine libia, che gha tolto e poder co el nome de Shoshenq I. Sta dinastia gha dovù ritirarse da la Nubia e combatar co vari grupi che volea destabilisar el Egito. En Nubia, na dinastia locale gha tolto el poder e i gha scominsià a movarse verso nord, ocupando prima l’Egito del sud, e dopo tuto el paexe. La venticinquesima dinastia de faraoni xera neri nubiani. Verso el 700 a.C., l’Egito gavea perso forza e prestigio, e la nova forsa internasional xera l’Asiria. Dopo verghe vinto varie bataglie, i asiri gha ocupà Tebe e sachegià Menfis. I asiri gha anca meso al poder la ventiseiesima dinastia come re vasali de la Asiria dal 664 a.C. in poi.


L’ultimo periodo[canbia | canbia sorxente]

Psamtik I, co i so 54 ani de regno, xe stà bon de rimetar ordine en Egito e de conquistar on margine de indipendensa che la durò fin al 526 a.C. Dopo sta data, i egisiani no xe stà pi boni de contrastar asiri e persiani. Nel 380 la trentesima dinastia xe stà l’ultima de faraoni egisiani a governar l’Egito, anca se come vasali de la Persia.


I Tolomei[canbia | canbia sorxente]

Alesandro el Grande l’è rivà en Egito nel 332 a.C. e no gha vù resistenza a la conquista del paexe. Dopo verghe fondà la nova cavedal, Alesandria d’Egito, gha meso Cleomenes a la guida del paexe mentre che lu andava a combatar contro i fenici. Dopo la morte de Alesandro, Tolomeo gha tolto el so posto in Egito, e gha stabilio la so dinastia, che controlarà el paexe par tre secoli.

Roma[canbia | canbia sorxente]

La nova potenza mediteranea, Roma, sa catà a far guera contro Marco Antonio e la so aleata, la regina Cleopatra de i Tolomei. Vinta la batalia de Anzio nel 30 a.C., i romani se sa ciapà el control de l’Egito. Co la division de l’impero romano, l’Egito l’era controlà da Bisanzio, fin a l’arivo de i arabi en tel 639 d.C.