Storia de l'Angola

Da Wikipedia, l'ençiclopedia libara.
Va a: navigasion, serca
Mapa de l'Angola

Dopo esar stà na colonia del Portogalo dal 1655, en tel 1951 l’Angola la xe stà incorporà come na division aministrativa del paexe eoropeo. L’Angola la xe rivà a l’indipendensa en tel 1975.

Preistoria[canbia | canbia sorxente]

En te i tenpi preistorici, l’Angola xera abità da popoli pigmei, i progenitori de i khoikhoi de ancò. Verso el VI secolo d.C., i primi grupi bantu i xe rivà dal nord. I bantu i gavea na cultura materiale superiore a quela de i pigmei i i gha preso el sopravento sensa fadiga. L’ocupasion de el teritorio che ancò forma l’Angola la xe durà vari secoli. Co la formasion del regno del Congo, el nord de l’Angola el xe entrà ne la zona de influensa de sto regno.

Portoghexi[canbia | canbia sorxente]

La regina Jinga che trata co i portoghexi

I portoghexi i xe rivà a la corte del re en tel 1482. El comercio tra i do paexi el sa svilupà ben e de i congolexi i xe stà mandà a Roma par studiar. I portoghexi i xe entrà en Angola solo en tel 1575 co l’arivo de Paulo Dias de Novais e on centenaro de fameje de coloni co na guarnigion de soldati. Sto grupo el gha fondà Luanda, che la xe diventà sità en tel 1605. I portoghexi i gha tentà de penetrar en tel interno del paexe ma i gha catà la resistensa de i vari regni bantu, specialmente quela del regno de Ndongo. Dopo verghe decapità el re Kiluange, i ndongo i xe tornà a la carica co al regina Jinga Mbandi. La regina la xe stà bona de far n’aleansa co i regni de Matamba, Congo, Kassanje,Dembos e Kissamas. I portoghexi no podea resistar contro tuti i regni unii e i gha dovù ritirarse en tel forte de Massangano.

I olandexi i se n’à improfità e i gha ocupà Luanda par on pochi de ani. CO i portoghexi i gha risolto i problemi interni, i gha mandà n’armada dal Brazile (1648) che la gha riconzuistà Luanda e verto le porte a novi coloni par ndar in Angola. Dopo na serie de bataje, tuti i regni locali i xe stà conqustadi. El regno de Ndongo el xe cascà en tel 1671. La seconda conquista la gha verto el marcà braziliano a l’Angola. L’Angola la xe diventà come na colonia del Brazile, eso steso na colonia del Portogalo. I porti de Luanda e Benguela i xera sempre pieni de navi braziliane. Par la metà del XIX secolo, Luanda la xe diventà ona de le sità pi moderne del continente.

La colonia angolana la provedeva avorio, goma, prodoti agricoli, oro, legname e altri prodoti e la se sa sempre mostrà de groso interese par el Portogalo. El clima en te la colonia el xera tranqilo. Verso el 1950, i primim movimenti naxionalistici - el Movimento Popolar par la Liberasion de l’Angola el xera el pi importante - i gha scominsià a domandar l’indipendensa. El rifiuto portoghexe al dialogo el gha portà a la guera en tel 1961. Dopo ani de guera, l’indipendensa la xe rivà el 11 novembre 1975.

Guera sivile[canbia | canbia sorxente]

I portoghexi, dopo el colpo de stato che gah meso fin a el governo Salazar, i xera d’acordo de lasar el poter a i tri grandi movimenti de oposision: MPLA, UNITA, e FNLA. La coalision no la gha tegnù e, prima ancora de l’indipendensa, UNITA e FNLA i gha scominsià a combatar contro el MPLA. El MPLA el gha subito preso el control de la costa, dove che ghe xera anca i novi campi petroliferi, e proclamà l’indipendensa el 11 novembre 1975. Agostino Neto el xe diventà el presidente, dopo de lu, en tel 1979, José Eduardo dos Santos gha preso el so posto. I movimenti de opozision i gha formà on governo par el control de l’interno del paexe co Jonas Savimbi e Holden Roberto a capo de la coalision. La guera le x continuà fin al 1991, co i acordi de Bicesse i do grupi en guera i gha deciso de fermar el conflito e darghe la posibilità a la zente de votar el governo che i volea lori. El MPLA el gha vinto le prime elesioni. Savimbi el no gha volù sentir razoni e el xe tornà a la guera. En tel 1994, on novo acordo de paxe el xe stà firmà. On governo de unità naxionale el xe stà inaugurà en tel 1997, ma la guera la xe tornà en tel 1998.

Ancò[canbia | canbia sorxente]

La guera sivile no la podea andar vanti. Dopo la fin de la guera freda, i Stati Unii e el bloco Sovietico no gavea interese a continuar na guera inutile. En tel 2002, on grupo de soldadi portoghexe el gha atacà la base de Savimbi e i lo gha copà. Dopo de lori, l’esercito de l’Angola el xe entervegnù par darghe l’impresion che i xera stà lori a metar fine a la guera sivile. Dopo vari incontri tra UNITA e MPLA, on novo acordo el xe sta firmà. La guera sivile la gha creà 4 milioni de sfolati interni, distruto le infrastruture, diseminà 15 milioni de mine antiomo en tuto el teritorio e parmeso la corusion dilagante en tel governo.