Storia de l'Algeria

Da Wikipedia, l'ençiclopedia libara.
Va a: navigasion, serca
Algeria map-FR.png

La Storia de l’Algeria la xe tipica de quele de le popolasioni mediteranee. Come tuti i paexi nord africani, anca l’Algeria la gha visto decine de popoli pasar so le so tere, tute le potense mediteranee – fenicia, berbera, greca, romana, otomana e francexe - le xe pasa de qi. I algerinin moerni i parla arabo, ma ghe na minoransa che usa el berbero, na lengoa autoctona del Maghreb.

Preistoria[canbia | canbia sorxente]

I palentologi i gha fato ricatamenti che testimonia la continua abitasion del nord Africa da 200 000 ani fa fin ancò. Le popolasioni neolitiche le gavea svilupà na cultura agricola e de alevamento del bestiame. No ghe disolusion de continuità tra sta zente e le popolasioni berbere che le xe autoctone almanco dal 6000 a.C. I berberi i no gavea na lengoa scrita e no ghe fonti serte par conosar el so pasà. I primi documenti scriti se cata co l’arivo de le siviltà axiatiche su le coste de l’Africa. Tra i documenti egisi ghe solo qualche nota su l’area che ora ciamemo Algeria.

Storia Antica[canbia | canbia sorxente]

Sito de Cartàxene

I berberi, i primi abitanti de l’Algeria, i xe stà sempre pi spinti verso l’interno desertico da i vari popoli invasori. I fenici i xe rivà qi en tel X secolo a.C. e i gha costruio Cartàxene e altri aprodi longo la costa. El marcà tra i berberi e i fenici el gha continuà per secoli, ma le popolasioni bebrbere le se sa catà en ne situasion de dipendensa da i invasori. Cartàxene la gha perso forsa co le guere puniche e la xe stà distruta en tel 146 a.C. I berberi i xe tornà en coltrol del teritorio e i gha organisà na serie de sità stato soto la guida de on re. Dopo i fenici, i romani i xe rivà en te la zona e i gha scominsià a conquistar tuta la costa. Tuta l’area de l’Algeria longo la costa la xera soto el control roman dal 24 d.C. I berberi i se sa oposto a i romani, ma i no xe mia stà boni de tornar a l’indipendensa. El cristianeximo el xe rivà a l’inisio del II secolo e i berberi i xe diventà cristiani en poco tempo. Tanti de i primi misionari che gha portà el critianeximo en Eoropa i xera berberi. San Agostino, vescovo de Tagaste e scritore cristiano, el xera on berbero.

Islam[canbia | canbia sorxente]

Dopo el cristianeximo, el pi grande evento culturale e sociale de l’Algeria el xe stà l’arivo de l’Islam en tel VII secolo. La nova religion e la nova lengoa, l’arabo, el gha trasformà la società maghrebina. I primi musulmani a rivar qi i xe stà le armate de i Umayyadi, na dinastia con cavedal a Damasco. Dopo de lori, el control de la region el xe andà a i Abbasidi (750) che i comandava da Baghdad. I Abbasidi i gha lasà el poter a i imam Rustimidi che gavea el loro sentro a Tahirt, poco a sud de Algieri. I imam i xera considerà omeni santi e i gha dato vita a scole par studiar el Corano e le siense. I iman i no xe stà boni de organixar on esercito e i xe presto finii soto el control de i Fatimidi (909) de l’Egito. Anca i Fatimidi i gha lasà el control de la region a n’altra dinastia, i Ziridi – de origine berbera – che i gha tegnù el poter dal 972 al 1148. I Ziridi i gha aministrà mal el teritorio ma i xe riusidi a islamisar el interno del paexe. I berberi che abitava en tel Maghreb de l’ovest (la zona del Maroco moderno) i se sa organisà soto la guida de i Almoravidi e i gha scominsià l’espansion verso el nord (la Spagna) e l’est, rivando a Algeri en tel 1106. Meso secolo dopo la xe sta la olta de i Almoahidi che i gha caturà tuto el Maghreb verso el 1176. Le guere in Spagna le gha indebolio i Almoahidi che i gha perso el teritorio de l’Algeria, che el xe pasà a i Zayanidi. I Zayanidi i gha tegnù el teritorio fin a la metà del XVI secolo, co l’impero otoman el gha vù el sopravento. Durante sti ani, la pirateria la xe diventà l’atività pi importante de la costa nord africana. I famoxi pirati Aruj e Khair ad Din, conosù come el Barbarosa, i gavea i so porti principali en Tunisia e a Algeri.

Otomani[canbia | canbia sorxente]

Soto la regensa de Khair ad Din, Algeri la xe diventà el sentro del poter otomano en nord Africa. Par 300 ani, Algeri la sarà la cavedal del Maghreb, governà da on pasià nominà da i Turchi. Berberi e arabi i no podea laorar en tel governo de la region. En tel 1671, i pirati i gha sostegnù on leader locale che i ciamava dey. En tel 1710, el dey el sostituiva el pasià e el controlo otomano el xe diventà de poco conto. Dopo le guere napoleoniche, tuti i Stati eoropei i se sa mesi contro i Stati maghrebini, ciamadi anca Stati barbareschi. I Stati Uniti de America i gha anca fato do guere (guere Barbaresche 1801-5 e 1815).

Storia moderna[canbia | canbia sorxente]

En tel 1827, Hussein Dey, governator de Algieri, el gha vù na discusion co el console francexe. La Francia la gha risposto co el bloco navale de la sità par tre ani. El 5 lulio 1830, i francexi i gha ocupà la sità e scominsià a conquistar la costa e l’interno. En tel 1848, el parlamento francexe el gha anexo i teritori ocuà e creà i novi dipartimenti francexi de Algeri, Orano e Costantine. Le tere pi bele le xe andà a i coloni francexi e tute le tradisioni locali distrute. I algerini i xera considerà de nasionalità francexe, ma sensa i diriti de i citadini francexi. L’ocupasion francexe la xe durà 132 ani.

Resistensa[canbia | canbia sorxente]

Dopo la prima guera mondiale, vari grupi de oposision – specailmente el Fronte de Libarasion Nasionale e el Movimento Nasionale Algerino – i se sa oposto a i francexi. Tute le riforme le xera ostacolà da i coloni francexi. I algerini i gha sostegnù la Francia durante la seconda guera mondiale. En tel 1943, Ferhat Abbas, on leader de l’oposision, el gha presentà on manifesto co al richiesta de na costitusion algerina. I francexi i gha risposto co l’oferta de la citadinansa francexe a on grupo ristreto de algerini. La tension la xe sciopà el 8 magio 1945 co i francexi i gha verto el fogo so i dimostranti e i gha arestà o copà quasi tuti i leader de l’oposision. I francexi i gha dito che i gha copà 6 000 persone, i algerini i dixe che i morti i xe stà pi de 50 000.

Guera de indipendensa[canbia | canbia sorxente]

Dal 1 novembre, 1954 al 18 marso, 1962, l’Algeria la gha combatù na dura e brutale guera par l’indipendensa. 2 milioni de algerini i xe morti durante la guera e altri 3 milioni i gha dovù vivar come sfoladi. Co i francexi i gha firmà la paxe, pi de on milion de coloni i gha lasà el paexe e l’Algeria al xe entrà en on periodo de violensa e de faide interne. El 3 lulio 1962 Algeria la deventava indinpendente, e el novo governo de Ben Bella el podea finalmente laorar su la situasion interna. Ben Bella el gha naxionalisà tute le propietà de i francexi che i xera scapai e asunto poteri sempre pi forti al governo. L’oposision la gha domandà on ritorno a la democrasia. A la fin del 1963 la situasion la xera texa. El ministro de la difesa Houari Boumediene el gha mandà i soldadi a combatar contro i opositori. Co el presidente Ben Bella el gha provà a formar on governo de unità nasionale, i militari i xe intervegnudi.

Militari[canbia | canbia sorxente]

El 19 giunio 1965, Boumediene el gha organisà on colpo de stato e Ben Bella el xe stà meso a i aresti domiciliari. El verà libarà solo en tel 1980. El novo omo forte de Algeri el gha sospeso el parlamento (Asemblea Naxionale) e sospeso la Costitusion. El Consiglio de la Rivolusion, composto da militari, el xera in controlo de l’andamento del paexe. Boumediene el savea che el no podea mia governar da solo. Lu el no gavea mia on sostegno de base e el no xera conosù fora da i militari. Par questo el gha dovù usar el governo col sostegno de on comitato de militari.

La nova Costittusion la xe stà aprovà en tel 1976 e do ani pi tardi Boumediene el xe morto. El novo presidente, Chadli Bendjedid, el gha laorà par el cambiamento del paexe aprovando el multipartitismo. Tra i novi partiti, el Fronte de Salvesa Islamico (FIS) el xe stà quelo pi bon de caturar el sostegno de la zente, stufa de ani de militarismo. En tel 1990, el FIS el gha vinto le elesioni municipali, e en tel 1991, el xera en vantagio durante le elesioni nasionali.

Guera Sivile[canbia | canbia sorxente]

Co i militari i gha visto la vitoria iminente de el FIS, i xe intervegnui. El risultà el xe stà on continuo uso de la violensa da ambo le parti. En tel 1999 la nova Costitusion la proibiva i partiti religiosi e Abdelaziz Bouteflika el xe diventà el presidente. En tel setembre 2000, el presidente el gha oferto na amnestia a tuti i combatenti de la guera sivile. La majoria la gha aderì a l’amnistia, ma la violensa no la xe sparia. En tel 2004 Bouteflika el xe stà rieleto sensa el sostegno de i militari e n’ano dopo el gha riproposto l’amnestia. La situasion la se sa stabilizà.