Houston Rockets

Da Wikipedia, l'ençiclopedia libara.



I Houston Rockets i ze una de łe trenta scuadre de basket che łe zoga inte ła NBA, el canpionado de basket de i Stati Unii; el só pałaseto el ze el Toyota Center de Houston, e el nome el ze stà sernìo par onorar el dezviłupo del mìsiłe (“rocket”, mìsiłe) Atlas de l’aeronàutega meregana.

Storia de ła scuadra[canbia | canbia el còdaxe]

Fondài inte el 1967 a San Diego, no i ga mìa vùo ani boni a l’inisio, anca se A ghe jera zogadori forti come Elvin Hayes, Calvin Murphy o Rudy Tomjanovich; pian pian a metà ani Setanta e dopo ver canbià ałenador i ze riusìi a ndar a i playoff anca grasie a Moses Malone (soranomenà "The chairman of the boards", “El presidente de i consiji de aministrasion”). Inte el 1981 i ga anca zogà ła finałe contro i Boston Celtics, ma i ga perso de bruto. L'ano dopo Malone el ze stà vendùo parché el só contrato el jera scadùo, e al só posto A ze rivà do sentri ben alti: Ralph Sampson e Hakeem Olajuwon, do zóvani che i ga formà na copia ciamada “Tóri Zemełe” pa ła só altesa. Dopo serti ani de rodajo e de alti e basi, inte el 1994 e anca inte el 1995 i ze riusìi finalmente a vìnsar el canpionado grasie al dominio totałe de Olajuwon, che par do ani drio man el se ga ciapà el tìtoło de MVP.

Dopo 'sti ani boni A ghe ze stà un fià de cało fin a metà ani Domiłe, che rento a cueło A se ga fato nome el sentro Yao Ming, Tracy McGrady e James Posey, sansa parò mai otenjer vitorie inportanti.

Inte 'sti ùltemi ani A ze rivà el playmaker James Harden che intorno a cueło pian pian A ze stà costruìa na scuadra senpre pì bona: inte el 2021 A ze sciopà tuta ła só braura, jutada da l'arivo de l'ałenador Mike D’Antoni che el ze riusìo a cavar fora da Harden łe só mejo cuałità meténdoghe in man el zogo.


Controło de autoritàVIAF (EN137237638 · LCCN (ENn82242609 · WorldCat Identities (ENn82-242609
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Houston_Rockets&oldid=1099622"