Discusion Juto:Convension de scritura

Grafìa Vèneta Internasionaƚe Moderna

Ncora in giugno calche wikipedian che scrive in DECA me segnaƚava sta notisia. Pararìa in sostansa che ƚa comision regionaƚe, che a so tenpo ƚa gheva tirà fora la GVU, ƚa sia orientà a adotar sto sistema. Donca i wikipediani academisi (de l'Academia de ƚa Bona Creansa) i proponeva de adotarla, se no come grafìa uficiaƚe de ƚa wiki come grafìa prinsipaƚe, e pa' i mesaji de sistema e magari ƚe pàgine da ajuto.

Go spetà fin deso a tacar la discusion uficiaƚe parché go preferìo no scominsiare na discusion cusì inportante inte'l periodo de le vacanse. Ma semo in setenbre e xe ora de scominsiar a parlarghine (però preferiria 'ver un link pì isitusionaƚe, parché xe vero che chel sito el xe de ƚa Region, ma xe anca vero che go catà ƚa notisia soƚo che là... @Dragalog 502305]

ghe xe altre fonti?).

Mi no so contrario a 'ver un standard pa' i mesaji de sistema e pa' ƚe pàgine de ajuto (se i amisi del Projeto:DECA i ga voja de metarse a sistemarle :) ). Cogna però tegner prexente anca el parer de i altri projeti, overo Wikisource e Wikisionario, che i xe influensai anca lori dal eventuaƚe canbio so i mesaji de sistema. Donca me piaxaria sentir anca el parer de i aministradori de chei progeti (@Candalua e Tn4196] ).

Par farghine ƚa grafìa uficiaƚe par conto mio xe masa presto. Se ris-cia de limitar i contributi de ƚa xente, parché soƚo che cueƚi che ga fato el corso de l'Academia i xe boni scrivare in chel modo. Sensa contar po che i venetofoni no i ghe xe solo che in Vèneto e semo drio parlar de na posibiƚe decixion de na comision de esperti mesa in pìe da ƚa Region Vèneto e no de na decixion ciapà da na Academia riconosua da tuti i venetofoni...--GatoSelvadego (msj) 18:11, 8 set 2018 (CEST)

Pinghemo un fià de xente va... @Vajotwo, Davy1509, Enrico, Ciaurlec, Alvise Morosin, L'Ospite Inatteso, Perkwunos, Salgaron, Meppolo, Marisol, Ffeeeddee, e ElConejanes]

(i ativi); @Aerzperch, Achillu, Beppe, Frigotoni, Gatto099, Giovanni, Groucho85, L.V., Marco 27, Nick1915, OrbiliusMagister,  e Semolo75]
(i storisi, inte'l caxo i pasase de cuà); @Cimiz 020105, Cmpfrc 814739, Loyev 274931, Piovedrum 941980, Shanks 214182, Seele 894214,  e Ichigo 244152]
 (i academisi). Se go desmetegà calchedun me scuxo.--GatoSelvadego (msj) 18:27, 8 set 2018 (CEST)

Ma el novo manuaƚe de grafia veneta internasionaƚe moderna dove se cata in PDF? Parché mì no riesso mia vedarlo. Xè zà disponibiƚe? Mi me ricordo soƚo sto qua a drita.

--- Vajotwo (posta) 18:35, 8 set 2018 (CEST)

G'o dà n'ociada al sito, e me par che no i senta el bisogno de farghene un pdf. El manual de vint'ani fa ł'e ancora bon, ghe saria da vedar le vere poche diferense vegnue fora dal laoro de sti ultimi ani. Anca par mi ł'e giusto łasar libertà de scritura, scaraboci, sbaji e stramberie ne łe discusioni, ma sercar de uniformar la grafia ne łe voxe: se un utente el sbaja no gh'e mia da sbranarlo, emo sbajà tuti (e mi par primo sbajo molto anca adeso); se ghe dixe con creansa de vardar el manual o sistememo diretamente i erori de persona. A propoxito, i siori che i a lavorà al manuale je tra i pì grandi studiosi riconosui in materia. - εΔω 09:53, 9 set 2018 (CEST)

Sì, à rexon @OrbiliusMagister]

. La libertà de scritura par mi la deve restar cuà su vec.wiki, come che l'é sènpre stat. Par el rèsto, concòrde co @GatoSelvadego]

che l'é prest par far de la Grafia Veneta Ufficiale en standard par noaltri. Stes discorso par mi su'l Wikisionario: a'l momènto se pòl far en po de pràtica co sta nòva grafìa, e se la funẑiona e il la acèta tuti, alora pason a cuela. Ma prèsa, almancol mi, no ghen ò. Tn4196 cónteme 17:08, 9 set 2018 (CEST)

Par deso no ghe xe gnancora na grafìa uficialmente riconosua da tuti i venetofoni (ciapo rento anca i veneto-brasiliani, i triestini, i graisani, i istriani, i trentini...) donca mi no sarìa par adotar un standard par tute le voxe, come che me par che sostegna Orbilius. Anca parché se ris-cia de limitar ancora de pì el nùmaro de cueƚi che pol contribuir. Ghe xe varie grafìe documentae e par mi le pàgine in ns-0 (e no soƚo che le discusion) ƚe pol èsar scrite in chel modo, basta che in sima a ƚa pàgina ghe sia el modèl che diga la grafìa (e ƚa variansa). Chel che secondo mi invese ghe vole xe adotar un standard pa' ƚa sidebar, i mesaji de sistema, ƚa pàgina prinsipale e ƚe pàgine da ajuto. Parché xe bruto rivar drento a na wiki e catar la sidebar scrita inte un modo e ƚa home inte 'n altro. E sta GVIM ƚa podaria anca èsar el standard. E visto che canbiar la sidebar ga i so efeti anca so i altri progeti voƚevo apunto saver el parer de Candalua e Tn4196. PS: @Vajotwo]

se te segui el link meso sora so'l sito te cati tuta la spiegasion. El xe bastansa fasile come metodo, soratuto se se conose un fià el alfabeto fonetego...--GatoSelvadego (msj) 12:34, 10 set 2018 (CEST)

PPS: Me par anca giusto informarve del fato che ƚe utense de: Dragalog, Piovedrum, Ichigo e Loyev ƚe xe blocae (co bloco infinìo) so it.wiki parché i dixe che i xe sockpuppet (ghe xe vegnesto el sospeto co i ga visto che i laorava a le stese voxe, overo cueƚa de l'Academia e cueƚa de Mocellin, voxe po scanselae parché considerae no ensiclopedeghe). Mi personalmente go vùo modo de conosare dal vivo Piovedrum, Seele e Shanks. No go gnancora vùo el piaser de conosare i altri, ma credo che se trate de utense separae e no de sock (senplisemente ghe capita de scrivare dal steso IP, del resto i xe tuti ligai a l'Academia). Penso anca che no ghe sia da parte de l'Academia ƚa voƚontà de farse reclan(e farghe reclan a la so scritura) doparando ƚa wiki; i ga laorà co inportanti università foreste, donca no i ga pròpio bixogno de noaltri che no ne conose scuaxi nisun... Xe pì un vantajo par noaltri (novi utenti che riva... parché co i fa i corsi i ghe dixe che se i vol tegnerse alenai a scrivare i pol vegner cuà), che par lori sto raporto. Xe logico comuncue che lori i tire acua al so muƚin, ma cuà ghe xe posto anca pa' i altri muƚini se i voƚe dar na man, e i ƚo sa ben anca a l'Academia.--GatoSelvadego (msj) 13:14, 10 set 2018 (CEST)

Ciao, go da n'ociada a pàjina che ti ga łinkà e vołevo na s-cianta far ciaro su el parché no ła me piaxe masa e su el parché no me fido mìa tanto de chi che ła ga butada zxo. Vago a punti:

1) Scominsemo da łe vocałe: ghe xé scrito che łe vocałe àtone łe xé zsincue: /a, e, i, o, u/. Cuesto no xé vero, zsincue łe xé inte'l tałian. In venezsian łe rimane sète, come cuełe tòniche. Difati, cuando che inte na paroła l'azsénto el casca su na vocał alta, cuindi su na [i] o su na [u], tute łe [e] e łe [o] dełe sìłabe dopo łe xé svèrte, anca se łe xé àtone. Vardè: co mi digo "cuło" o "vivo", łe [o] ała fine de łe parołe łe xé svèrte come ła [o] de "òmo" (/'kuɰɔ/; /'vivɔ/). Sentì? Conpanje łe xé łe [e]: inte łe parołe "dighe!" o "dure", łe [e] finałi łe xé svèrte come in "bèło" (/'digɛ/; /'durɛ/). Pensé soło al comando "dìmeło!" (it. Dimmelo!), ła [e] e ła [o] łe xé svèrte (/'dimɛɔ/). Sto fenòmeno cuà el se riflète anca 'nt' el tałian rejonał che parlémo in Veneto.

2) Inte ła sezsion de el sòno [i/ì], i dà come alfabeto IPA el sòno /e/, che, el xé ciaro, xé no sbajo.

3) Inte łe aprosimante i méte la [l], ma no la [r]. Parché?

4) Inte ła sezsion de la [ł] tajada, i dixe che l'IPA corispetivo el xé na "e" picenina. Łora parché no ła vien doparada par tuto el rèsto de i exémpi de łe altre łétare?

5) Ghe xé na sezsion ciamada "N, n [ŋ]". Preméto che il sòno /ŋ/ el xé cueło che faxémo inconzsiaménte co ghe xé na "n" seguìa da na vełar, tipo inte ła paroła "anca" /'aŋka/. Par Inténdarse, el sòno conpanjo del sufiso -ing ingléxe. Come xé posìbiłe far un sòno sìmiłe inte łe parołe "contar" e "confuxion"?! In "contar", gavémo una /n/ normał; in "confuxion", gavémo invézse el sòno /ɱ/.

6) Come se pol aver na grafìa VENETA che ła se difarénzsia e uxa ŁETARE divèrse a seconda da dove che ti vién? (TH - Z, DH - D ecc.) Sta grafia no ła pol èsar ufizsiał parché no ła xé UNITARIA!

Dài tuti sti sbaji, mi pòso dir che sta cuà no ła xé stada fata da lenguisti o da lenguisti conpeténti. Ghe xé masa inprezsixioni, masa robe butałe łà che no łe xé stae pensà a fondo, l'alfabeto fonetico el xé sta scrito coi pìe... a mi, no el me piaxé njanca un fià, jénte. --DavideAnastasio (msj) 21:38, 12 set 2018 (CEST)

1. A livel de grafìa, che xe chel che conta, la E e la O co le xe àtone le se scrive senpre e e o, sia che le sia verte sia che le sia serae. No se mete pì de un asento, come che fa invese le fransexe. Cuesto i intende.
2. Penso se trate de un eror de stempa.
3. Parché la R la xe na vibrante, no na aprosimante.
4. Anca inte'l manuaƚe de la GVU, cueƚo del '95, i mete come sinboƚo IPA ƚa e alta pa' ƚa ƚ. Imho xe sbaƚià, soƚo che so'l CanIPA ghe xe un sinboƚo dedicà a ƚa nostra Ƚ, so'l IPA imho el manca e se ghe mete na roba che ghe insomeja.
5. No, femo senpre ƚa veƚare. Dal Manual de ƚa GVU: "la n velare ha una fascia di impiego molto più larga, estendendosi alla posizione preconsonantica, anche se la consonante che segue è una p o una b, od è posta alla fine". E ƚa naxaƚe labiodentaƚe (/ɱ/) in lengua vèneta no ƚa ghe xe.
6. Si che ƚa xe unitaria. El alfabeto el xe uno par tuti, e ognuno el scrive co ƚe letare che'l ga inte ƚa so variansa. Xe fadiga far na grafìa co carateri che posa èsar leti in modo difarente in baxe a ƚa proveniensa del parlante, come che gheva proà far el Brunelli o come che proa fare Mauro Trevixan (se no me ricordo mal). Parché xe vero che de soƚito ndove che ghe xe /z/ ghe xe /dz/ o /ð/, e 'ndove che ghe xe /s/ ghe xe /ts/ o /θ/, ma ghe xe de ƚe ecesion. Par exenpio i venesiani i dixe /paze/ e mi digo /pase/. Opure, deso se dixe /voze/ ma na volta inte'l vixentin se dixea /vose/...
   

PS: Vedo che te scrivi co ƚe zx e zs del vècio sistema de Brunelli (sistema che ani fa el jera sta adotà da sta wiki, defati mi al inisio ghevo pì o meno inparà chel modo)... Beh, te avixo che el steso Brunelli no'l dòpara pì chela grafìa, basta darghe un ocio a ƚa version pì axornà del so manuaƚe. Dito cuesto, se te vardi ben mi no dòparo sto sistema de scritura (par exenpio el DECA/GVIM el ga z-s-ts-dh-th-dz, mi che dòparo ƚa GVU ridota in stiƚe wikisionario go x-s-ç-đ-ẑ-z), e ghe so masa afesionà pa' canbiarlo. Però no'l me disturbaria mia vedarlo so ƚa sidebar (par exenpio), anca parché el xe un sistema fonetego e inte un futuro se se canbia ncora se riusirìa canbiar tuto anca co un bot.--GatoSelvadego (msj) 15:32, 13 set 2018 (CEST)

Bondì a tuti.

A parte che, @DavideAnastasio]

, crear na utensa a posta par sparar contro l'Academia de ła Bona Creansa portando argomenti che i fa acua in maniera ciara el ze romài ridìcoło da védar (farse ła guera par 'ste robe el ze fora contesto, cuà!), rengrasio @GatoSelvadego]

pa'l sondajo.

A vedo da i cominti che el problema/paura el ze cuel de łimitar ła łibartà de scritura parsonałe, ma ła domanda ła ze ciara: 'ver un standard pa' i mesaji de sistema e pa' ƚe pàgine de ajuto. A no ze mìa scrito "Gavemo da tacar scrìvar come che ga dito ła Rejon", sindo na ensiclopedìa łìbara A no ze posìbiłe na inpozision cusì; ma recordémose che ła ze sì łìbara, ma che ła ze na ensiclopedìa: a dir che ła pol venjer doparada par studi, par fonte de dati, par ła łengua. Gavé justamente parlà de Braziłe, Mèsico, nord sud Veneto evc: pensé a'l poro braziłian, ma anca a un ingleze o un napołetan, che'l vopie inparar a scrìvar in veneto e che'l vien cuà rento! El taca védar, inte ła homepage (e nò tanto in volta eh, homepage), "ençiclopedia" e "prinsipałe", "pajina" e "pagine", "discussion" e "discusion"... che idèa se fało? De un grupo de mati, de na scarpa e un sòcoło, e justamente el ciapa paura! Cuà apunto A se trata de capir se continuar a ndar vanti co na scarpa e un sòcoło, o se métarse sù i scarponi: A ze ciaro che l'Academia ła propone i só scarponi, i ze cuełi che atualmente so'l marcà i ze i mejo...

Se dopo ła zente la vol scrìvar come prima parché ła ze abituada, par afeto, par pigrisia o par comodità, ła pol ben farlo anca se, A ve recordo, onji sandbox dove far potaceti ła ze parte de un dezerto ben pì grando.

Donca ła domanda vera ła ze: vołemo darghe na imàjine, na covertina, pì seria e łineare a Wikivec, o vołemo continuar a dopararla pa zogatołar e farse i dispeti canbiàndose łe parołete? Montemo so na màchina, o restemo so na carioła co ła roda zbuzada? Penseghe, se vołé... Piovedrum 941980 (msj) 11:43, 14 set 2018 (CEST)

Anca mì saria par partire co no standard novo e riconossuo da tuti qua dentro ... no standard che gavarò da inparare anca mì eh, no me tiro mia fora. L'ideaƚe saria vere na grafia unitaria tipo queƚa proposta da ƚa comision regionaƚe, ƚa pì nova atualmente disponibiƚe. Faxemo in modo che tuti i posa studiare sto novo modo de scrivare in veneto e adatarse al fenomeno. No standard unico de sicuro el portaria vantaji a tuti i fruitori de ƚa nostra Wikipedia. --- Vajotwo (posta) 12:35, 14 set 2018 (CEST)

Asolutamènte sì, mi parle da primieròt, persona che parla te'n dialèto che ẑèrti i considera vèneto, altri molto meno, ma visto che in giro la magioranẑa i ne include te la léngua vèneta scrive cuà, e pense che in tanti i me pòde capir. El fato l'é che in tanti pòsti se avea dei continuum e nò de le lingue standard, a partir da'l caxo de l'Italia da'l 1300 in pòi. Sènẑa en standard no se fa nient, e in cuesto no pòde che sostégner @Piovedrum 941980]

. Donca son co @GatoSelvadego] , par uniformar el sidebar, cuà e su i altri progèti, secondo en standard condivixo da tuti (te i lìmiti de'l posìbile, se intènde!). Se no se cata en standard almancol te la grafìa (g/j, s/ss, ecc.), pasa pròpio la voja de leder a chi che pasa par la Wikipedia vèneta. Tn4196 cónteme 15:47, 14 set 2018 (CEST)