Difarense intrà łe version de "Che Guevara"

Da Wikipedia, l'ençiclopedia libara.
[Version verifegà][Version verifegà]
Contenuto cancellato Contenuto aggiunto
Xqbot (discusion | contribusion)
p Robot: no:Che Guevara el xe on articoło de cuałità
Xqbot (discusion | contribusion)
p Robot: os:Че Гевара, Эрнесто el xe on articoło de cuałità
Riga 259: Riga 259:
{{Link GA|en}}
{{Link GA|en}}
{{Link GA|no}}
{{Link GA|no}}
{{Link GA|os}}

Version de le 21:41, 3 xug 2014

Ernesto Guevara De la Serna pì noto come Che Guevara (Rosario, 14 de giugno 1928La Higuera, 9 de otobre 1967) xe stà un [[rivołusion |rivołusionario]] [[Argentina |argentin]].


El soranome de "Che" el ghe xe sta dà dai so conpagni de łota cubani in Mesico, e el vien dal fato che Guevara, come tuti i argentini, el dixeva speso ł'ałocusion "che". Ła paroła ła deriva dała łéngoa Mapuche e vol dir "omo", "persona", e ła xe sta ciapà 'nte ło spagnoło parlà in Argentina e Uruguay, par ciamar ł'atension de on interłocutor, o pì in xeneral, come on'esclamasion simile a "hey".

Biografia

Cronołogia

  • 1928-1930 - El nase a Rosario el 14 de giugno[1], primo de sinque fiołi, da Celia de la Serna e Ernesto Guevara Lynch. El ga pasà i primi du ani de vita 'ntel Nord de ł'Argentina, 'nte ła xona de Misiones. El ga soferto de 'na forma cronica de asma e ła so fameja ła se ga trasferìo so ła Sierra de Alta Gracia, visin a Córdoba.
  • 1945-1950 - El se trasferise a Buenos Aires insieme ała so fameja e el łaora come inpiegato munisipal pur frequentando ła Facoltà de Medisina. El fa el so primo viajo de 4.500 km in motorin insieme al so mejor amigo Alberto Granado.
  • 1951-1952 - El viaja atraverso el Ciłe e el Sud America fin ała Florida.
  • 1953 - El se laurea e el parte par on terzo viajo atraverso el Sud America, stavolta in compagnia de on altro amigo, Carlos Calica Ferrer. El taca a intaresarse ała połitega e el se avisina al comunismo.
  • 1954-1956 - El Conoce ła xovane peruviana Hilda Gadea che ła sposarà 'ntel '56. Da eła el ga avudo 'na fioła, Hildita. El se trasferise a Sità del Mesico. El Conose Fidel Castro e el vien arestà insieme a altri cubani. El vien łibarado dopo sirca du mexi de prexon.
  • 1957-1958 -Come "dotor-guerijero" el partecipa al fianco de Castro a ł'invaxion deła Sierra Maestra a ł'Avana e ała Bataja de Santa Clara.
  • 1959-1960 - El diventa sitadin cuban e el entra a far parte del governo castrista come ministro de ł'Industria e presidente deła Banca Nasional. Par on serto periodo el xe diretor del carsere La Cabaña. El se marida co Aleida March da cui el gavaà quatro fiołi (Aleidita, Camilo, Celia, Ernesto). El fa viaji diplomateghi a ł'estaro.
  • 1961-1964 - El partesipa ała conferensa dei stati mericani a Punta del Este. El vien meso al comando deła Difexa durante ła crixi deła Baia dei Porci. El incontra a Algeri Ben Bella, el partesipa a Mosca ai festejamenti par el 47.mo aniversario deła Rivołusion de Otobre, el intervien a New York a ł'asenblea de ł'ONU. Inte sta sircostansa el pronuncia ała tełevixion mericana on durisimo discorso indove el riaferma ła so poxisone anti-cavedałistega. El parte par on łongo viajo in Africa.
  • 1965 - A marso el rientra a Cuba e ł'apare par ł'ultima volta in publico. El 1° de apriłe, inte 'na łetara a Castro, el anuncia łe so dimision da ogni carica e da sitadin cuban. Il mexe dopo el va segretamente in Congo par ajutar miłitarmente i rivoltoxi durante ła crixi del Congo. El ghe restarà fin a novenbre quando - altretanto clandestinamente - el fa rientro a Cuba. Insieme a on grupo de fedełi tra cui Tania el prepara on piano de guerija par portar ła rivołusion in Bołivia.
  • 1966 - A novenbre el 'riva soto falso nome in Bołivia e el taca a scrivare el "Diario".
  • 1967 - A causa de quache spion ła so posibiłe presensa in Bołivia ła gera sta segnałà dała stanpa. Nonostante sti avertimenti, ł'exercito bołivian el xe ciapà de sorprexa durante alcune perlustrasion 'nte ł'area del rio Ñancaguazu, afluente del rio Grande.Nonostante sti primi sucesi, ła guerija no ł'incontra ł'apozo dexiderà. Ł'opoxision de alcuni menbri del partito comunista bołivian, che i reclamava ła diresion dełe operasion, ła scarsa adexion dełe popołasion contadine, martełae da 'na propaganda nasionałista, contro ł'invaxion straniera, da parte del governo ditatoriałe del generałe Barrientos, łe inospidałi rejon, coerte da boscaja spinosa e dexerti, e ła catura e sucesiva dełasion, anca soto tortura, de alcuni menbri deła guerija, i debiłita ł'asion del Che. Ł'exercito fratanto el consołida łe poxision aumentando numaro e mesi dei conbatenti. Tra agosto e setenbre, oramai bracà da forse sostansialmente superiori, ła so presensa ła vien segnałà da alcuni contadini 'nte łe vałate tra el rio Grande e Pucarà. Ł'8 de otobre inte on scontro a fogo el vien ferìo ałe ganbe e caturà 'nte ła "quebrada del Yuro". El dì dopo el vien copà a sangue fredo 'nte ła scoła del viłajo de La Higuera par ordene de Barrientos. Felix Rodriguez, agente deła CIA de orixine cubana, consijer miłitar de ł'exercito bołivian, el ga scatà łe ultime foto in vita del Che.

Infansia e xoventù

Ła caxa nadal de Ernesto "Che" Guevara a Rosario

Ernesto Guevara de la Serna el xe nato a Rosario, in Argentina, da 'na fameja de orixini spagnołe, basche e irlandexi. I xenitori i gerano Ernesto Guevara Lynch e Celia de la Serna.

Rełativamente ała data de nàsita a se ga notisie discordi: 'nte ła biografia pì conpleta e documentada, queła redata da Jon Lee Anderson a vien cità ł'afermasion de so mare, ła quałe ła ga dito che ła data coreta ła xe el 14 de majo. El gera el primo de sinque fradei (tre mas'ci e do femene). (Ma so pare el gavarà da on secondo matrimonio co' ła pitrice argentina Ana Maria Era altri 3 fiołi, Ramon, Maria Victoria e Ramiro)

Inte sta fameja, benestante e połiticamente de sanca, zà da putin el futuro Che el se ga fato notar par el dinamismo e łe sinpatie radicałi.

Nonostante el sofrise de asma (małe che costrinxarà i Guevara a trasferirse a Còrdoba e che ło ga aflito tuta ła vita), el se ga dedicà ało sport, specialmente al rugby, con otimi risultati.

El ga studià dal 1941 'ntel "Colegio Nacional Deán Funes" e, 'ntel 1948, el se ga iscrito a ł'Università de Buenos Aires par studiar medisina. Dopo diverse interusion, el se ga łaureà 'ntel marso 1953, ma - probabilmente - no 'l fa finìo el tirocinio necesario par exercitar ła profesion medica.

El Sudamerica in moto

Quando el gera ancora studente, Guevara el ga pasà parecio tenpo a viajàr in America Łatina. 'Ntel 1951 on so vecio amigo, Alberto Granado, el ga proposto a Guevara de ciapar on ano de pauxa dai studi in medisina par intraprendare el viajo atraverso el Sudamerica che par ani i se gera proposti de fare. Guevara e el so amigo Alberto i xe partìi dała sità de Alta Gracia a cavało de 'na moto Norton da 500 cc del 1939. Ła so idea ła gera queła de pasar qualche setimana 'ntel lebroxario de San Pablo, in Perù, so łe rive del Rio dełe Amasoni, a far atività de vołontariato. Guevara el ga cuntà sto viajo 'ntel diario "Latinoamericana" (Notas de viaje) da cui - 'ntel 2004 - a xe sta trato el film I diari della motocicletta.

Dopo aver visto tanta mixeria e influensà dałe łeture marxiste, el finìo col pensar che soło ła rivołusion ła gavarìa podesto risolvare łe difarense sociałi e economiche de ł'America Łatina. I so viaj i ghe gà fornio anca ł'idea de non vedare el Sudamerica come tante diverse nasion, ma come on'unica entità, par ła łiberasion deła quałe a gera necesaria 'na strategia de respiro continentale . El ga scuminsià a imaginar ła posibiłità de 'na Ibero-America unìa e sensa confini, łigada da 'na stessa cultura (mestizo).

El Guatemała

Dopo ła łaurea ała scoła medica de ł'Università de Buenos Aires 'ntel 1953, Guevara el ga riscuminsià a viajar, vixitando Bołivia, Perù, Ecuador, Panama, Costa Rica, Nicaragua, Honduras e El Salvador. El xe rivà infine in Guatemała dove el presidente Jacobo Arbenz Guzmán el guidava on governo popułista che el zeercava de portare avanti 'na rivołusion sociałe atraverso varie riforme, soratuto fondiarie.

Guevara el ga ciapà contato anca con diversi exułi cubani, łigà a Fidel Castro, tra cui Antonio "Ñico" López, che el gaveva ciapà parte a ł'ataco deła caxerma "Carlos Manuel de Céspedes" a Bayamo, 'nte ła provincia cubana de Oriente, e che el sarìa morto al ponte Ojo del Toro poco dopo ło sbarco a Cuba deła Granma.

Guevara el gera 'ndà par on periodo 'ntel Salvador par procurarse on novo visto e in seguito el gera ritornà in Guatemała. 'Ntel fratempo, el gera tacà el colpo de Stato de Carlos Castillo Armas, messo in ato con ł'apoxo deła CIA.[2] Łe forze contrarie a Arbenz no łe gera sta grado de arestar el trasporto dełe armi ceche so ferovia. In seguito però, riorganizae e dotae de suporto aereo, łe ga tacà a guadagnar teren. Guevara el xe 'ndà drento inte 'na miłisia armada organizada dai xovani comunisti, ma ben presto a xe ritornà ai so inpegni medeghi. A seguito del colpo de Stato, Guevara el se gera presentà vołontario, ma Arbenz el ga consijà ai sostenidori dotai de sitadinanza estara de abandonar el paexe. Guevara par breve tenpo el se ga sconto 'ntel consołato argentin e po el se ga trasferìo in Mesico.

El colpo de Stato contro Arbenz, apozà dała CIA, el ga consołidà ł'opinion de Guevara che i Stati Unìi i fuse 'na potens inperiałista, che ła sarìa sepnre 'ndà contro i governi intensionai a ridure łe disparità economiche, endemiche in America Łatina e 'nte i altri paexi in via de sviłupo. A sto punto el gera convinto che soło el sociałismo, ragiunto atraverso ła łota armada e difexo dal popoło in armi, el gavarìa risolto i problemi dei paexi poariti.

Ła Rivołusion cubana

Poco dopo ł'arivo in Mesico, el se ga rimeso insieme ai altri exułi cubani che el gaveva incontrà in Guatemała. Quando Fidel Castro el xe rivà a Sità del Mesico, so fradeo Raúl el ghe ga presentà Guevara. Dopo aver ciacoła tuta 'na note, Guevara el se ga convinto che Castro el gera el capo rivołusionario che el gera drio sercar e el ga aderìo al Movimento del 26 de lugjo che el gaveva intel programa de butare zo el ditator cuban Fulgencio Batista. Anca se i se gera mesi d'acordo che Guevara el sarìa sta el soło el dotor, el ga partesipà ł'isteso a ł'adestramento miłitar insieme ai altri menbri del movimento e, ała fine del corso, el xe sta segnałà da ł'istrutor, el cołoneło Alberto Bayo, come el pì bravo de tuti. El 18 de agosto 1955 Guevara el se ga maridà e el 15 de febraro 1956 a xe nata so fioła, Hilda Beatríz.

Quando, el 25 de novenbre 1956, ła nave Granma ła xe partìa da Tuxpan, in Mesico (provincia de Veracruz) ała volta de Cuba, Guevara el gera ł'unico non cuban a bordo. El 2 de diçenbre i xe sbarcà a La Playa de las Coloradas, 'na zona pałudoxa visin a Niquero (Cuba sudoriental). Poco dopo i xe sta atacai dai miłitari de Batista e ła metà de luri i xe morti in conbatimento o sta copà dopo ła catura. I sopravisui, sirca 'na ventina, i se ga riorganisà e i xe scapà so łe montagne deła Sierra Maestra, par condure ła guerijia contro el regime.

'Nte i ultimi dì del diçenbre 1958, el ga direto ł'ataco condoto dała so "squadra suicida" (on reparto che ga fato łe mision pì a ris'cio de ł'exercito rivołusionario)[3] so Santa Clara. Ła xe sta una dełe bataje decixive deła rivołusion, anca se ła serie de inboscade, prima durante la ofensiva so ła Sierra Maestra po' so ła Guisa e l'intiera canpagna dełe pianure de Cauto probabilmente łe ga avudo 'na major inportansa miłitar. Dopo esarse incorto che i so alti ofisiałi, come el generałe Cantillo che el gaveva incontrà Castro ał zucherificio abandonado "Central America", i gera drio far 'na pace separà con Castro, Batista, el 1° de genaro 1959, el scapà 'nte ła Republica Dominicana.

'Ntel governo cuban

El 7 de febraro 1959, el novo governo el ga nominà Guevara "Sitadin cuban par dirito de nàsita". Poco dopo, Guevara el ga scuminsià łe procedure de divorsio da Hilda Gadea. El 2 de giugno 1959, el ga spoxà Aleida March, 'na cubana che ła faxeva parte del Movimento del 26 de lujo.

El e sta nominà comandante deła prexon de San Carlos de La Cabaña a L'Avana, e, par i siè mixi de incarico (dal 2 de genaro al 12 de giugno 1959)[4], el ga sovrintexo ai procesi e ałe execusion de parece persone (secondo alcune stime 20 000), comprexi ex ufisiałi del rexime de Batista, menbri del BRAC (Buró de Represión de Actividades Comunistas, "Ufficio repressione attività comuniste", 'na połisia segreta), acusài de crimini de guera e disidenti połiteghi. Mentre el faxeva el procuratore miłitare el ga influìo so ła sorte (avendo ła posibiłità de dare o manco ł'apeło) de alcuni tra i condanà ała pena cavedal (fonti diverse łe riporta da 55 a "sirca domiła"[5]) tramite fuxiłasion acusài de crimini de guera, torture e omisidi. Secondo Orlando Borrego [6] Guevara el ga fato oservare tute łe regołe procesuałi e el xe sta acusà adiritura de far 'ndar pian i procesi par "exigere eceso de ełementi probatori". Secondo Tony Saunois a xe sta condanai quełi ca gera sta responsabiłi de torture e asasini durante ła ditatura de Batista. In seguito, Guevara el xe diventà dirigente de ł'Istituto Nasional par ła Riforma agraria e po' presidente deła Banca Nazionale de Cuba.

Zà dal 1959, Guevara el ga ajutà a organixar tentativi rivołusionari, a Panama e po' 'nte ła Republica Dominicana.

'Ntel 1960 Guevara el ga ciapà parte socorsi ałe vitime in seguito a ł'esploxion deła nave La Coubre. Mentre ł'operasion de salvatajo ła gera in corso, a xe sucesa 'na seconda esploxion. I morti i xe sta oltre sento.[7] A xe sta inte sta ocaxion che Alberto Korda el ga fato ła so fotografia pì famoxa. A no' xe ancora ciaro se ła nave ła fuse sta sabotà o se ła xe esploxa par on insidente. Quei ca xe par ła teoria del sabotajo i tende a atribuirlo ała Central Intelligence Agency[8] e speso i atribuise ła colpa a William Alexander Morgan [9] on rivałe de Guevara 'nte łe forse anti-Batista dełe province sentrałi, che pì tardi el sarìa 'ndà drento ła CIA. Alcuni exułi cubani i porta invese avanti ła teoria secondo ła quałe ł'atentato el sarìa sta fato dai fiłosovieteghi, nemighi de Guevara [10].

El Che 'ntel 1960 el ga inaugurà el primo canpo de rieducasion, precixamente 'nte ła penixoła de Guanaha.

Dopo i insucessi come diretor de ł'Istituto Nasional par ła Riforma Agraria e deła Banca Nasional de Cuba, Guevara el xe sta nominà ministro de ł'industria. Inte sta poxision, el ga dà el so contributo a modełare el sociałismo cuban, diventando una dełe figure połiteghe pì inportanti de ł'ixoła. 'Ntel so livro Sulla guerriglia, Guevara el ga sostegnuo el modeło cuban de rivołusion, scuminsià da grupeto de guerijeri (foco), sensa ła necesità de ricorare a grandi organizasion che i sostegnese ł'insuresion armasa (dotrina del fogołar). Sta strategia pì tardi ła sarìa fałìa in Bołivia.

Durante ł'invaxion deła Baja dei Porci (1961), Guevara no 'l ga partesipà ai prinsipałi conbatimenti, parché el gera sta asegnado da Castro a on comando 'nte ła provincia pì osidental de Cuba, Pinar del Rio, dove el ga respinto on tentativo d'invaxion. Intanto che el gera drio espletare sto incarico el se ga ferìo in faciao, el ga afermà in seguito ca gera sta ła so pistoła che ła gaveva sparà asidentalmente.

Guevara el ga xugà on ruoło inportante 'nte ło schieramento a Cuba dei misiłi bałisteghi sovieteghi, armai con testate nucleari, cauxa deła crixi de ł'otobre 1962.

Ł'ałontanamento da Cuba

'Ntel diçenbre del 1964 Guevara el xe 'ndà a New York in quałità de capo deła dełegasion cubana e el ga tegnuo on discorso a ł'asenblea xeneral de ł'ONU (ascolta, A ghe xe bisogno de RealPlayer; opure lexi). Inte che ł'ocaxion, el xe 'ndà fora 'ntel programa d'informasion Face the Nation so ła CBS e el ga incontrà diverse personałità e esponenti de grupi połiteghi. Tra questi, el senador statunitense Eugene McCarthy, conponenti del gruppo guidà da Malcolm X e dała radicałe canadexe Michelle Duclos [11][12]. El 17 de diçenbre el xe xołà a Pariji, scuminsiando on viajo de tri mixi, dove che el ga vixità ła Republica Popołare Cinexe, ł'Egito, ł'Algeria, el Ghana, ła Guinea, el Mali, el Dahomey, el Congo-Brazzaville e ła Tanzania, con soste in Irlanda, a Pariji e a Praga. A Algeri, el 24 de febraro 1965, el ga fato ł'ultima aparision publica sol palcosiènico internasional, intervegnendo al "Secondo seminario economico so ła sołidarietà afro - axiatica". 'Ntel so discorso el ga dichiarà: "Inte sta łota fin ała morte a non ghe xe frontiere. Non podemo restar indifarenti davanti a quanto a sucede inte ogni parte del mondo. 'Na vitoria de qualsiasi nasion contro ł'inperiałismo ła xe 'na nostra vitoria, come 'na sconfita de qualsiasi nasion ła xe 'na nostra sconfita" [13][14]. El ga sorprexo tutti proclamando che "I paexi sociałisti i ga el dovere moral de łiquidar el so siłensio conplice co i paexi sfrutadori del mondo osidental". El ga po dełineà anca 'na serie de mixure che, secondo łu, i paexi del bloco comunista i gavarìa dovesto ciapar par rivar a sto scopo [15][16]. El xe ritornà a Cuba el 14 de marso, riçevuo sołenemente a ł'aeroporto de Ł'Avana da Fidel e Raúl Castro, Osvaldo Dorticós e Carlos Rafael Rodríguez. Do setimane dopo, Guevara el se ga ritirà dała vita publica e el xe sparìo. Dove chel fusse el xe restà el grande mistero cuban par tuto el 1965, anca se el gera senpre genericamente considerà el "numaro do" del rexime dopo Castro. Ła so łatitansa ła gera sta variamente atribuìa al rełativo insuceso del piano d'industriałizasion che el gaveva portà avanti da ministro de ł'industria, ałe presion fate so Castro dai Sovieteghi, ałarmai dałe tendense fiło cinexi de Guevara, inte on momento indove ła fratura tra Mosca e Pechino la se gera drio aprofondir, opure a dixacordi tra Guevara e el resto deła dirigenza cubana so ło sviłupo economico de ł'ixoła e so ła so łinea połitega. A xe anca posibiłe che Castro el fusse difidente dała popołarità de Guevara, che ła podeva farlo diventar 'na minacia. I criteghgi de Fidel i aferma che łe so spiegasion so ła sconparsa de Guevara łe xe senpre pareste sospete e pareci i cata sorprendente che Guevara no el ga mia dito łe so intension in publico, ma soło inte 'na łetara priva de data a Castro.

Ł'orientamento fiło cinexe de Guevara el gera senpre pì problematego par Cuba, man a man che ł'economia del paexe ła diventava senpre pì dipendente da ł'Union Sovietega. Dai primi dì deła rivołusion cubana, Guevara el gera sta considerà on sostenidor deła strategia maoista 'nte ł'America Łatina. El so piano par 'na rapida industriałizasion de Cuba par pareci ła gera conparabiłe ała canpagna cinexe del grande balzo in avanti.

Durante ła crixi de ł'otobre 1962, Guevara el ga percepìo come on tradimento sovietego ła decixion - ciapà da Nikita Khruščёv sensa consultar Castro - de ritirare i misiłi da Cuba. El xe diventà quindi pì siético 'nte i confronti de ł'URSS. Come ca gera emerso dal so ultimo discorso a Algeri, el gaveva tacà a vedar ł'emisfero setentrional, guidà a ovest dai Stati Unìi e a est da ł'Union Sovietega, come unica entità sfrutatrice de ł'emisfero meridional.

Dopo che Che Guevara el gera sparìo dała circołasion, Castro, el 16 de giugno 1965, el ga dito che ł'opinion publica ła sarìa sta informà so Guevara quando ło stesso Guevara ło gavarìa ritegnuo oportuno farlo. Il 3 de otobre de queło stesso ano, Castro el ga rexo publica 'na łetara priva de data [17] presumibilmente scritaghe da Guevara diversi mixi prima, in cui el riaffermava ła so sołidarietà con Cuba, ma el dixeva anca ła so intension de abandonar ł'ixoła e de 'ndar a conbatare da altre parti par ła Rivołusion. 'Nte ła stessa łetara Guevara ł'anunciava de dimetarse da tute łe cariche che ł'ocupava, 'ntel governo, 'ntel partito e 'nte łe forse armade. El ga rinuncià anca ała sitadinansa de Cuba, che ła ghe gera sta concesa 'ntel 1959 par i so meriti 'nte ła rivołusion.

In Congo

Durante on incontro, durà tuta ła note tra el 14 e el 15 de marso 1965, Guevara e Castro i se ga catà d'acordo sol fato che el Che el gavarìa guidà personalmente ła prima asion miłitar cubana in Africa.

Ł'operasion cubana 'nte ł'ex Congo Belga (pì tardi Zaire e atualmente Republica Democratega del Congo) ła gera finałizada al sostegno del movimento marxista dei Simba, favorevołe a Patrice Lumumba.

Durante ła mision africana, par oun serto periodo Guevara el xe sta asistìo dal capo guerijero Laurent-Désiré Kabila, che ł'ajutava i sostenidori de Lumumba a condure 'na rivolta, sopresa da ł'exercito congołese 'ntel novenbre de queło steso 1965. Guevara el ga considerà Kabila insignificante, scrivendo de lui "Gnente a me fa credare che el sia ł'omo adato al momento".[18]

Guevara el gaveva 37 ani e non el gaveva mai avudo on'istrusion miłitar formałe. Ła so asma ła ghe gheva infatti evità el servisio miłitar in Argentina, on fato de qual el era sta contento, viste łe so opinion pułiteghe de opoxision al goerno. E gheva, tutavia, łe esperiense deła rivołusion cubana, in particołare ła marcia so Santa Clara, che ła xe sta basiłare 'nte ła vitoria final dełe forse castriste.

Mercenari sudafricani e britannici come Mike Hoare e exułi cubani i ga łaorà con ł'exercito congołese par ostacołar i piani de Guevara. I xe sta in grado de monitorare łe comunicasion dei reparti ai ordeni del rivołusionario argentin, de tendare inboscade ai guerijeri e ałe trupe cubane ogni volta in cui i tentava de atacar, de interonpare łe łinee de rifornimento de Guevara.[19][20] El propoxito de Guevara el gera queło de esportar ła rivołusion cubana indutrinando i Simba a ł'ideołogia comunista insegnandoghe łe stratexìe deła guerija. Ł'inconpetensa, el setarismo e łe łote intestine dełe varie fasion congołexi łe gera sta indicae da Guevara come łe prinsipałi raxon del fałimento deła rivolta.

Dopo sete mixi, małà, sofarente par ł'asma e zo de moral par łe aversità, Guevara el ga abandonà el Congo co' i cubani sopravisi. A on çerto punto, Guevara el gera sta tentà de rimandare a Cuba soło i ferìi, restando a conbatare da łu soło in Congo fin ała fine, par ofrir on exenpio ai rivołusionari. I so conpagni d'arme e du emisari de Fidel Castro i ło ga convinto parò a łasare el canpo de bataja.

Dal momento che Fidel Castro el gaveva meso de dominio publico ła łetara che Guevara el ghe gaveva mandà, indove el rivołusionario argentin el ghe scrito deła so intension a tajar tuti i łigami con Cuba par dedicarsi intieramente ała rivołusion inte łe altre parte del mondo, el Che non ła se ga sentìa moralmente de tornar indrio e el ga pasà i sucesivi siè mixi vivendo da clandestin a Dar-es-Salaam, Praga e 'nte ła Republica Democratega Todesca. Durante sto periodo, el ga scrito łe so memorie so ł'esperiensa in Congo e el ga tacà a ełaborar altri du livri, uno de fiłoxofia (Apuntes Filosóficos) e uno de economia (Notas Económicas).
In tuti sti mexi, Castro el ga sercà de convinsarlo afinché el tornase indrìo, ma Guevara el ga acetà soło quando el vołeva aprofitar par preparar 'na nova inpresa rivołusionaria in America Łatina e che ła so presensa ła sarìa sta sconta.

In Bołivia

Ła guerija

Łe ipotexi so dove Guevara el podese esare finìo łe xe sta ojeo de dibatito par tuto el 1966 e i primi mixi del 1967. El gera sa visto ai scuminsi del 1967 a Dar el Salaam co i rappresentanti del movimento indipendentista moxanbican FRELIMO. Inte on discorso del 1° de majo 1967 a ł'Avana, el ministro dełe forse armade faxente funsion, magior Juan Almeida, el ga dito che Guevara el gera drio "servir ła rivołusion da qualche parte inte ł'America Latina".

So domanda de Fidel Castro, on toco de tera inte 'na zona distante el gera sta conpra dai comunisti bołiviani parché Guevara ło doparasse come baxe e canpo d'adestramento. Probabilmente, par Guevara e i cubani che i ło aconpagnava, la sielta de non tacare a conbatare subito, ma de adestrarse inte sto canpo inte ła rejon de Ñancahuazú el ga conportà pareci ris'ci.

El reparto de Guevara, conposto da sirca 50 combatenti e ciamà ELN (Ejército de Liberación Nacional de Bolivia), el gera ben equipajà e in scuminsio el ga conseguìo on serto numaro de sucesi contro łe forse bołiviane, sora on teren difisiłe e montagnoxo deła rejon de Camiri. In setenbre, tutavia, ł'exercito el xe riusìo a ełiminar du grupi guerijeri, copandoo uno dei capi.

Nonostante ła natura viołenta del conflito, Guevara el ga dà cure mediche a tutti i miłitari bołiviani che i guerijeri i ga ciapà prexonieri e, de seguito, i łi gà łassà 'ndar. Anca dopo ł'ultima bataja de Quebrada del Yuro, indove el xe sta ferìo e ciapà, quando el xe sta condoto inte on sentro de detension provisoria e el ga visto che lì a se catava diversi miłitari bołiviani rimasti ferìi 'ntel conbatimento, el se ga oferto de fornirghe asistenza medica (oferta rifiutada da ł'ufisial bołivian in comando)[21]

In reałtà ł'ipotexi che el Che el fusse drio preparar ła rivołusion in Bołivia ła pare non esare coreta. A xe pì probabiłe, come a conferma anca łe ricerche del giornałista bołiviano José Luis Alcázar, che el fusse drio preparar 'na scoła d'adestramento par guerijeri, par portar inte on secondo tenpo ste forse a sud e 'ndar drento el so Paexe d'orijine, ł'Argentina. [22]

Catura e execusion

Zà da pì de on mexe, dal 31 de agosto, ł'avanguardia de Guevara ła gera resta da soła dopo ł'anientamento da parte de ł'exercito deła retroguardia comandada da Joaquin, a Puerto Mauricio, sol rio Grande.

Guevara, durante i primi dì de otobre, ormai con poche informasion, senza vivari e con scarse vie de scampo, el se gheva rifujà inte on canałon (quebrada) dove el xe sta sircondà da forse miłitari preponderanti. Chi Guevara el xe sta caturà da ł'exercito bołivian, insieme a altri guerijeri, ł'8 de otobre del 1967 'nte ła quebrada del Yuro, a pochi km dal viłajo de La Higuera. El se ga 'rendù dopo esar sta ferìo ałe ganbe e dopo che el so fuxiłe el gera sta distruto da on projetiłe.

Barrientos, apena informà deła catura, el ga dà ł'ordene de coparlo, ma el ga fato girar on comunicato indove el afermava che Che Guevara el gera morto in conbatimento. Guevara el xe sta sarà drento ła scoła del paexe, dove el ga pasà ła note. El xe sta copà 'ntel primo pomerijo sucesivo da Mario Terán, on sergente de ł'exercito sièlto a sorte tra i vołontari. Guevara el ga dito diverse parołe prima deła morte. A se ga dito che el gavarìa acolto cusì el so asasìn: "A so ca te si chi par coparme. Spara dunque, codardo, i te si soło drio copar on uomo".[23] El so corpo el xe sta portà a Vallegrande, dove a ł'ospedałe el xe sta mostrà ała stanpa.[24] Łe fotografie fate ałora łe ga fato nasare lexende come quełe de San Ernesto de La Higuera e El Cristo de Vallegrande.[25]. Dopo che un dotor miłitar el ga tajà łe man al cadavare, ł'exercito bołivian el ga fato sparir el corpo, rifiutandose de dire se i resti i fuse sta sepełìi o bruxà.

Ła cacia a Guevara in Bołivia ła xe sta guidà da Félix Rodríguez, on agente deła CIA che el gera sta infiltrà a Cuba par ciapar contato coi rebełi dei Monti Escambray e con anbienti anti castristi de ł'Avana prima de ł'invaxion ała Baia dei Porci e che el gera sta con suceso fato 'ndar fora da ł'ixoła dopo el fałimento deło sbarco.[26][27] Rodríguez el ga riferìo ła notisia deła catura al quartier general deła CIA a Langley, in Virginia, servendose de diverse stasion de ł'Agenzia situàe in Sud America. Dopo ł'execusion, Rodríguez el se ga tegnù ł'orołojo de Che Guevara.

On altro fato, de minor riłevanza, łigà ała catura e ała morte de Guevara el xe sta ł'aresto de Régis Debray. 'Nte ł'avril del 1967 łe forse governative bołiviane łe ga caturà Debray, on xovane fransexe, profesor de fiłoxofia a ł'Università de ł'Avana, che el gaveva studià a ł'Ecole Normale Supérieure col fiłoxofo marxista Louis Althusser,[28] acusandoło de cołaborar ała guerija. Debray el ga dichiarà con forsa de laorar soło come xornałista e el ga rivełà che Guevara, sconparso da tempo, el gera drio guidar ła guerija. El proceso a Debray (che el xe diventà on caxo internasional) el gera apena tacà quando łe autorità bołiviane, ł'11 de otobre, łe gheva riportà (falsamente) che Guevara el gera sta copà 'nte ło scontro con łe forse governative dei dì prima.

El 15 de otobre Castro el ga riconosesto publicamente ła morte de Guevara e el ga proclamà tre dì de luto nasional. Ła morte del Che ła xe sta vista come on grave fałimento par i movimenti rivołusionari d'inpronta sociałista operanti 'nte ł'America łatina e 'ntel resto del terzo mondo.

El mauxołeo de Che Guevara

'Ntel 1997 i resti del cadavare de Guevara i xe sta exumà visin ała pista de voło a Vallegrande e riportài a Cuba. El 17 de otobre 1997, i suoi resti, asieme a quełi de siè altri combatenti cubani morti durante ła canpagna in Bołivia, i xe sta tumułai con tuti i onori miłitari inte on mauxołeo costruìo apoxitamente 'nte ła sità de Santa Clara, dove trentanove ani prima el gaveva vinto queła che gera sta ritegnùa ła bataja decixiva deła rivołusion cubana.

El monumento el xe coredà da 'na grande statua co ła scrita "Hasta la victoria siempre" e da 'na łapide recante ła parte inisiałe del testo del famoxo ordene de servizio firmà da Fidel Castro el 21 de agosto 1958, con cui a vegneva comunicae łe istrusion operative par ła cołona numaro 8, comandà da Guevara: "Se asigna al comandante Ernesto Guevara la misión de conducir desde la Sierra Maestra hasta la provincias de Las Villas una Columna rebelde y operar en dicho teritorio de acuerdo con el plan estratégico del Ejército rebelde".

So ła guerija

El livro del Che "Sulla Guerriglia" el xe sta considerà par on serto tenpo come on testo definitivo 'nte ła strategia par conbatare guere iregołari. Secondo altri, invese, ła so catura in Bołivia ła testimonia come, en materia, a non exista strategie rixołutive. Che Guevara el gera convinto che el consenso popołar el fuse indispensabiłe par ła rivołusion, e che sensa questo a non fuse posibiłe portar avanti nisun movimento rivołusionario. In realtà, specialmente in Bołivia, ł'idealismo del Che el se ga scontrà co' 'na realtà pì conplesa de queła che ła podeva parer inte on primo momento. I contadini speso i vardava co' difidensa i foresti che i dixeva de conbatare par luri, e el grupo de Guevara el xe restà progresivamente senpre pì ixolado.

So łe cause de ł'insuceso bołivian a xe pexà anca el contesto internasional: i partiti comunisti bołiviani no i ga cołaborà ała insuresion projetà, e in cheła faxe dełicada deła guera freda ogni tentativo de ripropore ła "rivołusion mondiałe" no 'l gera ben visto 'nte i pì grandi paexi del bloco sociałista.

Poeta e sagista. El Guevara "sconosesto"

Sicuramente manco conosesto, esiste anca un Guevara autor de poexie, saji letarari e storeghi. Sti ultimi in particołar no i manca de acutesa, e i se aconpagna a inportanti oservasion połiteghe, come a xe posibiłe par exenpio riscontrar 'ntel comento che el ga scrito sol livro de Pablo Neruda "Canto Generale". Infati, al contrario de pareci miłitari e omani d'armi, el Che el gera estremamente colto e el pol esare definìo on fiłoxofo. Tutavia el gera pì on omo d'asion che on poeta e on fiłoxofo. Riguardo ała so pasion par ła łeteratura e ła poexia, a xe sta catà on so quaderno de racolte de citasion e publicà col titoło Prima di morire - Appunti e note di lettura

Icona rivołusionaria

File:100 4578.JPG
Monumento al Che - La Higuera (Bołivia)

Ała fine dei ani '60 Guevara el diventa on'icona mondial par queła parte de xoventù che ła se riconose 'nte i so ideałi rivołusionari. Anca adeso Ernesto Guevara el xe visto come ła figura de ł'eroe ideal, 'na sorta de eroe sofocleo, che no 'l xe bon de far conpromesi a costo deła so stesa vita.

Guevara el xe sta interpretà al cinema da Francisco Rabal (1968), Omar Sharif (1969), Antonio Banderas (1996), Alfredo Vasco (1999), Gael García Bernal (2002) e (2003) e Eduardo Noriega (2005).

Riferimenti e note

  1. Ła data de nàsita registrada sol so sertificato de nàsita ła xe 14 de giugno 1928, anca se 'na fonte tersiaria (Julia Constenla, cità da Jon Lee Anderson) ła aferma che in realtà el gera nato el 14 de majo deło steso ano. (Constenla ła ga dito che sta informasion ła ghe gera sta dà da 'na figura non identificà che so madre, Celia de la Serna, ła gera xà insinta quando eła e Ernesto Guevara Lynch i se gera maridà e pertanto ła data de nàsita de so fioło ła xe sta spostada on mexe pì tardi par evitar on scandało). Fonte: Anderson, Jon Lee. Che Guevara: A Revolutionary Life, New York: 1997, Grove Press, pp. 3 and 769.
  2. U.S. Department of State, "Foreign Relations, Guatemala, 1952-1954". Online, visionà el 4 de marso 2006
  3. Ernesto Che Guevara, "Suicide Squad: Example Of Revolutionary Morale (brano trato da Episodes of the Cuban Revolutionary War - 1956-58). The Militant Online, vixionado el 27 de marso2006.
  4. Anderson, Jon Lee. Che Guevara: A Revolutionary Life, New York: 1997, Grove Press, p. 372 and p. 425
  5. Alvaro Vargas Llosa, "Così il Che è diventato il logo del capitalismo", Corriere della Sera, 16 de lujo 2005.
  6. "Un bastardo allo scoperto" de Orlando Borrego
  7. Cuban Information Archives, "La Coubre explodes in Havana 1960". Online, vixionà el 26 de febraro 2006. A se pol vedar łe fotografie sol sito cubàn fotospl.com.
  8. Defensa Nacional, "SABOTAJE AL BUQUE LA COUBRE" Online, vixionà el 26 de febraro 2006
  9. The Miami Herald, "Dockworker set ship blast in Havana, American claims". Online, vixionà el 26 de febraro 2006
  10. Guaracabuya.org, "Recuento Histórico:El porque el PCC ordenó volar el barco "La Coubre".Online, vixionà el 26 de febraro 2006
  11. Montreal Gazette, "Liberals picked the wrong issue". Online, visionà el 26 de febraro 2006
  12. Guaracabuya.org, "TERRORISTS CONNECTED TO CUBAN COMMUNIST GOVERNMENT". Online, visionà el 26 de febraro 2006
  13. Ernesto Che Guevara (curadori Rolando E. Bonachea e Nelson P. Valdés), Che: Selected Works of Ernesto Guevara, Cambridge, MA: 1969, p. 350.
  14. Ernesto Che Guevara, "English Translation of Complete Text of Algiers Speech", Online su Sozialistische Klassiker, visionà e 4 de genaro2006
  15. Ernesto Che Guevara, (curadori Rolando E. Bonachea e Nelson P. Valdés), Che: Selected Works of Ernesto Guevara, supra, pp. 352-59.
  16. Ernesto Che Guevara, "English Translation of Complete Text of Algiers Speech", Online su Sozialistische Klassiker, visionà el 4 de genaro 2006.
  17. Ernesto Che Guevara, "Che Guevara's Farewell Letter", 1965. Tradusion inglexe: Su Wikisource.
  18. BBC News,"Profile: Laurent Kabila", 26 May 2001. Online at BBC News, visionà el 7 de agosto 2006.
  19. African History Blog, "Che Guevara's Exploits in the Congo", Che Guevara's Exploits in the Congo Online at African History, visionà el 5 de genaro 2006.
  20. Sito de "Mad" Mike Hoare, "Mad Mike". Online at Geocities.com, visionà el 5 de genaro 2006.
  21. Taibo, Paco Ignacio II. Ernesto Guevara, también conocido como el Che, Barcelona, 1999: Editorial Planeta, p 726.
  22. José Luis Alcázar. Ñacahuasu, la Guerrilla del Che en Bolivia.
  23. Anderson, Jon Lee. Che Guevara: A Revolutionary Life. New York: Grove Press, 1997.
  24. Richard Gott, "Bolivia on the Day of the Death of Che Guevara". Online at Mindfully.org, visionà el 26 de febraro 2006
  25. El Nuevo Cojo Ilustrado, "Galeria Che Guevara". Online, visionà el 27 de apriłe 2006
  26. Rodriguez, Felix I. and John Weisman. Shadow Warrior/the CIA Hero of a Hundred Unknown Battles (Hardcover), New York: 1989, Publisher: Simon & Schuster
  27. MaxNews, "Félix Rodríguez:Kerry No Foe of Castro". Online, visionà el 27 de febraro 2006
  28. marxists.org website, "Louis Althusser" Online, visionà ł'11 de marso 2006.


Opare de Che Guevara

Varda anca

Persone

Film so Che Guevara

  • I diari della motocicletta (ARG/USA 2004) de Walter Salles con Gael García Bernal
  • Che Guevara (USA 2005) de Josh Evans con Eduardo Noriega

Cansoni su Che Guevara

Altri projeti


Łigamenti foresti

Note


Modeło:Link FA Modeło:Link FA Modeło:Link FA Modeło:Link FA Modeło:Link FA Modeło:Link FA Modeło:Link FA Modeło:Link FA Modeło:Link FA Modeło:Link FA Modeło:Link FA Modeło:Link FA Modeło:Link GA Modeło:Link GA Modeło:Link GA Modeło:Link GA

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Che_Guevara&oldid=551762"