Déjà vu

El déjà vu (par Francese /deʒavy/ "zà visto"), el xe la sensazion de gaver vissuo precedentemente un vegnimento o na situazion che la xe drio sucedar.

El termene el xe stà creà dal psicologo francese Émile Boirac (1851–1917), inte'l so libro L'Avenir des sciences psychiques (el futuro de le sienze psicheghe), revision de un savio che el gaveva scrito có uncora el gera studente a l'Università de Chicago, Stai Unii. L'esperienza del déjà vu la xe conpagnada da un senso forte de famegiarità, ma de solito anca da la consavevolezza che no la coresponde verametne a na esperienza realmente vissua. Inte alguni casi, però, ghe xe na sensazion ferma che l'esperienza la sie zenuinamente sucessa inte'l passà.

Par tentar de spiegar sientifigamente el fenomeno, na possibile ipotese zeneral la par essar quela de na sensazion de famegiarità (e donca: "zà visto") falsa, e insoma dovua a na alterazion de le funzion cognitive de reconossimento (atenzion) e recuparo (memoria). Sto senso de famegiarità, a alto valor emotivo, el pol estendarse a tuti i lementi presenti in chel momento inte l'anbiente parcepibile, anca se novi. Altresì podaria restar normai altre funzion cognitive: da questo provegnaria, par esenpio, la consavevolezza par la qual "ma no, no xe vero: no lo go zà vissuo" che in tanti casi si proa, in descordanza co la sensazion stessa.

El déjà vu el par essar un fenomeno bastanza comun. Inte na ricerca del 2003 Alan S. Brown, psicologo a la Southern Methodist University, el stima che el 60% de la popolazion el gabia gavuo in manco na volta inte la vita na esperienza de déjà vu.