Giovanni Battista Belzoni

thumb|250px|right|Belxoni vestìo aea maniera araba Giovanni Battista Belzoni (Padoa, 15 novembre 1778 - Nigeria, 3 dicembre 1823) el xe sta un esplorador veneto e pioniere de l'archeoeogia. El xe ritegnuo uno dei più importanti egitoeogi del mondo.

Biografia

Infansia e gioventù

El gera nato a Padoa al tenpo dea Republica Veneta, el gera ncora un bocia col ga tacà lavorare nea botega de barbiero de so papà. A sedes' ani el se ga trasferio a Roma pa farse frate e studiare idraulica; col ga visto e rovine dea capitae el ga comincià a apasionarse de archeoeogia. I francesi gaveva intanto conquistà l' Italia e i gaveva abojo l' ordine dei frati dove che gera Belxoni. E eora eo el ga comincià a viajare, che gera stà ea so pasion fin da toxeto.

Ea pasion pa i viaj

El primo viajo xe stà a Parigi, dove che nol ga vuo tanto suceso come venditore de ogeti sacri. El xe tornà a Padoa e poco dopo el xe ripartio pa l' Olanda, e qua, frequentando e trupe francesi de ocupasion, el ga aprofondio i so studi de idraulica. Co el xe tornà Padoa, forte dee so esperiense al' estero, el ga vuo un bon suceso,ma questo ghe ga crea dee inimicisie. Coinvolto nel caos poitico che xe vignuo fora dopo ea ocupasion napoeonica el xe ga inguaià e eora nel 1803, par evitare de finire in gaera, el xe scampà co so fradeo in Olanda e da eà in Inghiltera.

Ea Inghiltera

El se ga trovà cusì ben che el ghe xe restà nove ani, ciapando anca ea citadinansa britanica. Ea xe diventà ea so seconda patria. A Londra el se mantegneva fasendo l'"uomo forzuto" in un circo (l'era un mauton grando e grosso, alto do metri e forte come un toro) e el se ga sposà co Sarah Banne, na toxa inglese de Bristol, che dopo eo gavaria compagnà in quasi tute e so aventure. Sicome che anca ea gaveva ea pasion pa i viaj i ga organixà un spetacoeo ambueante che ga vuo un bon suceso e che i ga portà in giro pa tuto el regno. El numero principae gera queo de caricarse sue spae na piramide umana de diexe persone e portarle in giro pal palco. Oltre che al numero dell' uomo forzuto el mostrava un xugo de fontane generae da na machina idraulica de so invension.

Da novo in viajo

Dopo tanto girovagare in Inghiltera ghe xe vegnua ea nostalgia dei grandi viaj, e co so mujere el xe partio pa portare el so spetacoeo anca in altri paesi. Ea turnè ga tocà ea Spagna, el Portogaeo, ea Sicilia e aea fine i xe sbarcà a Malta. Qua el ga conosuo un emisario del pascià del' Egito, che a chei tempi gera na provincia del' Inpero Otoman, e el xe vegnuo savere che in chel paese i gera drio cominciare un novo programa agricoeo che comprendeva grandi lavori de irigasion. El xe partio subito, convinto che i so progeti idraulici ghe gavaria verto e porte del suceso.

L' Egito

Col xe rivà in Egito el ga fato amicisia co un saco de personaj importanti. Uno de questi xe stà Bernardino Drovetti, un piemontese ex soldato napoeonico che gera diventà consoe generae de Francia oltre che coesionista d' arte e egitoeogo. Questo eo ga introdoto aea corte del pascià. Altri do personaj che el ga conosuo saria stai importanti pa eo: el grande esploratore svisero Johann Ludwig Burckhardt, che ghe ga dà un mucio de consigli che ghe gavaria fato da guida, e el novo consoe generae britanico Henry Salt, n' altro egitoeogo e coesionista che saria diventà gran rivae de Drovetti nea corsa ae scoperte archeoeogiche.

Quando che el pascià eo ga ricevuo el se ga dimostrà interesà al so progeto de na machina paea irigasion, ma co xe stà el momento dea dimostrasion no ea ghe ga comodà e el ga rifiutà l' oferta. Belxoni el ghe xe restà tanto mae, ghe gaveva vusuo un ano e un mucio de schei pa organixare a dimostrasion. thumb|250px|left|El busto de Ramesse II al British Museum

Viaj archeoeogici

E eora el ga acetà ea oferta de Henry salt de trasportare el busto de na statua del re Ramesse II, che el pesava più de 7 toneate, dal tempio Ramesseum tacà Luxor fin sua sponda del fiume Nieo che gera distante 1200 metri. Sfrutando e so conosense de idraulica e iutandose co mexi de fortuna el xe riusio nea impresa metendoghe soeo do stimane. Da aeora el se ga butà anima e corpo nea archeoeogia. Tra e so varie scoperte, in pochi ani el ga riportà aea luce el tenpio de Abu Simbel visin a Assuan nel sud, el ga esplorà ea sità de Berenice sul mar Rosso e ea Vae dei Re a Luxor catando ea tonba de Seti I, una dee più bee dea vae, che ncora ai giorni nostri ea xe conosua anca come tonba Belzoni, e el ga catà l'ingresso dea piramide de Chefren visin al Cairo, tuto questo portando a Londra un mucio de reperti. Sta ultima scoperta xe stà acolta a Londra co un gran entusiasmo e pa ceebrarla xe stà conià in so onore na moneda de bronzo che ea gaveva el so profio stampà de sora.

A chei tenpi in Egito ea archeoeogia no gera gnancora rafinà come che ea xe desso. Quei che ndava furegare nee rovine più che archeoeogi i gera aventurieri al servisio dei musei o dei coessionisti privati, e noi se fazeva scrupoeo de usare parfin a dinamite pa verzare e tonbe, rovinando un pasto de tochi pregiai.

Belzoni invese el se ga distinto pa ea so profesionaità, col doveva vaeutare un reperto el ghe ndava pian prima de stabiire ea data de quando che el gera stà fato e e so descrision e gera sempre precise e particoearegiae. Prima de meterse a esplorare ea piramide de Chefren el ga passà un mucio de tempo a studiare come che ea gera fata ea visina piramide de Cheope.

Tornà in Inghiltera nel 1819, el ga scrito e publicà e so memorie, dove che el contava tute e so grandi scoperte.

L' ultimo viajo e ea morte

Nel 1823 ea asociasion africana de Londra eo ga ingagià par na spedision sul fiume Niger. A chei tempi sto fiume el gera quasi del tuto inesplorà e se saveva poco del so corso. Eo el pensava che sto fiume podesse essere un afluente del Nieo e cusì el ga acetà. Ma poco dopo che el xe sbarcà in Africa el xe morto de disenteria nel 1823 nel vilagio de Gwato, visin a Benin City, che a chei tempi ea gera ea capitae del antico regno del Benin, ma che deso ea xe in Nigeria. El gera drio ndare nea favoeosa Timbuctù nel Mali, che ea gera pena stà rinvegnua da un esploratore scossese qualche ano prima, e che ea se trova a circa metà del corso del Niger. El signor Houtson che eo compagnava nea spedision eo ga fato sepeire pena fora de Gwato e el ghe ga meso na epigrafe sua tomba col nome e ea data de morte. El ghe ga anca fato scrivare:"el signor che ga meso sta epigrafe sua tomba de sto famoso e intrepido viajador, el spera che ogni europeo che visita sto posto el tegna neta ea tera e el fasa riparare ea recinsion che ghe xe intorno, se xe necesario". Circa quarant' ani dopo un viajador che xe rivà fin là nol ga trovà altro che l' albaro.

Curiosità

El regista american George Lucas el se ga ispirà a Belzoni col ga creà el famoso personagio de Indiana Jones definendoeo un archeoeogo ecesionae ma dotà de un caratere duro e rude.

Na cità del stato americano del Mississippi ea porta el so nome.

L' atore inglese Matthew Kelly nel 2005 el ga interpretà Belzoni pa el docudrama dea BBC Egypt.

Opere

• Narrative of the Operations and Recent Discoveries Within the Pyramids, Temples, Tombs and Excavations in Egypt and Nubia and of a Journey to the Coast of the Red Sea, in search of the ancient Berenice; and another to the Oasis of Jupiter Ammon, Londra, John Murray, 1820 (edision inglese del 1835 consultabie online)
• Description of the Egyptian Tomb, Discovered by G. Belzoni, Londra, Murray, 1821
• Viaggi in Egitto e Nubia contenenti il racconto delle ricerche e scoperte archeologiche fatte nelle piramidi, nei templi, nelle rovine e nelle tombe di questi paesi seguiti da un altro viaggio lungo la costa del Mar Rosso e all'Oasi di Giove Ammone, Milano, Sonzogno, 1825 (edision italiana del 1827 consultabie online)