Giovanni Battista Belzoni

thumb|250px|right|Belzoni vestìo aea maniera araba Giovanni Battista Belzoni (Padoa, 15 novembre 1778 - Nigeria, 3 dicembre 1823) el xe sta un esplorador veneto e pioniere de l'archeoeogia. El xe ritegnuo uno dei primi egitoeogi.

El gera nato a Padoa al tenpo dea Republica Veneta, el gera ncora un bocia col ga tacà lavorare nea botega de barbiero de so papà. A sedes' ani el se ga trasferio a Roma pa farse frate e studiare idraulica; col ga visto e rovine dea capitae el ga comincià a apasionarse de archeoeogia. I francesi gaveva intanto conquistà l' Italia e i gaveva aboio l' ordine dei frati dove che gera Belzoni. Nel 1803, par evitare de vegner aruoeà ne l'esercito de Napoleon, el xe scampà in Inghiltera, dove che el se mantegneva fasendo l'"uomo forzuto" in un circo (l'era un mauton grando e grosso, alto do metri e forte come un toro). A Londra el se ga sposà co Sarah, na tosa irlandese che dopo eo gavaria compagnà in quasi tute e so aventure.

Dopo ver viajà un fià par l'Europa, el xe rivà in Egito, dove che el ga provà a vendarghe na pompa idraulica al pascià ma nol ghe xe riusio. E eora el ga acetà ea oferta del consoe generae britanico in Egito de trasportare el busto de na statua del re Ramesse II, che el pesava più de 7 toneate, dal tempio Ramesseum tacà Luxor fin al British Museum de Londra. Sfrutando e so conosense de idraulica e iutandose co mezi de fortuna el xe riusio nea impresa metendoghe soeo do stimane. thumb|250px|left|El busto de Ramesse II al British Museum El xe tornà subito in Egito e el se ga butà anima e corpo nea archeoeogia. Tra e so varie scoperte, in pochi ani el ga riportà aea luce el tenpio de Abu Simbel visin a Assuan nel sud, el ga esplorà ea sità de Berenice sul mar Rosso e ea Vae dei Re a Luxor catando ea tonba de Seti I, una dee più bee dea vae, che ncora ai giorni nostri ea xe conosua anca come tonba Belzoni, e el ga catà l'ingresso dea piramide de Chefren visin al Cairo, tuto questo portando a Londra un mucio de reperti. Sta ultima scoperta xe stà acolta a Londra co un gran entusiasmo e pa ceebrarla xe stà conià in so onore na moneda de bronzo che ea gaveva el so profio stampà de sora.

A chei tenpi in Egito ea archeoeogia no gera gnancora rafinà come che ea xe desso. Quei che ndava furegare nee rovine più che archeoeogi i gera aventurieri al servisio dei musei o dei coessionisti privati, e noi se fazeva scrupoeo de usare parfin a dinamite pa verzare e tonbe, rovinando un pasto de tochi pregiai.

Belzoni invese el se ga distinto pa ea so profesionaità, col doveva vaeutare un reperto el ghe ndava pian prima de stabiire ea data de quando che el gera stà fato e e so descrision e gera sempre precise e particoearegiae. Prima de meterse a esplorare ea piramide de Chefren el ga passà un mucio de tempo a studiare come che ea gera fata ea visina piramide de Cheope.

Tornà in Inghiltera nel 1819, el ga scrito e publicà e so memorie, dove che el contava tute e so grandi scoperte.

Nel 1823 ea asociasion africana de Londra eo ga ingagià par na spedision sul fiume Niger. A chei tempi sto fiume el gera quasi del tuto inesplorà e se saveva poco del so corso. Eo el pensava che sto fiume podesse essere un afluente del Nilo e cusì el ga acetà. Ma poco dopo che el xe sbarcà in Africa el xe morto de disenteria nel 1823 nel vilagio de Gwato, visin a Benin City, che a chei tempi ea gera ea capitae del antico regno del Benin, ma che deso ea xe in Nigeria. El gera drio ndare nea favoeosa Timbuctù nel Mali, che ea gera pena stà rinvegnua da un esploratore scossese qualche ano prima, e che ea se trova a circa metà del corso del Niger. El signor Houtson che eo compagnava nea spedision eo ga fato sepeire pena fora de Gwato e el ghe ga meso na epigrafe sua tomba col nome e ea data de morte. El ghe ga anca fato scrivare:"el signor che ga meso sta epigrafe sua tomba de sto famoso e intrepido viajador, el spera che ogni europeo che visita sto posto el tegna neta ea tera e el fasa riparare ea recinsion che ghe xe intorno, se xe necesario". Circa quarant' ani dopo un viajador che xe rivà fin là nol ga trovà altro che l' albaro.

Curiosità

El regista american George Lucas el se ga ispirà a Belzoni col ga creà el famoso personagio de Indiana Jones definendoeo un archeoeogo ecesionae ma dotà de un caratere duro e rude.

Na cità del stato americano del Mississippi ea porta el so nome.

L' atore inglese Matthew Kelly nel 2005 el ga interpretà Belzoni pa el docudrama dea BBC Egypt.

Opere

• Narrative of the Operations and Recent Discoveries Within the Pyramids, Temples, Tombs and Excavations in Egypt and Nubia and of a Journey to the Coast of the Red Sea, in search of the ancient Berenice; and another to the Oasis of Jupiter Ammon, Londra, John Murray, 1820 (edision inglese del 1835 consultabie online)
• Description of the Egyptian Tomb, Discovered by G. Belzoni, Londra, Murray, 1821
• Viaggi in Egitto e Nubia contenenti il racconto delle ricerche e scoperte archeologiche fatte nelle piramidi, nei templi, nelle rovine e nelle tombe di questi paesi seguiti da un altro viaggio lungo la costa del Mar Rosso e all'Oasi di Giove Ammone, Milano, Sonzogno, 1825 (edision italiana del 1827 consultabie online)