Sèzio

Modeło:Comune Žes (par italian Cesiomaggiore) (BL) al è an comun de 4.076 abitanti de l'Alto Veneto.

Giografia

Žes al se estende te la destra idrografica de 'l Piave, verso medanot e verso le žime de croda de le Dolomiti. Al capoluogo de 'l comun al è Žes, che 'l è circa 12Km a Nord-Est de la cità de Feltre e a 18 km a n.o. de la cità de Belun.

La strada provincial pedemontana, paralela setentrional de la statal 50, la sta arent a le montagne e la traversa 'l comune, 'ndando in su da Feltre e po' in do verso Santa Justina, aonde che la torna a dontarse a la statal che la va da Feltre a Belun.

A Sera al teritorio de 'l comune, delimità da 'l Caoran, al confina co 'l comun de Feltre; a Matina se cata i teritori de Santa Justina e de San Gregorio. A medanot, drio le žime, al comun al confina co altri teritori de la Provincia de Belun e de 'l Trentin.

Al teritorio 'l è caraterizà da 'l continuo calar de i còi verso la val de 'l Piave. Al paesagio 'l è vivace, movest e alternà da paeset, vile vece, cesete, canp e boschi de piante a foja larga.

Storia

Al teritorio de Žes el fa parte, fin da l'antichità, de la zona feltrina, tera che prima de i romani la era abitada da i Reti.

Al nome se pensa che 'l gnene da 'l antroponimo latin caesius, riferì a na gens Caesia, de la qual al fa parte al poeta latin Cesio Basso (I secolo d.C.). La presenža de la gens Caesia 'nte la zona de Žes la è atestada da 'l ritrovamento de na inscrižion che menžona an L. Caesius L. L.. Tra i reperti che testimonia la presenža romana ghe n'è na colona monumental de 'l 47 d. C., che la recorda la costružion de la via Claudia Augusta altinate (tra Altinum, su 'l mar Adriatico e Augusta Vindelicum, ades Augsburg, 'te la region danubiana), e che al è gnest al sinbolo araldico de 'l comune.

Te'l medioevo Žes al è deventà sede de la pieve de Santa Maria, cesa dipendente da la diocesi de Feltre e da 'l so "vescovo - conte". Al teritorio al è restà fražionà in tanti feudi governadi da castaldi sogeti a'l vescovo. Tra de sti qua ghe n'era i Muffoni, ciamadi anca "da Cesio", i Rambaldoni da Fianema, da i quai al gnen Vittorino da Feltre, i Corte da Marsiei. Ste fameje le èa anca la carica de "marighi" o "capovilla" cioè i era i capi de i paeset. Resti de le so residenže fortificade se pol vederli 'ncora al dì de incoi 'nte 'l capoluogo comunal de Žes e te le fražion de Fianema e Marsiei.

De 'l 1404 Žes al è ndat co Feltre a far parte de la Republica de Venežia: la cerimonia de la consegna de le ciau de la cità a 'l anbassiador venežian, Bartolomeo Nani, al 15 giugno de quel an, la è stata fata da Vetor Muffoni, da Žes, e la gnen ancora rievocada te 'l Palio de Feltre. Durante al periodo de la dominažion venežiana (XV-XVIII secolo), le residenže fortificade le se à trasformà in vile, come la vila Tauro a le Žentenere, la vila Corà e la vila Muffoni inte 'l capoluogo comunal.

Dopo de la dominažion de i francesi de Napoleone al Feltrin, e insieme Žes, al è ndat a far parte de 'l Inpero Austriaco e de 'l Regno Lonbardo-Veneto.

De 'l 1866 insieme a 'l resto de 'l Vèneto, Feltre e Žes i è stati anetesti a 'l Regno d'Italia: te 'n quela circostanža Žes al à ciapà al nome talian de "Cesiomaggiore" (inveže che "Cesio" o "Žes"), da' che ghe n'era belche te 'l regno an nantro comun co 'l stesso nome te la Provincia de Inperia. Al Regno d'Italia al se ha portà drio tanti problemi economici e sociali che i è stati a la base de 'l fenomeno de la emigražion.

Al teritorio de Žes al è stat metest a la proa durante la prima guera mondial. Al 1917, in particolar, al è stat ciamà "''al an de la fan''" par colpa de i sachegi fati intant che ghe n'era i austriaci.

Altre tribolazion le ghe n'é state co la seconda guera mondial, in specie te 'l so ultimo periodo..

Personalità de Žes

• Vittorino da Feltre, educator e umanista de 'l XV secolo, al fea parte de la fameja de i Rambaldoni, paroi de 'l castel de Fianema.
• Piero da Cesio, pitor e incisor de 'l XV secolo.
• Piero Favero (1812-1890) agricoltor, vivaista, propagador de la Vit Mericana.
• Giovanni De Bortoli, cognossest come Nane Castaldo, scritor.
• Romano Ocri (Žess 1897-Venežia 1980), originario de Soranẑen, fražion che la à belche na scola dedicada a el.
• Guido Rossa operaio metalmecanico copà a Genova da 'l grupo teroristico de le Brigate Rosse. Ghe è stat dedicà al asilo de Pež.

Fražion

Al Bordugo

La è na fražion picioleta inte la Val Canžoi. La confina co Le Ave a N, Le Montagne a W, La Busa a S e Tostcian a E. Sto paeset al è nassest arent a 'l Caoran e la so economia la era fondada su la energia de l'aqua. Ghe n'era difati la oficina de i Gris e na segheria. AL patrono al è San Gregorio Taumaturgo.

Anžaven

Paeset a E de Dorgnan e Pež, a SE de Tussui, a W de Bjei (Santa Jostina). Al è abastanža gross e al à an centro co case vece e na area a meodì co case nove.

Busche

A S de Pež, arent Pont (Feltre), ghe n'è Busche. Infin a 'n žentener de ani fa al era abità da 3 o 4 fameje. La cesa de San Gabriel la è stata trata dò dintorn de i ani '80 de 'l Otožento parchè la era dirocada e no la ghe intaressea a gnissuni. Ultimamente la so posižion su la statal de 'l Grapa la à fat nasser tuta na serie de inprese che le à tirà là anca la đent. Inte sto paeset ghe n'è anca la stažion de 'l treno, de riferimento par i comuni de Žess, Mel e Lentiei. Famosa la è la lateria de Lattebusche, la pì grossa de la provincia de Belun. Al comun de Žess al è drio investir par riqualificar la zona e crear an novo centro de 'l paess, che al gnen cossì a no catarse pì su la riva de San Gabriel. A matina de Busche ghe n'è al omonimo lago artificial che bina l'aqua par far ndar la central de Quero. De recente è stat fat laori mar la viabilità, e è stat vert an centro comercial. In costružion ghe n'è la nova cesa.

Can

Al confina co Culogne a N, Tostcian e Soranẑen a W, Menin e Caljol a S, Žessmenor a E. Al è an paeset abastanža gross fabricà pì che sie inte 'l pian. Na olta al fea part tut de na unica vila e parerèe che i residenti i se maridesse tuti fra de parent par no divider la proprietà. Al patrono al è Santa Lužia.

Cossalter

Paeset de na trentina de persone. Al nome al gnen fursi da "col" "salterio" (breviario) parchè fursi na olta al prete al ndea là a dederse al breviario. Al confina co Menin a W, co Soranžen a N, co Fianema a E, e co Polir a S. La cesa la è fora de 'l paess e la è dedicada a San Vendemian (1 giugno). Te 'l centro se pol ricognosser te na casa le fonde de 'l legendario Castel de Roconcui.

Col San Vito

A S de Žess, su in žima a 'l omonimo col, che n'è al paeset de Col San Vito. Da là se pol goder an bel panorama su tut al capologo comunal. Al patrono al è San Vito.

Cullogne

A N de Tostcian e de Can ghe n'è al paeset de Culogne. Al è bel e al solivo e cress ben i castegner.

Dorgnan

A S de Tussui e Caljol, a E de Polir, a W de Anžaven e a N de Pež ghe n'è sto altro bel paeset. Al patrono al è San Bastcian.

Fianema

A NE de Salgarda, a SW de Soranžen, a W de Cossalter e Polir, ghe n'è Fianema. La è na fražion bela grossa, popolada par al passà probabilmente da đent che ferea i cavai. Adess ghe n'è anca an bar e al dugo de i sboci. La cesa paesana la è piena de piture vece che merita esser viste. La è dedicada a San Roco, ma la è tradižion dir messa anca par la inmacolada concežion, al 8 de disdenber.

La Busa

A N de Soranẑen, a W de Tostcian, a S de 'L Bordugo e a E de Le Montagne ghe n'è sto gropet de case, in riva a 'l Caoran. Na olta ghe n'era molin e anca an fol. Adess al è in fase de abandono parchè al è a 'l pustern e la strada par ruarghe la è bruta.

Le Au

Inte la parte central de la Val Canžoi ghe n'è sto paeset. Al nome no se sa se al pode gner da la presenža de bož de au. Drio la ceseta de Santa Rosia se pol veder ancora an toch de la via Slaudia Augusta Altinate, scavà inte la croda.

Le Montagne

A N de Soranžen e a E de 'L Bordugo e de La Busa ghe n'è sto altro grop de case picà te la montagna. A W de ste abitažion ghe n'è Arson, inte 'l comun de Feltre. Le Montagne al è an posto che piass pì che sia par le ferie parchè al è al solivo e fora de la confusion. Le case le è tute vecie e in stile feltrin. La festa paesana la gnen fata in ocasion de 'l aniversario de la benedižion de 'l Cristo arent a la fontana.

Massiei

A S de Moržanch e de Žess, e a E de Col San Vito, arent a Sarei (comun de Santa Jostina), ghe n'è Massiei. Inte 'l centro se pol veder ancora al vecio castel. La cesa principal la è dedicada a San Piero (sagra al 29 de giugno) e quela secondaria a San Liberal.

Menin

Al è an paeset de 150-200 anime. Al è a SW de 'l capologo e 'l confina co Soranžen a NW, Cossalter a W, Polir a S, Caljol a E, Can a NE. Al centro storico al è in medo a 'l Col de Žimia e a 'l Col Cumiass, ma te i ultimi 30 ani è stat fat sù tante case anca te la canpagna ciamada Chižole. Arent a 'l paess vecio ghe n'è la Vila de i De' Međan, che na olta la era circondada da 'l pì bel giardin de la Provincia de Belun, che al è stat par la gran part eliminà dopo de la prima guera mondial. Arent ghe n'è la cesa de San Biasi, co la pola de nass monumental. A 'l 3 de febraro se fa festa par al patrono e probabilmente la è la cesa aonde che se à sonà a cop (canpanò fat co na unica canpana) par la ultima olta, 'te 'l 2008. Infin a 50 ani indrio la economia la era basada su la produžion agricola (ua e vin, po, per, fasoi, sorch, mjel, ...) e su 'l alevamento de vache da lat. Sta tera la era cognossesta par al vin bon che se podea far e al è stat al primo avanposto te la provincia de Belun onde che sie stat inpiantada la ua mericana. Ogni an al conte Gaspare De' Mezan al fea na festa par onorar i contadin pì bravi. Ancora adess ghe n'è na bona produžion de ua mericana da magnar e de bianche ta da vin. No manca gnanca le vit Grinto che le gnen doperade a far al vin par casa. An deto al recita:<<Tos'cian su la forca, Pulir inte 'l profondo, e Menin 'te 'l fior de 'l mondo.>>

Moržanch

Al confina a W co Žess, a E co Žargnei (Santa Jostina), e a S co Massiai. Al gode de na bona esposižion a Meodì e al è tut te 'l sviert.

Polir

Al è an paeset grosset e 'l confina co Menin e Cossalter a N, Fianema a W, Pont a S, Pež e Dorgnan a E. Ghe n'è na ostaria e 'n canpo da dugar a balon. Al patrono al è San Lorenž.

Salgarda

Paeset nassest dintorn de 'n castel che custodia al passajo su 'l Caoran de na strada, fursi romana. Al centro abità al è smedà da 'l Caoran, che al segna anca al confin tra i comuni de Žess e Feltre. Al confina co Fianema a E e Vilabruna a W. Na olta la economia la era fondada su segherie e molin. Ghe n'è anca 2 centrai dismeteste, anca se par che sie invià al discorso par ripristinarghen una. Co la costružion de 'n novo pont su 'l Caoran se à creà an novo grupet de case, ciamà anca Salgarda Nova. Al patrono al è San Giuda.

Soranžen

Al è al secondo paes de 'l comun par popolaẑion. Al confina co Tos'cian a NE, La Busa a N, Arson a NW, Fianema a W, Cossalter a S, Menin e can a E. Al à qualche oficina mecanica. La produžion na olta la era incentrada su la agricoltura. Al à an uficio postal, do ostarie e na scola elementare. In altri tenpi ghe n'era anca an castel. La cesa parochial la è dedicada a i ss. Piero e Paolo (29 giugno).

Tostcian

Al confina co Can a E, Culogne a N, Al Bordugo e La Busa a W, Soranžen a S. Se 'l riconoss par la ceseta de San Valentin (festa 14 febraro) in žima a 'n col. Inte 'l centro ghe n'è na oficina e na pizeria.

Tussui

Al è a N de Dorgnan, a S de Žess, a E de Caljol e a W de Anžaven e Col San Vito. Al è a 'l soliu e al è pien de canp de sorch.

Val Canžoi

Insieme de case sparse te la parte pi a montagna de la Val Canžoi. La economia na olta la era fondada su i comerci co 'l Primier, su la produžion de legn e su i pascoi. Adess la economia che rende de pì la è al turismo. La à vist nasser una de le confraternite pi vece dintorn de la cesa de San Piero d'Avola, po' sostituida co quela de Santo Stach, e a la fin co quela de Sant' Antoni.

200px|thumb|left|Žess vist da Žessmenor.

Žess

Al è al capologo de 'l comun e anca al centro abità pi gross. Al à Žess Menor a W, Tussui, Col San Vito e Marsiei a S, Moržanch a E. Al è a 'l solivo e tut in riva. La cesa, dedicada a Santa Maria, la è te la parte bassa de 'l paes vecio. Sot al centro abità ghe n'è la zona industrial, caraterizada da oficine artigianai de 'l legn e de 'l fer. Interessanti i musei etnografico de Saravela (par andar verso Santa Justina) e de la bicicleta visin le scole. Arent a la zona artigianal ghe n'è al canpo da balon.

Žes menòr

Can a W, Caljol a S, Žes a E. Al conta an bela poca de đent. Al è interessante darghe na ociada a 'l centro storico fat de case a sass che rispeta tuti i elementi de la architetura tradižional feltrina de i ultimi 400 ani. Sta part de 'l paess però a pinpianet la è drio a gner abandonada da la đent e la è drio a degradarse. Se à svilupà invece tuta na serie de case nove te 'n quela che era la canpagna, infin a dontar Žes menor co Žes. Al patrono al è San Leonardo.

Economia

Al teritorio al viu na discreta produžion agricola e artigianal. Se cata 'te la zona diverse inprese artigianai dedicade a la produžion de aredi e de conplementi par la ediližia. Inportanti i è la produžion e la laoražion de la lat tant a livel de media inpresa (Lattebusche) che de nicia (malghe in montagna). Ghe n'è na bona part de popolažion che, a titolo principal o no, la à an redito da la coltivažion de le patate, de i cereai, de i pon, de la ua mericana e de i fasoi. Inportante la è anca la presenža de arnie e de 'l taj de i bosch. No manca al turismo che al è drio a cognosser, in gražia anca de la presenža de 'l Parco Nazionale Dolomiti Bellunesi, an svilupo svelto e cressente.

Aministražion

Al sindaco de 'l comun de Žes 'l è Giani de Bastiani, rielegest par al secondo mandato 'nte le eležion de la fin de magio 2007, co pì de 'l 70% de i voti. Vicesindaco l'è Dino Tonin e asesori Michele Balen (cultura, scola e identità locale) e Celso Lenzi (lavori publici e gemelagi).

Gemelagi

Al comun de Žess al è gemelà co 'l Municipio de Aratiba, 'te 'l Brasil.

Prodoti tipici

• Piave (formai)
• Cesio (formai)
• Dolomiti (formai)
• Patata de Ẑess DECO
• Ordo
• Pon
• Ua Mericana
• Miel
• Polenta de Sorc Sponcio