Kikuyu

Da Wikipedia, l'ençiclopedia libara.
Na dona kikuyu.

I kikuyu i xe el grupo etnico pi grande del Kenya. Co 6 milioni de poplasion, i xe el 22% de i kenyani. I abitava i altopiani centrali ntorno al Monte Kenya. Ancò i se cata in tuto el paexe, e tanti i vive fora dal Kenya.

Storia[canbia | canbia el còdaxe]

I kikuyu i xe on grupo bantu. I xe rivà in Kenya da l’ovest, anca se el xe dificile dir da doe in particolare. Co i xe rivà rente al Monte Kilimanjaro, on grupo el xe andà a sud, e n’altro a nord. I primi kikuyu i xera caciatori e racoglitori, i vivea de quelo ch ei riusiva a cater su. Na olta rivà su i altipiani rente al monte Kenya, i xe diventà agricoltori.

La mitologia kikuyu la conta che Dio – Ngai – el ga creà Kikuyu e so mojer Mumbi e el la mesi sul monte Kirinyaga. La prima fameja la ga vù nove fiole: Wanjiku, Wanjiru, Njeri, Wamboi, Wangari, Wacera, Watheira, Wairimu e Wangoi. Co le xe diventà done, le ga sposà de i omeni che vegnea da lontan. N’altro mito dixe che i omeni i xe stà creà da Ngai e che i xe vegnù fora da on Mugumo (figo). Ancora deso, tute le done kikuyu le ga ono de i nomi de le prime nove fiole de kikuyu e Mumbi.

I kikuyu i sa stabilio ntorno al monte Kenya e i ga inglobà grupi pi pecenini. La tribù la xe reusida a cresar e a organixar na produsion agricola pi grande del bisogno interno. L’ecedensa la xe stà usà par el marcà co le tribù contigue: maasai, kamba, meru e embu. I kikuyu i ga scominsià a espandarse. El colonialismo el ga fermà sta spansion e ridoto i kikuyu a vivar inte le riserve, dando la tera pi bona a i colonialisti inglexi.

En tel 1920, i kikuyu i ga scominsià a organizarse par resistar i colonialisti. El primo grupo che i ga fondà el xe stà la Asociasion Sentrale de i Kikuyu (Kikuyu Central Association), tra i fondatori se cata anca Jomo Kenyatta, che el diventarà el primo presidente del paexe. El movimento volea on cambiamento politego, sensa rivar a la violensa. Da el 1952 al 1958 el Kenya el ga visù l’emergensa. El grupo Mau-Mau el ga scominsià a usar la violensa e el terorismo par rivar a l’indipendensa. Bisogna anca dir che i inglexi i ga amplificà l’importansa de i Mau Mau par poder reprimere la zente. Migliara de kikuyu inocenti i xe morti ne i campi de concentramento. I Mau Mau i ga copà pochisima zente.

Dopo l’indipendensa, i kikuyu i xe stà boni de tor el control del paexe. Questo el xe stà posìbiłe parché i xera la majoransa, i xera pronti a lasar da parte le tradision e asetar le idee ocidentali, i gavea vù el privilegio de le scole de i misionari (i misionari no gavea costruio tante scole tra i altri grupi bantu e i no podea laorar tra i grupi pastoralisti par divieto governativo). El primo presidente del Kenya el xera on kikuyu, e anca el terzo – Mwai Emilio Kibaki – el xe on kikuyu. I kikuyu i domina anca el setor comerciale. Tanti kikuyu i xe marcanti, anca se tuti i rimane de i bacani in tel cor.


Controło de autoritàLCCN (ENsh85072307 · BNF (FRcb126523929 (data) · NDL (ENJA00565796
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Kikuyu&oldid=1032505"