La Danimarca la xè un Stato de l'Union Europea con capital Copenaghen. La se trova in tel nord de l'Europa, a nord de la Germania, e la xè la unica de le region scandinave tacà a la tera (come teritorio europeo). Difati la xe considerà parte dei Paesi Scandinavi, ma in realtà no la se cata mia su la penisola scandinava.
El paese el xe fato da na granda penisola, el Jutland, che el confina par via de tera col nord de la Germania, e un zentinaro de isole e isolete (le pi grande le xe Sjælland, Fyn, Falster, Lolland, Vendsyssel-Thy e Bornholm). El xè bagnà dal Mare del Nord a ovest e dal Mar Baltico a est, e la xe separà da la Norvegia e da la Svezia dai stretti de Skagerrak e de Kattegat. Grazie a sta conformazion giografica, storicamente la Danimarca la ga senpre poduo tegner d'ocio ci ndasea drento e fora dal Mar Baltico.
El Regno de Danimarca (Danmarks Rige) el ciapa rento, oltre a la Danimarca vera e propria, anca le Isole Fær Øer e la Groenlandia, che i ga comunque na granda autonomia.
La Danimarca la xe na monarchia da pi de mile anni: nel 1849 la xe deentà na monarchia costituzional, e dal 1901 la xe na monarchia parlamentar. La xe la seconda monarchia pi vecia de la storia dopo quela del Giapon.
Dal 1973 la fa parte de l'Union Europea, mentre le Fær Øer, pur fasendo parte del regno, no le xe entrà ne l'Union, e la Groenlandia la sa tirà fora nel 1979. Finora i danesi i ga preferio tegnerse el so scheo, la corona danese, inveze de l'euro. Lori e i inglesi i xe i unici che i ga dei acordi speciali co l'Union Europea, che dise che no i xe obligà par forza a doparar el scheo comune se no i vol.