Storia del Burundi

Mapa del Burundi

El Burundi, co Etiopia, Egito, Ruanda e Burkina Faso, el xe uno de i pochi stati africani che el gha conservà na continuità teritoriale co el pasà.

Preistoria

Anca se no ghe ricatamenti paleontologici de rilievo, se sa ch ei primi abitanti del Burundi i xera pigmei, i twa, che anca ancò i se cata en tel Burundi. A scominzsiar dal secolo VII de la nostra era, grupi de bantu i xe entradi en tel paexe e i gha formàna siviltà agricola. Altri grupi bantu i xe rivà a ondate en te i secoli sucesivi e i gha portà la metalurgia. I bantu i gha dato vita a el popolo hutu. I primi segni d epresenzsa tutsi i xe del XV secolo.

Problema de le etnie

La società burundexe la xe divisa tra hutu e tutsi, i twa i xe na minoranzsa picinina. I colonialisti i gha sostegnù la teoria de do popoli de origine diversa, una superiore e l’altra inferiore. Sto schema el se sposava ben co la teoria che divideva i grupi umani so na scala de valori dal baso a l’alto, e che giustificava el predominio de i bianchi su i neri. Secondo sta teoria, i tutsi i xe de origine hamitica, e quindi pi nobile de i bantu. I sarea vegnù zo da i altipiani etiopici. Altri i dixe che i tutsi i vien dal sud. I ricercatori moderni i xe contrari a vedar in hutu e tutsi do grupi etnici geneticamente diversi. Tanti fatori i fa pensar a on solo grupo che el se sa diviso longo tradizsioni economiche e sociali. I hutu i xe agricoltori e i tutsti alevatori. Le diferenzse fisiche le se pol spiegar co la dieta e tipo de laoro. Tuti e do i parla el kinyarwanda, on fato difisile da spiegar se i do grupi i gavese veramente na origine diversa. El saria el primo caso de na clase dominante che tol la lengoa de la clase inferiore. Altro fato che fa pensar a n’origine comune xe l’importanzsa che tuti e do i ghe da a l’alevamento. La verità la xe che la majoria de le persone le xe uguali e se pol saver l’etnia solo da i nomi. Sicuramente nel pasà grupi nilotici i xe rivà qi dal nord, ma no ghe segni storici de na migrazsion hamitica traverso el Kenya. Anca i grupi nilotici i xera picoleti e no gha lasà trace significative.

Storia moderna

Verso el XVI secolo, uno de i regni bantu localizà a oriente el gha scominzsià a inglobare i altri grupi. El periodo de pi grande espansion el xe quelo del re Ntare Rugama (1796 – 1850) che el xe stà bon de conquistar tuto el Burundi e de farghe presion a el regno del Ruanda. El re, mwami, el xera a capo de i nobili. Le tere le xera quasi tute de i nobili e la zente la dovea pagar de i tributi. En tel 1899 i todeschi i xe rivà en Burundi e lo gha preso come colonia de l’Africa Orientale Todesca. I re burundexi i gha resistio la penetrazsion todesca e l’arivo de misionari. I todeschi i gha risposto co la violenzsa, e i xe riusidi a controlar el re solo co le armi.

Colonialismo

I todeschi i no xe mai riusidi a controlar propiamente el Burundi. A lo steso tempo, i gha portà malatie sconosude a la popolazsion locale che le gha decimà la popolazsione umana e animale (epidemie del 1914, 1922, 1944). Tra el 1905 e el 1914, metà de la popolazsion de i pianori ocidentali la xe morta de malatie foreste. Durante la Grande Guera, i belgi i gha invazso el Burundi e dopo la fin del conflito i sa tegnudi la colonia. I belgi i gha subito apogià i nobili tutsi e afidà a lori l’aministrazsion de la colonia. Dopo la seconda guera mondiale, el Belgio el gha parmeso la creazsion de partiti politeghi. Do le xe stà importanti par la vita del paexe:

• l'Union par el Progreso Naxionale (UPRONA)
• Partito Democratico Cristiano del Burundi (PDC).

En tel periodo de preparazsion a l’indipendenzsa, el principe ereditario Rwagasore el xe stà asasinà. A le elezsioni aministrative del 1961, la reazsion popolare la gha dato la vitoria a l'UPRONA.

Indipendenzsa

El Burundi el xe diventà indipendente el 1 lulio 1962. El re Mwambutsa IV el gha sercà de darghe n’equilibrio a la tension tra tutsi e hutu formando na monarchia costituzsionale. En tel 1965, el primo ministro, un hutu, el xe stà copà, provocando somose popolari de sostegno a i hutu. En tel 1966, el re Mwabutsa V el xe stà deposto da so fiol Ntare V, a so olta deposto dal so primo ministro, Michel Micombero. Micombero el gha abolio la monarchia e promoso la republica. De fato, el xe diventà on ditator che el gha sofià sora i confliti etnici de i ani sesanta. En tel aprile 1972, i militari i gha scatenà el genocidio contro i hutu considerà ribeli. Omeni, done e butini i xe stà copà senzsa proceso. 200.000 huti i xe morti en poche setimane. 150.000 hutu i xe scapadi en Tanzania e Congo. En tel 1976, el colonel Jean-Baptiste Bagaza el gha organizsà on colpo de stato. Bagaza el sostegnea i tutsi, ma el gha cambià le legi che regolava el campo agricolo e i raporti sociali al fin de spianar le diferenzse tra le etnie. Ent el 1981, el xe stato eleto capo de stato e el gha scominzsià a nor rispetare i diriti umani e a far arestar i so opositori. En tel 1987 el magior Pierre Buyoya el gha deposto Bagaza, sospeso la Costituzsion . En tel 1988 i militari i gha scominzsià n’altro conflito contro i hutu, 150.000 persone le xe morte e 300.000 le se sa rifugià fora dal paexe. En tel 1991, Buyoya el gha aprovà na nova Costituzsion par lasarghe spazsio a la democrazsia. El primo presidente eleto regolarmente el xe stà Merchior Ndadaye, un hutu, en tel 1993. Dopo pochi mezsi, i militari i gha copà Ndadaye. El paexe el xe cascà n’antra olta en te la guera sivile, co la morte de 250.000 persone. En tel 1994 Cyprien Ntaryamira el xe diventà presidente. Dopo pochi mesi, Ntaryamira e el presidente del Ruanda, Juvénal Habyarimana, i xe morti en on incidente aereo provocà da le trupe ribeli de Paul Kagame (ancò presidente del Ruanda). El 8 aprile 1994 Sylvestre Ntibantunganya el xe stà eleto presidente del Burundi. I rifugiati ruandexi che scapava dal genocidio e el conflito tra militari e popolazsion locale i gha destabilizsaà el governo. En tel 1996, Buyoya el xe tornà al poter co on colpo de stato, ma la guera sivile no la se sa fermà. Solo en tel 2001 el tratato de tregua el xe diventà ativo. En tel 2003, Domitien Ndayizeye el xe stà eleto presidente.

Portałi:
• Portałe de Africa
|