One Piece

One Piece (ONE PIECE - ワンピース Wan Pīsu) el ze un manga scrito e dizenjà da’l mistro japoneze Eiichirō Oda, tut’ora in corso de pubregasion. Co’l tèrmene manga, in tuto ‘l mondo, A se intende i fumeti pubregài solche in Japon, siben che ‘sta paroła in łengua japoneze ła gapia el sinjifegà zenèrego de “fumeto”. Pubregà ła prima ‘olta inte’l ano 1997, rento ła revista japoneze Weekly Shōnen Jump, One Piece ła ze una de łe pì łonghe tra łe serie manga fin deso pubregàe. Par de pì ‘sto manga chive inte’l ano 2015 el ze entrà inte’l Guiness de i Primadi par èsar ła serie a fumeti (dizenjà solche da un autor) co’l pì grando númaro de copie pubregàe: a’l 4 de desenbre 2014 i ga rejistrà 320.866.000 copie . A partir da’l ano 2001 vien pubregada na edision in łengua itałiana da ła caza de edision Star Comics.

A partir da’l 1999 One Piece el ze deventà anca un anime, a dir na serie animada pa’ ła televizion, prodoto da’l studio de animasion japoneze Toei Animation. L’emitente Italia 1 ła ga scumisìa a mandarlo in onda su i só canałi a partir da’l ano 2001. Par de pì ła Toei Animation ła ga prodoto 11 spesiałi tełevizivi, 13 film pa’l sìnema, do cortometraji 3D, un ONA e un OAV (che łe ze edision pa’l marcà home video). Asè zviłupà e fiorente ze el marcà łigà a i zogàtułi, a i videozughi e a tuti i prodoti che a coełi A ghe vien petà chel nome.

Trama

Ła storia de One Piece ła scumisia co ‘sta fraze pronunsiada da’l "Re de i Pirati" Gol D. Roger poco prima de èsar justisìa da ła Marina inte’l patìboło de ezecusion: in cheła ocazion Roger el conferma l’ezistensa de’l tezoro ciamà purpio One Piece e, dizendo cusì, el scaena ła cusidita "Era de ła Piratarìa". Siben che ła storia de’l manga ła ciapa rento un stramaro de parsonaji e de situasion A se pol dir che’l protagonista asołuto de l’òpara el ze un tozatel de njanca vinti ani che’l se ciama Monkey D. Luffy. Ła narasion ła scumisia co łu che’l ciapa el mar pa’ ła prima ‘olta in serca de’l mìtego tezoro One Piece. A partir da i primi capìtułi Luffy el scumisia a catar vari conpanji de aventura, tuti cuanti co na abiłità partegołare, che i ndarà a costituir ła Ciurma de’l Capel de Paja (Mugiwara in orizenałe japoneze), ciamà cusì purpio in onor de’l capel de paja che Luffy el ga indoso sin da’l primo epizodio. Daspò de vinti ani de pubregasion regołare njancura no se sa mìa che cosa che’l sipia el tezoro One Piece, siben che ła só ezistensa ła ze stà confarmada da Gol D. Roger e anca da n’altro strainportante pirata ciamà Barbabianca. Roger el ze stà ciamà “Re de i Pirati” parché, co ła só ciurma, el ze stà el primo a concuistar tuta ła Rota Major. A'l ponto de ła narasion che’l coresponde a’l vołume n°82 A savemo che Luffy e i primi menbri de ła ciurma i ze partii da’l Mar Orientałe, i ze entrài inte ła Rota Major, i ga traversà tuta la prima parte anca dita "el Paradizo" ciapando rento man man altri menbri, fin che i ze stài sconfiti inte un scontro contra de ła Marina na ‘olta che i jera rivài a’l confin con ła Łinea Rosa, pronti par pasar inte’l Mondo Novo. A sèito de ciò i ze stài sparpanjài in jiro pa’l mondo per du ani, par poderse cusì arlenar e mejorar. Daspò de i Du Ani de'l Time Skip, e de i avenimenti de ła Gran Bataja de Marineford, i Mugiwara i se ga catà tuti insenbre pa retornar a navegar inte'l Mondo Novo. Chive i ga vuo ocazion de scontrarse co’l pirata Don Quijote Do Flamingo (ex de ła Flota de i Sete) e i ze drio pa' intrigarse co un de i Cuatro Inperadori. L’autor Oda el ga declarà che, rivài a ‘sto ponto, A simo sirca a’l 70% de ła narasion . Donca A ze coestion che pasa ancura de i ani vanti de rivar a ła fine de ła storia.

Anbientasion

El manga el ze anbientà inte un contesto jeogràfego e tenporałe de pura fantazìa siben che A se pol catar fasilmente tuti i refarimenti stòreghi, jeogràfeghi e łetarari che a coełi Oda el se ga ispirà.

Contesto tenporałe

El manga el ze anbientà inte na època che no ła ga corespondensa co’l mondo reałe, de fati A vien raprezentada na realtà co na tecnołozìa che ła pol senbrar a'l isteso tenpo sia vecia che moderna. Par ezenpio łe navi łe va tute a veła, l’ùnego treno visto el va a vapor, ła zente ła scrive a man, A no ghe ze automòbiłi o aeroplani. Parò, de raverso, A se cata el dòparo de ła corente ałètrega, de i tełèfoni e de łe tełecàmare (siben che i funsiona grasie a na spesie de grosi sciozi ciamài łumacòfoni e łumacàmare ), de i fax, de i raji łàzer e de na siensa mèdega ben zviłupada. In onji cazo par One Piece A no sarìa mìa coreto parlar de na anbientasion de’l tipo steampunk.

Contesto jeogràfego

Par savèrghene de pì, vardarse ła voxe Jeografìa de One Piece.

El mondo de One Piece el ze asè diverso da'l mondo reałe anca da'l ponto de vista jeogràfego e morfołózego. A ghe ze senpre on globo terestre ma ła dispozision de i continenti e de łe acue ła ze conpletamente reinventada da l'autor Oda. Anca ła cosmołozìa de'l mondo ła ze tuta diversa da coeła reałe de fati, inte'l Àlbaro de ła Conosensa de l'ìzoła de Ohara, l'autor el ga dizenjà un mapamondo co un pianeta somejante a ła Tera e che'l ga sie łune che ghe orbita intorno, e onjuna de 'ste sie łune ła ga un só satèłite orbitante. El globo terestre de One Piece el se prezenta tuto recoverto de acua co un stramaro de ìzołe e arsipèłaghi sparpanjài so tuta ła suparfisie. L'ùnega tera emersa che ła se configura cofà un continente ła ze ła cusidita Łinea Rosa che ła traversa el globo inte'l senso łonzitudinałe "tajandoło" in du parti cofà el meridian de Greenwich. In corespondensa de ła łinea de l'ecuatore A se cata na fasa de mar anca dita da ła Rota Major. 'Sta chive ła ze dividesta in du parti par via de ła prezensa de i du meridiani formài da ła Łinea Rosa: ła prima metà ła ze ciamà el Paradizo, tamentre ła segonda ła ze ciamà el Mondo Novo. Se considaremo ła Łinea Rosa e ła Rota Major cofà de i ełeminti de confin e łora vien fora che'l resto de’l spasio de'l pianeta el ze costituìo da cuatro triàngułi sfèreghi che i coresponde a i Cuatro Mari: el Mar Orientałe (East Blu), el Mar Osidentałe (West Blu), el Mar Meridionałe (South Blu) e'l Mar Setentrionałe (North Blu). Łe ciurme de i pirati de i Cuatro Mari łe ze manco perigołoze e potenti de coełe de ła Rota Major. El protagonista Monkey D. Luffy el provien da l’ìzoła Dawn inte’l Mar Orientałe. Chełaltri menbri de ła Ciurma de’l Capel de Paja i provien da ìzołe sparpanjàe intra tuti e cuatro i Mari a ecesion de'l mèdego de bordo Chopper, che'l ze nativo de l'ìzoła de Drum inte ła prima metà de ła Rota Major.

Parsonaji de One Piece

Par savèrghene de pì, vardarse ła voxe Parsonaji de One Piece.

Se’l protagonista de l’òpara el ze Monkey D. Luffy, capitan de ła Ciurma de’l Capel de Paja, via via che ła storia ła prosede A se zonta un stramaro de parsonaji che i pol èsar insebrài in ‘ste categorie:

Pirati

I pirati i ezisteva za vanti de Gol D. Roger ma, daspò de ła só declarasion so’l One Piece (fazesta inte’l patìboło de ezecusion), A se pol dir che scumisia ofisialmente l’Era de ła Piratarìa. De fati A se cata ciurme de pirati za inte łi Cuatro Mari, indóe che i tende a far i sparonsoni tra łe popołasion de łe varie ìzołe e co ła Marina che ghe tien bota. A partir da’l Paradizo de ła Rota Major A se cata ciurme asè pì potenti e organizàe e par 'sto motivo tante ìzołe łe ze sote el controło direto de i pirati, soratuto de coełi che i apartien a ła Flota de i Sete. El Mondo Novo el ze goernà solche da i Cuatro Inperadori, donca se na ciurma ła vol soravìvar in 'sto mar o ła se sotomete a un Inperador opur ghe toca conbàtarlo. Scuazi tuti i pirati pì forti i ze dotài de poteri spesiałi derivanti da'l fato de ver manjà on partigołare Fruto de'l Diàoło.

Ciurma de'l Capel de Paja

Par savèrghene de pì, vardarse ła voxe Parsonaji de One Piece#Ciurma de'l Capel de Paja.

Ła Ciurma de'l Capel de Paja (麦わらの一味 Mugiwara no ichimi) ła ze ła ciurma protagonista de One Piece. Ła ze capitanada da Monkey D. Luffy. A'l momento (vołume n°82) 'sta ciurma ła ze conposta da 9 menbri. Onjun de łuri el ga na partigołare braura inte un spesìfego canpo. Ła ze una de łe pì forti tra coełe che łe nàvega inte ła Rota major, e de fati i ze rento la łista de i pì parigołozi pirati de ła nova jenerasion conosùi co'l nome de łe Ùndeze Suparnove. Tuti i só menbri i ga na reconpensa so'l cao, mesa su da'l Goerno Mondiałe, e a'l momento la soma de łe tute łe reconpense de i Mugiwara ła ze rivà a ła nodévołe sifra de 1.570.000.100 Berry.

Ła Flota de i Sete

Par savèrghene de pì, vardarse ła voxe Parsonaji de One Piece#Ciurme de ła Flota de i Sete.

Ła Flota de i Sete (王下七武海 Ōka Shichibukai) ła ze na organizasion de pirati che i ga asetà de sotostar a i òrdeni de’l Goerno Mondiałe in canbio de na imunità łegałe. De conseguensa łe varie atività criminałi portàe vanti da ‘sti corsari łe resta inpunìe parché ła Marina anca eła ła depende da’l Goerno Mondiałe. Ła Ciurma de’l Capel de Paja fin deso ła se ga scontrà o ła ga vuo a che far co scuazi tute le ciurme che łe ze, o łe ze stàe, rento ła Flota de i Sete.

I Cuatro Inperadori

Par savèrghene de pì, vardarse ła voxe Parsonaji de One Piece#Ciurme de i Cuatro Inperadori.

I Cuatro Inperadori (四皇 Yonkō) i ze i comandanti de łe cuatro ciurme de pirati pì forti in asołuto de'l mondo de One Piece e i dòmina incontrastài tuto el Mondo Novo. Onji inperador el ze considarà na parsona forte asè e perigołoza e solche in puchi i se azarda a sfìdarli o a mancarghe de respeto. A savemo che i Cuatro Inperadori i ze ‘sti cuà:

- Shanks “El Roso”
- Charlotte Linlin “Big Mom” (let. “Ła Mamona”)
- Kaido “de łe Sento Bestie”
- Marshall D. Teach “Barbanera”

Prima de ła Gran Bataja de Marineford a’l posto de Barbanera el jera inperador Edward Newgate “Barbabianca”, conosesto par èsar l’omo pì forte de’l mondo e copà in cheła bataja purpio da'l pirata Barbanera. Un puchi de ani indrìo Barbabianca el gheva sintìo ła spiegasion de'l segreto de'l One Piece ciacołando de parsona co Gol D. Roger, ma no’l se ga mai intaresà par catarlo. A savemo anca che Shanks, da zóvane, el jera stà novisio inte ła ciurma de’l Re de i Pirati e donca pol èsar che anca łu el conosa calcosa. A no savemo mìa se Big Mom e Kaido i sipia a conosensa de ła verità so'l One Piece, par serto savemo che i ze drio nar in serca de i misteriozi Road Poignee Griffe che i serve par catar ła diresion justa par l'ìzoła de Raftel, indóe che se pensa che ghe sipia el tezoro. I Cuatro Inperadori i ze paroni asołuti de’l Mondo Novo, njanca ła Marina ła ze bona de contrastarli, siben che nisun de łuri el sipia bon de prevałer sora de chełaltri. I convive su che’l toco de mar in virtù de on dełicato ecuiłibrio che'l stà in piè a mezo de ałeanse co chełaltre ciurme, ma anca a mezo de crìmini e de tramaci małavitozi.

Łe Ùndeze Suparnove

Par savèrghene de pì, vardarse ła voxe Parsonaji de One Piece#Ciurme de łe Ùndeze Suparnove.

Łe Ùndeze Suparnove (11人の超新星 Jūichinin no Chōshinsei) łe costituise un grupo de pirati de ła nova jenerasion che, rivàe inte'l arsipełago Sabaody vanti de i Du Ani de'l Time Skip, łe gheva so'l cao na reconpensa suparior a 100 mełioni de Berry. Daspò de du ani da ła Gran Bataja de Marineford A se cata tuti 'sti parsonaji inte'l Mondo Novo co łe reconpense che łe ze ndàe suzo anca de un spropozito. Łe Ùndeze Suparnove, insenbre co'l neoinperador Marshall D. Teach “Barbanera”, łe ze aromai consideràe co'l tèrmene de ła "ła pezo jenerasion" (最悪の世代 Saiaku no seda) parché łe ze drio crear cazin inte łi dełicati ecuiłibri che fin deso i gheva tenjesto in piè el mondo de One Piece. Da cuande che łe ze inte'l Mondo Novo calcune de łe Ùndeze Suparnove łe ga streto de łe partegołari ałeanse intra de łure (par ezenpio come che i ga fato i Capel de Paja co i pirati Heart capitanài da Trafalgar D. Water Law) opur łe se ga sotoposto a un de i Cuatro Inperadori.

Marina (One Piece)

Ła Marina (海軍 Kaigun) ła ze na organizasion miłitar sote el controło del Goerno Mondiałe e ła ga el cònpito de mantènjar ła paze e l’òrdene inte i mari, soratuto contrastando el mondo de ła piratarìa. A se pol dir che la Marina de One Piece ła ze na sorta de “połisìa de’l mar” anca parché inte łe varie ìzołe, indóe che A ghe ze na sovranità indipandente, A se pol catar ła prezensa de guardie o de ezèrsiti sote el controło de cheła istesa nasion. El Goerno Mondiałe el dòpara ła Marina, insenbre co ła Flota de i Sete, par mantènjar el difìsiłe ecuiłibrio co’l strapotere de i Cuatro Inperadori. In cao de ła Marina A ghe ze un Capitan Zenerałe da Mar (Grandammiraglio inte ła varsion italiana) che'l ze Sakazuki anche dito "Akainu" (let. “El Can Roso”). Sote de Akainu A ghe ze tre Capitani da Mar (Ammiragli inte ła varsion italiana) che i ze reconosùi par èsar forti asè tanto da poder tènjar el confronto almanco co un de i Inperadori. El nono de’l protagonista Luffy el ze Monkey D. Garp, a dir un Capitan da Mar Vicario (Vice Ammiraglio inte ła varsion italiana) sèłebre e respetà pa’ ła só gran forsa e parché, ani indrìo, el ga conbatùo a ła pari njente manco che co’l Re de i Pirati. Cofà che ze pa' i pirati anca tra i ofisiałi pì forti de ła Marina A ghe ze chi che ga i poteri derivài da i Fruti de'l Diàoło e, in partigołare, i Capitani da Mar.

Goerno Mondiałe

El Goerno Mondiałe (世界政府 Sekai seifu) el se ciama cusì parché ła ze l’organizasion che ła goerna el mondo de One Piece. El ze stà fondà 800 ani vanti de ła narasion, da 20 nasion vinsenti che łe gavéa sconfito un misteriozo Renjo Antigo che de coeło A no se sa mìa njente. I disendenti de 'sti Vinti Renji i costituise ła casta de i Draghi Sełesti. El Goerno el ze struturà cofà na confederasion de 170 renji sparpanjài in tuto el mondo. Onjun de ‘sti renji el mantien na forte autonomìa e indipandensa ma pa’ łe coestion intarnasionałi i pol cołaborar fra de łuri tràmite el Goerno. In cao de ła jerarchìa de’l Goerno A ghe ze i Sincue Astri de Saviesa, a dir sincue misterioze parsone che par comandar, e mantènjar l’ecuiłibrio mondiałe, i ga a despozision ła Marina, ła Flota de i Sete e anca el Cypher Pool, a dir na sorta de połisìa segreta che ła ga jurezdision so i cazi “pułìteghi”. De fati ła preocupasion granda de i Sincue Astri de Saviesa ła ze coeła de mantènjar el siłensio, pa’ no dir ła censura totałe, so i fati revardanti i Sento Ani de’l Vodo Grando, a dir el parìodo che in coeło A se pensa che’l sipia stà anientà el misteriozo Renjo Antigo. Par tuti ‘sti motivi A vien fora, asè de frente, che l’operar de’l Goerno no l’è mìa tanto spiero e ansi, in tałuni cazi, A se pol dir che’l sèita de łe sielte asè discutìbiłi da’l ponto de vista ètego, pa’ no dir criminałi. Anca par 'sta razon ła Ciurma de’l Capel de Paja pì de calche ‘olta ła se ga meso contro el potere mondiałe. A onji modo el nemigo prinsipałe de’l Goerno resta ła cusidita Armada Revołusionaria.

L'Armada Revołusionaria

L'Armada Revołusionaria ła ze na organizasion forałeje che ła ga l'obietivo de butar zo el Goerno Mondiałe e i Renji che a coeło i ze łigài. Ła ze tanto segreta tanto cuanto potente e par 'sto motivo ła ze considerada asè parìgołoza da łe autoridà mondiałi, a'l isteso łeveło de łe pì forti Ciurme de i Pirati. A se pol dir che'l Goerno el consìdera i menbri de l'Armada cofà de i veri e propi teroristi. In cao de 'sta organizasion A ghe ze Monkey D. Dragon a dir só pare de'l protagonista Monkey D. Luffy, on parsonajo tanto misteriozo cuanto l'organizasion istesa. Ła baze de'l organizasion ła se catava inte l'ìzoła de Baltigo inte ła Rota Major siben che, inte łi ùltemi capìtułi, ze venjesto fora che ła ze stà descoverta da i pirati de Barbanera e daspò anca da ła Marina e donca ła ze stà dezbandonà par senpre da i Revołusionari. L'operar de l'Armada Revołusionaria el ze de'l tuto fora da łe règołe e da ła łeje cofà coeło de i Pirati ma, a difarensa de 'sti ùltemi, i Revołusionari i seità obietivi puramente połìteghi e mìa de richesa o dominio so i mari. Donca, anca par 'sto motivo, no i se mete mai in conpetision co łe Ciurme Pirata. El comandante vicario de l'Armada el ze Sabo, a dir el fradełastro de Monkey D. Luffy e de Portuguese D. Ace. N'altro de inportante el ze Emporio Ivankov anca dito Iva, on parsonajo asè stranbo ma anca tanto forte e asè łigà a Dragon. Iva el ze stà de gran juto a Luffy sia durando ła saga de Impel Down e sia durando coeła de ła Gran Bataja de Marineford. Par de pì el ga arlenà el cogo Sanji durando i Du Ani de'l Time Skip.

Varda anca

• Eiichirō Oda
• Parsonaji de One Piece
• Jeografìa de One Piece
• Monkey D. Luffy