Fevra

Un termòmetro clìnico chel mostra na tenperadura corpòrea de 38.7 °C

Ła fevra (o féra) ła xé na ełevasion de ła tenperadura corporea al de sora del vałor considarà normałe (sirca 37 gradi centìgradi par i ómeni).

Tenperadura corpòrea

Łe reasion chìmeghe che łe permete ła vida łe pode acader soło entro un determinà entervało de tenperadura. I animałi omeotermi i dòpara dei mecanismi drénto de termoregołasion, chei łasia stabiłir na determinada tenperadura corpòrea media, difarente da spece a spece, par el coreto mantenimento de łe funsion vidałi.

'Ntei èsari omani ła tenperadura normałe ła xé comunemente considarada de 37 °C, parò sta roba qua ła xé un vałor approsimà. A revardo i xé sta fati un mucio de studi e, drio łe fonti, xé stà indicàe piasè tenperadure "normałi". I studi pì rexenti i indica speso na tenperadura de 36,8 °C, co na serta variabiłità da persona a persona (de sirca ±0.4 °C).

Oltre a ła variabiłità individuałe bexogna anca tégnare conto che ła tenperadura corpòrea ła se move de sòłito durante el giorno, col łiveło pì baso el matin a łe 4 e col pì alto ła sèra a łe 18. Cusì na tenperadura de 37,5 °C podarìa èsare fevra del matin o del pomerijo. Anca altri faturi come ła digestion, l'atività fìxica e, 'nte łe fémane, el ciclo mestruałe.