Raffaella Carrà

Da Wikipedia, l'ençiclopedia libara.
Infobox de personajo Raffaella Carrà
Raffaella Carrà.jpg
Raffaella Carrà inte'l 2008 durante l'ùltema edision de Carràmba! Che fortuna
SitadinansaItàlia
Nasimento18 de zugno, 1943, Bołonja
Morte5 lujo 2021 Cànbia el vałor in Wikidata (78 ani) 5 lujo 2021 Cànbia el vałor in Wikidata (78 ani) Cànbia el vałor in Wikidata
Łéngue parlae
Ocupasion
  • showgirl, cantante, bałarìna, atora, condutora tełeviziva, radiofonega e autora tełeviziva itałiana
Discografia
Targheta discogràfegaColumbia Records
Hispavox (it) Traduzi
Barclay (it) Traduzi
Compagnia Generale del Disco (it) Traduzi
RCA Italiana (it) Traduzi
Decca Records (it) Traduzi Cànbia el vałor in Wikidata
IdeołoziaComunismo Cànbia el vałor in Wikidata
StrumentoVoze Cànbia el vałor in Wikidata

IMDB: nm0141123 Allocine: 58878 Rottentomatoes: celebrity/raffaella_carra Allmovie: p11226
Facebook place: raffcarra Twitter: raffaella Youtube: UCa-fnDJH_jA-0gWdEnUU0ng Spotify: 6EVyI0S0b1Ld2nm37m5x85 iTunes: 26368290 Last fm: Raffaella+carrà Musicbrainz: feeef0f7-33d3-4df7-a269-f811489a4125 Songkick: 85322 Discogs: 302018 Allmusic: mn0000327427


Raffaella Carrà, pseudònemo de Raffaella Maria Roberta Pelloni (Bołogna, 18 de zugno, 1943 - Roma, 5 de lujo del 2021), ła ze stada na showgirl, cantante, bałarìna, atora, condutora tełeviziva, radiofonega e autora tełeviziva italiana.

Definia "Ła rezina de ła tełevizion itałiana"[1][2], ła ze sta prezente inte i pałinsesti tełevizivi da ła fin dei ani sesanta ad ancùo e durante ła so łonga carera ła ze deventà na icona de ła mùzega e de ła tełevizion itałiana, catando grandi consensi anca a l'estero, soratuto in Spanja.[3][4][5][6]

Inte el corimento de ła so cariera, cofà declarà da eła stesa inte na intervista sol setimanałe TV Sorrisi e Canzoni, ła ghea vendesto pì de 60 milioni de dischi, mentre inte'l corimento de n'altra co Pippo Baudo a Domenica In, ła ga declarà de gaver 22 dischi intrà plàtino e oro, rezultando èsar una de łe artiste italiane a gaver vendesto de pì in tuto el mondo.

Inte l'autuno 2020 el cuotidian britànego The Guardian el incorona Raffaella Carrà cofà sex-symbol eoropea, definéndoła «l’icona culturałe che ła ga insegnà a l'Eoropa łe zoje del seso».[7]

Biografia[canbia | canbia el còdaxe]

Raffaella Carrà ad 8 ani in Tormento del passato de Mario Bonnard (1952).

Raffaella ła zera nasesta Bołogna da pare romanjoło,[8] zestor de un bar de Bellaria (sitadina de ła riviera adriadega a l'epoca in provinsia de Forlì, ancò de Rimini), e da Iris Dellutri (1923-1987[9]), di famiglia siciliana[10][11]. I zenitori, tutavia, se ga separà poco dopo łe nose[12] e ła picoła Raffaella ga pasà gran parte de ła so infansia tra el bar del pare e ła zełatarìa de Bellaria-Igea Marina. Pròpio in sta ùltema, ła ze cresesta seguìndo in TV ła trazmision de Il Musichiere, inparando a memoria titołi, bałeti e ritornełi de łe canson. A sołi oto ani ła ga łasà ła riviera romanjoła per seitar i studi diretamente a Roma, prima a l'Academia Nasionałe de Dansa, fondada da ła bałarìna rusa Jia Ruskaja, drìman al Sentro sperimentałe de sinematografia.

Ani sincuanta e sesanta[canbia | canbia el còdaxe]

Ła so cariera sinematografega ga scominsià asè presot, o sia inte el prinsìpio dei ani sincuanta, partesipando cofà atora puteła, a 'pena oto ani, al film de Mario Bonnard, Tormento del passato (1952), un mełodrama "zbregałàgreme" (fiłon siematografego ałora tanto in voga tra el pùblego itałian) inte'l cuało ła ga intarpretà el personazo infantiłe de Graziella.[13] Tra el 1958 e'l 1959 ła ga ciapà parte, co picołi ròłi, ad altri tre film.

Inte'l 1960 ła ga conseguìo el diploma al Sentro sperimentałe de sinematografia; inte'l steso ano, ła ga ciapà parte ai film La lunga notte del '43 de Florestano Vancini e Il peccato degli anni verdi de Leopoldo Trieste. Contenporaneamente, ła ga scominsià anca el teatro, scriturada da ła conpanja Carli-Pilotto. Dopo un pasajo a ła radio, indove so mandà de Luciano Rispoli, ła ga reałizà e ga conduzesto ła rubrica Raffaella col microfono a tracolla, a metà 1962, el regista Stefano De Stefani ła ga seliesta come vałeta de Lelio Luttazzi par el programa Il Paroliere questo sconosciuto.

Inte'l 1960 ła ga sostenjesto un provin par el ròło de Rosetta (ła fia de ła protagonista Cesira, intarpretada da Sophia Loren) par el film La ciociara de Vittorio De Sica, ma ła zera stà scartà in cuanto retenjesta masa maùra par cueła parte (drioman afidada a l'atora itało-mericana Eleonora Brown).

Ła ga partesipà cuindi ad altri film, tra łe cuałe I compagni (1963) de Mario Monicelli e l'hollywoodian Il colonnello Von Ryan (1965) de Mark Robson, indove ła ga avesto cofà partner Frank Sinatra. Inte'l 1964 ła ga reçità inte l'orizinałe tełevizivo La figlia dell'oca bianca scrivesto da Edoardo Anton par ła rubrica Rai Vivere insieme, direta da Ugo Sciascia[14]. Inte'l 1965 ła ga reçità ła parte de Costanza De Mauriac inte'l senegiato tełevizivo Scaramouche, co Domenico Modugno.[15] Inte i ani sesanta łe croniche roza se ga ocupà speso de èła par ła rełasion co'l zogador de bałon de ła Juventus Gino Stacchini,[16] durada oto ani.

El 3 de marso 1967 vien trazmetesto so'l canałe nasionałe "Tutto per bene", el film par la tv traesto da l'omonemo romanzo de Pirandello.

Inte'l zenaro 1968 ła ze stà a ła condusion de un speciałe in onda so ła segonda rede, intitołà Tempo di samba. Inte'l zugno del steso ano, ła ga parteçipà al senegiato Rai Processo di Famiglia, de Diego Fabbri e, so'l finir de l'ano sucesivo, ła ze stà prezente inte'l senegiato Il sorriso della gioconda.

El canbio del conjome[canbia | canbia el còdaxe]

Inte ła prima metà dei ani sesanta gha ze stà dazesto el pseudonemo Carrà, consejà dal regista Dante Guardamagna, el cuałe, pasionà de pitura, ga asosià el so vero nome, Raffaella, che recorda el pitor Raffaello Sanzio, al conjome del pitor Carlo Carrà.[17] Tutavia, Raffaella no ła ze riusìa o otenjer tanto suceso (in termani de popołarità) come atora, e cusì, a l'inisio dei ani setanta, drìo el suceso otenjùo come showgirl in tełevizion, ła ga deçidesto de abandonar ła reçitasion (via che alcune sporadiche ed izołae esperiense sucesive in alcuni film e senejadi TV), e de concentrarse so ła carièra de prezentadora tełeviziva, soubrette e cantante, co ła cuała invese ła otenjarà suceso e fama a łiveło intarnasionałe.

Ani setanta[canbia | canbia el còdaxe]

Raffaella Carrà (a sànca) co Marisa Mell inte'l 1972.

Inte ła stajon 1969-1970 ze rivà el suceso tełevizivo, inte'l spetacoło Io, Agata e tu (co Nino Taranto e Nino Ferrer), in cui ła Carrà zlansava un novo stiłe de showgirl, scatante e moderna. Inte l'ùtuno del steso ano ła ze stà al fianco de Corrado in Canzonissima, andove ła ga dazesto scandało par el bonìgoło descoerto mostrà inte ła sigla de avertura Ma che musica maestro!, che ga razonzesto łe sime de łe clasifeghe, vendendo 200.000 copie. I ùndeze indezi de gradimento e de ascolto gaveva tocà łivełi inaspetai, consacrando Raffaella cofà ła nova steła del spetacoło itałian. Vedesti i sodisfacenti eziti de l'ano presedente, ła Rai gaveva desidesto de reconfermar ła stesa copia de condutori anca par ła nova edision del programa. Infati inte'l 1971 ła ze stà de novo a Canzonissima, indove ła ga vedesto entra in clasifega tre sìngołi: ła sigla Chissà se va, Maga Maghella (destinada al pùblego dei putełi) e 'l çełebre Tuca tuca, co zontà el bałeto. Sto ùltemo da ła tersa pontada del programa l'è stà censurà da ła Rai par via de ła coreografia zudegà masa sfrontà e provocatoria. Soło daspò l'ezibision insenbre co Alberto Sordi, el bało ga suparà łe censure e łe połemiche inisiałi, deventando un otintìco fenomeno popołar. Ze del steso ano el primo album publegà da ła cantante, Raffaella, publegà so l'onda del gran suceso de Canzonissima 1970 e de cueło parsonałe de ła vedette. El contien Ma che musica maestro, sigla del programa. Inte'l steso ano ła ga publegà nantro album de suceso, Raffaella Carrà, contenjente anca el brano Borriquito, primo suceso so'l marcà łatin.

Senpre inte'l 1971, ła ga partesipà rénte de Georges Descrières a l'epizodio intitołà La donna dai due sorrisi, inte ła serie tełeviziva de produsion franseza Arsenio Lupin, produzesta dal 1971 al 1974.[18] Seguì poi, nel 1974, Milleluci, prezentà al fianco de Mina, (ùltemo varietà al cuało partesiparà sta ùltema proco prima del ritiro definitivo da łe sene) che ga otenjesto un clamorozo suceso de pùblego, afermando definitivamente Raffaella come showgirl a tuto tondo. Nonostante łe notisie rełative a na suponesta rivałità, łe do andava asè d'acordo durante el programa, tanto che ze stà l'istesa Mina a chieder al regista Antonello Falqui de dar major spasio a ła co-condusion del show a Raffaella. A tal propozito Raffaella afermarà drìoman in merito al raporto co ła cołega:

"Gavemo pasà na setemana a Ługano, in una sua dełisioza cazeta so'l łago, se gavemo piazeste suito e gavemo fazesto suito amçisia. Tanti ne vołeva rivałi, ma nialtre a ła sera, daspò łe estenuanti prove co Falqui, zogavimo a caza mai a scopon sientìfego par ore."

So l'onda del grando suceso de ła trazmision, ła ga publegà l'album Milleluci, conponesto prevałentemente da cover. Inte l'isteso ano ła ga prezentà ła so tersa Canzonissima, sta volta conduzesta in sołitaria, indove par de pì ła dotava co Topo Gigio inte'l brano dedicà ai putełi Strapazzami di coccole. Inte l'isteso ano ła ga publegà l'album Felicità tà tà, contenjente oltra al brano omonemo, sigla de ła so tersa Canzonissima, uno dei so mazori sucesi, el brano disco-music Rumore. L'album ga otenjùo un otimo suceso in Italia, andove el se ga azudegà el disco de platino, e boni riscontri anca a l'estero, azudegandose racuanti dischi d'oro.

Tra el 1975 e'l 1980 ła se ga fazesto conosar in Spanja, e'l suceso de łe so canson ga portà TVE a ofrirghe inte'l 1976 na monografia, La hora de Raffaella Carrà (pontada de ła serie La hora de...), grasie a ła cuała ła ze devenjesta popołar par el pùblego iberico.

In sti ani Raffaella se ga consentrà majormente so ła so carièra de cantante, otenjendo consensi in tuto el mondo cofà Spanja, Zermania, Fransa, Ołanda, Belgio, Inghiltera, Gresa e in partegołar inte i paezi de l'America Łatina, devenjendo un vero e pròpio fenomeno de esportasion de ła mùzega itałiana inte'l mondo. Uno dei sucesi pì clamorozi ze stà el brano A far l'amore comincia tu, che ze riusìo a tocar, inte ła so varsion ingleza, el segondo posto de ła clasifega dei sìngołi pì vendùi in Inghiltera, otenjendo diversi dischi d'oro e platino in tuto el mondo.[19] Inte'l 1976 ła ga insidesto l'album Forte forte forte, publegà in 36 paezi del mondo, azudegandose in Spanja, Renjo Unìo e Zermania racuanti dischi d'oro, mentre in Italia ben do dischi de platino, raprezentando uno dei łaori discografeghi de mazor suceso de ła cantante, anca a łiveło cuałitativo. Mentre inte'l 1977 ze stà ła volta de Fiesta, l'album, dai soni pretamente eurodisco, che contien Fiesta, una de łe canson "sìnboło" de ła soubrette.

Inte'l 1978 ła ze rientrà in Italia, dopo numeroze tournée a l'estero, par prezentar el varietà del sabo sera Ma che sera, inte'l cuało ła prezentava, cantava e bałava afiancada da Paolo Panelli, Bice Valori, Alighiero Noschese e Giorgio Bracardi, anemadori dei spasi comici del programa. Partegołarmente recordà ze ła sigla inisiałe, Tanti auguri, in cui Raffaella canta un ino a l'amor łibaro e spensierà, co'l ritorneło devenjesto in poco tenpo çełeberimo (Come è bello far l'amore da Trieste in giù), el cui video ze stà zirà a l'interno del parco a tema de l'Italia in miniatura de Rimini; el brano ze devenjùo suito un altro suceso intarnasionałe e'l ze stà inserìo inte l'album Raffaella, che ga otenjùo un altro inportante suceso de pùblego. El programa parò, ze stà ojeto de controversie e połemiche, parchè trazmetesto inte i difisiłi e trazeghi zorni del Secuestro de Aldo Moro.

Inte'l 1979 zera stà ła volta de un altro clamorozo suceso discografego par Raffaella, l'album Applauso, el cuałe vantava łe firme, oltra a cuełe de Gianni Boncompagni, anca dei zovai debutanti de Sanctis e Musso. L'album ga razonzesto el 75º posto tra i pì vendùi de l'isteso ano.

Ani otanta[canbia | canbia el còdaxe]

Inte'l 1980 ła ze stà so'l set del film Barbara, zirà in Arzentina e distribuìo par el marcà sudamerican (ma non in Italia indove ze tuto ancùo ancora inedito), direto da Gino Landi.

Inte l'isteso ano ła ga insidesto l'album Mi spendo tutto contenjente ła hit Pedro, uno dei brani pì conosùi de ła cantante e Ratatataplan, ispirà inte'l titoło da l'omonemo film de Maurizio Nichetti. (El 10 de zenaro 2020, in ocazion del 40º aniversario da ła so prima publegasion, ze stà publegà ła restanpa in varsion Picture Disc, concuistando inte ła prima setemana el 4º posto inte ła clasifega dei viniłi pì vendùi.)

Inte'l 1981 ła ga prezentà Millemilioni, che ga raprezentà el primo esperimento de cooperasion tełeviziva intarnasionałe: sincue spesiałi, paromo dei cuałi zirà in una diversa cavedałe: Buenos Aires, Sità del Mèsego, Łondra, Roma e Mosca. El programa ga avesto na media de sirca 10 milion de tełespetadori.

Inte'l 1982 ła ga afiancà ancora Corrado prezentando Fantastico 3, co Gigi Sabani e Renato Zero, co na media de 25 milion de spetadori, cantandone anca ła sigla de vertura, ła çełebre Ballo ballo, canson che sarà anca al çentro de alcune controversie, in cuanto acuzada da alcuni de èsar un plagio del brano Eleanor Rigby dei Beatles. So l'onda del gran suceso de ła trazmision del sabo de sera Fantastico, ze stà publegà el disco Raffaella Carrà 82, aranzà e conponesto, tra i altri, da Franco Bracardi e Danilo Vaona, e che ga vedesto tra i autori, oltre a Gianni Boncompagni e G. Belfiore, anca Giancarlo Magalli.

A febraro del 1983, drìoman al gran suceso de Fantastico 3, ła Carrà zera stà invità ad ezibirse par ła prima volta come super ospite al Festival de Sanremo 1983. Soli sulla luna e Ahi, scrivesti da Valsiglio - Pace - Depsa, ze brani inçidesti apozitamente par l'ocazion, registrai - "in fretta e furia" - come ga dichiarà ła stesa cantante.

Dal 1983 al 1985 ła ga prezentà so Raiuno Pronto, Raffaella?, el primo programa de mezozorno de ła Rai che ga senjà ła so definitiva afermasion cofà condutora, metendo in resalto non soło łe so cuałità de soubrette, ma anca de intratenidora e parona de caza, capase de rełasionarse co enpatia conpanja sia ai ospiti iłustri sia ai tełespetadori che tełefonava par partesipar ai zoghi del programa, in cui ła ga łaorà par ła prima volta co Gianni Boncompagni (che ne ga curà ła regia e ne ze stà autor insenbre a Giancarlo Magalli), in concorensa direta co Il pranzo è servito del so amigo Corrado, co'l cuało ła ga conduzesto anca na edision dei Telegatti inte'l 1991. El programa ze recordà parchè el ze stà el primo de ła Rai ad andar in onda inte ła fasa del mezozorno. Al çentro de ła trazmision ghe jera l'interasion co'l pùblego in direta traverso vari zoghi tełefoneghi. Uno dei zoghi-sìnboło che ga caraterizà ła trazmision inte l'imajinario cołetivo del pùblego jera el zogo dei faziòłi. Ła resposta de Rai 1 ga otenjesto suito un groso suceso de pùbleco, razonzendo in poco tenpo rezultadi d'ascolto un mucio ełevai co 4 milion e 500miła spetadori de media e ponte de 9 milion de contati. Inte'l ziro de breve tenpo ła trazmision ze devenjesta ojeto de studio de ła tełevizion braziliana, arzentina, todesca e franseza che ne ga copià el format. Anca in sta trazmision, Raffaella ga intarpretà ła sigla del programa: Fatalità inte ła prima edision, Que dolor inte ła segonda.

El straordenario suceso de Pronto, Raffaella? gha ga fazesto vinser inte'l 1984 el titoło de "Personajo tełeviziv femeniłe a łiveło europeo", consenjà da l'European TV Magazines Association. Inte'l 1984 ła ga firmà un contrato milionario par ła durada de do ani co ła dita de cuzìne Scavolini, co'l bomò "la più amata dagli Italiani" (ła pì amà dai italiani). Senpre inte'l 1984, el rinovo del contrato de łaor co ła Rai ze stà al çentro de una inpisada controversia co l'ałora Presidente del Consejo, Bettino Craxi, che gaveva definìo "imorałe e scandałoza" ła çifra che ła condutora gavarìa vadanjà par na escluziva de do ani (6 miliardi de łire de ałora).[20]

De sti ani ze i album de suceso, Fatalità (1983) e Bolero (1984).

Tra el 1985 e'l 1986, Raffaella Carrà ła ze stà invià del setemanałe Radiocorriere TV, par "Gli incontri di Raffaella", in cui ła intarvistava personałità połìteghe e del spetacoło.

Inte ła stajon tełeviziva 1985-1986 ła ze stà ła condutora del supershow Buonasera Raffaella (varsion de prima serada de Pronto, Raffaella?), łe cui prime dièze pontade zera andae in onda da Roma, mentre łe ùlteme sincue ze venjeste trazmeteste in direta, par ła prima volta inte ła storia de ła TV pùblega italiana, dai studi de ła Rai Corporation de New York (deso no pì uzai) e grasie a Rai International, vizibiłi in tuto el nord e sud Amèrica. Raffaella, in pì, intervistava e dotava co ospiti iłustri cofà Henry Kissinger, Joe Cocker, Riccardo Cocciante, Patty Pravo, Stevie Wonder, Ginger Rogers e Sammy Davis Jr. e ła cantava łe sigle Fidati! e Bellissimo. Ła sigla inisiałe e finałe de ła trazmision ze contenjùe inte l'album Fidati!, venjesto fora inte'l steso ano.

Inte ła stajon sucesiva 1986/1987 ła ga conduzesto ła trazmision ideà da Corrado inte'l 1976 Domenica in, de cui inazonta ła cantava sia ła sigla de avertura, Curiosità, che ze stà una de łe prime sigle de ła TV italiana ad èsar reałizà traverso gràfeghe ełaborae al computer (granda inovasion par l'època), sia ła sigla de serada, Casa dolce casa. Pròpio a Domenica in, inte'l meze de novenbre, ła Carrà ga reazìo a un artìgoło publegà dal setemanałe scandałìstego Novella 2000, menasando na asion łegałe inte i confronti del jornałe, che ła gaveva acuzada de trazandar so mare che ła jera drìo morir.[21] So mare de Raffaella infati ła ze morìsta inte'l 1987. Raffaella ghe ga rendesto omajo pròpio durante naltra pontada de Domenica in, dedicandoghe el brano I thank you life.

Inte'l 1987 ła ze pasà a ła Fininvest, co un contrato miliardario de ła durada de do ani. Ła prima aparision so Canale 5 de ła Carrà risałe al 27 de disenbre 1987: in segonda serada zera stà trazmetesto un spesiałe dal titoło Benvenuta Raffaella, co'l dadrìo łe cuinte e video de łe prove del so novo show, nonché interviste a ła stesa Carrà e al so conpanjo de l'epoca, Sergio Japino, anca regista e coreografo de ła trazmision. El programa in cuestion ga debutà el 9 de zenaro del 1988 e ze stà el Raffaella Carrà Show. Drìoman ze seguìo, inte ła primavera 1989, Il principe azzurro, el segondo e ùltmeo programa conduzesto da ła Carrà par Canale 5. Entranbi i spetacołi in onda so l'atuałe Mediaset, no ga otenjùo parò grosi rezultadi in termani de ascolto, e i ga paresto panar ła so popołarità.

Ani nonanta[canbia | canbia el còdaxe]

Raffaella Carrà e Carlo Frisi a Ricomincio da due inte'l 1991.

Dapò el pariodo pasà a ła Fininvest, dai primi de zenaro del 1990, Raffaella ze tornà in Rai. El so novo show se intitołava Raffaella Venerdì, Sabato e Domenica... E saranno famosi, programa in onda el vènare in prima serada e'l sabo e ła doménega da łe 12:00. El programa ga avùo un seguito intitołà Ricomincio da due, in onda, sta volta, soło il sabo e ła doménega in orario de pranso. Entranbi i programi ze andai in onda so Raidue e ga otenjesto otimi indèzi de ascolto, che ła ga reportà al suceso. Inte'l majo del 1991, poche setemane dal fenimento del so programa, Raffaella ga conduzesto na edision dei Telegatti co Corrado, ùltemo ospite de ła trazmision de ła Carrà.[22]

Inte'l zugno del 1990, co Gigi Sabani, ła ze stà ła condutora de Cuando Calienta el sol, programa tełevizivo in do pontade in onda da l'Italia e da ła Spanja.[23]

Insenbre a Johnny Dorelli, inte'l 1991, ła ga conduzesto el varietà del sabo de sera de Raiuno, Fantastico 12, che, pur esendo recordà par l'ospitada de Roberto Benigni del 19 de otobre, che ga simułà un anpleso co ła condutora, fin a sinturarla, par po' simentarse in una ełencasion dei vari modi de pronunsiar i organi zenitałi mascołini e femenini, ga otenjesto indezi de ascolto inferiori a łe aspetative.

Dal 1992 al 1995 ła ze tornà cuindi in Spanja, prima do ani so TVE 1, conduzendo tre edision de Hola Raffaella, premià co tre TP de oro, ecuivałente iberego del Telegatto, e 'l preserałe A las 8 con Raffaella, che ła ga consacrà definitivamente inte'l paeze (drìoman TVE ga reciamà speso Raffaella par alcuni eventi de un zorno, cofà i festejamenti del Cao de l'ano del 1998); drìoman, inte ła stazon 1994-95, ła ze pasà invese a l'emitente spanjoła de ła Fininvest, Telecinco, co'l programa pomeridian En casa con Raffaella (vero e pròpio remake spanjoło de Pronto, Raffaella?) che ga otenjesto gran suceso, tanto che in fenimento de ła stazon, Telecinco ghe ga ofrìo a ła prezentadora un novo contrato de escluziva de do ani, che ła showgirl parò ga rifiutà par tornar a łaorar in Itàłia.

A ła fin del 1995 infati ła ze tornà so Rai 1 co Carràmba! Che sorpresa. Inte'l programa, inventà insenbre a Sergio Japino e Brando Giordani (tołendo ispirasion dal format britànego Surprise surprise!) Raffaella coinvolzeva in direta i ospiti e'l pùblego in sała de sorpreze e incontri inaspetai co parsone care (parenti, amisi) che no vedeva da tanto tenpo, architetai insenbre co un conplise. Ciò jera alternà a momenti de spetacoło traverso ła prezensa de vari ospiti tra i cuałi Adriano Celentano, Madonna, Britney Spears e Robbie Williams. El programa, za d ła prima edision, ga senjà el record de ascolti co na media de 10.000.000 de tełespetadori, che zera stà riconfermà anca inte łe sucesive edision. Inte'l 1998 al programa ze stà afidà el conpito de resołevar łe sorte de ła Lotteria Italia (a cui jera stà abinà za inte'l 1996), se ga desidesto cuindi de canbiar el nome in Carràmba! Che fortuna. Ła trazmisione ga riusìo a otenjer un suceso ancora mazor respeto a łe presedenti edision, razonzendo pichi del 66% de share co 14.000.000 de tełespetadori. Inte'l 1996 e dal 1998 al 2000, in contenporanea co Carràmba! Che sorpresa/Carràmba! Che fortuna, ga conduzesto anca łe strise 40 minuti con Raffaella, Centoventitré e I Fantastici di Raffaella, zonte zornaliere de cuaranta minuti del varietà del sabo de sera.

Ła ga refudà ła condusion del Festival de Sanremo 1997, co Piero Chiambretti, łasando el posto a Mike Bongiorno e Valeria Marini (come contà da Chiambretti steso, in un'intervista del 2018)[24]

Inte'l 1997 ła ga partesipà inazonta da protagonista a na miniserie in cuatro pontade de ła Rai intitołada Mamma per caso, direta da Sergio Martino, inte ła cuała ła intarpretava el ròło de na zornałista single, afiancada da Ray Lovelock, Jean Sorel, Maurizio Crozza e Carla Signoris, e trazmetesta in prima serada so Raiuno.

Ani domiłe[canbia | canbia el còdaxe]

Inte'l 2000 ła ga prezentà par ła segonda volta so Canale 5 el Gran Premio Internazionale dello Spettacolo insenbre a Paolo Bonolis (ła gaveva conduzesto el programa da novo inte'l 2004 insenbre a Gerry Scotti, ezibindose co Loretta Goggi.

Inte'l 2001, afiancada da Piero Chiambretti, Enrico Papi, Megan Gale e Massimo Ceccherini, ła ga preznetà ła 51ª edision del Festival de Sanremo, edision che no ga otenjùo gran suceso. L'edision nùmaro sincuant'un del pì inporante concorso canoro italian ze stà al sentro de non poche połemiche, sia so'l pian tełevizivo sia so'l pian de ła condusion.

Drìo de na pauza łonga sìrca un ano da l'esperiensa poco fełiçe del Festival, dal 24 de zenaro 2002 ła ze tornada in prima serada so Rai 1 co ła cuarta edision de Carràmba! Che sorpresa. Inte'l 2004 ła ga conduzesto el programa Sogni, inte'l cuało, rivizitando Carràmba! Che sorpresa, se concentrava so ła posibiłità de reałizar i sonji dei italiani e inte'l 2006 Amore, replica de un esperimento riusìo in TVE (Contigo), dedicà a łe adosion a distansa. L'obietivo jera cueło de rancurar tramite un sentrałin łe adezion de cuanti vołeva jutar i putełi dei paezi pì povari del mondo co un sostenjo a distansa, riusindone a rancurar sìrca 130.000.

Inte l'isteso ano l'ator Fabio Canino, coadiuvà da Roberto Mancinelli, ła ghe ga dedicà un łibro publegà da Sperling & Kupfer: el RAFFAbook, sorta de sirco de na łonga carièra dedicà a łashow-girl. A l'isteso modo, na pontada de La storia siamo noi ghe ze stà dedicà a èła. Sénpre inte'l 2006 Tiziano Ferro ga publegà inte l'àlbun Nessuno è solo ła canson E Raffaella è mia, dedicada a ła Carrà, che ga partesipà al videoclip del brano, mentre ła cantante spanjoła Roser ga insidesto l'àlbun Raffaella, tributo co i mazori sucesi de ła Carrà cantai in spanjoło. Drìoman ła ga partesipà, insenbre co Robbie Williams, al programa de Diego Armando Maradona La noche del 10.

El 30 de novenbre 2007 ze venjesta fora Raffica, do CD e un DVD in cui ze stae meteste insenbre łe cantade e bałade da Raffaella durante tuta ła carièra, che ga razonzesto in Itàlia ła pozision nùmaro 15 inte ła clasifega FIMI,[25] vendendo pì de 50.000 copie.

Inte'l 2008 TVE ła gaveva ciamà par tre programi łigai a l'Eurovision Song Contest. El primo jera ła sełesion in onda l'8 de marso, Salvemos Eurovisión in cui i spetadori, traverso tełevoto e sms, serniva ła canson tra 10 sielte dai utenti de Myspace da portar a l'edision de chel'ano de ła kermesse eoropea che se ga zvolzesta a majo a Belgrado.

Daspò tałe inpenjo, ła ze tornà so Rai 1 par prezentar na nova edision de Carràmba! Che fortuna (dove, memore del recente inpenjo par TVE, ła ga inserìo come ospiti alcuni cantanti de l'ESC 2008) premiada ancora da l'auditel, co na media de 5.000.000 de tełespetadori; inazonta el biłanso de sta ùltema edision łigà a ła Lotteria Italia ze stà tanto pozitivo respeto ai ani presedenti: infati ze stà vendùi oltre 18 milion de tajandi (+25.5% respeto al 2007); Raffaella Carrà ła ze ła condutora ad aver conduzesto pì programi abinai a ła lotteria Italia, ben dièze: Canzonissima, Fantastico, Carràmba! Che sorpresa e Carràmba! Che fortuna; globalmente, in 5 edision de Carràmba, ła ga vendùo oltre 125.000.000 de tajandi.

Drìoman ła ze tornà in Spanja par conduzer na pontada de ła varsion ibèrega del Saturday Night Live so'l canałe Cuatro.

Sénpre inte'l 2008 ze stà publegà el łibro Mito in tre minuti de Antimo Verde, biografia artìsega bazà so un łaor de riserca. El 7 de novenbre de chel'ano l'è venjesto fora anca Raffica - Balletti & Duetti, un segondo cofaneto de do CD e un DVD co na sełesion de łe ezibision tełevizive de ła Carrà, fra łe cuałe doti co Mina in Milleluci, el çełebre Tuca Tuca co Alberto Sordi a Canzonissima 1971, Money Money co Loretta Goggi a Fantastico 12 e i bałeti de Millemilioni, registrai in esterna in varie sità del mondo, che ga razonzesto in Italia ła pozision nùmaro 66 inte ła clasifega FIMI[26] e ła pozision nùmaro 2 tra i DVD muzegałi pì vendesti.

Inte l'isteso ano par Rai 3, Raffaella ze stà autora de Il Gran Concerto, programa tełevizivo indove ła Granda Orchestra Sinfonega Nasionałe de ła Rai ła prezentava brani de mùzega clàsega e operìstega par na platea de 700 putełi e tozi, al fin de farghe scoerzer łori ła mùzega clàsega; a prezentarlo ze stà Alessandro Greco e ła regia fu de Sergio Japino.

Ani 2010[canbia | canbia el còdaxe]

Raffaella Carrà a Madrid inte'l 2017 insenbre al sìndico de Catania Enzo Bianco e al sìndico de Madrid Manuela Carmena.

Dal 2010 ła ze stà testimonial de ła Danone e fin al 2012 ła ga zirà diversi spot publicitari in onda so varie redi nasionałi. El 7 de agosto del primo ano del decenio, a Rimini, durante el Festival Milleluci, dedicà a èła, sìrca 250 copie ga bałà el Tuca Tuca, bałeto che ga conpìo 40 ani (bałà par ła prima volta co Enzo Paolo Turchi durante Canzonissima 1971-72). Inte'l 2010 ła ga dotà co Renato Zero inte'l so àlbun Sei Zero, ła canson Triangolo. I do se ga ezibìo anca in una tapa del conderto de Zero, el 5 de otobre del medemo ano. Inte'l 2011, daspò 13 ani de asensa, l'Italia ze tornà a partesipar a l'Eurovision Song Contest, e ła Rai ga seliesto ła Carrà par conduzer e comentar da l'Italia ła serada finałe de ła manifestasion, oltre che prezentar i voti asenjai da zuria e tełevoto.

Inte l'istà 2011 ze venjesto fora el remix de un novo stòrego brano muzegałe, A far l'amore comincia tu, che deventa cusì Far l'amore, reałizà dal noto DJ franseze Bob Sinclar, so partner inte ła condusion de ła finałe de l'ESC 2011, che ła ga vołesta al so fianco inte ła reałizasion del brano (e del rełativo videoclip), che se ga rivełà un rinovà suceso intarnasionałe; tałe remix ze stà drìoman inserìo da Paolo Sorrentino inte ła cołona sonora del so film La grande bellezza; el film, venjesto fora inte'l 2013, l'è stà premià l'ano drìo co l'Oscar al mejo film in łengua foresta.

Drìoman, insenbre a Neri Marcorè, ga fazesto da testimonial ad alcuni spot TIM, interpretando ła rezina Isabella di Castiglia. Inte l'otobre 2011, par el cuarto ano consecutivo, ła ze stà da novo autora del programma tełevizivo de Rai 3 Il Gran Concerto, conduzesto da Alessandro Greco.

Inte'l zunjo 2012 ła ga partesipà al Concerto per l'Emilia a sostenjo de łe popołasion colpìe dal taremoto del 20 e del 29 de majo 2012, indove ła cantava un so suceso, Rumore. A zenaro 2013, Raffaella Carrà ła gavarìa dovesto tornar, dopo dieze ani, a prezentar el varietà del sabo sera de Rai 1: el programa, dal titoło provizorio Auditorium, gavarìa dovesto sfidar el talent-show de Canale 5 Italia's Got Talent, ma inte'l meze de otobre 2012 el diretore de Rai Intratenjimento, Giancarlo Leone ga anuncià che l'inisio de ła trazmision el sarìa stà postisipà a data da destinarse, ma drìoman el programa ze stà anułà. A febraro 2013 ła ze deventà invese uno dei coach, insieme a Noemi, Piero Pelù e Riccardo Cocciante, inte'l programa The Voice of Italy, talent show muzicałe de Rai 2, prezentà da Fabio Troiano e Carolina Di Domenico. El 16 de łujo 2013 ła ga publegà el sìngoło dance Replay, che antisipava el so novo àlbun, a dizisete ani de distansa dal so ùltemo disco de inediti, dal titoło Replay (The Album).

L'àlbun l'è stà publegà el 19 de novenbre 2013, conpanjà dal segondo sìngoło estraesto Cha Cha Ciao. Sénpre inte l'isteso ano ła ga intarpretà sé stesa inte'l cine-panettone Colpi di fortuna par ła regia de Neri Parenti. Inte'l 2014 ła ga partesipà da novo a The Voice of Italy, sénpre łaorando cofà coach, visin a Piero Pelù, Noemi e el rapper J-Ax (che ga sostituìo Riccardo Cocciante). Anca i condutori del programa jera canbià: Fabio Troiano e Carolina Di Domenico zera stà sostituìi da Federico Russo e Valentina Correani. A febraro de l'isteso ano ła ze stà ospite a ła prima serada del Festival de Sanremo, indove ła se ga ezibìo in un medley de canson del so ùltemo àlbun, rivando al pico de ascolti de ła pontada (e segondo in asołuto) co un share del 55,36%.

Inte ła stajon tełeviziva 2014-2015 ła ze tornà so Rai 1 co un novo talent-show, ciamà Forte forte forte, che reciapava el titoło de una de łe canson pì conosùe de ła stesa Carrà (anca st'altra remixà da Bob Sinclar co'l titoło Forte), andà in onda in prima serada onji vènare dal 16 de zenaro al 13 de marso 2015. So ła sìa de ła trazmision vien publegà ła cuinta racolta ofisiałe de l'artista, co tante rarità publegae in franseze, ingleze, todesco, grego e spanjoło dal titoło Forte forte forte - Hits & Rarities.

A partir dal 24 de febraro 2016 ła ze tornà come coach inte'l programa de Rai 2 The Voice of Italy visin a Emis Killa, Max Pezzali e Dolcenera; durante ła pontada finałe ła ga anuncià che abandonava definitivamente el programa. El 19 de disenbre 2016 ła conduze co suceso el gala dei 60 ani (Gala 60 años juntos) de ła TVE, ła tełevizion pùblega spanjoła. Inte l'istà 2017 ła deventa produtora muzicałe (mantenjendo ła promesa fazesta in direta inte ła semifinałe de ła presedente edision de The voice of Italy) par uno dei so concorenti, Samuel Pietrasanta.

El 13 de otobre 2018 ła ze stà insinjìa de l'onorifisensa de Dama a l'Ordene al merito siviłe da l'anbasador spanjoło in Italia, Alfonso Dastis, par conto del re de Spanja Felipe VI.[27]

El 30 de novenbre 2018 ze venjesto fora l'àlbun de nadałe Ogni volta che è Natale, che raprezentava el gran ritorno discogràfego de l'artista a distansa de sincue ani dal so ùlemo łaor in studio (Replay - The Album) e el ritorno so ła sena tełeviziva despò do ani de asensa, cofà ospite de Fabio Fazio a Che tempo che fa e da Carlo Conti(condutor tełevizivo) a Un Natale d'Oro Zecchino. Inte l'àlbun A ze prezente un brano mai publegà, Chi l'ha detto, in rodasion radifònega dal 16 de novenbre e so YouTube dal 23 de novenbre, co'l video ofisiałe de ła canson, anuncià da èła istesa so'l so account ofisiałe de Twitter.

Inte ła primavera 2019 ła ze tornà in TV cofà condutora de un programa de intarviste a noti personazi del spetacoło, de ła cultura e del sport, dal titoło A raccontare comincia tu, ispirà al programa spanjoło Mi casa es la tuya, trazmetesto inte ła prima serada del zioba so Rai 3 par sìe setemane, dal 4 de apriłe al 9 de majo.[28] Drìoman el suceso otenjesto, el progrmaa ze stà confermà co novo siclo de cuatro pontae, in onda dal 24 de otobre al 14 de novenbre. El 17 de novenbre 2019 ła Carrà riłasa ła so ùltema intarvista tełeviziva al programa Che tempo che fa, so Rai 2.[29]

Ani 2020[canbia | canbia el còdaxe]

Inte l'otobre 2020 ze venjesto fora inte i sinema spanjołi el film Ballo ballo, co ła rezia de Nacho Álvarez, bazà so łe canson de ła Carrà, ła cuała ła ze prezente anca in un cameo. Dal 25 de zenaro 2021 el film ze disponibiłe in streaming inte ła varsion italiana.[30]

Ła morte[canbia | canbia el còdaxe]

Ła ze moresta a Roma el 5 de łujo 2021, a l'età de 78 anni,[31][32] a cauza de na małatia che no ła ze stà rendesta pùblega par vołontà de èła istesa. A darne l'anuncio ze stà el conpanjo de łonga data Sergio Japino.[33]


Tełevizion[canbia | canbia el còdaxe]

Prosa tełeviziva Rai[canbia | canbia el còdaxe]

Dopiadore italiane[canbia | canbia el còdaxe]

Rubriche zornałìsteghe[canbia | canbia el còdaxe]

Programi tełevizivi[canbia | canbia el còdaxe]

In Italia[canbia | canbia el còdaxe]

A l'èstaro[canbia | canbia el còdaxe]

  • La hora de... Raffaella Carrà (Primer Programa, 1976)
  • Raffaella Carrà Show (TSI 1, 1979)
  • Fantastica Raffaella (ATC, 1982)
  • Raffaella Carrà Show (TV3, 1988)
  • La fiesta del Mediterraneo (TVE 1, 1991)
  • Sevilla sueña (TVE 1, 1992)
  • Hola Raffaella! (TVE 1, 1992-1994)
  • A las 8 con Raffaella (TVE 1, 1993-1994)
  • En casa con Raffaella (Telecinco, 1995)
  • Campanadas de fin de año (TVE 1, 1997-1998)
  • Contigo (TVE 1, 2004)
  • Raffaella Hoy (Canal 13, 2005)
  • Salvemos Eurovision (La 1, 2008)
  • Europasión (La 1, 2008)
  • Salvemos Eurovision con Chikilicuatre (La 1, 2008)
  • Saturday Night Live (Cuatro, 2009)
  • 60 años juntos (La 1, La 2, 2016)

Autora[canbia | canbia el còdaxe]

  • Furore (Rai 2, 1997-2001, 2003, 2017)
  • Navigator (Rai 1, 1999)[36]
  • Segreti e bugie (Rai 1, 1999)
  • Il gran concerto (Rai 3, 2008-2011)
  • Forte Forte Forte (Rai 1, 2015)

Partesipasion a Festival muzicałi[canbia | canbia el còdaxe]

Publicità[canbia | canbia el còdaxe]

Całendari[canbia | canbia el còdaxe]

  • Calendario Lambretta 1970

Òpare łetararie[canbia | canbia el còdaxe]

Note[canbia | canbia el còdaxe]

  1. Nicola Napoletano, Raffaella Carrà compie 77 anni. Buon compleanno, Regina!blmagazine.it, 18 de zugno 2020. entrada il 29 de apriłe 2021.
  2. milanodabere.it, https://www.milanodabere.it/lifestyle/people/raffaella-carra-buon-compleanno-alla-regina-della-tv/.
  3. Raffaella Carrà 75 anni oggi: celebriamo la storia (galattica) di un'icona intramontabile, in Gioia, 18 zugno 2018. entrada il 15 settembre 2018.
  4. (ES) Lorena Pacho, Raffaella Carrà, el mito cumple 75 años, in El País, 19 zugno 2018. entrada il 15 settembre 2018.
  5. (ES) RAFFAELLA CARRA// Icono del espectáculo italiano — Radio Imagina, in Radio Imagina, 14 maggio 2012. entrada il 15 settembre 2018.
  6. 75 anni di Raffaella Carrà, icona da Trieste in giù - VanityFair.it, in VanityFair.it, 1529295344. entrada il 15 settembre 2018.
  7. (EN) Raffaella Carrà: the Italian pop star who taught Europe the joy of sexthe Guardian, 16 de novenbre 2020. entrada il 5 de febraro 2021.
  8. [1]
  9. [2]
  10. Raffaella Carrà: "Mio padre? Mi chiamava per sapere se ero ancora vergine" - Perizona Magazine, in Perizona Magazine. entrada il 28 novembre 2018.
  11. Raffaella Carrà: "Mio padre mi chiamava per chiedermi se ero ancora vergine", in ilGiornale.it. entrada il 28 novembre 2018.
  12. [3]
  13. Scheda Imdbimdb.com.
  14. STASERA ALLA TV La "figlia dell’oca bianca» è un'insopportabile egoista .Vivere insieme dedica il suo atto unico al problema dei ragazzi viziati, in Stampa Sera, 25 marzo 1964, p. 11 (archivià da l'orizenałe).
    «I programmi serali del Primo Canale incominceranno con un originale televisivo della serie Vivere insieme diretta da Ugo Sciascia. L'atto unico, La figlia dell'oca bianca, è stato appositamente scritto da Edoardo Anton e sarà interpretato da Anna Menichelli, Raffaella Carrà,...».
  15. Gigi Vesigna, Sorprese VIP, in Oggi, 5 zugno 2013, pp. 74-80.
  16. Gli eroi in bianconero: Gino STACCHINI - Tutto Juve
  17. Intervista a Raffaella Carrà (ligo ronpesto dispunìbiłe in Internet Archive; védarse el [http://www.lastoriasiamonoi.rai.it/pop/schedaVideo.aspx?id=458 Intervista a Raffaella Carrà istòrego], la [http://www.lastoriasiamonoi.rai.it/pop/schedaVideo.aspx?id=458 Intervista a Raffaella Carrà prima version] e ła [http://www.lastoriasiamonoi.rai.it/pop/schedaVideo.aspx?id=458 Intervista a Raffaella Carrà ùltema])., Mixer 1985
  18. Fonte: Internet Movie DataBase (IMDB)
  19. [4]
  20. Martini, op. cit., pp. 21-34.
  21. Fonte: Repubblica
  22. UNA NOTTE DA STAR PER I 'TELEGATTI' - la Repubblica.itArchivio - la Repubblica.it. entrada il 20 de lùlio 2020.
  23. "CUANDO CALIENTA EL SOL" ARRIVANO IN COPPIA RAFFAELLA E SABANI - la Repubblica.itArchivio - la Repubblica.it. entrada il 20 de lùlio 2020.
  24. Chiambretti rispolvera il passato e porta a galla un altarino segreto di Raffaella CarràThe Social Post, 29 de lùlio 2018. entrada il 2 de disenbre 2019.
  25. FIMI - Federazione Industria Musicale Italiana - Classifiche Archivià il 25 febbraio 2014 Data inte l'URL no conbazante: 25 de febraro 2014 in Internet Archive.
  26. FIMI - Federazione Industria Musicale Italiana - Classifiche Archivià il 23 febbraio 2012 Data inte l'URL no conbazante: 23 de febraro 2012 in Internet Archive.
  27. Raffaella Carrà "Dama" di Spagna: «Il mio ombelico scoperto simbolo di libertà»ilmessaggero.it, Il Messaggero, 13 ottobre 2018. entrada il 14 ottobre 2018.
  28. il Resto del Carlino, Raffaella Carrà a Ravenna, in città per registrare una puntata del suo nuovo programmail Resto del Carlino, 1550038678000. entrada il 15 febbraio 2019.
  29. Che Tempo che Fa, stasera una puntata speciale dedicata a Raffaella CarràGayburg, 8 de lùlio 2021. entrada il 9 de lùlio 2021.
  30. Veronica Redazione, Ballo Ballo in streaming su Prime Video: trama e trailerTeam World, 22 dicembre 2020. entrada il 13 gennaio 2021.
  31. E' morta Raffaella Carrà, aveva 78 anniadnkronos.com, 5 luglio 2021.
  32. È morta Raffaella Carràcorriere.it, 5 luglio 2021.
  33. La Carrà è morta per un tumore ai polmoniilgiornale.it, 8 luglio 2021.
  34. Radiocorriere TVwww.radiocorriere.teche.rai.it. entrada il 25 de agosto 2021.
  35. Da Radiocorriere tv n. 48, 1985 a n.14, 1986
  36. Raiuno, da lunedì il via a «Navigator» con Enzo Decaro Un viaggiatore in tv Il programma è di Japino e Carrà - La Nuova Sardegna, in Archivio - La Nuova Sardegna. entrada il 13 gennaio 2018.
  37. par ła TV spagnoła

Bibliografia[canbia | canbia el còdaxe]

  • Paolo Martini, TV sorrisi e milioni, Grandi Edizioni Italiane, 1985, ISBN 88-345-0020-2.
  • Joseph Baroni, Dizionario della televisione, Raffaello Cortina Editore, 2005, ISBN 88-7078-972-1.
  • Aldo Grasso (curà da), Enciclopedia della televisione, 3ª ed., Garzanti Editore, 2008, ISBN 978-88-11-50526-6.
  • Le Ricette di Raffaella di Raffaella Carrà, 1991
  • Enrico Lancia e Roberto Poppi (a cura di), Le attrici: dal 1930 ai giorni nostri, Roma: Gremese Editore, 1999, p. 70.
  • Le teche Rai, la prosa televisiva dal 1954 al 2008.
  • Le teche Rai, il varietà televisivo dal 1954 al 2008.
  • Raffabook di Fabio Canino
  • Mito In Tre Minuti di Antimo Verde
  • Grazie Raffa di Valeria Muccifora, Castelvecchi, 2000
  • Gli ospiti di Raffaella / libro a tiratura limitata distribuito alla Stampa

Altri projeti[canbia | canbia el còdaxe]


Notasion[canbia | canbia el còdaxe]


Controło de autoritàVIAF (EN4152221 · ISNI (EN0000 0000 5545 6794 · SBN (ITIT\ICCU\CFIV\047765 · Europeana agent/base/53841 · LCCN (ENn93120201 · GND (DE134344006 · BNF (FRcb13928685b (data) · BNE (ESXX878818 (data) · WorldCat Identities (ENn93-120201
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Raffaella_Carrà&oldid=1087282"