Paso de Canpogroso

Da Wikipedia, l'ençiclopedia libara.
Jump to navigation Jump to search

Canpogroso el xe un paso (Paso de Canpogroso), a 1460 metri, fra el Veneto (provincia de Vicensa) e el Trentin. Da na parte se va xo a Recoaro e Valdagno, dałaltra in Vałarsa e Rovereto. El paso el divide el Carega dal Sengio Alto. Cołe machine se pol vegner su soło da Recoaro parchè łe do strade ke porta al Pian dełe Fugase łe xe sarà al trafico. Na volta el xera al confin fra Tiroło e Serenisima Republica. Durante ła Prima Guera Mondiałe, Canpogroso xera drento el teatro dełe operaxion dei do eserciti, de Austria e deł'Italia. Sul paso ghe xe un rifugio (el Rifugio Canpogroso, ke na volta el xera intitołà a Antonio Giuriolo, Alpin medaja de oro deła Rexistensa) e na picoła sała połivałente intitołà al pi grande alpinista de Recoaro, Gino Soldà, ke xe sta tra quei ke ga conquistà el K2. Drio rente ghe xe anca un rifugeto, el Rifugio Schio, ke se pol doparare soło domandando prima ła ciave ała Sesion del Club Alpino Italiano de Vicensa. Dal paso parte raquanti trosi, ke i porta sul Fumante, l'Obante e in sima al Carega, ma anca suła Sisiła e pi in là sul Bafełan.