Mesa/Boogie Mark IIC and IIC+

Da Wikipedia, l'ençiclopedia libara.
Jump to navigation Jump to search

Vita, morte e miràcoi del Mark IIC+[canbia | canbia el còdexe]

Come xè nato el Mark IIC+[canbia | canbia el còdexe]

Verso a fine del'inverno del 1983, Randall Smith jera ndà a fiera dei strumenti muxicài in Germania, el Musik Messe, pa sponsorixàre a Mesa/Boogie(col Mark IIC) in Europa. Intanto kel paròn dea Mesa Boogie jera a Francoforte, i tecnici Mike Bendinelli e Doug West i gheva decixo de proàre a modificare el Mark IIC, stàndoghe drio un paro de setimàne a far raquante prove, e i ga visto ke i gheva trovà a modifica giusta pa fare qualcosa de bon, ma fin al febraro del 1984 el Mark IIC+ no l'è stà mèso in produsiòn parkè i ga voèsto provare ben ogni minimo particoeàe, finkè no i jera contenti e sicuri de aver fato na modifica ke ndave puìto. A modifica fondamentàe ke xè stà fata al circuito dal IIC al IIC+, xè ke i ghe ga xontà gain e fàto diventare pì ciàro e armonico soe medio-alte. Quando ghe xè stà domandà a Mike Bendinelli parkè el sòna cusìta, lù el ga dito: "L'è stà Doug West a voèrlo cusìta ciàro". Doug West ndava in serca de fare un'anpli da poèr fare shred sensa avèr bixogno de doparàre boost a pedàe davanti, a fine rivàndo a quèo kel voèva. Oviamènte Randall Smith ghe jera piaxùo a modifica, eora el ga aprovà el novo circuito e decixo de mèterlo subito i produsiòn e ciamàrlo Mark IIC+.

El “+”[canbia | canbia el còdexe]

El "più" se cata soi Mesa/Boogie col numero de serie ke va dal 12500 al 14999, anca se el se poe catàre so calke modèo col numero de serie intorno ai 12400, parkè magari el jera fàto so mixura o el jera un prototipo: sol pasajo da IIc a IIc+ ghe xè stài vari esperimenti. I anpli ke xè stài agiornài intorno i primi àni '90, i ga un RA(Return Authorization) ke xè na autorixasiòn pa riagiornàrne l'anpli dèso.

I tecnici[canbia | canbia el còdexe]

Soto (o in parte) a spina dea corente ghe xè scrito co l'indeebie "MB", ke xè e inisiài del tecnico Mike Bendinelli: l'è quèo ke faxeva el contròeo finàe ai anpli. Nol jera l'unico tecnico kel ghe metèva e man ai Mesa/Boogie Mark, so ogni circuito stanpà se poe vedere dee inisiài ke poe esère SDG, BN, CD, RH, LB, PG, MB, KDW e RCS.....RCS, Randall C. Smith. KDW stà par Kay Dee ke secondo i esperti, i Mark IIC+ ke porta e so inisiài, sona mejo. No soeo Mike Bendinelli faxeva a verifica finàe, ma ghe xè raquanti exenplari, tanto rari, de IIC+ ke invèse de catàr scrito par da drio MB, se cata RCS...el capo.

I frontaìni[canbia | canbia el còdexe]

In teoria i Mark IIC+ dovarìa avere scrito sora el potensiometro del master "Pull deep" e invèse i Mark IIC dovarìa aver scrito "Gain Boost". I primi frontaìni gheva l'equaìxatore grafico de coeòre grixo scuro, cuèi vegnèsti fora dopo de grixo ciàro. Sò a "Christmas card"(a publicità fato soto el periodo de Nadàe) del 1983 se vede pa a prima olta el frontaìn davanti co scrito "Pull deep", ma savendo ke a Mesa/Boogie no i gheva tanti fastidi, i ghe ne gà butài sù anca dei quèi co scrito "Gain boost" finkè no i gheva finii. Sò i Mark IIC+ col cono da 15 pòici, i ga spetà sie mexi prima de canbiarghe a scrita del frontaìn, da "Gain boost" a "Pull deep", ma pa savère se l'è un C+ originàe xè pì inportante vardare sel ga i numeri de serie da 12500 a 14999, ke star là a vardare stì picoi particoeàri, ansi a pì sicura xè senpre a prova del loop efèti....

El test del loop[canbia | canbia el còdexe]

Pa vedere se te ghe un Mark IIC+ o un Mark IIC, bixogna farghe a prova del loop efèti:

  • 1)Inpira el jack dea kitara diretamènte sol return del loop efèti.
  • 2)Meti sol canàe distorto(el lead)
  • 3)Finkè te soni pròa girare i potensimetri del drive e del gain.
  • 4)Se no ghe xè variasiòn de voeùme e i sona, te ghe un Mark IIC+

E skede stanpàe[canbia | canbia el còdexe]

Sol Mark IIC e IIC+ i ga doparà el stèso tipo de skeda stanpà sol circuito de preanplificasiòn(SP-11A e RP-11A), par quèo ke se poe portare un IIC a IIC+. El skeda dea sesiòn finàe se ciàma PWR- 7-C1 so i 100 watt e i simul-class, e PWR -7D so i modèi 60 watt. A skeda dove ke ghe xè i condensatori de filtro se ciàma PS-1C.

Rexistense, condensatori e conponenti vari[canbia | canbia el còdexe]

Se se varda drento a ogni C+ sarà fadiga catàrghine de conpagni uno a kealtro, ghe xè rexistense e condensatori de vari tipi, dimensiòn e materìai. I condensatori ke jera stài uxài sol preanplificatore poe esère Sprague 715P, 225P, Mallory Orange Drops. De sòito come condensatori de catodo vegnèa doparài i Mallory neri, invèse in serte xone tipo pal Pull Bright, Equaìxatore grafico, V1A Pull Shift, vegneva doparài dei condensatori de tipo miitare da 0,22 e 3,3uf pa V4B(a valvoea ke contròea el reverbero). Comunque canbiàva e marke, ma no el vaeòre elètrico dei conponenti.

Dopo lulio e agosto del 1984 a Mesa/Boogie i ga tacà doparare dee rexistense da 22 kΏ sol potensiometro del "master" parke a CTS gheva spostà a produsiòn dai USA al Taiwan: ghe xè dee lejere diferense so e regoeasiòn rispèto a quei prima, ma el suono resta senpre quèo.

I trasformatori Schumacher[canbia | canbia el còdexe]

El numero 606 ke ghe xè scrito al'inìsio dei codici ke se cata soi trasformatori, vol dire ke l'è un trasformatore Schumacher EIA. El numero ke vièn dopo se riferìse al'àno de produsiòn, ad exenpio, el numero 3 vol dire ke l'è del 1983. I dò numeri ke vièn dopo se riferìse a setimana de produsiòn, se ghe xè scrito ad exenpio 42, vol dire ke kel trasformatore xè stà fato sò a quarantaduèxima setimàna del'83: EIA 606-342

60W OT - T60-152019 Simul Output - SC-152019B – Simul-Class

60W PT - 00-162310 60W Export - PT: X62-162318 Simul/60-100 Power - 105-162318 – Power X101-162318 – Export

Serti primi Mark IIC+ monta i trasformatori "100", el trasformatore de alimentasiòn "105" sarìa quèo originàe del IIC+, ma ghe xè ki ke preferìse i IIC+ ke monta el traformatore "100" parkè i dixe kel sona pì sscièto, altri invèse dixe kel mejo traformatore xè el "X101"(cuèo ke vegneva montà so i modèi export).....cuestìon de gusti. Comuncue a kei tenpi a Mesa/Boogie no i vardava tanto stè robe, i butà sù quèo ke i gheva pa e man.... Poe èsere ke i traformatori de alimentasiòn "100" jera drio finire, verso a fine del 1983 i ga tacà mètere soeo el "105". El "X101" existeva xà dal 1982.

I codici del tearo[canbia | canbia el còdexe]

Sol teàro se càta dee scrite fàte co l'indeèbie, eco quà cosa ke e vol dire:

  • SR – 60 Watt, reverbero
  • SRG - 60 Watt, reverbero, equaìxatore grafico
  • HR – 100 Watt, reverbero
  • HRG - 100 Watt, reverbero, equaìxatore grafico
  • HRGX - 100 Watt, reverbero, equaìxatore grafico, Export(switch canbio corente)
  • DR – Simul-Class, reverbero
  • DRG - Simul-Class, reverbero, equaìxatore grafico
  • DRGX - Simul-Class, reverbero, equaìxatore grafico, Export(switch canbio corente)

Ghe poe èsere i standard 60 o 100 watt sensa equaìxatore grafico e gnanca reverbero e quindi se poe catàre e sigle da soe come S, D e H. Qualsìasi anpli poe avere el trasfomatore Export, eora xè posìbie catàre a sigla "X" mèsa de fianco a kealtre, exenpio SX, DX and HX. I anpli ke ga el cono da 15" se vede parkè i ga el teàro pi longo rispèto a quèi normài.

I numeri dopo el codice del tearo[canbia | canbia el còdexe]

El numero stà pa a setimàna de produsiòn, ad exenpio: se ghe xè scrito DGR 6 vol dire ke l'è un Simul-class co equaìxatore grafico, reverbero e fato so a sesta setimàna del'àno. A produsiòn partiva ben o mae dò mexi prima.

I numeri de serie[canbia | canbia el còdexe]

  • Mark I 1x12: A0001-A2999 = 2999 Mark I
  • Mark I 1x15: B001 - B300= 300 Mark I
  • Dal 1971 al 1978 = 3299 Mark I


  • Mark IIA 1x12: 3000-5574 = 2575 Mark IIA
  • Mark IIA 1x15: B301-B549 = 249 Mark IIA
  • Dal 1978 al'agosto 1980 = 2824 Mark IIA


  • Mark IIB 1X12: 5575-11000 = 5426 Mark IIB
  • Mark IIB 1X15: B550-1100 = 550 Mark IIB
  • Mark IIB Series 300: Dal K001 al K336 = 336 Series 300 Mark IIB
  • Dal'agosto 1980 a majo 1983 = 5212 Mark IIB


  • Mark IIC 1X12: 11001-12499 = 1499 Mark IIC
  • Mark IIC/IIC+ Series 300: dal K337 al K422 = 86 Series 300 Mark IIC/C+
  • Mark IIC+ 1X12 = dal 12500 al 14999 = 2500
  • Mark IIC dal majo 1983 al genajo 1984
  • Mark IIC+ dal genajo 1984 a marso 1985 : 1499+86+2500 = 4085


  • Mark III 1X12: da 15000 a 28384 = 13385
  • Mark III Series 300: da K423 a K500 = 78
  • 1988 Special Edition Mark III 1X12: 001-100 = 100
  • Da marso 1985 a febraro 1999 = 13563

Più o meno 1000 Mark III al'àno.

Totàe dei Mark series: 28,983 dal Mark I al Mark III

Coliseum Mark, Series 300[canbia | canbia el còdexe]

Co a serie Coliseum o series 300 a MESA/Boogie ga fato dee testate e conbo ke gheva i stèsi circuiti dei Mark II e Mark III però co pì potensa.

A serie 300 vièn tacà fare sol 1980 portando el Mark IIB a 180 watt, doparàndo sie 6L6 de valvoe finài e sie valvoe de preanplificasion: quàtro 12AX7(da V1 a V4), na 12AT7 sò a V5 e na 6FQ7 so a V6, a phase inverter/driver. I Mark IIB Coliseum ghe jera soeo a 180 watt in clase AB e i conbo i metèva sù un cono da 15". I Mark IIC/IIC+ e i Mark III invèse ghe ne faxeva da 150 watt simul class, ke come valvoe de finài montava dò EL34 mèse in centro e so kealtre quàtro ai lati i ghe metìva e 6L6, o senò a versiòn 180 watt in clase AB co sie 6L6. Dea series 300 ghe nè stài fati 500 modèi, 336 Mark IIB Coliseum, 86 Mark IIC/IIC+ Coliseum e 78 Mark III Coliseum. Sol tour del 1981 Keith Richards e Ron Wood dei Rolling Stones se ga portà drio i Mark IIB Coliseum. Sol 1982 anca i Who li doparàva.