Lìquido

Sto articoło el xe scrito in venesian

Efeto de na giósa cascada su na superfisie de aqua

El lìquido el xé un dei stati de ła materia.

Propietà

Bromo, se nota l'alta vołabiłità de sto ełeménto chìmego che, insieme al mercurio el xé l'ùgnoło lìquido a tenperadura anbiénte e 1 atmosfera de presion.

Łe só propietà prinsipałi łe xé:

• fluidità: un lìquido el xé un flùido che, in asénsa de forse foreste infrà łe quałi quéła de gravità, ła ga na fórma sfèrega. I lìquidi, a cauxa de ła limitada forsa de coexion infrà łe mołècołe, łe xé scorévołi, overosìa flùidi. Se dixe dónca che "no łe ga na só fórma". In ogni caxo miga tuti i lìquidi i xé guałivamente flùidi, cusì se dixe che l'ètere el xé più flùido del'aqua o anca che l'aqua ła xé più viscóxa del'ètere.
• ełasteghità: i lìquidi i xé asae ełàsteghi, overosia i se defórma fasilmente soto l'asion de na forsa e i se tol sùbito ła fórma orixenal pena che ła moła l'asion de ła forsa deformadora.
• inconprimibiłità: un lìquido el xé un flùido el cui vołume el xé costante a tenperadura e presion costanti; ła conprimibiłità dei lìquidi el xé in gènere asae basa, e trascuràbiłe se paragonada a quéła dei gas, dónca i lìquidi i xé considerai inconprimìbiłi. Anca se i ga un coeficénte de conprimibiłità che'l se desferénsia in funsion de ła natura del lìquido stéso, alguni de sti qua lìquidi come l'aqua i xé stai provai a presion fin a 10 000 bar dando variasion asae pìcołe, invése altri come i idrocarburi i ga sensìbiłi variasion co presion de 100 bar.

Generalmente, na sostansa al stato lìquido ła xé manco dénsa che al stato sòłido, ma n'inportante ecesion ła xé costituida dal'aqua.

Caraterìsteghe

Łe mołècołe o àtomi che i costituise el lìquido i interagise infrà łóri, seben no forteménte come 'ntel sòłido. I no sta miga infrà łóri in poxision fise i scor i uni su st'altri, seben se ipotixi l'existénsa de gabie bastansa stàbiłi, in lìquidi coi forti ligami intermołecołari come l'aqua.

I lìquidi i se destingue in:

• vołàtiłi (par exénpio el benzene o'l bromo), indove i ligami infrà łe mołècołe costituénti el lìquido i xé débołi
• no vołàtivi (come el mercurio), indove i ligami infrà łe mołècołe costituénti el lìquido i xé forti

'Nte un canpo gravitasional costante, come che càpita, co aprosimasion, su ła superfisie terestre, ła presion 'nte un lìquido fermo ła xé guałiva a

$p=p_{0}+\rho gz\,\!$

indove $\rho$ ła xé ła densità del lìquido (che se consìdera uniforme) e $z$ ła xé ła profondità del pónto consideràto, $p_{0}$ ła presion a ła superfisie lìbara e $g$ l'acełerasion de gravità.

Bibliografia

• Luigi Rolla, Chimica e mineralogia. Per le Scuole superiori, 29^a ed. Dante Alighieri, 1987.

Varda anca

• Gas
• Sòłido