Giometria

Da Wikipedia, l'ençiclopedia libara.
Va a: navigasion, serca
Sto articoło el xe scrito in padoan
Osidentałe e àrabo che i pràtega ła giometria, manoscrito sénsa nome del XV sècoło.

Ła giometria (dal greco γεωμετρία, conposto da γῆ, = "tera" e μετρία, metria = "mexura", tradoto dónta leteralmente come mexurasion de ła tera) ła xé que ła parte de ła siensa matemàtega che ła parla de łe forme 'ntel pian e 'ntel spasio e de łe sóe difarénti rełasion.

Se pénsa che ła giometria ła sia nasesta 'ntel'Antigo Egito. Erodoto el conta che par via dei fenòmeni che i smagnava e i portava tera, durante łe piéne del Niło, l'estension de łe propietà teriére egisiane łe canbiava ogni ano e łe gaveva da èsare calcołae de novo par scopi fiscałi. Cusì el xé nasesto el bixogno de descovrir tècneghe de mexura de ła tera (giometria 'ntel signifegà orixenario del tèrmine).

Ła crésita de ła giometria pràtega el xé vèro antigo, par i numaruxi vantaji che ła parmete e par i quałi ła xé stada creada, e in tinpi łontani ła xé stada a volte fidada a na categoria de savi co tribusion sacerdotałi.

'Ntel'Antiga Gresia i ga scuminsià a doparare co frequénsa ła riga e'l conpaso (anca se pare che sti struminti i fuse xà stai inventai da altre parte) e soratuto ła xé nasesta l'idea nova de doparar tècneghe demostrative. Ła giometria greca ła xé servia de baxe par ła cresuda de ła giografia, del'astronomia, del'òtica, de ła mecànega e de altre siénse e anca de difarénti tècneghe, come quełe par ła navegasion. 'Nte ła siviltà greca, oltra ła giometria euclidea che ła se studia ancora a scóła e a ła teoria de łe còniche, łe xé naseste anca ła giometria sfèrega e ła trigonometria (piana e sfèrega).

L'introdusion de łe coordenade de René Descartes e ła cresuda, 'ntel fraténpo, del'àlgebra łe ga marcà na nova tapa par ła giometria, parché figure giomètreghe, come łe curve piane, łe podeva da ełora èsare raprexentae in giometria anałìtica, co funsion e equasion. Sta roba ła ga xugà un roło ciave 'nte ła cresuda de inportansa del càlcoło 'ntel XVII sècoło. Infin, ła teoria de ła prospetiva ła ga demostrà che ghe jera de pì par ła giometria che łe sołe propietà mètreghe par łe figure: ła prospetiva, infati, ła xé l'orìxene de ła giometria projetiva. El sojeto de ła giometria el xé stà richìo da novo dal studio de ła strutura drénto dei ojeti giomètreghi, che'l xé stà orixenà da Eulero e Gauss e'l ga portà a ła nasuda de ła topołogia e de ła giometria difarensiałe.

Giometria euclidea e giometrie no euclidee[canbia | canbia sorxente]

El quinto postułato.

Ła giometria creada da Euclide ła xé queła che ła vien studiada par prima. I conceti fondamentałi i xé el ponto, ła reta e'l pian. Ła se baxa su sinque asiomi fondamentałi, dai quałi i se orìxena i teoremi e tuto queło che'l vegne de conseguénsa. Quełi fisai da Euclide i jera:

  1. Infrà du punti qualsesia se poe desegnar na e na soła reta.
  2. Se poe slongar al'infinìo un segmento daspò i du punti che i eo lìmita.
  3. Dato un ponto e na łonghesa, se poe descrìvare un sercio.
  4. Tuti i àngołi reti i xé uguałi.
  5. Se na reta ła taja altre do rete determinando dal steso lado àngołi drénto ła cui suma ła xé menore de queła de du àngołi reti, slongando łe do rete, ste qua łe se incontrarà da ła parte indove ła suma dei du àngołi ła xé menore de du reti.

Parò col canbiar de ła concesion del mètodo asiomàtico i ga aumentà el nùmaro de asiomi, cusì che sti qua insiéme i fuse boni a descrìvare el conportamento dei tèrmini primitivi (ponto, reta...) sénsa che ghe fuse el bixogno de darghe definision (poco ciare, xé ojetivamente difìsiłe dire cosa che'l xé un ponto).

Spece st'ùltimo asioma el ga sénpre creà exitasion parché el xé davèro manco sénplexe da capir dei altri e'l ga va forma de un teorema. Co ła só negasion i ga creà łe giometrie no euclidee, fondae su novi modełi interpretativi (łe più inportante łe xé ła giometria iperbòłica, ła giometria ełìtica e ła giometria sfèrega).