Ciurma del Capeło de Paja

Ła Ciurma del Capel de Paja (麦わらの一味 Mugiwara no ichimi) ła ze ła ciurma protagonista del manga japoneze One Piece dizenjà da Eiichirō Oda. Sia so’l fumeto che so’l anime sti pirati i vien ciamài asè de frente “I Capel de Paja” (Mugiwara in orizenałe japoneze). In cao de ła ciurma A ghe ze el parsonajo de Monkey D. Luffy. A'l momento (vołume n°82) A ghe ze 9 menbri incorporài, siben che za da i primi capìtułi Luffy el gheva dito che ła só ciurma ła sarìa stà da 10 parsone. Onjun de łuri el ga na partigołare braura inte un spesìfego canpo, donca i ze tuti de utiłidà par seitar coel che’l ze l’obietivo finałe, a dir catar fora el One Piece. De fati nisun de ła ciurma conose el segreto de 'sto tezoro parò onjun el ga un sonjo presizo che el raprezenta el scopo de ła só vita e, par reałizarło, A ze nesesario parcórar tuta ła Łinea Granda. I Mugiwara i ze una de łe ciurme pì forti tra coełe che łe nàvega inte ła Łinea Granda e de fati Luffy e Zoro i ze stài mesi rento el grupo de pirati de ła nova jenerasion conosesto co’l nome de łe Ùndeze Suparnove. Tuti i Mugiwara i ga na reconpensa sol cao, mesa suzo dal Goerno Mondiałe, e al momento ła soma de tute łe reconpense de ła ciurma ła ze rivà a ła nodévołe sifra de 1,570,000,100 Berry. Ła Ciurma del Capel de Paja ła ga vuo in òrdene de tenpo du navi: ła prima ła jera ła Going Merry, che łi ga conpanjài dal Mar Orientałe fin a ła saga de Enies Lobby inte el Paradizo, ła segonda ła ze ła Thousand Sunny, a dir l'atuałe nave de la ciurma, projetada da Franky e costruìa in cołaborasion co i pì brai carpentieri de Water Seven. In órdene cronołòzego de recrutamento inte ła ciurma 'sta chive ła ze ła łista de i Mugiwara: Monkey D. Luffy (el caitan), Roronòa Zoro (el spadacin), Nami (ła navigadora), Uzop (el tirador), Sanji (el cogo), TonyTony Chopper (el mèdego), Nico Robin (l'archeòłoga), Franky (el carpentier), Brook (el sonador e anca spadacin). De ła ciurma atuałe solche 4 menbri i ze dotài de i poteri derivài da i Fruti del Diàoło, a dir: Luffy, Chopper, Nico Robin e Brook. Daspò che i ze rivài inte el Mondo Novo savemo anca che in cuatro de łuri i ze boni de doparar l'Anbision: Luffy, Zoro, Sanji e Uzop.

Monkey D. Luffy

Par savèrghene de pì, vardarse ła voxe Monkey D. Luffy.

Monkey D. Luffy (モンキー・D・ルフィ Monkī Dī Rufi) el ze el protagonista de ła storia de One Piece e ’l caitan de i Mugiwara. Inte’l manga el parsonajo el vien ciamà de frente Luffy opur Capel de Paja o, anca, Capełaro. I soranomi i vien purpio da’l capel de paja che Luffy el ga indoso sin da la só prima aparision. Cuande che ła storia de One Piece ła scumisia Luffy el ga solche 17 ani e ’l deside de ciapar el mar da soło salpando da’l viłajo de Foosha, inte l’Ìzoła Dawn de’l Mar Orientałe, par deventar el Re de i Pirati. El ze dotà de i poteri spesiałi del Fruti del Diàoło del tipo Gom Gom che i ło rende un omo de goma: de fati tuto el só corpo el pol zlongarse e far da ełàstego e anca sorbir scuazi tuti i culpi a ecesion de łe ferìe da arma da tajo. Daspò de pì de 80 capìtułi, e de un pariodo de du ani de arlenamento, Luffy el ze deventà un pirata asé potente, sèłebre e tenjùo de ocio sia da chełaltri pirati ma anca, e soratuto, da ła Marina e dal Goerno Mondiałe. De fati sora del só cao pende na reconpensa asé alta de 1.500.000.000 de Berry. Via de tut 'sto parsonajo el ga senpre conservà el só caràtare inzenuo, istintivo e par serti versi infantiłe, na caratarìstega che ło fa senbrar un fià baucheto ma che ła ga na só justifegasion sol zvolzarse de ła trama.

Roronòa Zoro

Roronòa Zoro (ロロノア・ゾロ), conosesto anca col nome de Zoro el Casador de Pirati (海賊狩りのゾロ Kaizoku-Gari no Zoro) o senplisemente "Zoro", el ze el spadacin de ła ciurma e el primo menbro a unirse co Luffy. El ze un tozo che deso el ga 21 anni, nativo del viłajo de Shimotsuki inte el Mar Orientałe, e ło catemo inte łi primi capìtułi del manga cuande che el vien salvà da Luffy a Sheltz Town. De aspeto el ze magro ma muscołozo co ła caratarìstega de ver i cavéi de cołor verdo e par 'sto motivo el cogo Sanji, par mincionarlo, ło ciama Marimo che el ze el nome de na alga japoneze. Daspò del salto de du ani el se ga fato su ancura pì muscołozo e in pì el ga anca na sicatrise sol ocio sanco. Zoro el ze un gueriero nato e el só roło inte ła ciurma el ze soło coeło de conbàtar tanto che, par el resto, no'l ze mìa bon de far altri mistieri. De fati, cuande che el ze inbarcà, A se pol catarlo drio menar łe spade, arlenarse, dormir, béar sakè e njent'altro. Dezà cuande che el jera picenin el scopo de la só vita el ze senpre stà coeło de èsar el mejo spadacin al mondo e el ga seità Luffy inte ła só aventura purpio par vantar 'sto sonjo. El vałor de Zoro inte ła ciurma el vien fora inte el momento de l'asion parché el ga na potensa devastante maurada in ani e ani de arlenamento e scontri co aversari senpre pì forti: par dir che durando el salto de du ani el se ga arlenà njente manco che co Dracul Mihawk, un de i menbri de i Sete Corsari, conosesto par èsar łu el pì forte spadacin del mondo. Sin dal scumisio del manga Zoro el ze sùito deventà popołare parché el conbate co ła tècnega, asè inprobàbile ma de seguro orizenałe, de łe "tri spade": de fati ghe ne tien una par man, a sanca e a drita, e ła tersa ła tien diretamente inte ła boca morsegando l'inpunjadura. El ze stà el segondo menbro a catarse co na reconpensa sol cao da 60.000.000 de Berry (saga de Ałabasta) che i ze ndài su a 120.000.000 (daspò de i avegnimenti de Enies Lobby), pa' rivar in finałe al vałor de 320.000.000 vantà inte el Mondo Novo daspò de ła saga de Dresroza. Un ponto débołe asé curiozo de 'sto parsonajo ze ła só scarsa capasità de orientamento: se'l se cata da soło inte un łogo calsiasi el fenise par pèrdarse onji 'olta.

Nami

Nami' (ナミ), conosesta anca col soranome de Ła Gata Ładra (泥棒猫 Dorobō neko), ła ze ła navigadora de i Mugiwara siben che, pena catài Luffy e Zoro, ła se fuse cuałifegà solche come na senplise ładra. Soło daspò de i avegnimenti de Arlong Park ła se unise ofiasialmente a ła ciurma col só roło de navigadora e col sonjo de dizenjar ła mapa parfeta de tuto el mondo conosùo. Ła ze na toza de vinti ani asè beła de vizo e benfata de corpo: in partigołare ła ze asè sèłebre tra i apasionài del manga par via del só seno ben formozo siben che ła gapia un corpo magreto e zlansìa. Via de tut ła ze conosùa par èsar una de łe parsone pì furbe e intełijenti de One Piece, tanto da èsar l'auténtega stratega de ła ciurma a ła pari del cogo Sanji. Ła só intełijensa ła ze asè ùtiłe par bałansar l'inpulsividà del caitan Luffy e ła se concretiza in du doti asè presioze: ła ze na cartògrafa brava asè e na straordenaria metereòłoga e conosidora de łe corenti marine e de ła navigasion. Donca, cuande che i Mugiwara i ze par mar, A se pol dir che ła caitana efetiva de ła nave ła sipia purpio Nami. L'ùnego difeto de ła toza, se pol dir, ła ze ła só pasion zmodada pa' i schei, l'oro e i zojełi siben che caita asè de ràdego che ła cate calcunaltro pì scaltro de eła. No ła ga mìa doti fìzeghe partigołari par conbàtar, via de tut inte el corso de ła narasion ła se ga dotà de na arma ciamà Clima-Tact che col tenpo la ze stà senpre de pì potensiada e parfesionada grasie anca al juto de Uzop e, par 'sto motivo, no ła se tira pì indrìo se ghe ze da bàtarse sol canpo. Daspò de i avegnimenti de Enies Lobby i ghe vea meso sol cao na reconpensa de 16.000.000 de Berry che i ze deventài 66.000.000 daspò de ła saga de Dresroza.

Uzop

Uzop (ウソップ Usoppu) el ze el cuarto menbro a nar rento inte ła ciurma. El só nome, in łengua japoneze, el ze derivà dal tèrmene "buzìa" e de fati łu el ze un gran buziaro. El só roło inte ła ciurma el ze coeło de tirador de presizion e armariol siben che, almanco al inìsio, el ga dovesto far un fià tuti i mistieri e, soratuto, coel de carpentier fin tanto che no'l ze rivà Franky. El ze anca un artista bastansa brao inte ła pitura e, pa' fortuna, el "jolly roger" del gonfałon de i Mugiwara el ze stà dizenjà purpio da łu, daspò che Luffy el gheva proà a far un orìbile scarabocio. El ga 19 ani e ła só caratarìstega fìzega pì łanpante ła ze ła só napia anca masa łonga, un ciaro refarimento de Oda al parsonajo de Pinocio. Oltra che èsar un buziaro el ze anca un gran fifon e el ga senpre paura de frontar el nemigo siben che, soratuto daspò de i du ani de arlenamento, el se ga fato su senpre pì brao e anca pì robusto. Ła só gran braura a tirar ła ze ereditada da só pare Yasop che el ze, njente manco, el tirador de ła ciurma de l'inperador Shanks. Durando ła saga de Enies Lobby el ga conbatùo pa' un serto tenpo mascarà col nome finto de Sogeking e donca la só prima reconpensa de 30.000.000 ła ze stà inprimada co 'sto nome chive. Daspò de łe só jesta a Dresroza el vien identifegà cofà God Uzop (let. "El Dio Uzop") e co 'sto nome el se ga catà na reconpensa de ben 200.000.000 de Berry sora el cao, ła tersa pì alta de ła ciurma. Ła só arma prinsipałe ła ze na spesie de fionda granda ciamada Kabuto (カブト) che col tenpo la ze stà senpre pì parfesionada, soratuto col dòparo de łe Pop Green che łe ze de łe semense spesiałi che łe vien doparàe cofà proiètiłi łansiałi col Kabuto. Uzop el reveste anca el roło de artełier de ła ciurma, cuande che el ze inbarcà inte ła Thousand Sunny, par via de ła só mira ecesionałe col dòparo de i vari canoni in dotasion a ła nave. Uzop el ga anca descoverto de ver l'Anbision de ła Percesion durando la saga de Dresroza.

Sanji

Vinsmoke Sanji (ヴィンスモーク・サンジ Vinsumōku Sanji), ciamà da tuti senplisemente "Sanji", el ze el cogo de la ciurma e l'ùltemo menbro che el ze stà recrutà cuande che i jera ancura inte el Mar Orientałe. El ze un tozo de 21 ani, biondo, magro, ben vestìo e senpre co ła cica in boca. El ze famozo par èsar na parsona de bona creansa e asè gałante co łe fémane, de raverso co i òmeni scostumài e de poca creansa el tende a èsar bastansa barufante e sustozo. El vien catà da Luffy inte el Baratie, a dir na na famoza nave-restorante jestìa da un ex pirata de nome Zef. A ła ciurma ghe servìa un cogo e i cata purpio Sanji che el ga na abiłidà fenomenałe in cuzina, tanto che ła zente ła se sente scuazi mancar da cuanto bon che el ze el só manjar. El sonjo del tozo el ze coeło de catar l'All Blue (ciamà anca Il Cuore dei Mari inte l'edision itałiana del anime), a dir na misterioza zona de ła Łinea Granda indóe che i confruise i Cuatro Mari co tuti i só pesi, da poderli cusì pescar e cuzinar. Via de tut Sanji el se reveła sùito anca par èsar un conbatente ecesionałe al isteso łeveło de Luffy e Zoro, tanto che i apasionài del manga i łi ciama el "Monster Trio" da cuanto forti che i ze tuti e tri. Posto che Sanji el ze un cogo e łora el ga zviłupà na tècnega de arti marsiałi fondà solche so łe ganbe pa' no rovinar łe man che par łu łe ze sacre e, par 'sto motivo, el ze conostesto anca col soranome de Ganba Nera. Durando ła saga de Zou, inte el Mondo Novo, ze venjeste fora de łe informasion inportanti sol pasato de Sanji, che łe spiega el parché del só conportamento e che łe fenise par infruensar el corso de łe aventure de i tuti i Mugiwara: de fati ze stà spiegà che Sanji el provien da ła nòbiłe fameja de i Vinsmoke, a dir i sovrani de ła Germa 66, che ła sarìa un renjio sensa tera del Mar Setentrionałe ma che, in realtà, ła se demostra èsar na spietada organizasion paramiłitar e mersenaria che Sanji el ga senpre dispresà e odià. Daspò de i avegnimenti de Enies Lobby i ghe vea meso sol cao na reconpensa de 77.000.000 de Berry che i se ga alsà a 177.000.000 daspò de ła saga de Dresroza: inte 'sto cazo ła reconpensa ła gheva scrito Only Alive (trad. "Soło Vivo") a motivo de l'infruensa de ła só fameja sol Goerno Mondiałe. Dopo Whole Cake Island la reconpensa se nà a 330.000.000 de Berry e se tornà la scrita completa Dead or Alive "Vivo o Morto".

Chopper

TonyTony Chopper (トニートニー・ チョッパー Tonītonī Choppā), ciamà da tuti senplisemente "Chopper", el ze el mèdego de bordo de ła ciurma e el primo menbro recrutà inte ła Łinea Granda, par de pì l'ùnego che no'l ze nasesto cofà un èsare umano: de fati el ze na rena che ła ga manjà un Fruto del Diàoło Zòan del tipo Homo Homo. Grasie a 'sto fruto el ga ciapà rento l'intełijensa e ła cosiensa umana e anca ła capasità de muar el propio corpo in forma umanòide (bastansa somejante a un yeti) siben che, in condision normałi, el mantien un aspeto ìbrido che ło fa somejar a un pupaso. Chopper el jera donca na rena che ła vivéa col só branco inte l'ìzoła de Drum, na ìzoła invernałe perenemente inevada. Daspò de ver manjà el Fruto del Diaoło el ze deventà un omo e par 'sto motivo el ze stà refiutà dal branco. L'ùnega parsona che ło ga asetà cofà un vero èsare umano ze stà el dotor Hillk che in realtà el jera un ciarlatan ma de gran bon cor. A séito de ła morte de Hillk Chopper el deventa novisio de ła dotora Kureha, na mèdega strabrava e conpetente, che ło fa studiar fin a deventar un mèdego altretanto brao. Chopper el deside de entrar in ciurma daspò de łe aventure de i Mugiwara in chel'ìzoła, col sonjo de jirar par el mondo e catar na cura par tute łe małatìe. El ze un parsonajo de gran intełijensa e conpetensa par cuanto che revarda el só mistiero ma, de raverso, inte łi raporti co chełaltre parsone el ze asè inzenuo e infantiłe, na caratarìstega che ło rende somejante, par serti versi, a Luffy. Via de tut el ze drio maurar man man che ła storia ła prosede a motivo de i parìgułi e de łe espariense anca dramàteghe che el cata co ła ciurma. Daspò del salto de du ani el ga potensìa e aumentà łe só forme intarmedie de trasformasion, el ga mejorà łe só arti marsiałi e finalmente el ga vantà ła capasità de controłar el cusidito "Monster Point", a dir ła só forma fìzega pì potente ma anca pì parigołoza parché co coeła e'l deventa un yeti zigantesco. Ła reconpensa che el ga sol cao ła ze ła pì basa e ridìcoła de tuti i Mugiwara parché, a motivo del só aspeto normałe da animałeto còcoło, i crede che el sipia solche ła mascotte de ła ciurma. Donca ła só prima reconpensa de 50 Berry ła ze stà solche radopiada a 100 daspò de Dresroza. So'l manifesto de ła reconpensa ze scrivesto el soranome che ghe ga dato el Goerno, a dir "L'amante del sùcaro fiłante".

Nico Robin

Nico Robin (ニコ・ ロビン Niko Robin) ła ze l'archeòłoga de ła ciurma, catada inte ła Łinea Granda, e ła prima conpanja recrutada daspò de èsar stà na nemiga de i Mugiwara. Ła ga 30 ani e, cofà Nami, ła ze na toza atraente e de gran bel aspeto, co cavéi mori łonghi e un corpo zlansìa e asè formozo. Ła só cuałità pì inportante ła ze ła só profonda e presioza conosiensa de l'archeołozìa e de ła storia del mondo de One Pece: grasie a eła i łetori i ze venjùi a saver de misteri cofà i Poneglyph, el Renjio Antigo e el Sècoło Vodo. El isteso pasado de Nico Robin el ze łigà a 'sti misteri e par 'sto motivo tuta ła só ezistensa ła ze stà senjà profondamente. De fati savemo che ła nase inte l'ìzoła de Ohara, inte el Mar Osidentałe, un łogo famozo in tuto el mondo pa' la prezensa de i só studiozi che i ze stài boni de desifrar el łenguajo de i Poneglyph. Enblemàtego in chel senso jera l'enorme Àlbaro de ła Conosensa sito al sentro de l'ìzoła e che el contenjeva ła pì gran racolta de łibri e documenti de ła storia de tuto el mondo. I jenitori de Nico Robin i jera łuri stesi de i studiozi archeòłoghi che, cofà el resto de che el grupo, i ga intuìo el segreto che el stà dadrìo de i misteri de ła storia. E par 'sto motivo el Goerno no'l se ga mìa fato scrùpoło de ordenar a ła Marina de sasinar tuti i abitanti de Ohara e de farla ràdar al teren tràmite un Buster Call. Nico Robin ła jera na cea cuande che se ga consumà cheła straje e ła se ga salvà solche grasie al sacrifisio de un ofisiałe de ła Marina: Hagwor D. Sauro. El Goerno, donca, el serca continuamente de caturar Nico Robin parché eła, dezà da picenina, ła ga inparà a desifrar el łenguajo de i Poneglyph e cusì A ghe toca vìvar cofà na criminałe resercada. Dezà da cea el Goerno el ghe gavéa petà el soranome de Putèa Demonìaca e na reconpensa sol cao de ben 77.000.000 de Berry. El só destin el se ga incrozà co coel de i Mugiwara inte l'ìzoła de Ałabasta indóe che ła jera imanegada co l'organizasion criminałe ciamà Baroque Works: al inìsio ła ze stà nemiga de i Capel de Paja ma, daspò che Luffy el ga batùo el só paron Crocodile (che'l jera anca menbro de i Sete Corsari), Nico Robin ła ga capìo che ła podéa fidarse de chel tozo e che unéndose a łuri ła gavarìa podùo vantar el só sonjo che el ze coeło de descovrir el segreto de ła storia. De fati grasie a i Mugiwara, inte el corso de łe aventure seitanti, ła ga descoverto altri Poneglyph che i jera sconti so de i łoghi asè parìgołozi. E anca el só atejamento col tenpo el ze canbià asè, soratuto daspò de ła saga de Enies Lobby, cuande che ła ga finalmente capìo de ver catà de i veri amighi. El só conportamento in ciurma el ze senpre rasionałe e controłà e, cofà Nami, ła ze na bona stratega; anca inte el conbàtar ła se defende ben perché ła ze dotà de i poteri del Fruti del Diàoło del tipo Fior Fior. Durando i du ani de arlenamento ła se ga parfesionà njente manco che co l'Armada Revołusionaria de Monkey D. Dragon, el pare de Luffy, e donca eła ła ze l'ùnega de ła ciurma che ło ga conosesto de parsona. Daspò de ła saga de Dresroza ła reconpensa sol só cao ła ze stà alsà a 130.000.000 de Berry.

Franky

Franky (フランキー Furankī) el ze el capentier de i Capel de Paja e, par de pì, el projetista e el costrutor de ła nave atuałe de ła ciurma, a dir ła Thousand Sunny. El só vero nome el ze Cutty Flam, el ga 36 ani, e'l ze fiol de pirati e nativo del Mar Meridionałe. Ła só partigolaridà pì granda l'è che łu el ze un cyborg, a dir che łu steso el ga modìfegà el só corpo trasformàndoło inte un ròbot. 'Sta caratarìstega ła ze ancura pì evidente daspò de i du ani de arlenamento cuande che el ga potensìa e modifegà ancura de pì ła só strutura robòtega e anca łe armi incorporàe rento: pararìa che 'sto parsonajo, dal ponto de vista del aspeto, el sipia un omajo del mistro Oda a i "robotoni" de łe pì famoze serie TV japonezi. Franky par ałimentar el só corpo robòtego el dòpara ła Cola, el isteso carburante che el dòpara anca pa' far funsionar i dispozitivi de ła Sunny. 'Sto parsonajo el incroza el só destin co i Mugiwara a partir da i avegnimenti del ìzoła de Water Seven ma'l deventa efetivo de ła ciurma solche al tèrmene de ła saga de Enies Lobby, col sonjo de costruir na nave che ła sipia bona de navegar fin a ła fin de tuta ła Łinea Granda. Inte el roło de carpentier el ze asè presiozo par via de ła só gran braura e de ła gran espariensa che el ga maurà da bocia, inte łi cantieri de Water Seven, cuande che el jera novisio del sèłebre carpentier de nome Tom, a dir el costrutor de ła nave Oro Jackson che ła ze stà ła nave de Gol D. Roger. Franky, par via del só raporto de amicisia co Tom, el jera venjùo in poseso de i projeti de Plùton, a dir una de łe cusidite Armi Antighe, che ła pararìa fuse stà na nave, e par 'sto motivo el jera stà arestà dal Goerno insenbre co Nico Robin ma in finałe el ga prafarìo bruzar i projeti de Plùton pitosto che darli a Spàndam, el cao de ła CP9. Via de tut pararìa che Franky el fuse stà bon de inparar a memoria chel projeto e donca, A se teoriza, che ła Thousand Sunny podarìa èsar purpio na varsion de l'arma Plùton. Daspò de i du ani de arlenamento Franky el ga potensià ancura de pì łe capasità de ataco de ła nave, zontàndoghe de i mòdułi da conbatimento costruìi inte na łega spesiałe. Cofà Nico Robin anca łu el ze stà nemigo de i Mugiwara pena che łi vea conosùi, salvo canbiar idèa daspò de ver capìo che el podéa fidarse de łuri. In partigolare el cyborg el ga łigà co Uzop par via de ła pasion comune che i ga pa' łe armi, ła projetasion e'l łaoro manuałe: de fati, rento ła nave, Franky el ga reałizà na zona ofisina indóe che łu e Uzop i pol zviłupar e riparar i vari armamenti in dotasion a ła ciurma. Ła prima reconpensa sol cao de Franky ła jera da 44.000.000 de Berry che i ze ze deventài 94.000.000 daspò de Dresroza.

Brook

Brook (ブルック Burukku) el ze el sonador e spadacin de i Mugiwara, par de pì l'ùltemo parsonajo a èsar stà recrutà fin a 'sto momento. Da'l ponto de vista del aspeto fìzego el ze un de i parsonaji de ła ciurma pì zbałà e stranbo: de fati el ze un vero e propio schèłetro anemà. 'Sta caratarìstega curioza ła depende dal fato che Brook el gheva manjà el Fruto del Diàoło del tipo Yomi Yomi che el ga consetìo a ła so ànema de reconzùnzarse col corpo daspò che el jera morto ma, par culpa del całigo masa fiso, l'ànema ła ghe ga metesto masa tenpo a catar el corpo e doncà ła ga podesto reanemar solche i osi che i jera restài de 'sto parsonajo. Brook el ga efetivamente 90 ani parché el jera morto cuande che ghin vea 38 ma ła parte granda de la só segonda vita da schèłetro ła ga pasà a navegar a ła deriva fin cuande che el ze stà catà da i Mugiwara inte łe acue incałigàe del Triàngoło Florian, durando el scumisio de ła saga de Thriller Bark. Siben che i altri menbri de ła ciurma i se gavéa inisialmente spazemà, par via del só aspeto màcabro, de sèito ze venjù fora tuta la só storia trista e comovente e donca el ze stà asetà de bon cor inte el grupo. Brook da zóvane el jera el schermidor de łe vardie de un renjo del Mar Osidentałe ma pì tardi el se gheva unìo a ła ciurma de i pirati Rumbar caitanada da Calico Yooki. Intanto che i ndéa par mar i ga catà un cùcioło de bałena, ciamà Lovoon, che el se ga afesionà a łuri e'l ga scumisià a seitar ła nave. Rivài inte ła Łinea Granda i ga dovùo dezbandonar Lovoon inte ła Ponta de i Zemełi, co Crocus a farghe conpanjìa, parché el viajo el sarìa stà masa parigołozo par el zóvane setàseo. A un serto ponto el caitan Calico Yooki el se ga małà e cusì el ze stà costreto a mołar el viajo pa' tornar indrìo, nominando Brook cofà caitan de ła ciurma. Poco daspò ła nave ła ze stà atacà da n'altra ciurma che ła doparéa frese invełenàe: tuti i pirati Rumbar i ze cusì morti, anca Brook: parò łu, grasie a i poteri del só fruto, el ze retornà in vita daspò de un ano e sote forma de schèłetro. Par via che el timon de ła nave el se gheva roto Brook el ga dovesto vagar in sołitùdine par el mar pa' scuazi 50 ani, fin tanto che no'l se ga catà co i Mugiwara. El só sonjo el ze coeło de navegar fin a ła fin de ła Łinea Granda par rivar de novo da ła Reverse Mountain e catarse cusì co Lovoon, che el ze ancura łive che ło speta. Oltra che èsar un bon spadacin, ma mìa al łeveło de Zoro, el ze un straordenario cantante e sonador anca de pì strumenti: viołin, pianoforte e, daspò de de i du ani de arlenamento, anca de ła ghitara ałètrega col nome d'arte de Soul King. A i tinpi de i pirati Rumabar el gheva maurà na reconpensa de 33.000.000 de Berry che, daspò de ła saga de Dresroza, ła ze stà alsà a 83.000.000.

Jinbe

Jinbe el ze el timonier de i Capel de Paja. El se gà ùnio ala ciurma a Whole Cake Island, ma ufficialmente entrerà a farne parte quando saranno a Wa, visto che el xe restà ad aiutare i so amici Pirati del Sole. El gà na reconpensa de 438 milioni de Berry.

Varda anca

• One Piece
• Monkey D. Luffy
• Parsonaji de One Piece
• Glosaro de One Piece
• Jeografìa de One Piece
• Eiichirō Oda