Carlos Santana

Da Wikipedia, l'ençiclopedia libara.
Carlos Santana
(EN) Carlos Augusto Alves Santana
Carlos Santana 2.jpg
SitadinansaMèsego e Stati Unii de l'Amèrica
Nasimento20 de lulio 1947, Autlán de Navarro
MorteCànbia el vałor in Wikidata
SpozàCindy Blackman
Łéngue parlaeinglexo
Perìodo atività1965 Cànbia el vałor in Wikidata –
Ocupasion
    • cantautore
    • cantante
    • compositore
    • chitarrista jazz
Menbro deSantana (it) Traduzi Cànbia el vałor in Wikidata
Discografia
Àlbun65
Stùdio32
In vivo5
Compilation28
ZènareLatin Rock, Pop Rock, Blues Rock, Fusion, Rock Psichedełico, Hard Rock
Strumentochitara, (el ga inparà a sonar el viołin a sincue ani)

Sito ufisiałe
IMDB: nm0005396 Allocine: 689878 Allmovie: p109823
Twitter: SantanaCarlos Spotify: 7yGQgQiiKpg2k00JXf8hJk Musicbrainz: f7fda030-0ba1-42e9-a385-3deebc939bc9 Songkick: 151868 Discogs: 79340 Allmusic: mn0000175196


Carlos Santana, (Autlán de Navarro, 20 de łujo 1947), el xe un chitarista e conpoxidor mesegan naturałixà statunitense.

El ga tacà aver consensi tra i ani setanta e otanta, col so grupo, ciamà senplisemente Santana. Xa ałora el smisiava vari xenerei, cuałi salsa, rock clàsego, blues e fusion. A chel tenpo cofà uncò Santana uxava in modo estensivo i so asołi de chitara e el se avałeva anca de strumenti pì tradisionałi del so paexe. Drìoman el ga continuà a sperimentar sta formuła, tra alterne fortune.

Inte el corso dei ani ani novanta Santana ga riscià el declin, sconxurà inte el 1999 da l'album Supernatural. Grasie a sto łaoro, el pì inportante suceso de ła so carièra, el ga fato conoser ła so fiłoxofia muxicałe a eł nove xenerasion.

El ga vendsto piasè de 80 miłion de dischi[1] e el xe anca considerà tra i mejo chitaristi rock existenti. Ła rivista Rolling Stone ło ga inserìo inte ła Łista dei 100 mejo chitaristi segondo Rolling Stone al 20º posto.

Biografia[canbia | canbia el còdaxe]

De orixeni spagnołe e native mesegane,[2] Carlos Santana xe nasesto ad Autlán de Navarro, inte el Stato mesegan de Jalisco, da na famegia de muxicisti: el pare José, nasùo el 18 de xenaro 1913 a Cuautla, ła xera na viołinista mariachi co un so conpleso, Los Cardinales, mentre el nono, Antonino Santana, el sonava el corno fransexo inte ła banda munisipałe. Inte el 1940 José ga spoxà Josefina Barragán, e dal matrimonio xe nasesto sete fiòłi: Antonio, Laura, Irma, Carlos, Leticia, Jorge e María. Anca Carlos s'a pasionà presto a ła mùxica, scominsiando a sonar el viołin a l'età de sincue ani. Co'l xovane Carlos el gavea 11 ani ła fameja se ga trasferìa a Tijuana; łì el toxo ga tacà sonar ła chitara da autodidata, vadagnandose da viver intratenindo i foresti dai Stati Unii. El se ispirava ad altri famoxi chitaristi cofà John Lee Hooker, T-Bone Walker e B.B. King, che scoltava da łe stasion radio statunitensi al confin.

Il Fillmore Auditorium de San Francisco

Inte el 1961 ła fameja Santana ga emigrà in Całifornia, a San Francisco, sità inte ła cui Mision High School Carlos se ga diplomà; poco dopo el ga acuixìo anca ła sitadinansa dei Stati Unii[3]. Carlos ga tacà jutar ła fameja łaorando cofà łavapiati, e el xe cresùo pasionandose a ła mùxica de ła Bay Area, de frecuente andando de scondon al Bill Graham's Fillmore Auditorium a scoltar alcuni dei suoi muxicisti preferìi: tra cuesti ghe jera Muddy Waters, The Paul Butterfield Blues Band, The Grateful Dead e tanti artisti rock, blues e jazz che łì i se exibiva.

A ła fin del 1966, el chitarista Tom Frazier ga intendesto meter in pìe un grupo rock. Cusì a łu se ga agregà Santana (voxe e chitara), Mike Carabello (percusion), Rod Harper (bateria), Gus Rodriguez (baso) e el nativo de Seattle Gregg Rolie (voxe e organo), par formar i Santana. Carlos ga sostegnesto che soło łu e Rolie xera interesài seriamente a ła mùxica, mentre i altri xera intenti soło al spetacoło e a łe exibision dal vivo. El steso Santana no'l xera visto dai altri come vero cao del grupo, che portava anca el so nome. I sìe opeava tuti come in un cołetivo, cosa che gavarìa fato par tuti i primi ani setanta. Stan 'Moon' Marcum, d'acordo col grupo so l'idea del so nome, xe deventà el so manager. In cuel periodo Jorge Santana, fradeło de Carlos e anca łu chitarista, ga tacà na carièra parałeła co i Malibus e drìoman el xe pasà ai Malo, de discreta popołarità.

I scominsi[canbia | canbia el còdaxe]

Dopo calche tepo el nome del grupo se ga riduxesto senplisemente a Santana. Ałora inte ła so formasion ghe xera Carlos, Rolie, el basista David Brown, el baterista Bob 'Doc' Livingston e el percusionista Marcus Malone. El promoter Bill Graham łi ga scoltà e ghe ga permetesto de exibirse al Fillmore (po' Fillmore West). L'exordio discografego de Santana xe stà na ospitada in The Live Adventures of Mike Bloomfield and Al Kooper, co Al Kooper e Mike Bloomfield, anca łori regołarmente in tournée al Fillmore.

Xe senpre xirae voce so come el grupo gabia incorporà ełementi de mùxica łatina, visto che ironegamente né Santana né Gregg Rolie ne ga traxesto inisialmente ispirasion. Se sa dei so frecuenti “showcases” al San Francisco's Aquatic Park, indove sonadori de conga se sarìa unìi a łòri par łe sesion ritmiche. Inaxonta, a l'epoca Carlos ga scominsià a perlustrar par ła prima volta altri tipi de mùxica, inte ła połiedrica sena de San Francisco. El łocałe chitarista jazz Gabor Szabo xe deventà fan de Santana, e ga uxà anca łu congas sol so album Spellbinder, usìo inte el 1966. Ma soratuto el ga capìo presto che, uxando łe percusion inte el grupo, łe toxe łe gavarìa bałà demenando i fianchi in modo salvàdego, cofà bałarine del ventre. Cusì Santana ga descoerto che łe percusion łatine tirava el publico, e łe ga xontae a ła pròpia mùxica.

Primi sucesi[canbia | canbia el còdaxe]

El grupo ga firmà par ła Columbia Records, e i ghe ga rejistrà el so primo album. Non sodisfai de łe vendite, i ga capìo ła nesesistà de un canbiamento stiłistego. Cusì i ga łiçensià Livingston e ło ga sostituìo co Michael Shrieve, che el se refaxeva un mucio a jazz e rock. Marcus Malone xe stà costrenxesto a łasar el grupo par problemi personałi, e xe rientrà Mike Carabello. Co sto ùltemo xe rivà anca el percusionista del Nicaragua José Chepito Areas, ben conosùo anca inte el so paexe:tuti do ga contribuìo asè a ła mùxica del grupo, sia par łe apresae capasità tecneghe che par l'esperiensa personałe.

Bill Graham, so fan fin dal prensìpio, ga convisesto i promotori del festival de Woodstock a permeterghe łori de entrar in sena, prima de l'usida del so primo vero album. Ła so exibision al festival ga risevesto un mucio de aplauxi, e indrìoman el suceso del brano strumentałe Soul Sacrifice (de ùndexe minuti) ga fato creser ła popołarità del grupo. Graham ghe ga daxesto po' dei conseji vitałi par rejistrar Evil Ways di Willie Bobo, dà el potensiałe suceso de ła so cołaborasion. El primo album in studio del grupo, Santana, ga ciapà el cuarto posto de łe clasifeghe statunitensi, e el reciàbiłe sìngoło Evil Ways xe rivà al nùmaro nove de Billboard.

Inte el 1970 i raxonxeva i primi grandi sucesi comerciałi co Abraxas, entrà al primo posto de tante clasifeghe e forte de pì de 4 miłion de copie vendeste. Al disco ga cołaborà anca el pianista Alberto Gianquinto, che ghe ga consejà al grupo de slontanarse da łe łonghe sesion de percusionisti, e de conçentrarse so canson da łe struture manco convensionałi. L'inovativa misiansa muxicałe de Santana ła xe rivada al cuarto posto de łe clasifeghe del Regno Unìo. Abraxas fegura da ałora in tante łiste so i "mejo album de senpre". Ła scuadra orixinal del grupo (primi do album) sarìa entrada inte el 1998 inte ła Rock and Roll Hall of Fame.

Tutavia, Woodstock e el suceso dei primi do album ga scominsià a crear problemi al grupo, e ga metesto in łuxe łe divergense artisteghe tra Rolie e Carlos. El primo, insieme ad altri conponenti, vołeva enfatixar el son hard rock de baxe ai exordi. El segondo jera invese drìo perlustrar sonorità blues e rock e vołeva invese inserir ełementi jazz, in una mùxica asè ispiarà anca da Miles Davis e John Coltrane; inaxonta el se dedicava senpre pì a rełijon e meditasion. A conplicar ła situasions se ga xontà anca Chepito Areas, a łe prexe co na gravisima moragìa çerebrałe; Santana e i altri ga continuà a sonar co vari sostituti (prima Willie Bobo e drìoman Coke Escovedo), ma i so cołeghi, speçie Michael Carabello, reputava sbalià łaorar sensa Areas. Alcuni menbri ga formà pròpi grupi, e i Santana ga tacà mołarse.

Al xovanisimo chitarista Neal Schon xera stà domandà de entrar inte el grupo inte el 1971 (Eric Clapton ghe ga proponesto anca de agregarse ai Derek and the Dominos). El xe deventà menbro dei Santana, e co łori el ga conponesto Santana III. El son del grupo, inte el cuało łe do chitare ga asumesto un ròło pì riłevante che in presedensa, xe stà consołidà anca dal ritorno de Chepito Areas, e da ła cołaborasion de Coke Escovedo a łe percusion. Ghe xe stà drìoman ulterior suporto da ła sesion de un tronbetista dei Tower of Power, Luis Gasca of Malo, e de altri cantanti e percusionisti. Santana 3 xe stà anca eło de suceso, rivando al nùmaro uno de tante clasifeghe e vendendo do miłion de copie. I so sìngołi pì de suceso xe stà Everybody's Everything e No One to Depend On.

Paraltro inte el grupo łe frision interne ga proseguìo. Insieme a łe difarense muxicałi, anca l'uxode de stupefasenti da parte de alcuni conponenti xe deventà un problema, e tante performance sucesive ga inisià a risentirne. Coke Escovedo ga anemà i Santana a badar a ła so diresion muxicałe tanto pì che a ła costernasion de serti altri, convinti che el grupo e ła so mùxica fuse un sforso cołetivo. Inaxonta se ga prexentà dificoltà finansiarie soto ła guida de Stan Marcum, da Bill Graham ritegnùo un inconpetente. I cresenti resentimenti tra Santana e Michael Carabello so i so stiłi de vita, ga induxesto el segondo a l'abandon del grupo. James Mingo Lewis xe stà ingagià a l'ùltemo minuto come so sostituto, durante un concerto a New York. Po' anca David Brown xe ndà via, a cauxa del so abuxo de droghe. Ałora xe stà anca interoto un tour a Lima, in Perù, dae łe proteste dei studenti contro łe połiteghe governative dei Stati Unii d'America e i fan indisiplinai. El tuto ga convinsesto Santana a perseguir altri canbiamenti inte el grupo e inte ła so vita.

Vista aerea del Diamond Head Crater

Inte el xenaro del 1972, Carlos, Neal Schon e Coke Escovedo se ga unìi al baterista de ła Band of Gypsies Buddy Miles par un concerto a l'Hawaii's Diamond Head Crater; da ciò ne sarìa derivà un album live. Poco dopo, Santana e el resto del grupo ga inisià a łaorar sol cuarto album, Caravanserai.
Durante łe rejistrasion, Santana e Michael Shrieve ga cołaborà co James Mingo Lewis, Armando Peraza (sostituto de Carabello), Tom Rutley e Doug Rauch (sostituti de David Brown). A łe tastiere ga łaorà Wendy Haas e Tom Coster. Non sodisfati dai novi muxicisti, Gregg Rolie e Neal Schon xe andai via suito drìoman el conpletamento de l'album, ancaben el so influente contributo. Rolie xe tornà a Seattle, verxendo un ristorante insieme al pare, e drìoman el xe deventà tra i fondadori dei Journey (in cui xe entrà anca Neal Schon).

Cuando Caravanserai xe emerxesto inte el 1972, ga segnà un forte canbiamento inte ła diresion muxicałe, movendose de più verso jazz e fusion. L'album xe stà tanto stimà da ła critica, ma el cao de ła Columbia Records Clive Davis ga avixà Carlos e i so conpagni che gavarìa riscià de deventar un fenomeno in clasifega, anca se el so łaor sarìa stà premià co un disco de platino. Łe dificoltà de ałora dei Santana xe sta contae da Ben Fong-Torres so Rolling Stone, inte ła storia de coertina "The Resurrection of Carlos Santana".

In chel periodo Santana ga conosesto Deborah King, che gavarìa po' spoxà inte el 1973. Deborah xe ła fia del muxicista blues Saunders King. Ła cubia ga tre fiòłi, Salvador, Stella e Angelica. Insieme a ła mujer, Santana ga fondà l'organixasion nonprofit "The Milagro Foundation", che fornise juti finansiari in tuto el mondo par l'istrusion e ła sałute dei putèłi.

Viaxo spirituałe[canbia | canbia el còdaxe]

Carlos Santana inte el 1973

Inte el 1972 Santana xe deventà grando fan del grupo The Mahavishnu Orchestra e del so chitarista John McLaughlin. Vegnùo a saver de l'interese de Carlos par ła meditasion, McLaughlin ga prexentà łu e Deborah al guru Sri Chinmoy. Sto ùltemo łi ga açetà drìoman come disepołi inte el 1973, e a Santana xe stà dà el nome de "Devadip" - o sia "Feràłe e òcio de Dio".

Santana e McLaughlin ga rejistrà insenbre l'album Love, Devotion, Surrender, jutai da so respsetivi grupi, ma anca dal percusionista Don Alias e da l'organista Larry Young (i do gaveva xa cołaborà inte el 1969 co Miles Davis, inte el disco Bitches Brew).

Otegnesti i derìti łegałi sol nome del grupo, Santana ga dirixesto un novo canbio de formasion. Cusì xera rivài Armando Peraza e torna el tinbałista Chepito Areas, Doug Rauch al baso, Michael Shrieve a ła bateria, e Tom Coster e Richard Kermode a łe tastiere. Drìoman Carlos ga ciamà anca el cantante jazz Leon Thomas par un tour in Japon: de chel concerto, alcune performance xe stàe rejistrae inte l'album live Lotus. Ła Columbia Records no ghe n'avaria permetesto ła publicasion, se no fuse sta scursà ła durada. Santana no xe stà d'acordo, e el disco xe deventà disponìbiłe domeché in edision łimitada, co tre rejistrasion. Drìoman i Santana xe andai in studio par rejistrar Welcome, album che refleteva ulteriormente i interesi de Carlos par jazz e fusion, e el so inpegno par ła vita spirituałe de Sri Chinmoy.

I canbiamenti de stiłe inte i ani setanta[canbia | canbia el còdaxe]

Indrìoman xe rivà na cołaborasion co ła vedoa de John Coltrane. El disco, intitołà Illuminations, canbiava tra free jazz, muxiche de l'India Orientałe e influense claseghe, ghe łaorava anca Jack DeJohnette e Dave Holland (anca łori al fianco de Miles Davis). Suito dopo , ga sevità altri canbi de formasion : Kermode, Thomas e Rauch ga łasà i Santana, e i xe stà sostituìi da dal cantante Leon Patillo e dal stòrego basista David Brown. A łori se ga agregà anca el sasofonista Jules Broussard. El grupo ga rejistrà in studio Borboletta, publegà inte el 1974. Po' Ndugu Leon Chancler ga sosistuìo a ła bateria Michael Shrieve, che gavarìa intraprendesto na carièra sołista.

A chel tenpo, ła xestion de Bill Graham ga inisià a ocuparse dei so negosi. Graham ga criticà ła svolta jazz de Santana, e par eło el chitarista gavea da conçentrarse a reportar el grupo in clasifega co sonorità più reciàbiłe (spèçie cuełe łatinexante e stradaiołe dei exordi). In realtà anca el steso Carlos sentiva che ła diresion del grupo descontentava tanti fans. Benché album e concerti fuse stà tanto apresai inte i anbienti jazz e fusion, łe so vendite xera declinae.

Carlos Santana inte el 1976

Insieme a Chancler, Tom Coster, el cantante Greg Walker e el produtor David Rubinson, Santana ga inponesto al grupo nantro canbiaminto de stiłe. Inte el 1976 i ga publegà Amigos, co piasè influense funk e łatine. El disco xe stà slansà da brani come Dance, Sister, Dance e Let It Shine e soratuto ła strumentałe Europa (Earth's Cry Heaven's Smile), e ga reportà el grupo ai primi posti in clasifega. Rolling Stone ghe ga dedicò poco dopo nantra istòria de covertina, Santana Comes Home.

I album de fin ani setanta ga seguìo ła istesa formułà de Amigos, tutociò difarenti canbi de formasion. Intrà i conponenti pì de frecuente in fuga e ritorno ghe xe stà el percusionista Raul Rekow, rivà a l'inisio del 1977, moristo par małatia el 2 de novenbre 2015. El pì conosùo dei so sforsi comerciałi de l'epoca xe stà She's Not There, cover de un famoxo brano dei Zombies, ativi inte i ani sesanta. Ła canson ła provegniva dal disco Moonflower, publegà inte el 1977.

Moonflower jera un dopio album parlopiù co trase dal vivo (19, par un totałe de 97 minuti). El gaveva na łarga sełesion de brani exeguìi fino a chel tenpo dai Santana, ma no mancava alcuni inediti. Oltre che co David Margen e el basista Pablo Tellez, el grupo ga łaorà co Tom Coster a łe tastiere e el cantante Greg Walker (che cui el se avałeva de na tecnega de canto flautada, ma fisa). Graham Lear ghe ga cołaborà come baterista e'l se ga exibìo in atachi de bateria oncora al dì d'ancuo tanto stimai dai so cołeghi rock, jazz, fusion e latin music (soratuto el so asoło so Soul Sacrifice, Hands and Feet). Altri tre percusionisti latin, Raul Rekow (bongos, congas, surdo, canpanełi), José Chepito Areas (percusion, canpane, timbales, congas) e Pete Escovedo (percusion, timbales, guiro, maracas) ga conpletà ła sesion ritmica. Inte el conpleso, daspùo el łaoro dal vivo dei Santana xe stà granfato pì apresà de prima.

I sucesi rełativi de cuełi album ga permetesto a Santana de inviar na cariera sołista, anca col juto de ła Columbia Records. Cusì xe stà reałixà inte el 1979 Oneness; Silver Dreams, Golden Reality e inte el 1980 The Swing of Delight, a cui ghe ga parteçipà anca Herbie Hancock, Wayne Shorter, Ron Carter e Tony Williams (xa insenbre a Miles Davis inte i ani sesanta).

Łe presion de łaoro, el dexiderio de èsar un rocker de alto profiło e i recuixiti de vita spirituałe che esixeva el guru Sri Chinmoy e i so seguaci, ga procurà non pochi problemi al matrimonio de Carlos. Pian pianeto el se ga dixiudesto de łe règołe de vita inponeste da Chinmoy, de frecuente non vedeste come raxonevołi (tra cui l'inpedimento al chitarista e so mujer de meter su fameja). Cuesto xe devegnesto spacàto drìoman, inte el fato che ła fama de Santana ła usada par render pì popołar el guru. In cao de tuto Carlos e Deborah ga termenà ła so frecuentasion co Chinmoy, inte el 1982.

I ani otanta[canbia | canbia el còdaxe]

Carlos Santana inte el 1984

Un decenio dopo, Santana e el so grupo ga publegà sìngołi pì reciabiłi. Winning inte el 1981 e Hold On inte el 1982 xe rivai ai primi 20 posti in clasifega. Dapò ła so rotura co Sri Chinmoy, Carlos xe tornà in studio par rejistra un altro album sołista, co Keith Olson e el renomà produtor R&B Jerry Wexler. El disco del 1983 ga riproponesto łe presedenti esperiense del chitarista a Tijuana, co Who Do You Love de Bo Diddley e Havana Moon de Chuck Berry. Co Santana ga łaorà anca Booker T. Jones, The Fabulous Thunderbirds, Willie Nelson e parfìn l'orchestra mariachi del pare José. Santana ga inserìo łe so prime influense rock anca inte i brani par el biopic La Bamba, interpretà da Lou Diamond Phillips e dedicà a Ritchie Valens.

Sìben el grupo gapia sercà de produxer dischi pì “radio friendly” inte i ani otanta, el canbiamento de gusti inte ła cultura pop ga scominsià a reflterse so łe vendite del so ùltemo łaoro del periodo, Beyond Appearances. El 28 de majo 1984 Santana se ga exibìo a l'Arena de Verona in concerto co Bob Dylan[4]. Inte el 1985, Bill Graham ga sołeçità oncora Santana, parchè el convinçese Bob Geldof a parteçipar al Live Aid. I consensi otegnesti a chel concerto, ga mostrà che i podeva oncora dar otemi ascolti dal vivo, malgrado łe redote vendite dei so dischi. Santana ga conservò gran respèto sia in anbiente jazz che cueło rock, tanto che Prince e Kirk Hammett dei Metallica ło ga minsonà cofà ispirador, e ła so amicìsia co Miles Davis, che da i ani otanta gaveva organixà ma jera senpre pì ancròja de sałute.

I Santana xe tornai inte el 1986 co un novo album, Freedom. Carlos ga reciamà al microfono Buddy Miles, che vołeva riłansar ła so carièra muxicałe drìo aver pasà tanti dei ani preçedenti in prexon, par spacio de droga. Ła so prexensa senega ga conferìo carisma a non pochi concerti, ma oncora na volta łe vendite del disco non xe stae desènti.

Oramai straco de conpiàxer i so manager co dischi da clasifega, Santana xe stà inveçe pien de boreso de łe sesion in studio e de łe cołaborasion (el famoxo grupo fusion Weather Report, el pianista jazz McCoy Tyner, el muxicista blues John Lee Hooker (co cui ga inçiesto inte el 1989 el sìngoło The Healer che riva in nona poxision inte i Paexi Basi), Aretha Franklin, el chitarista dei Living Colour Vernon Reid, e el cantante de l'Àfrega oçidentałe Salif Kieta). Łu e Mickey Hart dei Grateful Dead, drìomna i ga sonà e rejistrà col baterista nixerian Babatunde Olatunji (che co Santana gaveva xa łaorà par el brano Jingo, negli ani sesanta). Inte el 1988 Santana se ga riunìxo ad alcuni conpagni de band, par vari concerti. Inaxonta ła Columbia Records ga publegà Viva Santana, contegnente alcune so performance dei vinti ani preçedenti.

Inte l'isteso ano Carlos ga fondà un grupo del tuto strumentałe , Wayne Shorter Group, col jazzista Wayne Shorter al sasofono. Ghe xe rivai anca Patrice Rushen a łe tastiere, Alphonso Johnson al baso, Armando Peraza e Chepito Areas a łe percusion e Ndugu Leon Chancler a ła bateria. I xe stai brevemente in tour e i ga riçevesto criteghe łuxinghiere de ła stanpa muxicałe, aconparandołi ai Santana de Caravanserai. El chitarista el ga publegà anca el disco Blues for Salvador, vinçindor de un Grammy Award come Best Rock Instrumental Performance. El 14 de łujo 1989 co sta band el xe ospite internasionałe a Lamezia Terme de ła rasegna Fatti di Musica direta da Ruggero Pegna.

Inte el 1990 Santana ga łasà ła Columbia Records e el xe pasà a ła Polygram. Un ano drìo el ga parteçipù a l'album Solo Para Ti de Ottmar Liebert, par łe canson Reaching Out 2 U e na reinterpretasion de Samba Pa Ti. Inte el 1992 el ga ingagià i Phish come so grupo de vertaura. Ancora deso el xe visin al grupo, soratuto al chitarista Trey Anastasio.

Inte el 1993 (23 e 24 de majo) il Live in Mèsego (concerto a Città del Mèsego) dal cuało xe vegnisto el CD "Sacred Fire" e'l DVD co steso titoło.

El riłanso[canbia | canbia el còdaxe]

Carlos Santana ai tenpi de Supernatural

El 1994 xe l'ano inte el cuało Carlos Santana conpone (in cołaborasion co Franz Di Cioccio e Patrick Djivas de ła PFM) ła sigla de introdusion par i programi Mediaset. Inte el 1998 Santana e ła so band ga sonà in Piazza Mazzini a Viareggio, in ocaxion de ła cerimonia de vertura del famoxo Carnevałe; ła performance, che sarìa dovesta durar manco de na ora, ga durà invese pì de do ore.

Łe vendite de Santana inte i ani novanta łe xe stae reduxeste, e verso ła fin de chel decenio el se ga catà sensa contrato. Tutavia Clive Davis de ła Arista Records, che col chitarista el gavea łaorà par ła Columbia, el ło scriturà e ło ga incorajà a rejistrar un album co artisti parlopì zovani. Cusì inte el 1999 xe vegnùo fora Supernatural, che includeva partesipasion de Bobby Martin, Rob Thomas dei Matchbox 20, Eric Clapton, Lauryn Hill, Wyclef Jean, Maná, Dave Matthews, Eagle-Eye Cherry, Everlast e KC Porter[5].

Santana in un concerto a Barcełona

El so sìngoło de zlanso de xe stà Smooth, cantà da Rob Thomas (anca coautor dei testi). Ga avesto tanto suceso so varie stasion radiofoneghe. El ga pasà dòdeze setemane al primo posto de Billboard, deventando cusì l'ùltemo in ordene de tenpo tra i grandi singołi dei ani novanta; ne ze stà anca zirà el sełebre videoclip so un barrio. Supernatural ze stà premià in poco tenpo co tre dischi de platino, e ga razonzesto anca el primo posto de łe clasifeghe USA. El segondo singoło ciapà fora xe stà Maria Maria, aranjà da Bobby Martin ed sonà insnebre al do R&B The Product G&B; anca staltro el ze rivà al nùmaro uno in clasifega, e ghe ze restà par dieze setemane inte l'istà del 2000. Nantro singoło de suceso l'è stà Corazon Espinado, a cui ga cołaborà anca i Maná. Supernatural ga venduo fin deso pì de 25 milion de copie, de cui 15 milion inte i sołi Stati Unii de America.

El disco e tante so canson ga vinsesto 9 Grammy Awards (oto al steso Santana), intrà cui album de l'ano, rejistrasion de l'ano (el singoło Smooth) e canson de l'ano (premio andà a Thomas e Itaal Shur). I discorsi de Carlos durante ła premiasion, ga descrivesto łe so opinion sol ròło de ła muzega inte l'ezistensa spirituałe de na persona.

Inte el 2001 Santana ga łaorà co Michael Jackson a ła canson Whatever Happens, da l'album Invincible.

Un ano drioman el ga publegà Shaman, reałizà so ła falsariga de Supernatural e a cui ga paresipà i P.O.D., Seal e tanti altri artisti de suceso. Anca se manco fortunà in vendite del disco presedente, el ga contenesto altri do sìngołi de suceso: The Game of Love, reałizà co Michelle Branch e rivà al cuinto posto de Billboard, indove el xe restà par tante setemane; e Why Don't You and I, co Chad Kroeger dei Nickelback e (inte el remix) de Alex Band dei The Calling, che inte ła istesa clasifega ze zonzesto al numaro 8. The Game of Love ga vinsesto un Grammy Award come Best Pop Collaboration with Vocals.

Inte l'agosto del 2003, Santana ze rivà 15º inte ła łista dei 100 mejo chitaristi segondo Rolling Stone[6]. Inaxonta el so debuto eponemo e Abraxas ze entrà inte ła ełenco dei 500 mejo album publegà da ła stesa rivista, respetivamente ai numari 150 e 205.

Inte el 2005 Herbie Hancock ga contatà Carlos, par cołaborarve e par jutarlo a reclutar altri artisti, cusì da rejistrar un album simiłe a Supernatural. Cusì el 30 de agosto ze usìo Possibilities, co Santana e Angélique Kidjo a cołaborar a Safiatou.

All That I Am, publegà inte el steso ano, ga seguìo ła istesa formuła de Supernatural e Shaman, consistendo prevałentemente de canson reałizae co altri artisti; el primo sìngoło, I'm Feeling You, el ze stà reałizà da novo co Michelle Branch e i The Wreckers. A n'altra canson, Trinity, ga łaorà Kirk Hammett dei Metallica e Robert Randolph del grupo Robert Randolph & the Family Band. Signifegadiva anca ła parteçipasion de Steven Tyler dei Aerosmith a ła canson Just Feel Better. In pì Illegal ze stà ezeguio co ła cantante cołonbiana Shakira.

Tra l'apriłe e el majo del 2006 el chitarista ga scominsià un tour in Europa, par cui el ga verzesto el grupo de so fioło Salvador.

Santana durante un concerto inte el 2005

El 19 de otobre 2007 so mujer Deborah, drio 34 ani de matrimonio, ła chiede el divorsio dal chitarista.[7]

Shakira, Tina Turner e Chad Kroeger i cołabora a Ultimate Santana ła retrospetiva de Santana che ospita tre novi brani.

L'ano drio el cołabora co Eros Ramazzotti in una nova version de Fuoco inte el fuoco, canson del cantaudor roman.

Durante un concerto a Chicago inte el łujo 2010, in na data del tour, el ga publegamente domandà a ła moroza Cindy Blackman de deventar so mujer e ła copia ła se ga spozà inte el disenbre del steso ano[8].

El 21 de setenbre 2010 xe vegnùo fora el so novo album intitołà Guitar Heaven: The Greatest Guitar Classics of All Time, sto album el vanta cołaborasion cofà Rob Thomas, India Arie, Yo-Yo Ma, Chris Cornell, Scott Weiland, Jacoby Shaddix e tanti altri.

El 12 de łujo 2011 el se ezibise a l'Arena Santa Giuliana de Perugia durante ła manifestasion "Umbria Jazz 2011".

El 21 de łujo 2011 el sfoja na sublime prestasion de ła durada de scuazi 3 ore a l'Arena della Vittoria de Bari, indove el ga "ezordìo".

El 22 de łujo 2011 el se ezibise al Teatro Antico de Taormina par el so "Santana Guitar Heaven Tour 2011". I bilieti i xe stai vendùi tuti drento poche setemane.

El trentasìezemo album de Carlos Santana el se intitoła Shape Shifter e'l xe publegà el 15 de majo 2012. El cd el contien 13 brani de cui 11 scrvesti dal chitarista, e'l xe vedesto da ła critica come un ritorno a łe vècie sonorità[9].

El 7 de zugno 2019 Santana publegarà un album dal titoło Africa Speaks, in cołaborasion co ła cantante spagnoła Buika, produzesto da Rick Rubin.

Stromenti[canbia | canbia el còdaxe]

Łe chitare de Carlos Santana esponeste al Musical Instrument Museum de Phoenix

Chitare[canbia | canbia el còdaxe]

Inte ła so carièra Carlos Santana el ga utiłizà un gran nùmaro de chitare difarenti. Al festival de Woodstock el uzva na Gibson SG Special (conoscùa anca cofà "diavołeto") co pick up P90, indrìoman el pasa a ła Gibson SG Stàndar e a ła pì clàsega Les Paul inte łe so tanteplisi varianse, el inçide Borboletta co na Gibson L6 e inte el 1976 el taca ła so cołaborasion co Yamaha che ła durarà fin a ła metà dei ani otanta e'l uza un modèło parsonałizà de ła SG 2000. Caratèristega comùn a tute łe chitare da łù utiłizae, speçialmente cuełe parsonałizae, xe ła prezensa de tasti scavai che façiłita l'utiłizo del bending e del vibrà, tècneghe tanto utiłizae da Santana.

Efeti[canbia | canbia el còdaxe]

Par el son destintivo de łe so chitare, Carlos no'l se avałe tanto dei pedałi. Ła so PRS ła xe cołegà a un pedale wah wah e ad un pedałe delay T-Rex Replica[10], e cuindi a un anplifegador Dumble a so volta łigà ad altri anplifegadori intra i cuałi sernìr tramite un a/b switch.

In presedensa el ga uzà anca un overdrive Ibanez Tube Screamer[11].

Anplifegadori[canbia | canbia el còdaxe]

Ai inisi de ła carièra Santana uza anplifegadori Acoustic. A un serto ponto, un tècnego, Randall Smith (drioman titołare de ła Mesa Engineering), el modifega un anplifegador Fender Princeton co i finałi de un Fender Bassman, creando de fato l'anplifegador Boogie, el cui nome xe dovesto a na afermasion del steso Carlos ("that's really boogie"). Daspuò Santana conbina un Mesa/Boogie Mark I (co altoparlanti Altec 417-8H cołegà a na casa Boogie) e anplifegadori Dumble Overdrive Reverb e Special (co altoparlanti Celestion G12M, inserii in case Brown o Marshall 4x12, a segonda del tipo de son programà).

Par ła resesion del son el uza microfoni Shure KSM-32. Par rejistrar in studio el se avałe anca de un anplifegador Fender Cyber-Twin.

Discografia[canbia | canbia el còdaxe]

Da sołista[canbia | canbia el còdaxe]

Search ballonicon2.svg Par savèrghene de pì, vardarse ła voxe Discografia de Carlos Santana.

Album in studio[canbia | canbia el còdaxe]

Co i Santana[canbia | canbia el còdaxe]

Search ballonicon2.svg Par savèrghene de pì, vardarse ła voxe Discografia dei Santana.


Notasion[canbia | canbia el còdaxe]

  1. BBC NEWS | Entertainment | Latin honours for Carlos Santana
  2. [1]
  3. (EN) Notable Immigrants: Carlos Santana, Pacific Coast Immigrant Museum. URL vardà il 3 aprile 2013 (archivià da el URL orixenale il 18 marzo 2011).
  4. E BOB DYLAN SCESE NELL'ARENA - la Repubblica.it
  5. kcporter.com
  6. The Immortals: The First FiftyRolling Stone Issue 946, Rolling Stone.
  7. Carlos e Deborah: divorzio dopo 34 anni di matrimonio - Galleria - Repubblica.it
  8. Carlos Santana: proposta di matrimonio a Cindy Blackman durante concerto
  9. CARLOS SANTANA/ "Shape shifter", ritorno all'antico | pagina 2
  10. "Carlos Santana Spreads the Gospel of Tone" by Darrin Fox, Guitar Player Magazine, June edition 2005.
  11. Overview of Santana's old effects setup Archivià l'8 maggio 2015 Data inte l'URL no conbazante: 8 majo 2015 in Internet Archive. .

Altri projeti[canbia | canbia el còdaxe]

Linganbi foresti[canbia | canbia el còdaxe]


Controło de autoritàVIAF (EN20489878 · ISNI (EN0000 0001 0877 4113 · SBN (ITIT\ICCU\CFIV\173376 · Europeana agent/base/61194 · LCCN (ENn81022390 · GND (DE119397986 · BNF (FRcb13899393n (data) · BNE (ESXX1111241 (data) · WorldCat Identities (ENn81-022390
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Carlos_Santana&oldid=1054307"