Capitan (bałon)

Da Wikipedia, l'ençiclopedia libara.
Va a: navigasion, serca

El capitan de na squadra de balon el xe quel zugador, tra i óndese che va in canpo, a cui xe afidà la guida de la squadra sul tern de zugo. De solito el xe el zugador con pi presenze con quela squadra lì, o comunque uno de quei pi veci e esperti. Nol xe mia par forza el zugador pi brao o che fa piasè gol. El ga da essar in un serto senso el pi "autorevole" de la squadra, chel sia bon de consigliar i zugadori pi zoini e inesperti, e de farse scoltar da tuti i conpagni. Par distinguarse da cheialtri, el capitan el se mete al brazo na fassa colorà, opure bianca con scrito "C".

Uficialmente l'unica difarenza co queialtri zugadori xe che el capitan el partesipa al sortegio prima de la partìa par siègliar la metà canpo in cui zugar, e eventualmente dopo i tenpi suplementari el partesipa al sortegio par decidar ci tira par primo i calci de rigore. In calche sircostanza però l'arbitro el ciama da lu uno o tuti du i capitani, presenpio par dirghe de riciamar i so conpagni a na magior disiplina; opure se xe drio vegner zo un tenporal, el ghe domanda se secondo lori l'è el caso de zugar o no. Inoltre nei casi in cui s-ciopa na barufa in canpo par via de qualche intervento mia tanto coreto, i capitani de solito i xe quei che zerca de fermar la barufa e de chetar i elementi piasè "scalmanà".

El capitan el xe de norma uno dei zugadori piasè amà dai tifosi de na squadra, e quando la squadra la venze un qualche torneo, el xe lu quel che alza la cópa par primo.