Capeła dei Scrovegni

Da Wikipedia, l'ençiclopedia libara.
Esterno dea capeła dei Scrovegni
L'interno dea capeła co ła controfaciata e parte dei afreschi

Ła capeła dei Scrovegni (deta anca deła Arena) xe na cexa che ła se trova inte el sentro storico de Padova e ła ospita el famoxisimo ciclo de afreschi de Gioto che risałe ai primi ani del XIV secoło, considerá uno dei capołavori del'arte ocidentałe. Internamente ła xe lunga 29,26 metri, larga 12,80 e alta al masimo 8,48[1].

Inte el 2012 ła xe stà visità da 356.471 persone.

Storia[canbia | canbia el còdaxe]

Enrico Scrovegni el ghe ofre a ła Madona un modein dea capeła

Intitołà a ła stanga dea Carità, ła capeła xe stà costruia e afrescà tra il 1303 e i primi mesi del 1305 su ordine de Enrico Scrovegni, richisimo banchiere e strosin padovan, come oratorio privato e futuro mauxołeo familiare. Ła gà fata afrescare dal fiorentin Gioto, che el gaveva lavorà pa' i francescani de Assisi e de Rimini, e che el gera a Padova par dipingere al interno dea Baxełega de Sant'Antonio[2]. I leterati de chel tempo Riccobaldo Ferrarese e Francesco da Barberino i gà certificà ła prexensa de Gioto al cantiere e quindi ła capeła xe una dee poche intrà e só opere che ghe vien atribuie co certesa. Anca ła data poe esere considerà atendibie: el teren xe stà comprà da Scrovegni inte el 1300 e el vescovo de Padova Ottobuono di Razzi gaveva dà l'autorixasion a costruire prima de esere trasferio a Aquileia inte el 1302. Inte el 1303 xe stà poxà ła prima fondasion (o almanco ła consacrasion dea tera)[1]. Il 1º marso 1304 papa Benedetto XI gà conceso ła indulgensa a chi che gavese visità ła capeła, che xe stà consacrà el 25 marso 1305. Se pensa che i afreschi sia stà exeguii tra el 1304 e el 1306 o, secondo altri studi, inte el periodo 1308-1310[1].

Gioto el gà dipinto tuti i muri interni del'oratorio co un progetto iconografico e decorativo unitario, ispirà da un competente teologo agostiniano, che secondo G. Pisani gera Alberto da Padova[3]. Tra e fonti doparae ghe xe stà diversi testi agostiniani, i Vangei apocrifi del pseudo-Matteo e de Nicodemo, ła Legenda Aurea de Jacopo da Varazze e, par picoi dettaji iconografici, e Meditasion suła vita de Gesù del pseudo-Bonaventura, oltre a testi de ła tradision medievae cristiana, tra cui l'antico El Fixiołogo.

Inte el 1305, quando che i lavori gera drio finire, i visini frati Eremitani gà protestà parché in corso d'opera ła capeła gera stà ingrandia rispeto al progeto e ła gera drio trasformarse ne na cexa vera e propria co un campanie. Probabilmente in seguito a ste proteste, ła cexa xe stà ridimensionà nea parte de l'abside, come che confermaria ła datasion al 1320 dei afreschi de ła stesa abside[4]. Xe in ogni caxo sicuro che l'atuałe campanie visin a ła capeła no el xe originałe.

Ŀa capeła, acquisia dal Comune de Padova inte el 1880, ła gera cołegà in origine co un ingreso laterałe al pałaso Scrovegni (che deso no el esiste più), costruio visin ai resti de ła arena romana, sora ai quai ghe xe deso el spiaso davanti l'entrata de ła capeła. Dal'Otosento ła capeła xe stà diverse volte restaurà co scrupoło, garantendo cusì l'odierno otimo stato de conservasion[5].

Atribusion[canbia | canbia el còdaxe]

A diferenza dei afreschi del Domo de Assisi, al ciclo dei Scrovegni gà partecipà sicuramente Gioto e se ritien che el contributo de ła botega sia stà bastansa limità. Se nota ła prexensa de più man, sora-de-tuto nee raprexentasion secondarie, ma in generale e sene e vien atribuie al maestro fiorentin. I epixodi inte i cuałi xe più evidenti i contributi dei aiutanti xe quei de ła vita de ła Vergine, l'Ingreso a Gerusałeme, l'Ultima Sena, ła Saita al Calvario, i medaioni de ła volta e de łe fase decorative, alcune ałegorie a monocromo e el Giudisio Universałe[1].

Suła cronołogia interna del ciclo no ghe xe acordo tra i studioxi: alcuni sostien che ła reaixasion sia ndà secondo el sviłupo de łe storie e chi sostien l'oposto[1]. I restauri recenti gà confermà, suła baxe dei intonaci, che ła stexura gà seguio sostansialmente ła sucesion storica dei avenimenti, a partire da łe sene superiori[5].

Descrision[canbia | canbia el còdaxe]

E Nose de Cana e el Compianto sul Cristo morto co e fase ornamentai

L'esterno de ła capeła se presenta co i matoni a vista e teto a dó falde.

L'interno xe a navata unica co volta a botte e pareti lisce, sensa nervature, ideai pa ła stexura de afreschi; sul lato del'altare se trova un coretto, afrescà verso il 1315-1325 da un giotesco locałe, el cosideto "Maestro del coro Scrovegni" co Episodi de ła vita de Maria Vergine: Funerai, Tranxito, Asunsions e Incoronasion, oltre a fase co Santi. Ŀa luneta sora el tabernacoło mostra el Redentore, l'Orasion inte el Getsemani e ła Flagełasion, opere de Gioto. Na Madona col Puteo dentro na nichia xe atribuia a Giusto de' Menabuoi e riferia a ła seconda metà del Trexento.

Sul'altare de ła capeła ghe xe e tre statue rapresentanti ła Madona col Puteo e dó angei, opera de Giovanni Pisano, el scultore più famoso de chea epoca, ciamà da Enrico Scrovegni steso.

El ciclo pitorico[canbia | canbia el còdaxe]

I afreschi xe organixai in quatro fase sudivixe in panei incornixai co dipinte e storie dei personagi prinsipai[1]. Ŀa forma asimetrica de ła capeła, co sie finestre solo su un lato, ga determinà el inserimento de dó riquadri inte i spasi tra e finestre, e suła parete oposta ghe ne xe stà ricavai dó dea stesa mixura[6].

El ciclo pittorico, incentrà sul tema de ła salvesa, comprende più de quaranta scene dee Storie de Cristo e de quełe che e gà precedue (Storie de Gioachino e Storie de Maria), fin a ła Pentecoste. Suła controfaciata se trova un grande Giudisio Universałe[1].

Ŀa storia parte da ła sena de ła Gioacchino mandà via dal Tempio visin l'arco trionfałe, e ła prosegue verso l'ingreso co e Storie de Gioachino e Ana; ła riprende suła parete oposta co e Storie die Maria fin a ła luneta sora l'altare dove che se trova l'Annunciasion. Sul liveło soto ghe xe ła Visitasion, che segna ła fin de łe storie mariane e l'inisio de łe Storie de Gesù, che se xviłupa lungo i dó registri sentrałi. L'ultimo riquadro el prexenta ła discexa del Spirito Santo sui apostołi (Pentecoste). Subito soto ghe xe quatordexe Alegorie a monocromo che simbołegia i Visi (Stultitia, Inconstantia, Ira, Iniusticia, Infidelitas, Invidia, Desperatio), e quatro Virtù cardinai, Prudencia, Fortitudo, Temperantia, Iusticia, e e tre virtù teologałi, Fides, Karitas, Spes), alternae a finti marmi. El nome del visio o de ła virtù xe scrito in alto in latino e el spiega e imagini. Vizsi e virtù se frontegia a copia, simboło del percorso verso ła beatitudine, da fare superando co l'juto de łe virtù i ostacoli dei visi corispondenti.

E sene xe incornixae co fase decorative ornate intervałae da composision che raprexenta episodi dell'Antigo Testamento, contrapunto ideałe co e sene del Novo Testamento inte i riquadri principałi, o busti di Santi.

El caratere de ex voto de ła capeła xe raprexsentà inte el Giudisio universałe, dove xe rafigurà el Scrovegni che el ghe ofre a ła Madona, afiancà da san Giovani e santa Caterina d'Alesandria, un modeło preciso de ła capeła stesa pa guadagnarse el paradiso.

Gioto gà calcołà co gran precixion el punto de vista ideałe al centro del'oratorio e el gà disegnà l'intelaiatura tra i panei in modo che ła para un finto baxamento in marmo co loge sovraposte. Ła fonte de luce ła xe in armonia co ła luce prexente nełe sene. De particołare efeto xe ła prexensa dei cosideti coreti, dó finte stanse che se verxe al'altesa del primo registro tacà al coro vero, che e fa intravedere de łe volte a crociera in prospetiva[1].

Importante xe anca el socoło a riquadri marmorei in baso, usà pa ła prima volta, che gavarà un gran séguito inte i dó secoi sucesivi[6]. In sti riquadri se trova e Virtù e i Visi a monocromo che a sò volta sarà i prototipi de un genere a larghisima difuxion, come inte i caxi dei sportei esterni dei polittici fiaminghi, a łe lunete inte ła Camera de ła Badesa del Correggio.

El sofito xe fato a volta co stełe a oto punte (simboło dei santi[7]) su un cieło blè oltremare, cołore simboło de ła sapiensa divina. El xe traversà da tre fase trasversai che crea dó grandi riquadri co al sentro dó tondi dove ghe xe rafigurà ła Madona col Puteo e el Cristo benedixente; tuto intorno ghe xe oto Profeti (sete neviìm del'Antico Testamento e Giovani Batista), quatro par riquadro. E tre fase traxversałi e gà decorasion simiłi a quełe de łe incornixadure de łe pareti, co inserti che rafigura Santi e angeli in quea più visina al'altare, e Santi ne staltre dó[1].

El portałe xe simboło de ła Fede in Cristo mentre ła luce sołare del'alba che entra da ła rotonda finestra del'abside xe ła luce del Cristo risorto.[8] Suła volta stełà ghe xe ła imagine del Cristo Pantocratore benedixente co połexe, anułare e mignoło unii a simboło de ła Santisima Trinità, mentre indice e mèdio xe intreciai (simboło de ła dopia natura umana e divina de Cristo. Ła idea de Dio trino e uno ła se ripete co varie simbołogìe. Tre xe e absidi, nel'arco trionfałe un triangoło unise el trono de Dio Padre co l'arcangelo Gabriełe, a sinistra, e l'Anunciata a destra. Suła parete de fondo, Cristo-Giudice xe vegnuo xó dal trono-trifora. Tre volte e porte de Gerusaeme, tre volte el tabernacoło del Tempio, tre volte el cenacoło, tre volte l'asino cristòforo ('Nadałe, Fuga in Egito, Palme)[9].

Note[canbia | canbia el còdaxe]

  1. 1,0 1,1 1,2 1,3 1,4 1,5 1,6 1,7 1,8 Baccheschi, cit., p. 98.
  2. . Che Gioto gabia lavorà al Santo ła xe soło na ipotesi, dato che no ghe xe prove che ło conferma, cfr. Gnudi, 1959, e Salvini, 1952.
  3. Giuliano Pisani, I volti segreti di Giotto, Rizzoli, Milano 2008.
  4. Decio Gioseffi, Giotto architetto, Milano: Edizioni di Comunità, 1963
  5. 5,0 5,1 Baccheschi, cit., p. 99.
  6. 6,0 6,1 Bellosi, cit., p. 119.
  7. Roberto Filippetti, L'avvenimento secondo Giotto, ed. Itaca, 2005, pag. 8
  8. Roberto Filippetti, L'avvenimento secondo Giotto, ed. Itaca, 2005, pag. 7
  9. L'avvenimento secondo Giotto, Cappella degli Scrovegni, ed. Itaca, p. 7.

Bibliografia[canbia | canbia el còdaxe]

  • Maurizia Tazartes, Giotto, Rizzoli, Milano 2004.
  • Luciano Bellosi, Giotto, in Dal Gotico al Rinascimento, Scala, Firenze 2003. ISBN 88-8117-092-2
  • Edi Baccheschi, L'opera completa di Giotto, Rizzoli, Milano 1977.
  • La Cappella degli Scrovegni a Padova (The Scrovegni Chapel in Padua), collana Mirabilia Italiae - Guide, Editore Franco Cosimo Panini, 2005.
  • Giuliano Pisani, L’ispirazione filosofico-teologica nella sequenza Vizi-Virtù della Cappella degli Scrovegni, «Bollettino del Museo Civico di Padova», XCIII, 2004, Milano 2005, pp. 61–97.
  • Giuliano Pisani, Terapia umana e divina nella Cappella degli Scrovegni, in «Il Governo delle cose», dir. Franco Cardini, Firenze, n. 51, anno VI, 2006, pp. 97–106.
  • Giuliano Pisani, L’iconologia di Cristo Giudice nella Cappella degli Scrovegni di Giotto, in «Bollettino del Museo Civico di Padova», XCV, 2006, pp. 45–65.
  • Giuliano Pisani, Le allegorie della sovrapporta laterale d’accesso alla Cappella degli Scrovegni di Giotto, in «Bollettino del Museo Civico di Padova», XCV, 2006, pp. 67–77.
  • Giuliano Pisani, Il miracolo della Cappella degli Scrovegni di Giotto, in ModernitasFestival della modernità (Milano 22-25 zugno 2006), Spirali, Milano 2006, pp. 329–57.
  • Giuliano Pisani, Una nuova interpretazione del ciclo giottesco agli Scrovegni, in «Padova e il suo territorio», XXII, 125, 2007, pp. 4–8.
  • Giuliano Pisani, I volti segreti di Giotto. Le rivelazioni della Cappella degli Scrovegni, Rizzoli, Milano 2008 (ISBN 9788817027229).
  • Giuliano Pisani, Il programma della Cappella degli Scrovegni, in Giotto e il Trecento, catalogo a cura di A. Tomei, Skira, Milano 2009, I – I saggi, pp. 113–127.
  • Giuliano Pisani, La fonte agostiniana della figura allegorica femminile sopra la porta palaziale della Cappella degli Scrovegni, in «Bollettino del Museo Civico di Padova», XCIX, 2010 (2014), pp. 35–46.

Altri projeti[canbia | canbia el còdaxe]

Linganbi foresti[canbia | canbia el còdaxe]

Controło de autoritàVIAF (EN124429791 · LCCN (ENn87840423 · WorldCat Identities (ENn87-840423
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Capeła_dei_Scrovegni&oldid=1070916"