Asedio de Famagosta

Da Wikipedia, l'ençiclopedia libara.
Jump to navigation Jump to search
« Ve dimandemo Cipro e ne la dovè dar par amor o par forsa... »
( l’anbasador de ła Sublime Porta al Gran Consejo de ła Serenisima Republica de Venesia)


Bataja de Famagosta
Parte de l'invaxion otomana de Cipro
Data: 22 de agosto 1570 - 4 de agosto 1571
Posto: Famagosta
Èxito: Vitoria de l'Inpero Otoman
Schieramenti
VenesiaInpero otoman
Comandanti
Marcantonio Bragadin
Astorre Baglioni
Lala Mustafà Pascià
Efetivi
7 000 òmeni200 000 òmeni, 150 navi
Perdite
6 000 òmeni80 000 òmeni

Ne la seconda metà del ‘500 Venesia la xe a la masima espansion nel Mediteraneo oriental, preservando libertà, prosperità e paxe fin quasi le coste del medio oriente. Ma Selim II, ciamà l’inbriagon pa via del so visio a discapito de la so fede islamega, el xe deciso a riciapar la guera contro l’ocidente e par primo el vol ciaparse Cipro, al fine de asicurarse strategicamente el controllo anca de le xone de la Morea, de la Siria, de l’Asia minor e de l’Egito.

Cusita na flota de 80 000 omeni selti al comando del Mustafà Pascià la sbarca a Cipro e in manco de do mesi, sensa gran fadiga, i ciapa la capital Nicosia e i copa 20 000 inocenti, sol parché Venexia no la jera stada in grado de mandar rinforsi, in quanto indebolida momentaneamente da un grando incendio de l’arsenal, mentre anca la fortesa de Kirenia la se arende de so sponte.

Resta sol che Famagosta, comandada dal Bragadin, co setemila Veneti e 500 canoni, fortificada co murasi longhi 4 kilometri e larghi fin a trenta metri e co un fosato par davanti e sovrastada da na diesina de posenti forti ciamai "cavalieri".

L'asedio[canbia | canbia el còdexe]

I Turchi pa scomisiar i manda a Bragadin, de nobile e vecia casata venesiana, la testa tajada del governador de Nicosia, Nicolò Dandolo, drento na sesta, ma sdegnosamente lu el se ciuma de calsiasi intimidasion e la rimanda de via. Cusita el 22 de setenbre del 1570 i otomani i circonda la cità co 150 navi e adiritura 200 000 omeni. D’intorno su le coline i turchi i mete 1500 canoni e obici giganteschi.

I turchi i speta e i tien l’asedio ma la cità no la mola par la fame e la tien bota de grando. Se riva fin al 19 de majo del 1571, zorno intel qual scomisia l’inferno de la artiglieria turca ke la riva a sparar 170 000 canonade ininterotamente pa 1728 ore sensa ancora piegar la eroica resistenza dei Veneti guidai dal Bragadin. Pa finir el nemigo scava e mete mine, co quantità gigantesche de esplosivo, fasendo saltar intieri tochi dei posenti murasi soto i pié de i nostri conbatenti, fasendo seguito co ondate de atachi de sti barbari.

L’8 de lujo parte n’altro ataco un mucio potente verso el forte "Rivelino", ma l’eroe Roberto Malvezzi co 300 Veneti el se fa saltar par aria co tuta la santabarbara portandose via anca 6000 nemici turchi. Fin deso se conta 5.300 morti de venesiani contro 80 000 de turchi.

[canbia | canbia el còdexe]

Ma el 4 de agosto del 1571 a Famagosta no resta che 700 soldai Veneti, e munision pa un sol zorno de fogo. L’ufizial Baglioni el prospeta ed otiene che la cità se arendia, nonostante el governador Bragadin e l’ufizial Martinengo i fuse incora de contrario parer. In canbio de la resa i turchi i concede fintamente el salvacondotto pa lasar la cità co salva la vida. Ma prima de partir el Pascià co granda cortesia dimanda de vedar sti eroi ke i ga conbatudo co si grando valor. Xe na finta, vile e meschina. Subito xe copà el Baglioni e al Bragadin i ghe moza le recie e el naso. 350 teste de soldai veneti le vien tajade, e anca chelatri soldai che i spetava za in te le navi, pronti a partir, i xe deportadi come sciavi a Costantinopoli.

Marcantonio Bragadin el vien colpido, ofeso e caricà de pesi e portà in giro pa tuta la cità de Famagosta. Par finir el vien ligà coa testa in zò la colona indoe ghe jera el Leon Marciano, abatuo e scotegà da vivo. El boia el scomisia dal col fin ai pié in un sol toco. Bragadin no se lamenta mai e mieri de soldai nemici i xe stupìdi e i varda in silensio el so suplisio, colpidi da la tanta fiersa e dignità veneta. El dixerà sol che "Sun contento de morir indove xe morti un mucio de bravi soldai".

La pele de Marco Antonio Bragadin la vien inbalsamada e portada come trofeo a Istanbul, ma ghe la sarà robada da no sciavo e portada a Venexia indove la riposa in te on monumento a la destra de la entrada de la baxéłega de San Giovani e Paolo, cusì che tuti podemo incora andar a riverir la so memoria e dei so soldadi, tuti veri eroi Veneti. Coalche ano indrio (2003-2004?) xè sta fata na ricognision sua tomba da parte dei frati e coa presensa dei so disendenti e de altri studiosi dea storia de Venezia e ghe ne xè vegnesto fora anca on filmà e on documentario todesco. I resti xè in condision cative e se desfa tuto , ma se pol incora vedar i cavei che li jiera rosi e la pele del eroe venesian.

In te ła łiteratura[canbia | canbia el còdexe]

Ła bataja de Famagosta ła xe stà descrita dal scritor veronexe Emilio Salgari nel so romanzo Capitan Tempesta.

Bibliografia[canbia | canbia el còdexe]

  • Gigi Monello, Accadde a Famagosta, l'assedio turco ad una fortezza veneziana ed il suo sconvolgente finale, pp.192, tav. 10, Scepsi & Mattana Editori, Cagliari, 2006.
  • Nestore Martinengo, Relazione di tutto il successo di Famagosta, a cura di Gigi Monello, pp.32, Scepsi & Mattana Editori, Cagliari, 2007.