Zanetta Farussi

Da Wikipedia, l'ençiclopedia libara.
Va a: navigasion, serca

Zanetta Farussi - pseudonimo de Maria Giovanna Farussi o Farusso - dita Ła Buraneła (Venezia, 27 de agosto 1707Dresda, 29 de novenbre 1776) xe stà na atrice teatrałe venesiana. Ła gera speciałisà nei cosideti "intermezzi", opere lexière che łe smesava łe rapresentasion de opare tragiche o dramatiche.

Ła ga maridà el 27 de febraro 1724 Gaetano Casanova, anca lu ator, dal quałe ła ga avudo siè fiołi, ła paternità de qualchedun ła vien atribuia a vari personaji de spico de ł'aristocrasia venexiana e inglexe. El pì çełebre dei siè el xe sta ł'aventuriero e scritor Giacomo Casanova, ma anca altri du, Francesco e Giovanni, i xe sta pitori, soratuto el primo, de 'na serta notorietà.

'Ntel 1726, dopo on aprendistato venesian fato al teatro San Samuele, de proprietà deła fameja Grimani, ła xe partìa par Łondra insieme al mario e ła ga scuminsià 'na fortunà stajon de spetacołi. Ła se ga esibìo con suceso al Kings Theatre frequentà parecio dal principe de Gałes e futuro re Giorgio II.

'Ntel 1727 a xe nato el secondogenito Francesco e ła maldicensa popołare ła ghe ne ga atribuìo ła paternità al prinsipe. A no xe ciaro sa se tratase soło de ciacołe opure de abiłi operasion de marketing che, 'ntel mondo deło spetacoło, a se uxa far anca al di de inquò. Tornà a Venesia ła ga catà nove scriture 'ntel teatro San Samuele. 'Ntel 1733 el mario el xe morto, łasiandoła inte 'na situasion difiçiłe con sinque fiołi spetando el sesto.

Goldoni, che ła ga conosesta 'ntel 1734 a Verona, el ga scrito par eła ła comedia La pupilla, 'nte ła quałe ironisava bonariamente sora ła pasion, e conseguente gełoxia, che ła beła atrice ła gaveva susità in Giuseppe Imer, uno dei inprexari teatrałi pì noti de ł'epoca. Ła comedia ła xe sta rapresentà, soto forma de intermezo, insieme ała tragicomedia Belisario, senpre de Goldoni, 'ntel novenbre del 1734, 'ntel teatro San Samuełe dove Imer el svolgeva ła so atività.

'Ntel 1735 ła xe partìa par 'na nova tournée ała volta de San Pietroburgo.

'Nel 1737 ła xe sta scriturà a vita da ł'Eletore de Sasonia par recitar 'ntel teatro de Dresda, sità in dove ła ga pasà el resto deła so vita e dove che ła xe morta el 29 de novenbre 1776.