Vogałonga
|
Sto artìcoło el xé scrito in diałeto venesian
|
Ła Vogałonga xe 'na regata de inbarcasión a remi "non conpetitiva" che se desvòlze a Venesia 'ntel mexe de Magio.
Indice |
[canbia] Storia
Durante 'na regata che s'a svolto l'11 novenbre 1974 infra un grupo de venesiani, sia diłetànti che profesionìsti, nase l'idea de istituir 'na regata dedicàda a tuti i pasionài deła voga veneta, par riłansar sta antiga tradisión e par sostegnir 'na canpàgna contro 'l degrado e 'l moto ondoxo neła Łaguna de Venesia.
De sti propòxiti, s'a fato promotóri prinsipalmente Lauro Bergamo, a ł'epoca diretór de Il Gazzettino, oltre a Toni Rosa Salva e Bèpo Rosa Salva, speso inpegnài in prima parsona par ła salvaguardia de Venesia.
El 26 xenaro 1975 sti propòxiti se traduxe in un bando uficiałe par l'istitusión de ła Vogałonga, che vien prexentàda ała sitadinansa e ała stanpa, promosa da un apoxito comitato. El parcorso, łongo sirca 30 km, gera stà studià par tocar dei łòghi significativi e sentrałi de Venesia, cofà el Basin de San Marco e 'l Canal Grando, e par raxonxer łe xone a staltra łimitrofe, infra łe quałe Buran e Muran, par rientrar a Venesia dal Canal de Canaregio, che imete 'ntel Canal Grando e po' fenìr davanti a ła Ponta de ła Sałute.
Ła prima Vogałonga se desvòlze l'8 magio 1975, xorno de ła "Sensa", co' ła partensa de tute łe inbarcasión sunàe davanti a Pałaso Dogal, segnàda da un colpo de canón.
Xa da questa prima edisión gà partesipà 1.500 regatanti, co' ben 500 inbarcasión, che vegniva da Venesia, da tante altre locałità del Veneto e co' qualche equipàgio che rivava anca da altre región.
Co' łe edisión drìo, ła Vogałonga vede créser par scałinasión el so consenso e partesipasión, rivando a sorpasàr łe 1.600 inbarcasión e oltre 6.000 iscriti 'ntel 2008, co' regatanti rivài oramai da tuto'l mondo e co' ogni xenare d'inbarcasión, basta che ła sia a remi.
Tuti i partesipanti rivài al traguardo, escluxi i equipàgi squałificài, riseve 'na medàgia comemorativa e un certificato de partesipasión. Talfiè, inaxònta, xe sortegiài premi suplementari, slarghixài da asociasión o istitusión.
[canbia] Gałarìe de imàxene
-
Vogałonga 2010 - Muran
-
Vogałonga 2010 - Muran
