Storia del Vèneto

Da Wikipedia, l'ençiclopedia libara.
Va a: navigasion, serca

La storia del Veneto ła xe in gran parte comun con queła deła più granda rejon conosùa come Triveneto o Tri Venesie, 'ntel Nord-est deła penixola italiana, situà tra el confine del Mar Adriatico e tuta ła cadena dełe Alpi Orientałi, che ła conprende Trentin-Alto Àdexe, Veneto e Friułi-Venesia Julia.

Protostoria e Storia Antica[canbia | canbia sorxente]

El teritorio do che stava i Veneti ne l'età del fero

El Vèneto el gera abità za nte ła preistoria, da prima insediamento dei Euganei, el xe sta po, en epoca protostorica, ocupà dal popoło dei Veneti. Tito Livio, nativo de Padova, el ga scumensià ła so monumentałe storia de Roma col mito de Antenore che, scampando da Troia mentre che ła bruxava e guidando on gruppo de Troiani e de Eneti, popoło aleà proveniente dała Pafłagonia, el xe rivà nte ł'atuałe Golfo de Venesia. Nte ła tera estexa tra łe Alpi e el mare Adriatico, dopo aver parà via i Euganei, i se ga insedià cusì ste zente che i se ga fato ciamare Veneti. Antenore steso el saria sta el fondatore de Padova. Secondo na lezenda anałoga Diomede el gavaria fondà Adria mentre Clodio el gavaria fondà Cióxa. Łe xe comunque de serta origine venetica tante inportanti sità, quałi Concordia, Oderzo (fra łe pì antiche - IX-VIII sec. a.C.), Este, Trevixo, Bełun, Altino, Vicensa e forse Verona.

Ła proveniensa anatołica dei Veneti adriateghi non ła xe acetà da tuti i autori antichi e ła xe ancor inquò ogeto de ciàcołe. Łe fonti antiche łe tramanda ł'existenzea de vari fiłoni de ł'etnìa vèneta, dała Bretagna, ała Luxazia, fra Germania e Polonia, a ł'Epiro in Grecia, a ł'Axia Minore. Łigà a ł'etnico veneto a ghe sarìa diversi toponimi (ad es. ła Vindelicia, rejon corispondente a ł'atuale Baviera, Vindebona - ł'atuałe Vienna) e i nomi atribuìi a popołi de orixine slava in diverse łéngoe eoropee. Secondo alcuni studioxi, łe sarìa queste łe testimonianse de on'unica siviltà indoeoropea che ła se estendeva dal Baltego a ł'Adriatico, riconduxibiłe ai cosideti popołi dei Campi dełe Urne.

El periodo roman[canbia | canbia sorxente]

El teritorio de la Regio X Venetia et Histria

El proceso de romanizasion deła Venetia el xe avegnù un toco ała olta sensa traumi o conquiste manu militari, dato che i veneti e i romani i jera popołi ałeà uno con l'altro. Łe rełasion połitico-miłitari coi romani łe scominsia 'ntel III sec. a.C. : nel 225-222 i veneti e i cenomani i strenze na ałeansa miłitar con Roma contro i insubri, i boi e i gesati, fornendo secondo Polibio un contingente de 20 000 òmeni. I gałi i vegnerà batù in teła storica bataja de Clastidium nel 222. Nel 181 a.C. ła dedusion deła colonia de Aquiłeja ła rinforsa i tradisionałi raporti de cołaborasion tra veneti e romani.

In tel'epoca de Augusto el teritorio dei veneti el vien unìo e ghe vien dà un riconosimento ufiçial coła creasion deła Regio X Venetia et Histria, prima con capital Padoa e dopo Aquiłeja. Nonostante i sconvolgimenti che ghe xe sta nei primi secoli d.C., l'omogeneità e unità sostanziale de sto territorio no la xe mai sta alterà, tanto che Diocleziano el ga trasformà la region in Provincia Venetiae et Histriae, tegnendo i confini praticamente conpagni.

Nei primi secoli d.C. xe intacà el processo de cristianizazion del Veneto. El sentro de iradiamento de la nova religion el xera Aquileja, metropoli de la Venetia, in do che el Cristianesimo el xera rivà probabilmente dal mar. Secondo la tradizion xe sta San Marco 'Vangelista a fondar la Cesa de Aquileja, consacrandoghene vescovo Sant'Ermagora, martire soto de Nerone.[1] San Marco el gavaria inoltre mandà el greco Prosdocimo a evangelizar Padoa, Asolo, Vicensa, Treviso, Altino e Este. A l'evangelizazion de Verona gavaria contribuìo na comunità cristiana che vegnea da l'Africa romana; africano xe anca San Zen, el patrono de la sità.

Storia Medieval[canbia | canbia sorxente]

Dal V a l'XI secoło - Se ronpe l'unità teritorial veneta[canbia | canbia sorxente]

La fondazion de Venexia e la festa del popolo veneto
Secondo la leggenda, Venexia la xe nata el 25 marzo 421. Marin Sanudo, nel De origine, situ et magistratibus Urbis Venetiae el riporta che "Venezia fo comenzada a edificar ... del 421, adì 25 Marzo in zorno di Venere circha l'hora di nona ascendendo, come nella figura astrologica apar, gradi 25 del segno del Cancro. Nel qual zorno ut divinae testantur litterae fo formato el primo homo Adam nel principio del mondo per le mano di Dio; ancora in ditto zorno la verzene Maria fo annunciada dall'angelo Cabriel, et etiam il fiol de Dio, Christo Giesù, nel suo immacolato ventre miraculose introe, et secondo l'opinione theologica fo in quel medesmo zorno da Zudei crucefisso". Secondo n'altra tradizion, de origine padoana, la sità la xe sta fondà da tri cònsoli mandà da Padoa, fasendo consacrar la cesa de San Giacomo in Rialto. La storia ufizial de la Serenissima la vegnea datà dal 421, mentre el scominsio del calendario zivil el xera fissà nel mese de marzo, ma par comodità, el capodano el xera antisipà al primo marzo (Capodano Veneto); par no confóndarse, nei documenti internazionai le date che fasea riferimento al calendario veneto le vegnea indicà con m.v. (more veneto). Riconosendo l'inportanza de sto evento ne la storia veneta, e la partisipazion corale a la fondazion de la propria capitale storica, el Consejo Regional el ga decidesto de istituir el 25 Marzo come festa del popolo veneto.

Łe prime infiltrasion de tribù barbariche ntel teritorio deła rejon łe vu łuogo zà ntel 168-169 d.C. col sachejo de Oderzo par opara dei Quadi e dei Marcomani. A xe sta tutavia a partir dal V sec. d.C. che łe incursion łe se ga fato pì frequenti e pì devastanti (Goti, Eruli, Unni). Ciononostante, el quadro rejonałe el restava ancora sostansialmente unitario; łéngoa, scritura, istitusion, tecniche agricołe e manifaturiere, pur indebołie, łe xe sopravisù a ł'inpato de sta ondata barbarica.[2]

Xe sta solo a partire dal 568 d.C, con la disesa in Italia dei Longobardi - invasion che xe sta contà da Paolo Diacono ne la so Historia Langobardorum - che ga tacà a crearse (tra el VI e el VIII secolo) na division senpre pi netta tra la Venetia interna, soto el dominio longobardo e la Venetia maritima dipendente da l'Inpero bizantin e da l'Esarcato de Ravenna. Gran parte de le popolazion e le autorità religiose le se ga trasferìo da le sità de l'interno ai sentri lagunari (Grado, Caorle, Civitas Nova-Heraclea, Torseo, Malamocco, Olivolo, Ciosa, oltre ad Ammiana e Costanziaca uncuó sparìe).

Co la conquista longobarda de Ravenna a la metà de l'VIII secolo, el territorio lagunar el deenta senpre pi autonomo da l'inpero bizantin, del quale el resta formalmente dipendente. Dal trasferimento de la sede del dux bizantin da Civitas Nova, su la teraferma, a Malamocco, ne le isole lagunari (e da de qua, al scuminsio de l'VIII secolo a "Rivo Alto", la Rialto de desso), tol origine la sità de Venexia. Risale a l'811 el primo atto giuridico in cui la sovranità del Dogado la xe stabilìa ufizialmente: el tratato fra Carlo Magno e l'Inpero Bizantin. La separazion anca formal fra i due mondi de la laguna e de la teraferma (anca se ga continuà a èsarghe na forte osmosi) la xe rivà con la definizion dei confini (terminatio) fra el Ducatus Venetiarum e el Regnum Langobardorum, siglà dal re Liutprando e dal primo doxe Paulicio Anafesto.

Exquisite-kfind.png Par saverghene de pì, varda ła pajina Republica Veneta.


In te la teraferma veneta, che la xera drio cognósar un rapido declino, al comando de le sità prinsipai se ga piazà dei duchi longobardi. Na serta continuità de la vita sitadina la xera garantìa dai vescovi, divegnesti riferimenti autorevoli in canpo moral, cultural e social. Intel 827 xe sta sancìa anca dal punto de vista religioso na division fra el mondo del Veneto continental e de la Venexia maritima: i vescovi de la teraferma i xera soto l'autorità de la sede metropolita de Aquileja, inveze le nove sedi diocesane vegneste su ne la laguna le dependea dal patriarca de Grado.

La Marca de Verona e i teritori de la Republica Veneta ne l'anno Mile

L'arivo dei Franchi, che i è subentrà ai Longobradi nel IX secolo, costituendo ne la pianura padana el Regnum Italia, no'l ga canbià le robe. Un tentativo de Pipino, fiol de Carlo Magno, de conquistar la Venetia Maritima, formalmente dipendente da Bisanzio, el xe sta eficacemente respinto dai veneti. El vuoto de poteri, la dilagante conflitualità, le tremende agressioni dei Ongari, che ga colpìo el Veneto continental, la xe ga vu fine verso la metà del X secolo, col ristabilimento de l'autorità inperial da parte de Otone I: el xe sta lu che el ga agregà nel 962 un grando teritorio de l'Italia nord-oriental al ducato de Baviera e sucessivamente, nel 976, al ducato de Carinzia. L'organismo che xe vegnesto fora, e che el gavea finalità de cerniera fra Germania e Italia, el xe sta ciamà Marca Veronese, dal nome de la so sità prinsipal. Da la Marca se ga destacà nel 1027 el teritorio de la diocesi de Trento, che el s'à organizà in prinsipato eclesiastico e el Friuli nel 1077, che el ga scuminsià na so storia autonoma soto l'autorità dei Patriarchi de Aquileja.

I ligami fra la Marca Veronese e l'Inpero i xera rinforzà da la presenza nel teritorio de diverse dinastie feudali de origine germanica: tra le pi famose, destinà a zugar un ruolo inportante nei secoli sucessivi, ghe xe i Estensi, i da Romano, i Caminesi, i Cararesi.

Dal XII al XIV Secoło - Comuni, Signorie e ascesa del Dogado de Venesia[canbia | canbia sorxente]

Tacando dai primi decenni dopo l'ano Mile, sa vedesto in tuto el Veneto na forte cresita economica e na ripresa de la vita social ne le sità prinsipai, che le ga scuminsià a esersitar un controlo egemonico sul so contado. Ne la Marca Veronese (che a partir dal 1200 la scuminsiava a vegner ciamà col nome de Marca Trevisana), xe vegnù su via via i comuni lìbari de Verona (1136), Padoa (1138), Treviso e Vicensa.

Dentro de sta federazion de sentri urbani e teritori lagunari, da Grado a Loreo, che'l xera el Dogado, se ga afermà la sità de Venexia, inponente organismo urbano che s'à svilupà intorno al polo mercantile de Rialto e sentro di na entità politica gelosa asè de la propria autonomia. A partir da l'XI secolo, Venexia la se ga inposto come potenza egemone in tuto quanto el Mediteraneo, tacando na espansion colonial che la rivà al so culmine durante la Quarta Crociata, con la creazion nel 1205 de l'Inpero latin d'Oriente, e el dominio su la quarta parte e meza de l'inpero de Romania, cioè del vecio inpero bizantin. El Stato da Mar el rivava a includar, oltre ai teritori de l'Istria e de la Dalmazia, le isole Ionie, Creta, Cipro, e tuta quanta na serie de basi e piazeforti nel Peloponeso, ne l'Egeo e in Asia Minore.

Però anca se el mare l'era la fonte primaria de la so richeza, Venexia no la ga mai perdesto l'interesse par quel che sucedea ne l'entrotera: la ga mantegnesto forti ligami in particolare nel Trevisan e nel Padoan, la ga apogià la Liga Veronese e la ga aderìo a la Liga Lonbarda. Dopo la xe riussìa a verghe un ruolo prestigioso de mediatrice (e insieme de terza forza) fra el papa Alessandro III e l'inperador Federico Barbarossa, con la riconciliazion tra i du selebrà in San Marco nel 1177 (Pace de Venexia).

I teritori controlà dai Scaligeri de Verona nel 1336

Nel Doxento in tuta ła Teraferma i lìbari Comuni i xe deentà dełe Signorie in lota tra de lore par l'egemonia regional. Ła prima signoria ła xe stà queła de Ezelin da Roman, che l'è stà bon de conquistar gran parte del Veneto sentro-setentrional. Trevixo l'è ndà in man ai Da Camin, a Verona nel 1262 è ndà su i Scaligeri, a Padoa i Carraresi. Se pol dir che ła prima "unificasion" del Veneto ła xe stà tentà proprio dai Scaligeri, che con Cangrande i xe riusìi nel periodo 1311-1329 a ciapar Vicensa, Feltre, Bełun, Padoa, Trevixo e dopo, soto Mastino II, anca Parma, Lucca e Massa. Però nel 1339 i xe stà sconfiti da na lega formà da Venesia, Firenze e Milan e i gà perso quaxi tuto.

El XV secoło: łe Dedision a San Marco e ła riconpoxision de l'unità veneta[canbia | canbia sorxente]

Anca se Venexia la gavea nel mar el sentro dei so intaressi economici, la ga senpre mantegnesto vivi i ligami col proprio entrotera, esercitando na forte atrazion su le turbolente sità de la Marca Trevigiana. Zà nel 1291 Mota de Livenza la xe passà a la Republica, primo teritorio de Teraferma a darse liberamente e spontaneamente al goerno de Venexia, goadagnandose el titolo de fiola primogenita de la Repubblica. Xe sta però a partir dal XIV secolo che la Serenissima la ga tacà a intervegner in maniera senpre pi decisa ne la politica regional, soratuto par inpedir che el potente Stato dei Cararesi el metesse in pericolo le vie di comunicazion terestri e fluviali.

Nel 1339 xe sta Treviso col so teritorio, fin a chel momento dominà dai Scaligeri, a darse spontaneamente a Venesia, costituendo il so primo ànpio caposaldo in Teraferma. El potere e l'influenza senpre pi granda de la Republica i ga susità le gelosie dei so vizini, che nel 1379 i ga costituìo na formidabile coalizion che riunea i Cararesi, el Duca d'Austria, el Re de l'Ongaria, el Patriarcato de Aquileja e Genova, scatenando contro Venexia quella che sarìa passà a la storia come la Guera de Ciosa e conclusa nel 1381 con la vitoria sul mar contro Genova e la perdita de Treviso par parte de tera. Durante la guera, la Republica marciana la ga ris-cià seriamente de èsar travolta e la ga capìo la necessità de entrare risolutamente ne le contese politico-militari de la penisola taliana, tanto pi che sta deentando pericolosa la minaccia del Stato visconteo, che'l savea inpadronìo, fra el 1387 e el 1390 de na gran parte del Veneto.

In seguito xe sta de novo Francesco Novello da Carrara a minacciar l'acerchiamento: Venexia la ga reagìo in maniera decisa e dopo ver riciapà Treviso nel 1388, la ga batùò definitivamente i Cararesi nel 1405 espugnando Padoa. Intanto s'avea dato a Venexia in rapida sucession praticamente tute le tere de la Marca Trevisana: el 28 aprile 1404, el Senato Veneto l'accetta con do soli voti de majoranza la dedizion de Vicensa; pochi zorni dopo xe la olta de Cologna, de Belun, de Basan, de Feltre, quindi i Sete Comuni de l'Altopian de Asiago, e par ultima Verona el 22 giugno 1405. L'unità del Veneto l'era praticamente riconposta. Par ste tere, oltre a la fine dei confliti e a l'instaurazion de un governo stabile e rispetà, le dedizion a la Serenissima la ga significà, de solito, la concession de particolari statuti de autonomia che i garantea che vegnesse mantegnùi gran parte dei istituti e de le leggi che ghera prima: el Stato da Tera el nasea de fato come un Stato federal ante litteram.

Nei decenni sucessivi el Stato veneto el ga espanso ben al de là dei confini de la region de desso, includendo oltre al Cadore (1420), el Friul (1420), la Lonbardia oriental (1428), con Bresia, Bergamo e Crema e infine el Polesine (1482).

Storia Moderna[canbia | canbia sorxente]

El XVI secoło: ła Pax Veneta[canbia | canbia sorxente]

La Republica Veneta nel 1796

In teła seconda metà del '400 e al scominsio del '500, Venesia ła gà continuà ła so połitica espansionistica, portando el Leon de San Marco in Romagna, Trentin meridional, a Gorizia, Trieste e parfin in Puglia. Poco prima de ła guera del 1509, ła Republica Veneta, tra Stato da Mar e Stato da Tera, ła forma un inpero plurietnico abità da veneti, lonbardi, furlani, istriani, romagnołi, dàlmati, croati, albanexi, pugliexi, greci e ciprioti, e el xe de fato uno dei Stati piasè potenti d'Europa.

Tanta grandeza no ła podea non susitar łe invidie dei tanti vizini: nel 1508, dopo che i Veneti i gà vinto l'inperador de l'Austria tołéndoghe Trieste e Gorizia, se gà formà, par inisiativa del papa Giulio II, a cui Venesia ła gavea tolto łe çità de ła Romagna, na anplia ałeansa anti-venesiana, conosù come Liga de Cambrai, che ła gà dichiarà guera a ła Republica. I Venesiani i reagise coragioxamente, mobiłitando l'exercito soto el comando del valoroxo Bartolomeo d'Alviano, ma el 14 de majo 1509 i vien batù ad Agnadello nel cremasco dai Fransexi de Luigi XII. In póchi giòrni gran parte del Stato da Tera el vien ocupà, e soło Trevixo e el Friul i rexiste, restando fedełi a ła Serenisima. Nonostante ła situasion ła fuse desperà, i Venesiani però no i se perde d'animo, e specialmente el popoło el dimostra un grando atacamento par ła Republica. Póco dopo ła coałision ła se sfalda, anca grasie a l'abiłità diplomàtega dei Venesiani, e dopo ła vitoria de Marignano ła Serenisima ła riconquista quaxi tuta ła teraferma (tra łe tere perdùe ghe xe l'Anpezan, che'l restarà soto l'Austria fin al 1918).

Finìo el tenpo de łe guere, dal 1530 se verze par tuto el Veneto un longo periodo de pase e de svilupo, che continuarà, sensa interusion significative, par quaxi tri secołi, fin al 1797.

Storia Contenporanea[canbia | canbia sorxente]

L'invaxion de Napoleon e el dominio austriaco[canbia | canbia sorxente]

Le tere venete soto el dominio austriaco nel 1803
El Regno d'Italia soto Napoleon (1805-1815)

Nel 1796-97 ła Serenisima Republica ła xe stà invaxa da Napoleon Bonaparte, che dopo na serie de sachegi e de scontri sanguinoxi (come łe Pasque Veronexi), el ghe l'à data a l'Austria in canbio del Belgio. L'Austria la ga spartìo la Republica in tanti tochi, ognuno 'ministrà come na senplice provincia de l'inpero austriaco, senza funzioni de Stato. El governo austriaco el xe stà in generałe benevoło, con un'aministrasion pitosto eficiente e onesta, el gà çercà de darghe un çerto benèsere ai so sùditi, ma no l'era però mìa tanto liberałe. Nel 1805 el Veneto el xe pasà soto la Francia, par dopo ritornar soto l'Austria dopo la sconfita definitia de Napoleon nel 1815. Ła zona che corisponde più o meno a l'atuałe Region Veneto, più łe province de Udine e de Pordenon, ła restarà soto ła dominasion de l'Inpero Austriaco par altri 50 anni, come parte del Regno Lonbardo-Veneto.

Le province austriache del Lonbardo-Veneto

Durante sto periodo el Veneto el gà partecipà ai moti risorgimentałi col'eroica ribelion e rexistensa de Venesia del 1848-1849.

El Plebiscito del 1866[canbia | canbia sorxente]

Exquisite-kfind.png Par saverghene de pì, varda ła pajina Terza Guera de Indipendensa.
La situazion a la vizilia de la Tersa Guera de Indipendensa

Dopo deła guera Austro-Prussiana del 1866 (bataja de Sadowa) l'Austria sconfita ła gà dovù darghe el Veneto a Napoleon III de Francia. El tratato de pace de Viena firmà el 3 de otobre 1866 el dixéa testualmente che ła cesion del Veneto (con Mantoa e Udine) al Regno d'Italia (che el beneficiava deła vitoria prusiana anca se l'era stà batùo da l'Austria sia par tera a Custoza che par mar a Lissa) ła dovese avegner soto riserva del consenso dełe popołasion debitamente consultàe.

Napoleon III] el ga provedesto a pareciar un plebisito, rispetando le decisioni del tratado de pase, ma i Savoja i ga fato presion su de lu parché el ghe lasése ai taliani le forteze e el controlo militar de la region senza spetar i risultadi de la votazion. El conte di Gramont, a cui ghera stà dato in carico la 'ministrazion provisoria del teritorio (che el conprendea el Veneto, Mantoa e el Friul), el gà zercà de rispetar l'inpegno. A la fine però i Savoja i ga insistìo tanto che Napoleon III el gà decidesto de lasar perdar, e el gà ordinà al conte de Gramont de ritirarse e de consegnar le forteze e lasar che i taliani i ocupese el teritorio. Cussita el plebisito el xe stà organizà dai Savoja, che i ga fato in maniera da no dover contratar gnente coi Veneti, che secondo alcuni i ga perdesto cussita l'ultima s-cianta de autonomia e de libertà che 'ncora i gavea.

L'accesso a le operazion de voto, come par altri plebisiti de l'epoca (come quel fato par l'anession de Nizza a la Francia), e par ogni altra consultazion eletorale de l'epoca, l'era esluso a le done e limità par censo: per cui el ga interessà solo na parte minoritaria de la popolazion (manco de 650 000 votanti su un totale de 2.603.009 residenti).

El risultato final (646.789 sì; 69 no; 567 voti nulli), el rispechia, secondo alcuni studi storici, l'asołuta mancansa de segreteza nel voto e de trasparensa in tełe operasion de scrutinio. In sta maniera, ła sostansiałe sconfita miłitar del Regno d'Italia in teła Terza guera de indipendensa itałiana del 1866 l'è stà fata deventar un suceso połitico par i Savoia.

L'anesion a l'Itałia[canbia | canbia sorxente]

El dominio dei Savoia no'l gà portà tanti vantagi soto l'aspeto economico: łe tase łe jera piesè alte de quełe austriache, i servizi inferiori, e ła burocrasia manco vałida rispeto a ła proverbial eficensa burocratica austriaca. A ła perdita dei marcà de l'Europa çentral xe seguìo un periodo de crixi economica. Dopo l'anesion al Regno d'Itałia e fin a ła Prima guera mondial ghe xe na intensa emigrasion dal Veneto, in particołare verso Argentina, Uruguay e Braxil. 'Ntel periodo 1884-1886 scopia na grosa rivolta contadina, conosùa con nome de "Ła Boje".

Durante la I guera mondial na parte del teritorio ła xe stà invaxa e ła gà subìo gravi dani.

El fenomeno de l'emigrazion l'è ripreso nel primo dopoguera, direto soratuto verso i stessi Paesi de la Merica Latina che i gavea risevùo le presedenti ondate migratorie provenienti dal Veneto. Staolta la xe sta comunque na emigrazion organizà na s-cianta mejo.

La Seconda Guera Mondial la ga portà nove distruzion, specialmente par via dei bonbardamenti aerei (particolarmente feroce xe sta quelo che ga colpìo e butà zo bona parte de Treviso).

Finìa la guera, xe riscuminsià l'emigrazion, che la ga interessà, oltre a Argentina, Uruguay e Brasil, anca Venesueła, Colombia, Stati Uniti, Canada e Australia. Flussi migratori a breve termine i se ga vu verso el Belgio, la Francia e la Germania.

Na riserca del CSER (Centro Studi Emigrazione - Roma) la stima in zirca 3 300 000 le persone emigrà nei anni dal 1876 al 1976 dal Veneto, de fato la region italiana con piasè emigrati in sto periodo (seconda xe la Canpania, con 2 500 000). Se calcola che ghe sia nel mondo zirca 9 milioni de oriundi veneti.

A scominsiar dai ani otanta del XX secoło, l'emigrasion ła sà esaurìo e, da de lora, el Veneto el xe devegnesto tera d'imigrasion. Na parte picenina dei novi rivè i xe in realtà çitadini itałiani, emigrà durante i ani duri, che i torna ai so paexi; a olte i parla na version de ła lengoa veneta piesè "arcaica" de queła che se parla deso nel Veneto. In te łe ultime elesion i çitadini italiani che sta a l'estero i gà podù votar.

Note[canbia | canbia sorxente]

  1. Secondo n'altra tradizion, el martirio del vescovo Ermagora el xe avegnù inveze durante le persecuzion invià da Diocleziano. Nel stesso periodo xe sta condanà a morte a Padoa Santa Giustina.
  2. Da Cassiodoro, funsionario romano al servisio del re goto Teodorico, a savemo che nte łe Venetiae a susisteva 'na clase de propretari agricołi e che el sovrano el se ga preocupà de restaurare łe Terme Euganee, de far pì beła e fortificare Verona e de mantegnere eficiente ła rede de comunicasion viaria e fluviałe. Da ł'epistołario de Cassiodoro a vegnemo a saver inoltre che zà en epoca gota 488-553 d.C., 'na sparsa popolasion ła stava stabilmente nte ło spazio anfibio dełe łagune venete, tirando fora ła so sopravivenza dała pesca e dało sfrutamento dełe sałine.

Colegamenti foresti[canbia | canbia sorxente]